उपमुख्यमंत्री अरूण साव ह आज नवा रईपुर म वन मंत्री केदार कश्यप अउ वित्त मंत्री ओ.पी. चौधरी के संग राज्योत्सव अउ प्रधानमंत्री नरेन्द्र मोदी के छत्तीसगढ़ प्रवास के तियारी ल लेके समीक्षा करीन। ओमन राज्योत्सव के तियारी म लगे अधिकारी मन ल आयोजन म कोनो प्रकार के कोताही नइ बरते अउ बेरा के पहिली जम्मों तैयारी पूरा करे बर केहे हे। श्री साव ह छत्तीसगढ़ के स्थापना के रजत जयंती वर्ष म राज्योत्सव के मउका म प्रधानमंत्री के आगमन ल यादगार बनाय म जोरदरहा तियारी करे के बात केहे हे।
इही बीच, संस्कृति मंत्री राजेश अग्रवाल ह नवा रायपुर स्थित राज्योत्सव आयोजन स्थल जाके तियारी के जायजा लीन। ओमन बतईन कि एक नवंबर के प्रधानमंत्री नरेन्द्र मोदी ह नवा रायपुर म पांच दिन तक चलइया राज्योत्सव के सुभारंभ करही। ए दउरान प्रधानमंत्री ह देस के पहिली आदिवासी डिजिटल संग्रहालय, नवा विधानसभा भवन अउ ब्रह्ाकुमारी ईश्वरी विश्वविद्यालय के ‘‘शांति शिखर‘‘ अकादमी के घलो उद्घाटन करही। अपन छत्तीसगढ़ प्रवास के दउरान प्रधानमंत्री ह सत्य सांई अस्पताल म दिल के इलाज ले ठीक होवइया लइका मन ले मिलही।
मुख्यमंत्री-मुलाकात
मुख्यमंत्री विष्णुदेव साय ले आज रईपुर स्थित निवास कार्यालय म पंजाब सरकार के राजस्व, पुनर्वास अउ आपदा प्रबंधन मंत्री हरदीप सिंह मुण्डियन अउ स्वास्थ्य मंत्री डॉक्टर बलबीर सिंह ह मुलाकात करीन। ए दउरान दूनों मंत्री मन ह मुख्यमंत्री ल नौवां सिक्ख गुरू, गुरू तेगबहादुर के तीन सौ पंचासवां सहीदी दिवस के मउका म होवइया विशेष कार्यक्रम म सामिल होय बर नेवता दीन।
श्रेष्ठ योजना-आवेदन
अनुसूचित जाति के हुसियार छात्र मन ल देस के बढ़िया प्राईवेट आवासीय विद्यालय मन म सिक्षा दे जाही। एखर बर छात्र मन ले केन्द्र सरकार के ‘‘श्रेष्ठ योजना‘‘ के तहत तीस अक्टूबर तक अरजी मंगाय गेहे। ए योजना म हरेक साल राष्ट्रीय परीक्षण एजेंसी-एनटीए डहार ले राष्ट्रीय प्रवेश परीक्षा होही। एखर माध्यम ले कक्षा नौवीं अउ ग्यारहवीं म प्रवेस बर तीन हजार छात्र मनके चयन करे जाथे। ए छात्र मन बारहवीं तक के सिक्षा पूरा करथे। स्कूल मनके आवंटन योग्यता अउ छात्र मनके प्राथमिकता के आधार म ऑनलाइन काउंसलिंग के माध्यम ले करे जाथे। ए योजना के तहत चुने गे छात्र मनके सिक्षा अउ छात्रावास के फीस के पूरा खरचा भारत सरकार कोति ले करे जाथे।
प्रदेस सरकार ह जम्मों जिला कलेक्टर मन ल अपन-अपन जिला मन म स्कूल, वेबसाइट अउ सोशल मीडिया के माध्यम ले ए योजना के जादा ले जादा प्रचार अउ प्रसार करे के निरदेस देहे।
वित्त मंत्री-निरीक्षण
