प्रधानमंत्री नरेंद्र मोदी ह आज देस ल संबोधन करिन। ए दउरान म ओमन किहीन कि जीएसटी सुधार काली नवरात्रि के पहिली दिन ले लागू होही। माने जीएसटी बचत तिहार काली ले सुरू होही अउ लोगन अपन पसंद के जिनिस कम कीमत म बिसाय सकही। ओमन किहीन कि थोरकिन सुधार ले देस के विकास के गाथा बदलही अउ युवा, मध्यम वर्ग, किसान, माईलोगन अउ उद्यमी मन ल बचत तिहार ले बहुते लाभ होही। देस के विकास के यात्रा हर राज्य बरोबर भागीदार होही।
जीएसटी दर-लागू
जी.एस.टी. के नवा दर आज आधा रात ले लागू होवत हे। आम लोगन ल राहत देबर उपभोक्ता जिनिस मन उपर दर ल घटाय गेहे। प्रधानमंत्री नरेंद्र मोदी ह एसो के स्वतंत्रता दिवस के मउका म लालकिला ले जीएसटी सुधार के घोसना करे रिहीन हें।
जीएसटी परिषद ह अप्रत्यक्ष कर प्रणाली ल- 5, 12, 18 अउ 28 प्रतिसत के चार स्तर के संरचना ले सरल बनाके 5 अउ 18 प्रतिसत के दू-स्तरीय संरचना म बदले हे। तंबाकू अउ आने-आने नसा के जिनिस मन बर चालीस प्रतिसत उपराहा स्लैब के घोसना करे गेहे। जीएसटी परिषद ह आम आदमी, श्रम-प्रधान उद्योग, किसान अउ कृषि क्षेत्र ल चेत म राखत ए निर्णय लेहे। नवा ढांचा म दूध, पनीर, छेना, पिज्जा, ब्रेड अउ चपाती संगे खाय के जिनिस उपर कोनो ‘कर‘ नइ लगही।
ऐति, मुख्यमंत्री विष्णुदेव साय ह किहीन हें कि जीएसटी रिफॉर्म के असर हर क्षेत्र म होही। एखर ले उद्योग अउ व्यापार म लाभ होही संगेसंग कृषि यंत्र के दाम कम होही, जेखर ले किसान मन ल घलो फायदा होही।
सेवा पर्व
सेवा अउ सुशासन, माने जनसेवा अउ सुशासन के मंतर ले प्रेरित होके प्रधानमंत्री नरेंद्र मोदी के अगुवई म सरकार ह बदलाव अउ प्रगति लाने बर सरलग उदीम करत हे। आज ए बिसेस श्रृंखला ‘सेवा परब म‘ हमन आप मन बर लाने हन कि कइसे मोदी सरकार ह यूपीआई क्रांति के अगुवई करिस, जेखर ले डिजीटल भुगतान सहज, सुरक्षित अउ सबो बर सुलभ हो गेहे।
बतादन कि यूपीआई ह कतकोन बैंक खाता मन ल एकेच मोबाइल एप्लीकेसन म एकीकृत करके देस के भुगतान तंत्र म क्रांति लाने हे।
ऐति, छत्तीसगढ़ के भिलई नगर के व्यापारी सिध्दार्थ मिश्रा ह बतइन कि यूपीआई के परयोग ले उंखर व्यापार सरल होइस अउ चिल्हर के सेति होवइया परेसानी घलो दुरिहागे।
ईओडब्ल्यू-तलाशी अभियान
ईओडब्ल्यू ह आज सराब घोटाला अउ कोयला घोटाला मामला म छत्तीसगढ़ के संग झारख्ांड अउ बिहार म तलासी अभियान चलाइस। प्रेस विज्ञप्ति जारी करके ईओडब्ल्यू ह बतइन कि तलासी म महत्वपूर्ण कागजात, मोबाइल, इलेक्ट्रानिक उपकरण, संपति संबंधी कागजात अउ नगदी जब्त करे गेहे। ए कार्रवाई सराब घोटाला ले जुड़े व्यवसायी अवधेश यादव अउ उंखर ले संबंधित मनखे उपर करे गेहे।
उहें, कोयला घोटाला मामला म जयचंद कोशले के रइपुर अउ जांजगीर-चांपा स्थित आवास म ईओडब्ल्यू ह जांच करे हे।
नमो युवा रन
खेल अउ युवा कल्याण विभाग डहार ले रइपुर अउ बिलासपुर म ‘नमो युवा रन‘ के आयोजन करे गीस। स्वस्थ अउ नसामुक्त भारत बर आयोजित दउड़ म हजारों झन युवा मन भाग लीन। उपमुख्यमंत्री अरूण साव ह रइपुर के तेलीबांधा तरिया के तिर आयोजित कारीकरम स्थल ले ‘नमो युवा रन‘ ल हरा झंडा देखाके रवाना करिन। प्रदेस के अंतर्राष्ट्रीय अउ राष्ट्रीय खिलाड़ी मन युवा मन संग सुभाष स्टेडियम तक दउंड़ लगइन। उहें, बिलासपुर म सीएमडी कालेज मैदान ले सुरू होके रीवर-व्यू म सिरागे।
ए मउका म उपमुख्यमंत्री अरूण साव ह किहीन कि देस के हर युवा स्वस्थ, समर्थ अउ सक्षम होय संगेसंग नसा ले दूर रहय, एखरे जागरूकता बर ए दउड़ के आयोजन करे गीस। ओमन कारीकरम म सामिल जम्मों लोगन ले स्वस्थ्य अउ नसामुक्त भारत के निर्माण के सेति संकल्प लेय बर किहीन।
