छत्तीसगढ़ आज स्थापना दिवस के पचीस बछर पूरा होय म रजत महोत्सव मनावत हे। ए बेरा म प्रधानमंत्री नरेंद्र मोदी ह छत्तीसगढ़ के पच्चीसवां स्थापना दिवस, रजत महोत्सव के मउका म राज्य के लोगन ल सुभकामना दीन हे।
प्रधानमंत्री ह किहीन कि प्रकृति अउ संस्कृति बर समर्पित छत्तीसगढ़ आज प्रगति के नवा मानदंड स्थापित करत हे। बिसेस रूप ले ओमन किहीन कि जउन क्षेत्र कभू नक्सलवाद ले प्रभावित रिहीस ओ अब विकास के दउड़ म आगू बढ़त हे। प्रधानमंत्री ह भरोसा जतइन कि छत्तीसगढ़ के मेहनती लोगन अपन लगन अउ मेहनत ले विकसित भारत के वीजन ल साकार करे म महत्ता के भूमिका निभाही। उहें, छत्तीसगढ़ राज्य स्थापना के पच्चीस बछर पूरा होय म आज मुख्यमंत्री विष्णुदेव साय ह राजधानी रईपुर के कलेक्ट्रेट परिसर म छत्तीसगढ़ महतारी के प्रतिमा म फूलमाला चढ़ाके के नमन करीन। ए मउका म मुख्यमंत्री ह किहीन कि छत्तीसगढ़ महतारी हमर आस्था अउ गरब के प्रतीक हवय। ओमन प्रदेसवासी मन ल राज्योत्सव के सुभकामना देत किहीन कि राज्य सरकार प्रदेस के समग्र विकास खातिर प्रतिबध्द हवय। राज्य सरकार आम लोगन के जीवन स्तर म सुधार महिला सशक्तिकरण, कृषि विकास, युवा मन ल रोजगार, आदिवासी समाज के उन्नति अउ सांस्कृतिक संरक्षण खातिर कतकोन योजना चलाय जात हे।
प्रधानमंत्री छत्तीसगढ़
प्रधानमंत्री नरेंद्र मोदी ह किहीन हे कि ओ दिन दूरिहा नइ हे, जब छत्तीसगढ़ समेत देस के हर हिस्सा माओवादी आतंक ले मुक्त हो जही। आज छत्तीसगढ़ राज्य के गठन ल पचीस बछर पूरा होय म रईपुर म राखे गे छत्तीसगढ़ रजत महोत्सव म बोलत प्रधानमंत्री ह किहीन कि माओवादी आतंक के सेति बहुत समय तक छत्तीसगढ़ के आदिवासी क्षेत्र रद्दा, स्कूल जइसन मूलभूत जरूरत ले वंचित रिहीन। ओमन किहीन कि सरकार ह देस ल नक्सलवाद के समस्या ले मुक्त बनाय के संकलप लीन। एखरे सेति ग्यारा बछर पहिली जिंहा देस म एक सौ पचीस जिला माओवाद आतंक के चपेट म रिहीस, ओ अब सिरिफ तीन जिला म ही थोरबहुत परभाव बांचे हे। ओमन किहीन कि कुछेक महिना म बड़ संख्या म माओवादी आतंक ले जुड़े लोगन हथियार छोड़के समाज के मुख्यधारा म संघरीन हे अउ देस के संविधान ल मंजूर करीन हे।प्रधानमंत्री ह किहीन हे कि आज छत्तीसगढ़ बस्तर जइसन क्षेत्र म डर नइ भलूक उछाह हे।
ए मउका म प्रधानमंत्री ह चौदह हजार करोड़ रूपिया ले जादा के विकास परियोजना के उद्घाटन अउ सिलान्यास करीन। ए परियोजना मुख्य रूप ले रद्दा, उद्योग, स्वास्थ्य सेवा अउ ऊर्जा जइसन क्षेत्र ले जुड़े हे। छत्तीसगढ़ के आने-आने क्षेत्र म प्रधानमंत्री आवास योजना म करीबन साढ़े तीन लाख परिवार पक्का घर म रहे लगिन।
छत्तीसगढ़ दउरा के बेरा प्रधानमंत्री ह नवा रईपुर म राज्य के नवा विधानसभा भवन के लोकार्पण करीन। ए बेरा म प्रधानमंत्री ह भारत रत्न पूर्व प्रधानमंत्री अटल बिहारी वाजपेयी के प्रतिमा के अनावरण करीन। समारोह म बोलत प्रधानमंत्री ह किहीन कि आज पूरा देस विरासत अउ विकास ल संग ले चलत हे। ए भावना केंद्र सरकार के हरेक फइसला अउ नीति म दिखथे। ओमन किहीन कि भारत के ए सोच छत्तीसगढ़ विधानसभा के नवा भवन म दिखाई देथे। ए भवन राज्य के समृध्द संस्कृति के प्रतिबिम्ब हवय। ओमन किहीन कि राज्य विधानसभा के ए नवा भवन लोकतंत्र के स्तंभ हे अउ इंहा ले गे फइसला आने वाले कतकोन दसक तक छत्तीसगढ़ के भाग्य ल दिसा दिही।
