छत्तीसगढ़ राज्य निर्वाचन आयोग ल स्थानीय निकाय के चुनई म बढ़िया प्रबंधन बर अंतर्राष्ट्रीय स्तर म पुरस्कार बर नामांकित करे गेहे। आयोग ल संयुक्त राष्ट्र लोक प्रशासन नेटवर्क के शोध संस्था इंटरनेशनल सेंटर फॉर पार्लियामेंट्री स्टडीज-आईसीपीएस डहार ले पुरस्कार बर नामांकित करे गेहे।
आयोग डहार ले नगर पालिका अउ त्रिस्तरीय पंचायत चुनई एके संघरा करवाय उपर चुनाव प्रबंधन के बढ़िया उपलब्धि मानत एला नामांकित करे गेहे। पुरस्कार वितरण कार्यक्रम एक ले चार अक्टूबर तक बोत्सवाना के राजधानी गेब्रोन म होही।
स्वच्छता ही सेवा
स्वच्छता ही सेवा अभियान के तहत आज प्रदेस के कतकोन जिला म श्रमदान कार्यक्रम राखे गीस। दंतेवाड़ा, गौरेला-पेण्ड्रा-मरवाही, अंबिकापुर अउ महासमुंद म राखे गे कार्यक्रम मन म जनप्रतिनिधि, अधिकारी-कर्मचारी के संगेसंग लोगन मन ह समूह म भाग लेके साफ-सफाई करीन अउ साफ-सफाई ल अपन जिनगी के हिस्सा बनाय के संकलप लीन।
स्वच्छता ही सेवा पखवाड़ा के तहत आज अंबिकापुर नगर निगम म एक दिन, एक घंटा, एक साथ‘‘ श्रमदान कार्यक्रम राखे गीस। ए कार्यक्रम म जनप्रतिनिधि अधिकारी अउ आम लोगन मन सामिल होइन अउ मिलके श्रमदान करीन। ए मउका म सभापति हरमिंदर सिंह टिन्नी ह लोगन मन ल साफ-सफाई के सपथ देवइन।
त उहें, मुंगेली के पीएमश्री शासकीय स्कूल म जिला स्तरीय स्वच्छता कार्यक्रम राखे गीस ए मउका म जिला सिक्षा अधिकारी सीके घृतलहरे ह करीबन पांच हजार छात्र-छात्रा मन ल स्वच्छता के सपथ देवइन, जेखर बाद छात्र मन ह स्कूल परिसर म स्वच्छता के संदेस देवत मानव श्रृंखला बनईन।
सेवा पखवाड़ा के तहत आज गौरेला-पेण्ड्रा-मरवाही जिला के गौरेला स्थित पंडित माधव सप्रे महाविद्यालय म लर्निंग लाइसेंस बनाय बर सिविर लगाय गीस। सिविर म छात्र मन ल यातायात नियम के बारे म जानबा दे गीस।
ओति, कांंडागांव जिला के गोलावंड स्थित शासकीय उच्चतर माध्यमिक स्कूल म राष्ट्रीय सेवा योजना-एनएसएस के स्थापना दिवस के मउका म छात्र मन ह रैली निकलीन अउ संगेसंग नुक्कड़ नाटक अउ सांस्कृतिक कार्यक्रम के माध्यम ले साफ-सफाई के बारे म संदेस दीन।
जीएसटी
वस्तु अउ सेवा कर-जीएसटी के दर म करे गे सुधार के राजनांदगांव सांसद संतोष पांडेय ह स्वागत करत किहीन कि ए ह प्रधानमंत्री नरेन्द्र मोदी डहार ले उठाय गे एक ठिन क्रांतिकारी कदम हरय। आकाशवाणी समाचार ले गोठबात करत ओमन किहीन कि जीएसटी रिफॉर्म ले रोजे काम म अवइया जिनीस मन सस्ता होगे हे, एखर ले आम लोगन मन ल राहत मिले हे।
इही बीच, जीएसटी के दर म करे गे सुधार के जानबा दे बर प्रदेस म जनप्रतिनिधि मन ह व्यापारी अउ आम लोगन मनके बीच पहुंचत हे। इही कड़ी म उपमुख्यमंत्री अरूण साव ह आज बिलासपुर सहर के व्यापारी मन ले जीएसटी बचत उत्सव उपर गोठबात करीन। ओमन किहीन कि जीएसटी के फइसला आजाद भारत के सबले बड़का टैक्स रिफॉर्म हरय, जेखर सोझे फायदा एक सौ चालीस करोड़ देसवासी मन ल मिलत हे।
