उच्च शिक्षा विभाग ह जशपुर अउ बस्तर जिला म नवीन शासकीय महाविद्यालय के स्थापना ल मंजूरी देहे। ए महाविद्यालय जशपुर के फरसाबहार, करडेगा अउ बस्तर के नगरनार, किलेपाल म खोले जाही। राज्य शासन ह ए चारों महाविद्यालय बर कुल एक सौ बत्तीस पद के मंजूरी के संगेसंग कक्षा सुरू करे के मंजूरी दे देहे। मंजूर करे पद म प्राचार्य, सहायक प्राध्यापक, ग्रंथपाल, क्रीधाधिकारी, सहायक ग्रेड-एक अउ प्रयोगशाला कर्मी आदि सामिल हे।
मुख्यमंत्री ह किहीन कि प्रदेस के युवा मन ल बने उच्च शिक्षा देवाना राज्य सरकार के प्राथमिकता हरय। उच्च शिक्षा के पहुंच हर क्षेत्र म होवय। एखर बर राज्य सरकार शिक्षा के ढांचा ल मजबूत बनावत हे। मुख्यमंत्री ह यहू किहीन कि शिक्षा प्रदेस के विकास बर आधारसिला हवय अउ सरकार युवा मन बर मउका संसाधन अउ बने शैक्षणिक वातावरण देवाय बर प्रतिबध्द हवय।
राष्ट्रपति-सम्मान
राष्ट्रपति द्रौपदी मुर्मु ह बालोद जिला ल स्क्रीन फेलिसिटेशन अवार्ड ले सम्मानित करे हे। ए अवॉर्ड जिला ल आदि कर्मयोगी अभियान म करे गे बने काम बर दे गीस। राष्ट्रपति ह पाछू सत्रह अक्टूबर के विज्ञान भवन नई दिल्ली म राखे गे समारोह म आदिम जाति कल्याण विभाग के प्रमुख सचिव सोनमणि बोरा ल स्क्रीन फेलिसिटेशन अवॉर्ड दे गीस।
मंत्रालय-बायोमैट्रिक
सामान्य प्रशासन विभाग ह मंत्रालय म काम करइया सबो अधिकारी अउ करमचारी मन बर आधार सक्षम बायोमैट्रिक उपस्थिति प्रणाली लागू करे के काम सुरू कर देहे। ए प्रणाली एक दिसंबर ले लागू हो जही। ए संबंध म सामान्य प्रशासन विभाग ह मंत्रायल के जम्मो विभाग के सचिव मन ल निरदेस जारी करत किहीन हे कि सबो अधिकारी अउ करमचारी सात नवंबर तक पोर्टल म अपन पंजीकरण के काम पूरा करय। विभाग कोति ले जारी आदेस के मुताबिक ए प्रणाली मंत्रालय म काम करइया सबो अधिकारी अउ करमचारी मनके उपस्थिति दर्ज कराय बर जरूरी रूप ले लागू करे जाही। पंजीकरण बर विभागीय पोर्टल अनुभाग म जरूरी जानकारी भरे बर पड़ही।
वायुसेना एरोबैटिक शो
राज्य स्थापना के रजत जयंती के मउका म नवा रईपुर म भारतीय वायुसेना कोति ले एरोबैटिक सो राखे जाही। ए मउका म वायुसेना के सूर्यकिरण टीम कोति ले ‘बॉम्ब बर्स्ट‘ ‘हार्ट-इन-द-स्काई‘ अउ एरोहेड जइसन प्रस्तुति दे जाही। राज्य शासन अउ भारतीय वायुसेना के साझा परयास ले आयोजन के तियारी अंतिम चरण म हवय। मुख्यमंत्री विष्णुदेव साय ह किहीन हे कि छत्तीसगढ़ के रजत जयंती के ऐतिहासिक मउका म एसो राज्य कि विकास, आत्मविश्वास अउ राष्ट्रीय गौरव के उड़ान के प्रतीक बनही। ए प्रदर्सन युवा मन म देसभक्ति अउ गरब के भावना ल बल दीही। उहें, राष्ट्रसेवा के प्रेरणा मिलही।
