आधिकारिक जानकारी के अनुसार प्रधानमंत्री बिहनिया करीबन दस बजे बिसेस विमान ले रईपुर स्थित स्वामी विवेकानंद विमानतल पहुंचही। एखर बाद ओमन ‘दिल की बात‘ कारीकरम के तहत नवा रईपुर स्थित श्री सत्यसांई संजीवनी अस्पताल म ‘जीवन का उपहार‘‘ समारोह म हृदय रोग के सफलता पूर्वक उपचार करा चुके करीबन दू हजार पांच सौ लइका मनले गोठबात करही। प्रधानमंत्री एखर बाद ब्रम्हाकुमारी के ‘‘शांति शिखर‘‘ के उद्घाटन करही, जउन आध्यात्मिक शिक्षा, सांति अउ धियान के एक आधुनिक केंद्र हरय।
उहें, प्रधानमंत्री करीबन पौने बारह बजे नवा रईपुर स्थित छत्तीसगढ़ विधानसभा के नवा भवन म भारत रत्न पूर्व प्रधानमंत्री अटल बिहारी वाजपेयी के प्रतिमा के अनावरण करही। एखर बाद श्री मोदी छत्तीसगढ़ विधानसभा के नवा भवन के उद्घाटन करही। ए मउका म प्रधानमंत्री जन समूह ल घलो संबोधित करही।
प्रधानमंत्री मंझनिया लगभग डेढ़ बजे शहीद वीर नारायण सिंह स्मारक अउ जनजातीय स्वतंत्रता सेनानी संग्रहालय के उद्घाटन करे के बाद ओखर अवलोकन घलो करही।
प्रधानमंत्री-छत्तीसगढ़-02
प्रधानमंत्री मंझनिया ढाई बजे छत्तीसगढ़ राज्य के गठन के पच्चीस साल पूरा होय के उपलक्ष्य म आयोजित छत्तीसगढ़ रजत महोत्सव म हिस्सा लिही। ए मउका म श्री मोदी सड़क, उद्योग, स्वास्थ्य सेवा अउ ऊर्जा जइसे परमुख सेक्टर ले जुड़े चौदह हजार दू सौ साठ करोड़ रूपिया ले जादा के परियोजना मनके उद्घाटन अउ सिलान्यास करही।
उहें, प्रधानमंत्री श्री मोदी ग्रामीण आजीविका ल सुदृढ़ करे बर छत्तीसगढ़ के नौ ठन जिला म बारह नवा स्टार्टअप ग्राम उद्यमिता कारीकरम ब्लाक मनके उद्घाटन करही। प्रधानमंत्री तीन लाख इंक्यावन हजार पूरा हो चुके घर के गृह प्रवेस म घलो सामिल होही अउ प्रधानमंत्री आवास योजना ग्रामीण के अंतर्गत तीन लाख लाभार्थी मन ल बारह सौ करोड़ रूपिया के रासि जारी करही।
प्रधानमंत्री-छत्तीसगढ़-03
समारोह म प्रधानमंत्री रईपुर म एचपीसीएल के अत्याधुनिक पेट्रोलियम तेल डिपो के उद्घाटन करही। संघरा एक हजार नौ सौ पचास करोड़ रूपिया के लागत ले बने चार सौ नवासी किलोमीटर लंबा नागपुर-झारसुगड़ा प्राकृतिक गैस पाइपलाइन के लोकार्पण करही।
ए दउरान प्रधानमंत्री औद्योगिक विकास अउ रोजगार ल बढ़ावा देबर दू ठिन स्मार्ट औद्योगिक क्षेत्र जांजगीर-चांपा जिला के सिलादेही-गतवा-बिर्रा म अउ राजनांदगांव जिला के बिजलेटला के आधारसिला रखही। एखर अलाव प्रधानमंत्री नवा रईपुर के सेक्टर बाईस म एक फार्मास्युटिकल पार्क के आधारसिला रखही। ए पार्क औषधि अउ स्वास्थ्य सेवा विनिर्माण बर एक समर्पित क्षेत्र के रूप म काम करही।
प्रधानमंत्री पांच ठिन नवा सरकारी मेडिकल कालेज मनेन्द्रगढ़, कबीरधाम, जांजगीर-चांपा अउ गीदम दंतेवाड़ा म अउ बिलासपुर म सरकारी आयुर्वेद कालेज अउ अस्पताल के आधारसिला घलो रखही।
काली छत्तीसगढ़ राज्य के स्थापना दिवस हरय। ए साल राज्य निर्माण के पच्चीस साल पूरा होय के मउका म रजत महोत्सव मनाय जात हे। ए दउरान एक ले पांच नवंबर तक आयोजित होवइया रजत महोत्सव म कलाकार कोति ले सांस्कृतिक कारीकरम के प्रस्तुति दे जाही।
राज्योत्सव म ए दारी प्रदेस के कलाकार मन संग देस के जानेमाने कलाकार हंसराज रघुवंशी, आदित्य नारायण, अंकित तिवारी, कैलाश खेर अउ भूमि त्रिवेदी अपन प्रस्तुति दिही।
प्रधानमंत्री-राष्ट्रीय एकता दिवस