उहें, वित्तमंत्री ओ.पी. चौधरी ह रायपुर म दुकानदार अउ उपभोक्ता मन ले गोठबात करीन। ए मउका म विधायक अनुज शर्मा घलो संगे रिहीन। वित्तमंत्री ह अधिकारी मन ले किहीन कि ओमन बाजार म जाके व्यापारी मन ल जीएसटी के दर म कमी के पूरा जानबा देवय।
बुलेटिन-समय
प्रादेशिक समाचार एकांश, आकाशवाणी केन्द्र रायपुर डहार ले प्रसारित होवइया प्रादेशिक हिन्दी समाचार बुलेटिन कोनों बिसेय कार्यक्रम के सेती आज यानी गुरुवार के रतिहा नौ बजके पन्द्रह म प्रसारित करे जाही।
मुख्यमंत्री-राष्ट्रीय सेवा योजना
मुख्यमंत्री विष्णुदेव साय ह काली रायपुर म होय राष्ट्रीय सेवा योजना के राज्य स्तरीय स्थापना दिवस अउ सम्मान समारोह म सामिल होइन। ए मउका म ओमन किहीन कि राष्ट्रीय सेवा योजना के स्वयंसेवक मन ह राष्ट्र निर्माण म अपन बड़का भागीदारी निभावत हे। मुख्यमंत्री ह कहिन कि ए योजना के तहत देसभर म चार लाख ले जादा छात्र मन ह स्वयंसेवक के रूप म काम करत हे। प्रदेस म घलो एक लाख ले जादा छात्र मन ह अपन अपन भूमिका निभावत हे। कार्यक्रम म मुख्यमंत्री ह बढ़िया काम करइया संस्था, अधिकारी अउ स्वयंसेवक मन ल सम्मानित करीन। ए मउका म मुख्यमंत्री ह राष्ट्रीय सेवा योजना के पत्रिका ‘समर्पण‘ अउ विकसित भारत प्रश्नोत्तरी कार्यक्रम के पोस्टर के विमोचन करीन।
सेवा पर्व
सेवा अउ सुशासन के मंत्र ले प्रेरित होके प्रधानमंत्री नरेन्द्र मोदी के अगुवई म सरकार ह परिवर्तन अउ तेजी लाय बर सरलग परयास करत हे। केन्द्र सरकार ह पाछु ग्यारह बछर के दउरान रक्षा क्षेत्र म नवाचार उपर बिसेस ध्यान देवत हे। रक्षा उत्कृष्टता बर नवाचार, आईडीईएक्स पहल अप्रैल दू हजार अट्ठारह म सुरू करे गीस, जेखर उद्देश्य एक ठिन अइसन पारीस्थिकीय तंत्र बनाना हे, जउन ह नवाचार ल बढ़ावा देहे।
एमएसएमई, स्टार्टअप्स, व्यक्तिगत नवप्रवर्तक, अनुसंधान अउ विकास संस्थान के संगेसंग शिक्षा जगत ल सामिल करके आईडीईएक्स ह नवा-नवा प्रौद्योगिकी के विकास म सहायता बर डेढ़ करोड़ रूपिया तक के अनुदान देहे। एखर परभाव ल अउ मजबूत करत सशस्त्र बल मन ह आईडीईएक्स समर्थित स्टार्टअप्स अउ एमएसएमई ले चौबीस सौ करोड़ रूपिया ले जादा कीमत के तिरालीस ठिन जिनीस खरीदे हे, जे ह रक्षा तियारी बर स्वदेशी नवाचार म बाढ़त विश्वास ल बताथे।
बाढ़ आपदा-मॉकड्रिल
राष्ट्रीय अउ राज्य आपदा प्रबंधन प्राधिकरण के संयुक्त पहल म आज प्रदेस के कुछ जिला म बाढ़ आपदा जइसन चुनौती ले निपटे बर मॉकड्रिल करे गीस, जेमा नवा रायपुर के सेंध लेक म बाढ़ आपदा उपर मॉकड्रिल होइस। एखर उद्देश्य आपदा प्रबंधन के तैयारी के मूल्यांकन करना अउ लोगन मन ल जागरूक करना हे।
ओति, सक्ती जिला के चंद्रपुर स्थित दरहाघाट म घलो राज्य स्तरीय बाढ़ आपदा के मॉकड्रिल करे गीस। जिला कलेक्टर अमृत विकास तोपनो के मौजूदगी म एसडीआरएफ अउ डीडीआरएफ के टीम म खतरा वाले परिस्थिति ले निपटे के अभ्यास करीन। जिला अग्निशमन अउ बाढ़ आपदा प्रभारी विशम्भर राठौर ह बतईन कि मॉकड्रिल के दउरान डोंगा पलटे के बाद ओखर रेस्क्यू कइसे करे जाथे अउ संगेसंग टापू म फंसे मनखे मन ल बचाय के अभ्यास घलो करे गीस।