मुख्यमंत्री-जनसमस्या आवेदन
मुख्यमंत्री विष्णुदेव साय ह अपन गृहग्राम बगिया म आमलोगन ले उंखर समस्या जानिन अउ अर्जी लीन। ओमन जिला प्रशासन के अधिकारी मन ल उंखर विभाग ले जुड़े अर्जी के निराकरण करे के निरदेस दीन। मुख्यमंत्री ह गांव के लोगन, माईलोगिन, किसान, पढ़ईया लइका अउ आने-आने सामाजिक संगठन के लोगन ले भेंट करत देवारी तिहार के सुभकामना देवत समस्या जानिन। भेंट के दउरान स्वास्थ्य, शिक्षा, बिजली, सड़क, जन सुविधा अउ कतकोन योजना ले जुड़े अर्जी लोगन मन मुख्यमंत्री ल दीन। मुख्यमंत्री ह जम्मो अर्जी के समय राहत समाधान के बात अधिकारी मनले किहीन।
पुलिस कर्मी निलंबित
अंबिकापुर जिला अस्पताल ले दू झन कैदी के फरार होय के मामला म पुलिस अधीक्षक राजेश अग्रवाल ह सुरक्षा ड्यूटी म तैनात दू झिन पुलिस कमी ल निलंबित कर देहे। खबर के मुताबिक जिला जेल सूरजपुर ले दू झन कैदी के तबियत बिगड़े म अंबिकापुर जिला अस्पताल म जेल वार्ड म भर्ती करवाय गे रिहीस। इही दउरान देवारी तिहार के रतिहाकुन दूनों कैदी सुरक्षा ड्यूटी म लगे पुलिस कर्मी ल चकमा दे के फरार होगे। पुलिस अधीक्षक ह ए घटना ल गंभीरता ले लेवत प्रधान आरक्षक इसदोर एक्का अउ आरक्षक सनेस बखल ल निलंबित कर देहे। उहें, फरार होय कैदी के खोज करे जात हे।
मुख्यमंत्री दीप महोत्सव
मुख्यमंत्री विष्णुदेव साय रायगढ़ जिला के गांव भुईयापानी के गुरूधाम म दीप महोत्सव के कारीकरम म संघरीन। ए मउका म ओमन अपन गुरूदेव स्वामी धनपति पंडा अउ प्रेमशीला पंडा के प्रतिमा के आगू नमन करत प्रदेसवासी मन बर सुख-सांति, समृध्दि अउ खुसहाली के कामना करीन। मुख्यमंत्री श्री साय ह किहीन कि ए दीपोत्सव हर घर म अंजोर अउ हरेक के जीवन म सुख-समृध्दि सांति अउ मया के अंजोर बगराय। कारीकरम के दउरान ओमन शिव मंदिर अउ हनुमान मंदिर जाके पूजापाठ करीन। कारीकरम म मुख्यमंत्री ह गुरूधाम म एक करोड़ रूपिया के लागत ले भवन निर्माण महतारी सदन बर उनतीस लाख रूपिया के संगेसंग गुरूधाम परिसर म हाईमास्ट लाइट के बेवस्था तरिया के सौंदर्यीकरण, बोर खनन अउ आने जरूरत के जिनिस बर घोसना करीन। ए बेरा म लोकसभा सांसद राधेश्याम राठिया, राज्यसभा सांसद देवेन्द्र प्रताप सिंह अउ महापौर जीवर्धन चौहान समेत बड़ संख्या म जनप्रतिनिधि मौजूद रिहीन।
गोवर्धन पूजा
राजधानी रईपुर समेत प्रदेसभर म गोवर्धन पूजा अउ अन्नकूट के परब उछाह के संग मनाय जात हे। आज के दिन गौ-माता के पूजापाठ करके खिचड़ी खवाय जाथे अउ सोहाई बांध के गौवंश के रक्षा के मानता माने जाथे। राजधानी रईपुर के दूधाधारी मठ म अन्नकूट अउ गोवर्धन पूजा के कारीकरम राखे गीस। उहें, प्रदेस के आने जिला मन म अन्नकूट अउ गोवर्धन पूजा मनाय जाय के समाचार मिले हे।