देस के पहिली उपप्रधानमंत्री अउ गृह मंत्री सरदार वल्लभ भाई पटेल के आज एक सौ पचासवां जयंती के मउका म छत्तीसगढ़ समेत देसभर म राष्ट्रीय एकता दिवस मनाय जात हे। ए मउका म प्रधानमंत्री नरेंद्र मोदी ह अहमदाबाद के एकता नगर म राखे गे राष्ट्रीय एकता दिवस समारोह ल संबोधित करत लोगन मन ले एकजुट होके राष्ट्र के प्रगति बर खुद ल समर्पित करे के अपील करीन। श्री मोदी ह किहीन कि एखर ले विकसित भारत के सपना साकार होही।
राष्ट्रीय एकता दिवस-छत्तीसगढ़
ए मउका म मुख्यमंत्री ह स्वतंत्रता सेनानी मनके परिजन मन ल सम्मानित करीन अउ महाविद्यालयीन छात्र-छात्रा मन बर आयोजित रंगोली, चित्रकला, भाषण अउ काव्यपाठ प्रतियोगिता के बिजेता मन ल पुरस्कार प्रदान करीन। ओमन ‘रन फॉर यूनिटी‘ के प्रतिभागी मन ल हरा झंडा दिखाके रवाना करीन। संघरा बस्तर ओलंपिक के प्रचार रथ ल घलो हरा झंडा दिखाइन। कारीकरम म मौजूद लोगन मन ल स्वदेसी अपनाय के सपथ दिलाय गीस।
एखर पहिली, श्री साय ह स्कूली लइका, जनप्रतिनिधि अउ आमजन मन संग शास्त्री चौक ले शारदा चौक तक आयोजित एकता दउड़ म सामिल होके एक भारत-श्रेष्ठ भारत के संदेस दीन।
ओेति, राष्ट्रीय एकता दिवस के मउका म भिलाई इस्पात संयंत्र म एकता पैदल मार्च के आयोजन करे गीस। भिलाई इस्पात सयंत्र के प्रभारी निदेसक चितरंजन महापात्र ह वरिष्ठ अधिकारी मन ल राष्ट्रीय एकता दिवस के सपथ दिलाइन अउ पांच किलोमीटर लंबा एकता पैदल मार्च ल हरा झंडा दिखाके रवाना करीन।
उहें, नारायणपुर जिला म घलो एकता दउड़ के आयोजन करे गीस। ए मउका म आत्मसमर्पित माओवादी एकता दउड़ म सामिल होइन अउ सुरक्षा बल के जवान अउ स्कूली छात्र-छात्रा मन संग दउड़ लगइन।
प्रदेस के जम्मो जिला मुख्यालय मन म राष्ट्रीय एकता दिवस म ‘रन फॉर यूनिटी‘ के आयोजन करे गीस।
केंद्रीय गृहमंत्री-दक्षता पदक
केंद्रीय गृह मंत्रालय ह साल दू हजार पच्चीस बर ‘‘केंद्रीय गृहमंत्री दक्षता पदक‘‘ के घोसना करे हे। ए साल आने-आने राज्य, केंद्रशासित प्रदेस, केंद्रीय सशस्त्र अर्धसैनिक बल अउ केंद्रीय पुलिस संगठन के एक हजार चार सौ छैंसठ कर्मी मन ल सम्मानित करे जाही। एमा छत्तीसगढ़ के दू सौ बाईस पुलिस अधिकारी कर्मचारी सामिल हे। उहें, इंवेस्टिगेशन केटेगिरी म छत्तीसगढ़ के तीन अधिकारी मन ल घलो सम्मानित करे जाही।
बतादन कि ए पदक के घोसना हर साल इकतीस अक्टूबर के सरदार वल्लभ भाई पटेल के जयंती के मउका म करे जात हे।
बातों बातों-में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों-में‘‘ म ए दारी मतदाता सूची के गहन पुनरीक्षण-एसआईआर उपर केंद्रित रिही। एखर तहत राज्य के मुख्य निर्वाचन पदाधिकारी यशवंत कुमार ले लेगे भेंटवार्ता के प्रसारण करे जाही। ए कारीकरम के प्रसारण काली एक नवंबर के एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करही।
शराब घोटाला-सुप्रीम कोर्ट
शराब घोटाला मामला म पूर्व मुख्यमंत्री भूपेश बघेल के बेटा चैतन्य बघेल ह ईडी कोति ले अपन गिरफ्तारी ल सुप्रीम कोर्ट म चुनौती देहे। एमा कोर्ट ह प्रवर्तन निदेशालय-ईडी ले जवाब मांगे हे। मिले जानकारी के अनुसार चैतन्य बघेल ह फंडामेंटल राइट्स के उलंघन बर प्रिवेंशन ऑफ मनी लॉड्रिंग एक्ट-पीएमएलए के मुख्य प्रोविजन्स ल चुनौती देवत एक अलग पिटीशन घलो दायर करे हे। ए प्रकरण म जस्टिस सूर्यकांत अउ जॉयमाला बागची के बेंच ह सुनवाई करीन।