बस्तर दशहरा
विश्व प्रसिद्ध बस्तर दशहरा के तहत काली संझा फूलरथ के पहिली परिक्रमा करे गीस। ए रसम के तहत मां दंतेश्वरी के छत्र ल बाजा-गाजा के संग मावली माता मंदिर लाय गीस, जेखर बाद सीरासार भवन के तीर फूल ले सजाय गे बड़का दू मंजिला रथ म मां दंतेश्वरी के छत्र ल रथ म राखे गीस, जिहां पुलिस बल मन डहार ले माईजी ल सलामी दे गीस। जेखर बाद रथ ल घुमाके माईजी के छत्र ल दंतेश्वरी मंदिर म राखे गीस। बस्तर दशहरा म आज फूलरथ के दूसर परिक्रमा होही।
प्रदेस म काली कतकोन जघा म हल्का ले मध्यम बरसा के संग गरज-चमक अउ बूंदाबांदी होय के संभावना जताय गेहे। उहें, एक-दू जघा म भारी बरसा के संग गाज गिरे के संसो बताय गेहे। भारी बरसा मध्य छत्तीसगढ़ के रायपुर, दुरूग अउ बिलासपुर संभाग के जिला म हो सकथे। मौसम विभाग के मुताबिक अवइया अड़तालीस घंटा के दउरान उत्तर-पश्चिम बंगाल के खाड़ी म एक ठिन निम्नदाब के क्षेत्र बने के सेती बस्तर संभाग म एकदम जादा बरसा हो सकथे।
ऐति, गरियाबंद जिला म पाछु दिन ले सरलग होवत बरसा के सेती सिकासेर बांधा के चार ठिन गेट ल खो दे गेहे। बांधा ले ढाई हजार क्यूसेक पानी छोड़े जात हे, जेखर सेती पैरी नदिया म बाढ़ आ गेहे। जिला प्रशासन ह लोगन मन ले नदी के तीर म नइ जाय के अपील करे हे।
अउ अब थोरकुन समाचार सार म –
– आज मेक इन इंडिया पहल के ग्यारहवां वर्षगांठ हरय। ए मउका म प्रधानमंत्री नरेन्द्र मोदी ह सोशल मीडिया पोस्ट म किहीन कि मेक इन इंडिया पहल ह भारत के विकास ल गति दे अउ हमर देस के उद्यमशीलता क्षमता के दोहन करे के उद्देश्य ले सुरू करे गेहे।
– भारतीय जनता पार्टी ह आज देसभर म आत्मनिर्भर भारत अउ हर-घर स्वदेशी अभियान के सुरूआत करे हे। नई दिल्ली म राखे गे एक ठिन संवाददाता सम्मेलन म पार्टी महासचिव अरूण सिंह ह घोषणा करीन कि ए अभियान पूर्व प्रधानमंत्री अटल बिहारी वाजपेयी के जयंती पच्चीस दिसंबर तक जारी रइही।
– पंडित दीनदयान उपाध्याय के जयंती के मउका म आज छत्तीसगढ़ विधानसभा परिसर स्थित सेंट्रल हॉल म विधानसभा सचिव दिनेश शर्मा अउ आने सदस्य मन ह उंखर तैत्र चित्र म पुष्पांजलि अर्पित करीन।
– लोक निर्माण विभाग ह सात झन मुख्य अभियंता मनके नवा पदस्थापना आदेस जारी करे हे।
– श्रीरामलला दर्सन योजना के तहत सरगुजा संभाग के आठ सौ पचास श्रद्धालु मन ह आयोध्याधाम बर रवाना होइन। संस्कृति मंत्री राजेश अग्रवाल अउ कृषि मंत्री रामविचार नेताम ह अंबिकापुर रेलवे स्टेसन ले रेलगाड़ी ल हरा झंडी दिखाके रवाना करीन।
– इंदिरा गांधी राष्ट्रीय मुक्त विश्वविद्यालय-इग्नू डहार ले ओडीएल ऑनलाइन पाठ्यक्रम म प्रवेस अउ पुनः पंजीकरण के तारीख ल बढ़ाके तीस सितंबर कर दे गेहे।