इही बीच, आज प्रदेस के कतकोन जघा म गौरा-गौरी सोभा यात्रा निकाले गीस। पंडित नारायण वैष्णव ह बतइन कि भगवान शंकर अउ माता पार्वती के बिहाव के प्रतीक के रूप म गौरा-गौरी के परब मनाय जाथे।
गोवर्धन पूजा के दूसर दिन काली भाईदूज अउ मातर के परब मनाय जाही।
चार दिवसीय छठ महापरब पचीस अक्टूबर ले नहाय-खाय के संग सुरू होही। रईपुर म छठ महापर्व आयोजन समिति कोति ले राखे गे बइठका म समिति के सदस्य मन ह पूजा के आयोजन के संबंध म गोठबात करीन। समिति के अध्यक्ष राजेश कुमार िंसंह ह आज रईपुर म पत्रकार मनले गोठबात करत किहीन कि समिति ह एसो छठ पूजा भव्यता अउ उछाह के संग मनाय के फइसला लेहे। अेमन किहीन कि छठ पूजा के परब रईपुर, बिलासपुर, भिलाई, दुरूग, कोरबा, बस्तर अउ आने सहर मन म बड़ धूमधाम ले मनाय जाथे। रईपुर म खारून नदी के महादेवघाट भनपुरी के व्यास तरिया, नवा रईपुर के झांझ तरिया अउ आने तरिया तीर पचास ले जादा जघा म छठ पूजा के परब धूमधाम ले मनाय जाही। ओमन बतइन कि छठ महापरब पचीस तारीख ले सुरू होही अउ अट्ठाईस अक्टूबर के समाप्त होही। खरना छब्बीस अक्टूबर के होही अउ सत्ताईस तारीख के संझा कून सुरूजदेव ल अर्ध्य दे जाही। उहें, अट्ठाईस तारीख के बिहनिया उगत सुरूज ल अर्ध्य दीही। ए बेरा म सत्ताईस तारीख के संझा महादेवघाट म सांस्कृतिक कारीकरम होही, जेमा छठ गीत के प्रस्तुति दे जाही। संगेसंग महाआरती होही।
रेलवे ट्रेन
रईपुर रेलवे प्रशासन ह देवारी अउ छठ परब म यात्री मनके बाढ़त संख्या ल देखत तीन ठिन एक्सप्रेस ट्रेन ल प्लेटफार्म नंबर पांच के जघा म सात नंबर म चलाय के फइसला लेहे। दुरूग-पटना-साउथ बिहार एक्सप्रेस अउ दुरूग-छपरा-सारनाथ एक्सप्रेस बाईस ले सत्ताईस अक्टूबर अउ गोंदिया-बरौनी एक्सप्रेस तेईस अक्टूबर ले प्लेटफार्म नंबर सात ले रवाना होही। यात्री स्टेसन के गुढ़ियारी प्रवेस द्वार ले सोज्झे प्लेटफार्म नंबर सात म पहुंच सकत हे।
बच्चें मौत
बीजापुर जिला के हिरौली पारा गांव म काली तरिया म बूड़े ले तीन झिन लइका के मउत होगे। बताय जात हे कि ए सबो लइका तरिया म नहाय बर गे रिहीन इही दउरान गहरा पानी म जाय के सेति बूड़ गे। ए तीनो लइका एके मोहल्ला म रहवइया रिहीन अउ एक-दूसर के नता बताय जात हे। घटना के सूचना मिलतेच पुलिस मउका म पहुंचिस अउ जांच म जुट गेहे।
अउ अब जानन मौसम के हाल…
मौसम विभाग के मुताबिक अवइया चौबीस घंटा म दक्षिण छत्तीसगढ़ के कुछेक जघा म छूटपुट बरसा होय के संभावना हरय। मौसम विज्ञानी डॉक्टर गायत्री वाणी ह बतइन कि पच्चीस अक्टूबर ले एक घांव फेर प्रदेस म बरसा हो सकत हे।