स्वास्थ्य मंत्री श्यामबिहारी जायसवाल ह किहीन कि प्रदेस म एनएचएम कर्मचारी मनके हड़ताल खतम करे उपर सहमति बने हे। आज एक ठिन पत्रकार वार्ता म श्री जायसवाल ह बतइन कि कर्मचारी मनके प्रतिनिधि मन संग काली उच्च स्तरीय बात होय हे। ओमन एनएचएम कर्मचारी मनल काम म लहुटे बर किहीन हे। ओमन के जायज मांग पूरा होय के बाद भी अगर काम म नइ लहुटही त, ओमन के जघा म नवा भर्ती करे जाही।
श्री जायसवाल ह बतइन कि एनएचएम कर्मचारी मनके दस प्रमुख मांग म ले चार मांग ल पूरा कर ले गेहे। उहें, तीन मांग उपर बिचार करे बर कमेटी बनाय गेहे। जबकि तीन ठन दूसर मांग केंद्र सरकार ले जुडे़ हे। ओमन किहीन कि कुछ हड़ताली कर्मचारी मन ल बर्खास्त करे गेहे। ओखर बाहली ल लेके भी उच्च स्तर म गोठबात चलत हे। उहें, सैंकड़ों हड़ताली कर्मचारी मन ल बर्खास्तगी ल लेके एक महिना के नोटिस दे गेहे। ए कर्मचारी आज संझा तक काम म लहुट जही, त ओमन के खिलाफ कार्रवाई नइ करे जाही।
सीबीआई-पीएससी घोटाला गिरफ्तार
छत्तीसगढ़ पीएससी घोटाला मामला म केंद्रीय अन्वेषण ब्यूरो-सीबीआई ह छत्तीसगढ़ लोक सेवा आयोग के पूर्व परीक्षा नियंत्रक आरती वासनिक समेत चार दूसर मनखे मन ल गिरफ्तार करे हे। गिरफ्तार करे गे दूसर लोगन म आयोग के पूर्व सचिव जीवन किशोर ध्रुव, डिप्टी कलेक्टर पद म चयनित सुमीत धु्रव, निशा कोसले अउ दीपा आदिल सामिल हे। ए जम्मों आरोपी मन ल आज रईपुर के बिसेस अदालत म पेस करे गीस, जिंहा ले ओमन ल रिमांड म भेज दे गेहे।
बतादन कि छत्तीसगढ़ पीएससी घोटाला म एखर ले पहिली आयोग के पूर्व अध्यक्ष टामन सिंह सोनवानी समेत सात दूसर लोगन मनके गिरफ्तारी हो चुके हे।
उंहें, नान घोटाला मामला म पूर्व आईएएस अधिकारी डॉक्टर आलोक शुक्ला ह आज ईडी कोर्ट म सरेंडर करीस। उच्चतम न्यायालय ले जमानत याचिका खारिज होय के बाद काली प्रवर्तन निदेशालय ईडी के टीम ह डॉक्टर शुक्ला के भिलाई स्थित आवास म छापा के कार्रवाई करे रिहीस।
कृषिमंत्री-जीएसटी
कृषि अउ किसान कल्याण मंत्री शिवराज सिंह चौहान ह किहीन कि ट्रैक्टर अउ कृषि उपकरण म जीएसटी दर म कटौती के सीधा लाभ किसान मन ल मिलना चाही। नई दिल्ली म कृषि मशीनरी अउ उपकरण के प्रतिनिधि मन संग एक बइठका के अध्यक्षता करत श्री चौहान ह ए बात उपर जोर दीन कि जीएसटी दर ल बारह या अट्ठारा प्रतिसत ले घटाके पांच प्रतिसत करे ले ट्रैक्टर अउ मसीनरी बहुत सस्ता हो जही। श्री चौहान ह किहीन कि ए कदम ले आने-आने ट्रैक्टर श्रेणी मन म तेईस हजार रूपिया ले लेके तिरसठ हजार रूपिया तक के कीमत म उल्लेखनीय कमी आही।
जीएसटी-कार्रवाई
राज्य जीएसटी विभाग ह एक सौ सत्तर ले जादा बोगस फर्म बनाके करोड़ो रूपिया के जीएसटी चोरी के मामला म एक करोड़ चौंसठ लाख रूपिया नगद अउ चार सौ ग्राम सोना जब्ती करे हे। अधिकारी मन बतइन कि जीएसटी एनालिटिक्स अउ इंटेलिजेंस नेटवर्क के संघरा जीएसटी प्राईम पोर्टल के उपयोग करके बोगस फर्म अउ बिल तियार करइया सिंडिकेट के मास्टर माइंड मोहम्मद फरहान सोरठिया के आफिस म कुछ दिन पहिली राज्य जीएसटी के बी.आई.यू टीम ह जांच करे रिहीस। जांच के दउरान एक सौ बहत्तर फर्म के बारे म जानकारी मिलिस। उहें, बोगस पंजीयन बर किरायानामा, सहमति पत्र, एफिडेविट तियार करे के घलो साक्ष्य मिले हे। ए फर्म ले राज्य ल लगभग सौ करोड़ रूपिया के जीएसटी के नुकसान होय के प्रारंभिक आंकलन करे गेहे।