एखर पहिली, प्रधानमंत्री ह नवा रईपुर म शहीद वीर नारायण सिंह स्मारक अउ जनजातीय स्वतंत्रता संग्राम सेनानी संग्रहालय के उद्घाटन करीन। ए संग्रहालय आदिवासी वीर नायक मन ल समर्पित हे, जउन अंग्रेजी हुकूमत के विरूध्द अपन प्राण के आहूति दे रिहीन। ए संग्रहालय म छत्तीसगढ़ के जनजातीय सामुदाय के साहस, बलिदान अउ देसभक्ति के विरासत ल सुरक्षित करे गेहे। ए देस के पहिली डिजीटल संग्रहालय हवय, जेमा आधुनिक वीएफएक्स टेक्नालॉजी प्रोजेक्सन सिस्टम, डिजीटल स्क्रीन अउ मोबाइल म क्यूआर कोड स्कैन करे के सुविधा उपलब्ध हे। एखर ले इंहा अवइया मनखे हर कथा ल डिजीटल माध्यम ले अनुभव कर सकही। संग्रहालय म छत्तीसगढ़ के प्रमुख आदिवासी आंदोलन के जीवंत झलक दिखाय जाही।
उहें, प्रधानमंत्री ह नवा रईपुर के श्री सत्यसांई संजीवनी अस्पताल पहुंच के दिल की बात कारीकरम म करीबन ढाई हजार लइका मन संग गोठबात करीन। जनम ले ही हृदय रोग ले पीड़ित ए लइका मनके अस्पताल म मुफत म इलाज करे गेहे। ए बेरा म प्रधानमंत्री ह लइका मन ल जीवन के उपहार प्रमाण पत्र सौंपिन।
अपन छत्तीसगढ़ दउरा के बेरा प्रधानमंत्री ह नवा रईपुर म ब्रम्हकुमारी के सांति शिखर के घलो उद्घाटन करीन। ए आध्यात्मिक शिक्षा, सांति अउ धियान के आधुनिक केंद्र हे। ए मउका म प्रधानमंत्री ह किहीन कि राज्य के विकास ले देस के विकास होथे। इही मंत्र म चलत ओमन भारत ल विकसित बनाय के अभियान म जुटे हे। ओमन किहीन कि ए अभियान म ब्रम्हकुमारी जइसन संस्था के बड़ भूमिका हे। श्री मोदी ह किहीन कि ए संस्था म शब्द कम अउ सेवा जादा हे। अेमन किहीन कि अवइया बेरा म ए विश्व सांति के सार्थक परयास के प्रमुख केंद्र बनही।
शौर्य पदक-सम्मान
छत्तीसगढ़ पुलिस मुख्यालय ह शौर्य पदक सम्मान के घोसना कर देहे। छत्तीसगढ़ राज्य स्थापना दिवस के मउका म सुकमा म अतिरिक्त पुलिस अधीक्षक के पद म पदस्थ रेहे शहीद आकाशराव गिरपुंजे समेत चौदह झिन पुलिस करमचारी मन ल ए सम्मान दे जाही। एखर संगेसंग बीजापुर के निरीक्षक धरम सिंह तुलावी, सहायक उप निरीक्षक गोपाल बोड्डू, नारायणपुर के शहीद प्रधान आरक्षक बिरेन्द्र कुमार सोरी समेत दस झिन आरक्षक मन ल ए सम्मान बर चुने गेहे। अलंकरण समारोह पांच नवंबर के राखे जाही।
छत्तीसगढ-आकाशवाणी समाचार
छत्तीसगढ़ म आकाशवाणी समाचार के प्रादेशिक बुलेटिन के प्रसारण के पचीस बछर पूरा होगे। ए मउका म मुख्यमंत्री विष्णुदेव साय ह सुभकामना दीन हे। ओमन किहीन हे कि जउन दिन छत्तीसगढ़ राज्य के स्थापना होय रिहीस, उही दिन आकाशवाणी समाचार के प्रादेशिक बुलेटिन के सुरूआत ह छत्तीसगढ़ के जनभाषा अउ संवाद परंपरा ल नवा दिसा देवइया अध्याय जोड़िन। श्री साय ह किहीन कि आकाशवाणी समाचार ह ए पचीस बछर म छत्तीसगढ़ के विकास यात्रा के हर पड़ाव ल अपन आवाज देहे। हिंदी ले सुरू होय ए बुलेटिन आज चार भाषा अउ बोली हिंदी, छत्तीसगढ़ी, हल्बी अउ गोण्डी म समाचार अउ समसामयिक कारीकरम प्रसारित करत हे। ओमन किहीन कि आकाशवाणी समाचार बहुजन हिताय, बहुजन सुखाय के अपन ध्येय वाक्य ल समोखत लोगन ल जागरूक करे म महत्ता के भूमिका निभात हे। मुख्यमंत्री ह किहीन छत्तीसगढ़ कि विकास, सुशासन अउ लोककल्याण के नीति ल जनजन तक पहुंचाय म आकाशवाणी समाचार के योगदान सराहनीय हवय।
देवउठनी-एकादशी
देवउठनी एकादसी के परब आज राजधानी रईपुर समेत प्रदेसभर म भक्ति अउ उछाह के संग मनाय जात हे। प्रदेस म एला जेठउनी अउ छोटे दीपावली के रूप म जाने जाथे। ए मउका म घर म तुलसी अउ भगवान सालिग्राम के बिहाव करे जात हे। मुख्यमंत्री विष्णुदेव साय ह प्रदेसवासी मन ल देवउठनी एकादसी अउ तुलसी बिहाव के बधई अउ सुभकामना दीन हे।
जिले की चिट्ठी
प्रादेशिक समाचार एकांश, आकाशवाणी रईपुर कोति ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के सबो केंद्र रिले करही। ए बखत के अंक म गौरेला-पेण्ड्रा-मरवाही जिला के गतिविधि के संबंध म जानकारी दे जाही।