वित्तमंत्री ओ.पी. चौधरी ह रायगढ़ जिला के गजमार पहाड़ स्थित जाने-माने हनुमान मंदिर परिसर म चलत कतकोन विकास काम के निरीक्षण करीन। ए दउरान ओमन चलत काम के समीक्षा करीन अउ अधिकारी मन ल जरूरी दिसा-निरदेस दीन। ओमन किहीन कि हनुमान मंदिर परिसर म होवत काम ले अवइया पर्यटक मन ल बढ़िया सुविधा मिलही अउ संगेसंग ए क्षेत्र ह धार्मिक पर्यटन के नवा केन्द्र के रूप म विकसित होही।
रोजगार मेला
रोजगार मेला के सत्रहवां चरण काली ले देशभर म चालीस जघा म आयोजित करे जाही। ए मउका म प्रधानमंत्री ह वीडियो कान्फेंसिंग के माध्यम ले देशभर के कतकोन जघा म चलत समारोह म डाक विभाग अउ आने सरकारी विभाग मन बर इंक्यावन हजार ले जादा उम्मीदवार मन ल नियुक्ति पत्र दीहीं।
जानबा के मुताबिक रोजगार मेला के माध्यम ले अब तक दस लाख ले जादा नियुक्ति पत्र जारी करे जा चुके हे।
केदारनाथ/यमुनोत्रीधाम-कपाट बंद
उत्तराखंड म विश्व प्रसिद्ध श्री केदारनाथ मंदिर अउ श्री यमुनोत्री धाम के कपाट शीतकाल बर आज ले बंद कर दे गेहे। केदारनाथ मंदिर के कपाट बिहनिया साढ़े आठ बजे अउ यमुनोत्री धाम के कपाट मंझनिया साढ़े बारह बजे बंद कर दे गीस।
भाईदूज
कार्तिक मास के शुक्ल पक्ष के द्वितीया तिथि मनाय जाय वाला ए परब ल यम द्वितीया के नाव ले घलो जाने जाथे। एक ठिन किवदंति हे कि यम देवता ह अपन बहिनी यमी ल लंबा अगोरा के बाद इही दिन दर्सन दे रिहीन। तभे ले ए प्रथा चले आत हे।
राज्यपाल रमेन डेका अउ मुख्यमंत्री विष्णुदेव साय ह भाईदूज के मउका म प्रदेस के लोगन मन ल सुभकामना दे हवय।
त ऐति, प्रदेस के कतकोन जिला म मातर के तिहार घलो मनाय गीस। ए मउका म कतकोन जघा म अखाड़ा के साधक मन ह आने-आने करतब देखावत हे। उहें, गांव-गतौरी म देवी-देवता के पूजापाठ करे जात हे। जानबा के मुताबिक आजे के दिन राउत समुदाय के लोगन मन ह मैदान म गाय के झुंड के बीच करतब देखाथे अउ संगेसंग पारंपरिक लोक नृत्य राउत नाचा के प्रदर्सन करथे।
बस्तर ओलंपिक-पंजीयन
बस्तर ओलंपिक म भाग ले बर एसो बस्तर संभाग के सात जिला ले तीन लाख इंक्यानवे हजार ले जादा खिलाड़ी मन ह पंजीयन कराय हे, जेमा एक लाख तिरसठ हजार ले जादा पुरूष अउ दू लाख सत्ताईस हजार ले जादा महिला खिलाड़ी सामिल हे। बस्तर ओलंपिक के तहत पच्चीस अक्टूबर ले विकासखंड स्तर, पांच नवंबर ले जिला स्तर अउ चौबीस नवंबर ले संभाग स्तर म प्रतियोगिता होही। बस्तर ओलंपिक म एथलेटिक्स, तीरंदाजी, फुटबॉल, बैडमिंटन, कबड्डी, खो-खो, वॉलीबॉल, कराते, वेटलिफ्टिंग अउ हॉकी जइसन खेल के आयोजन करे जाही। विजेता खिलाड़ी मन ल जिला अउ संभाग स्तर म नगद पुरस्कार, मेडल, ट्रॉफी, अउ शील्ड दे जाही। उहें, संभाग स्तर के विजेता खिलाड़ी मन ल ‘‘बस्तर यूथ आइकॉन‘‘ के रूप म प्रचारित करे जाही। ए ‘‘स्पोर्ट्स फॉर पीस‘‘ मॉडल बस्तर म नवा सामाजिक चेतना के चिन्हा बनही। एमा आधुनिक खेल मन ल बढ़ावा देके संगेसंग इहां के स्थानीय परंपरा ले जुड़े खिलाड़ी मन ल घलो मंच मिलही। बस्तर ओलंपिक बर वन भैंसा अउ पहाड़ी मैना ल शुभंकर बनाय गेहे।
निजी चिकित्सा संस्थान-कार्रवाई
बस्तर जिला प्रशासन के अधिकारी मन ह प्राईवेट चिकित्सा संस्थान के हुरहा निरीक्षण करीन। मुख्य चिकित्सा अउ स्वास्थ्य अधिकारी डॉक्टर संजय बसाक के अगुवई म निरीक्षण दल ह जगदलपुर सहर के कतकोन प्राईवेट अस्पताल अउ डायग्नोस्टिक लैब मन म छापा मारीन। ए दउरान कुम्हारपारा म चलाय जात एक ठिन अस्पताल ल सील करके ओखर उपर पचास हजार रूपिया के जुर्माना लगाय गीस। उहें, एक ठिन लैब डहार ले पहिली ले लगाय गे जुर्माना के भुगतान नइ करे उपर लैब ल घलो सील करे के कार्रवाई करे गीस। अइसने, लालबाग म चलत क्लीनिक उपर बीस हजार रूपिया जुर्माना लगाय गीस। मुख्य चिकित्सा अधिकारी ह किहीन कि आगू घलो अइसने कार्रवाई जारी रइही। जिला प्रशासन ह लोगन मन ले अपील करे हे कि इलाज बर सिरिफ पंजीकृत चिकित्सा संस्थान म ही इलाज बर जावय अउ कोनो प्रकार के गड़बड़ी के पता चले, त एखर सिकईत प्रशासन ल करय।
छठ पर्व-विशेष ट्रेन
रेलवे ह छठ परब के मउका म अवइया पांच दिन म पन्द्रह सौ विशेष रेलगाड़ी चलाही। ए रेलगाड़ी रोजे चलइया रेलगाड़ी मन ले अलग ले चलाय जाही। रेलवे ह एसो छठ के संगेसंग जम्मों तिहार म यात्री मनके सुविधा बर विशेष रेलागाड़ी सेवा चलावत हे। एक अक्टूबर ले तीस नवंबर तक इकसठ दिन के दउरान देसभर म बारह हजार ले जादा विशेष रेलागाड़ी चलाय जात हे।
उहें, दक्षिण पूर्व मध्य रेलवे के रायपुर मंडल डहार ले दीपावली अउ छठ परब म यात्री मनके सुविधा ल देखत भीड़ ल रोके बर कतकोन उपाय करे गेहे। मंडल के प्रमुख स्टेसन मन म रेलगाड़ी मन म उपरहा स्टाफ के तैनाती करे गेहे। त उहें, सार्वजनिक घोषणा प्रणाली अउ डिजिटल संकेतक के माध्यम ले यात्री मन ल रेलगाड़ी आय के बारे म सही जानबा दे जात हे। प्लेटफार्म, फूट ओवर ब्रिज अउ कोच मनके तीर म भीड़ ल हटाय बर कर्मचारी तैनात करे गेहे। संगेसंग यात्री मन ल चलत रेलगाड़ी म चढ़े-उतरे ले बांचे बर केहे जात हे। रईपुर, दुगरू, भाटापारा, भिलाई अउ पावर हाउस स्टेसन मन म यात्री मन बर होल्डिंग एरिया के प्रावधान घलो करे गेहे। एम-यूटीएस अउ रेल वन ऐप के माध्यम ले यात्री मन ह अब बिना लाइन म लगे अनारक्षित अउ प्लेटफॉर्म टिकट ले सकथे।