प्रधानमंत्री ह किहीन कि पाछू एक दसक म हजारों नक्सली मन ह हिंसा के रद्दा छोड़के आत्मसमर्पण करे हे। ओमन किहीन कि ए दीवाली तिहार म माओवादी आतंकवाद ले मुक्त होय क्षेत्र के लोगन नवा उछाह के संग दीप जलाके उत्सव मनाही।
चिकित्सा शिक्षा-सीट स्वीकृति
राष्ट्रीय चिकित्सा आयोग-एनएमसी ह छत्तीसगढ़ के कतकोन शासकीय चिकित्सा महाविद्यालय म चिकित्सा स्नात्कोत्तर के इकसठ ठन नवा सीट के मंजूरी दे देहे। एखरे संग प्रदेस म शासकीय मेडिकल पीजी सीट के संख्या तीन सौ सोलह ले बड़के तीन सौ सतहत्तर हो गेहे। उहें, निजी चिकित्सा महाविद्यालय म एक सौ छियासी सीट हे।
चिकित्सा शिक्षा विभाग के आयुक्त शिक्षा राजपूत तिवारी ह बतइन कि छत्तीसगढ़ आयुर्विज्ञान संस्थान बिलासपुर म इक्कीस, स्वर्गीय अटल बिहारी वाजपेयी स्मृति चिकित्सा महाविद्यालय राजनांदगांव म सात, स्वर्गीय बलिराम कश्यप स्मृति चिकित्सा महाविद्यालय जगदलपुर म आठ, स्वर्गीय लखीराम अग्रवाल स्मृति चिकित्सा महाविद्यालय रायगढ़ म बारह अउ स्वर्गीय बिसाहू दास महंत स्मृति चिकित्सा महाविद्यालय कोरबा म तेरह सीट ल मंजूरी दे गेहे।
चिकित्सा शिक्षा मंत्री श्याम बिहारी जायसवाल ह एला चिकित्सा शिक्षा के क्षेत्र म ऐतिहासिक कदम बतइन हे। ओमन किहीन कि नवा पीजी सीट के मंजूरी ले प्रदेस म डॉक्टर मनके संख्या बाढ़ही अउ बेहतर स्वास्थ्य सेवा जनता तक पहुंचही।
केंद्रीय वित्त मंत्री निर्मला सीतारमन ह किहीन हे कि जीएसटी म होय सुधार ले देस के अर्थव्यवस्था ल बढ़ावा मिले हे। एखरे सेति तिहार के दउरान इलेक्ट्रानिक्स, ऑटोमोबाइल अउ उपभोक्ता वस्तु जइसन प्रमुख क्षेत्र म रिकार्ड बिक्री होय हे। नई दिल्ली म सूचना अउ प्रसारण मंत्री अश्विनी वैष्णव अउ वाणिज्य अउ उद्योग मंत्री पीयूष गोयल के संग जीएसटी बचत उत्सव म संयुक्त संवाददाता सम्मेलन म श्रीमती सीता रमन ह किहीन कि जीएसटी दर म कटौती के फायदा आम आदमी तक पहुंचत हे।
ए मउका म सूचना अउ प्रसारण मंत्री अश्विनी वैष्णव ह किहीन कि ए बछर नवरात्रि उत्सव म रिकार्ड बिक्री दर्ज करे गेहे। ओमन किहीन कि पाछू नवरात्रि तिहार के तुलना म ए बछर नवरात्रि म इलेक्ट्रानिक समान के बिक्री म पचीस प्रतिसत के बढ़ोत्तरी होय हे। ओमन किहीन कि जीएसटी सुधार के सेति खाद्य पदार्थ के कीमत कम होवत हे।
मुख्यमंत्री-कांकेर
मुख्यमंत्री विष्णुदेव साय कांकेर जिला के भानुप्रतापुर म चलत सर्व पिछड़ा वर्ग समाज के तेरहवां स्थापना दिवस कारीकरम म सामिल होइन। ए मउका म ओमन ह नब्बे करोड़ रूपिया के लागत के कतकोन निर्माण काम के लोकार्पण अउ सिलान्यास करीन। कारीकरम म मुख्यमंत्री ह जिला के हरेक विकासखंड म पचास-पचास लाख रूपिया के लागत ले एक-एक सामुदायिक भवन के निर्माण अउ पोस्ट मैट्रिक छात्रावास म अन्य पिछड़ा वर्ग के विद्यार्थी मनके सीट म बढ़ोत्तरी करे के घोसना करीन। कारीकरम म श्री साय ह किहीन कि राज्य सरकार ह पिछड़ा वर्ग के विकास अउ हित के बारे म प्रतिबध्द हे।
छत्तीसगढ़-सम्मान
आदि कर्मयोगी अभियान अउ प्रधानमंत्री जनमन योजना के सुघ्घर काम बर छत्तीसगढ़ ल सर्वश्रेष्ठ प्रदर्सन करइया राज्य के रूप म सम्मानित करे गेहे। काली नई दिल्ली म राखे गे कारीकरम म राष्ट्रपति द्रौपदी मुर्मु ह ए सम्मान दीन। राज्य सरकार कोति ले प्रमुख सचिव सोनमणि बोरा ह ए सम्मान ल लीन। आदि कर्मयोगी अभियान म मोहला-मानपुर, बालोद, दंतेवाड़ा अउ धमतरी जिला ल ‘स्क्रीन फेलिसिटेशन अवार्ड‘ दे गीस।
उहें, कोरिया जिला ल घलो बने प्रदर्सन बर सम्मानित करे गीस। एखरे संग जनजाति विभाग के राज्य प्रसिक्षण ललित शुक्ला ल व्यक्तिगत श्रेणी म पुरस्कार दे गीस।