बतादन कि युवा मन ल स्वस्थ अउ नसामुक्त राखे बर देसभर के पचहत्तर सहर म ‘नमो युवा रन‘ के आयोजन करे गिस। उहें, रइपुर अउ बिलासपुर म आयोजित कारीकरम म भाग लेय बर बीस हजार खिलाड़ी मन पंजीयन कराय रिहीन।
गार्बेज कैफे
स्वच्छता ही सेवा पखवाड़ा के तहत सरगुजा जिला के मैनपाट जनपद पंचायत के ग्राम पंचायत रोपाखार म देस के पहिली ग्रामीन ‘‘गार्बेज कैफे‘‘ सुरू करे गिस। ए कैफे ह स्थानीय स्तर म प्लास्टिक कचरा संग्रहन अउ पर्यावरण के संरक्षण बर जिला प्रशासन सरगुजा, एलआईसी, एच.एफ.एल. ग्रीन टुमारो परियोजना अउ फिनिस सोसायटी के सुघ्घर उदिम हे। कैफे के संचालन ‘कार्ब हट किचन‘ रोपाखार म करे जाही, जिंहा एक किलो प्लास्टिक देय म नास्ता अउ दू किलो प्लास्टिक देय म भोजन मिलही।
जिला पंचायत सीईओ विनय कुमार अग्रवाल ह बतइन कि 17 सितंबर प्रधानमंत्री नरेंद्र मोदी के जनमदिन ले दू अक्टूबर गांधी जयंती तक जम्मो देसभर म स्वच्छता सेवा पखवाड़ा मनाय जावत हे। इही कड़ी म मैनपाट जइसन पर्यटन जघा म प्लास्टिक कचरा संग्रहन अउ जागरूकता बर ‘ग्रामीन गार्बेज कैफे‘ के नवाचार करे गिस हे। एखर उद्देस्य लोगन मन ल ‘‘कचरा लानव अउ खाना पावव‘‘ जइसन सुघ्घर बेवस्था ले स्वच्छता बर प्रेरित करना हे। ओमन बतइन कि सकलाय कचरा के निपटारा जिला स्तरीय प्लास्टिक प्रोसेसिंग यूनिट म करे जाही। जिंहा समूह के माईलोगन मन कचरा ले दाना, डोरी अउ कुर्सी जइसन बउरे के जिनिस बनाहीं।
स्वस्थ नारी सशक्त परिवार अभियान
स्वस्थ नारी सशक्त परिवार अभियान के तहत ए बेरा प्रदेसभर म आने-आने कारीकरम आयोजित करे जावत हे। इही कड़ी म गौरेला-पेण्ड्रा-मरवाही जिला म घलो ‘‘स्वस्थ नारी, सशक्त परिवार‘‘ अभियान के तहत माईलोगन मनके स्वास्थ्य ल चेत म राखत कारीकरम के आयोजन करे गिस। कारीकरम के सुरूआत कलेक्टर लीना कमलेश मंडावी ह करिस। ए कारीकरम म माईलोगिन मन करीबन पांच किलोमीटर दूरिहा तक पैदल चलिन।
उपमुख्यमंत्री-प्रबुध्दजन संवाद
उपमुख्यमंत्री अरूण साव ह दुरूग जिला के साइंस कालेज ऑडिटोरियम म सेवा पखवाड़ा के तहत प्रबुध्दजन मन ले गोठबात करिन। ए मउका म श्री साव ह किहीन कि प्रधानमंत्री नरेंद्र मोदी के जनमदिन ले दू अक्टूबर तक सेवा पखवाड़ा मनाय जावत हे, जेखर तहत रक्तदान सिविर, स्वास्थ्य सिविर, धार्मिक जघा क साफ-सफाई अउ दिव्यांग मनके सेवा करे जावत हे। ए दउरान श्री साव ह साइंस कालेज म साइकिल अउ मोटर स्टैंड निरमान बर पैंतीस लाख रूपिया देय के घलो घोसना करिन हें।
ठग आरोपी-गिरफ्तार
दुरूग पुलिस ह सेयर मार्केट म निवेस के नांव म करीबन 67 लाख रूपिया के ठगी के मामला म एक दंपत्ति ल हिरासत म लेहे। नगर पुलिस अधीक्षक सत्य प्रकाश तिवारी ह बइतन कि आरोपी दंपति ह अपन संगवारी मन संग मिलके पच्चीस ले जादा लोगन ले धोखाधड़ी करे हे। आरोपी मन ले बैंक पासबुक अउ आने कागजात जब्त करे गिस।
सेवा पर्व-विशेष कार्यक्रम
आकाशवाणी रइपुर के प्रादेसिक समाचार एकांश डहार ले सेवा परब के तहत स्वास्थ्य सेवा के क्षेत्र म पाछू ग्यारा बछर ले हासिल करे गे उपलब्धि उपर छत्तीसगढ़ के स्वास्थ्य मंत्री श्याम बिहारी जायसवाल ले करे गोठबात के प्रसारण काली बाईस सितंबर के बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मो केंद्र ले रिले करे जाही।
अउ अब थोरकुन समाचार सार म –
– मुख्यमंत्री विष्णुदेव साय काली रइपुर के सेरीखेड़ी म गुरू श्री तेगबहादुर सिंह जी की 350वीं शहादत शताब्दी के मउका म नगर कीर्तन यात्रा म सामिल होइन।
– कोरबा जिला के कटघोरा क्षेत्र के केंदई रेंज म हाथी के बच्चा के मउत के मामला आगू आय हे।
– आदि कर्मयोगी अभियान के तहत बालोद जिला के एक सौ छियासी गांव म आदि सेवा परब अउ सेवा पखवाड़ा के आयोजन करे जावत हे।