ए सफलता बर मुख्यमंत्री विष्णुदेव साय अउ आदिम जाति विकास मंत्री रामविचार नेताम ह सबो विभागीय अधिकारी अउ पूरा टीम ल बधाई दीन हे।
माओवादी गिरफ्तार
कोंडागांव जिला म आज एक लाख रूपिया के इनामी माओवादी ह आत्मसमर्पण करे हे। ए माओवादी पूर्वी बस्तर डिवीजन के आमदई एलाओएस सदस्य के पद म लंबा बेरा ले सक्रिय रिहीस। आत्मसमर्पण करइया माओवादी ल राज्य सरकार के नवा पुर्नवास नीति के तहत पचास हजार रूपिया के प्रोत्साहन रासि दे गीस।
उपाध्यक्ष/अध्यक्ष-नियुक्त
राज्य सरकार ह अहिवारा विधानसभा क्षेत्र के विधायक डोमन लाल कोर्सेवाड़ा ल अनुसूचित जाति विकास प्राधिकरण के उपाध्यक्ष पद म नियुक्त करे हे। एखर पहिली, आरंग विधायक गुरू खुशवंत साहेब ए प्राधिकरण के उपाध्यक्ष रिहीन, फेर उंखर मंत्री बने के बाद ले ए पद ह खाली रिहीस।
उहें, राज्य सरकार ह एक ठन दूसर आदेस म रईपुर निवासी मोना सेन ल छत्तीसगढ़ फिल्म विकास निगम के अध्यक्ष नामांकित करीन हे।
हाईकोर्ट-याचिका खारिज
छत्तीसगढ़ उच्च न्यायालय ह पूर्व मुख्यमंत्री भूपेश बघेल के बेटा चैतन्य बघेल के याचिका ल खारिज कर देहे। चैतन्य बघेल ह प्रवर्तन निदेशालय-ईडी डहार ले सराब घोटाला ले जुड़े मनी लॉन्ड्रिंग मामला म पाछू अट्ठारा जुलाई के अपन गिरफ्तारी अउ रिमांड आदेस ल असंवैधानिक बतावत हाईकोर्ट म याचिका दायर करे रिहीन। ए समय चैतन्य बघेल केंद्रीय जेल रईपुर म न्यायिक हिरासत म हवय।
उहें, हाईकोर्ट ह करीब उन्नीस लाख रूपिया के साइबर ठगी के मामला म रईपुर निवासी तुषार अग्रवाल डहार ले दायर जमानत याचिका ल घलो खारिज कर देहे। आज ए मामला के सुनवाई मुख्य न्यायाधीश रमेश सिन्हा के सिंगल बेंच म होइस। कोर्ट ह मामला के गंभीरता ल देखत ट्रायल कोर्ट ल जल्दीच सुनवाई पूरा करे के निरदेस दीन हे।
जिले की चिट्ठी
आकाशवाणी रईपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ के आकाशवाणी के जम्मों केंद्र एके संगरा रिले करही। ए बखत के अंक म ‘‘राजनांदगांव‘‘ जिला के गतिविधि के बारे म जानकारी दे जाही।
खेल प्रतियोगिता
बिलासपुर म होवत पच्चीसवां राज्य स्तरीय शालेय क्रीड़ा प्रतियोगिता के आज समापन होइस। चार दिन के प्रतियोगिता म प्रदेस के सबो संभाग के एक हजार ले जादा खिलाड़ी मन ह भाग लीन। ए दउरान बेसबॉल, कबड्डी अउ कराते के प्रतियोगिता होइस। समापन कारीकरम म मुख्य अतिथि के रूप म केंद्रीय राज्य मंत्री तोखन साहू सामिल होइन अउ ओमन ह खिलाड़ी मनके उत्साह बढ़ाइन।
उहें, कोरबा जिला म बारह ले पंद्रह अक्टूबर तक चले पच्चीसवां राज्य स्तरीय शालेय क्रीड़ा प्रतियोगिता म बीजापुर जिला के खिलाड़ी मन ह शानदार प्रदर्सन करत पच्चीस ठन पदक हासिल करीन हे। खिलाड़ी मन ह स्वीमिंग संघरा कतकोन खेल प्रतियोगिता म दस स्वर्ण, दस रजत अउ पांच ठन कांस्य पदक जीतिन अउ दूसर स्थान प्राप्त करीन।
धनतेरस
छत्तीसगढ़ संघरा देसभर म धनतेरस के तिहार आज बड़ उछाह के संग मनाय जावत हे। धनतेरस के संगेच आज ले पांच दिन तक चलइया दिवाली के परब सुरू हो गेहे। आज के दिन धन के बढ़ोत्तरी बर भगवान कुबेर अउ स्वस्थ्य रहे बर आयुर्वेद के देवता धनवंतरि के पूजा करे जाथे। धनतेरस के ए परब ल कार्तिक महिना के कृष्ण पक्ष के त्रयोदसी के दिन मनाय जाथे। आज प्रदेसभर म बाजार मन म रौनक देखे जावत हे।
प्रधानमंत्री नरेंद्र मोदी, केंद्रीय गृहमंत्री अमित शाह, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह धनतेरस के मउका म लोगन ल बधई अउ सुभकामना दीन हे।