निर्वाचन आयोग-राजनीतिक दल
केंद्रीय निर्वाचन आयोग ह मानदंड क उल्लंघन करे के आरोप म चार सौ चौहत्तर पंजीकृत गैर-मान्यता प्राप्त राजनीतिक दल मन ल सूची ले हटा दे गेहे। ए पाटी मन ह दू हजार उन्नीस ले एक भी चुनाव नइ लड़े हे, जेखर सेति आयोग ह ए निर्णय लेहे। ए प्रक्रिया के पहिली चरण म, आयोग ह पाछू महिना तीन सौ चौतीस पंजीकृत गैर-मान्यता प्राप्त राजनीतिक दल मन ल सूची ले हटा दे रिहीस। आयोग ह पाछू दू महिना म आठ सौ आठ पंजीकृत गैर-मान्यता प्राप्त राजनीतिक दल ल सूची ले हटा देहे।
आयोग ह बतइन कि तीन सौ उनसठ अइसे पंजीकृत गैर-मान्यता प्राप्त राजनीतिक दल मन के पहिचान करे गेहे, जेमन पाछू तीन वित्तीय बछर मन म निर्धारित समय अवधि के भीतर अपन वार्षिक लेखा परीक्षित खाता जमा नइ करे हे। ए देसभर के तेईस ठन आने-आने राज्य अउ केंद्र शासित प्रदेस ले हे। आयोग संबंधित राज्य अउ केंद्र शासित प्रदेस मनके मुख्य निर्वाचन कार्यालय मनके ए दल ल कारण बताओ नोटिस जारी करे के निरदेस दीन हे।
सेवा पर्व-संस्कृति मंत्री
देस के प्रधानमंत्री नरेंद्र मोदी के पचहत्तरवां जनमदिन के मउका म सत्रह सितंबर ले दू अक्टूबर तक सेवा पखवाड़ा मनाय जात हे। सेवा पखवाड़ा के अंतर्गत संस्कृति मंत्री राजेश अग्रवाल ह सरगुजा जिला के नगर पंचायत लखनपुर स्थित सरकारी अस्पताल पहुंच के मरीज मनले स्वास्थ्य ले जुड़े जानकारी लीन। ए दउरान स्वास्थ्य सुविधा के संबंध म अधिकारी मन ल जरूरी निरदेस दीन। ए मउका म निसुल्क स्वास्थ्य सिविर के घलो आयोजन करे गीस।
उहें, प्रधानमंत्री के जनमदिन म छत्तीसगढ़ ह सामाजिक सुधार के दिसा म ऐतिहासिक उपलब्धि दरज करे हे। सूरजपुर जिला के पचहत्तर ग्राम पंचायत ल ‘‘बाल विवाह मुक्त ग्राम पंचायत‘‘ घोसित करे गेहे। पाछू दू बछर म ए पंचायत मन म बाल विवाह के एक भी प्रकरण दरज नइ होय के आधार म ए मान्यता दे गीस। ए उपलब्धि म महिला अउ बालविकास मंत्री लक्ष्मी राजवाड़े ह किहीन कि सूरजपुर जिला के ए पहल केवल छत्तीसगढ़ ही नही, बल्कि पूरा देसबर प्रेरणा के काम करही।
बातों-बातों में
समसामयिक बिसय म आधारित कारीकरम ‘‘बातों-बातों में‘‘ म ए बखत सेवा परब के तहत प्रसारित करे जात बिसेस कारीकरम के श्रृंखला के अंतर्गत नारी सशक्तिकरण बिसय उपर केंद्रीत रइही। ए कारीकरम के प्रसारण काली बीस सितंबर के एफएम चैनल म बिहनिया नौ बजे ले अउ प्रायमरी चैनल म बिहनिया साढ़े दस बजे ले करे जाही। एला छत्तीसगढ स्थित आकाशवाणी के जम्मों केंद्र रिले करही।
रोजगार मेला
स्वामी आत्मानंद उच्चतर माध्यमिक विद्यालय बलौदाबाजार म जिला प्रशासन डहार ले काली रोजगार मेला के आयोजन करे गीस। ए रोजगार मेला म हम होंगे कामयाब अभियान के तहत साठ अउ जिला रोजगार कार्यालय के माध्यम ले पंद्रह युवा मन ल नियुक्ति पत्र दे गीस। मेला म कुल एक हजार चार सौ अंठावन पद के विरूध्द तेरह सौ ले जादा आवेदन मिले रिहीस। ए मउका म राजस्व मंत्री टंकराम वर्मा अउ रोजगार मंत्री गुरू खुशवंत साहेब घलो मौजूद रिहीन।
निलंबन
रामानुजगंज-बलरामपुर जिला म निसुल्क गणवेस वितरण कार्य म अनियमितता अउ लापरवाही बरते म प्रभारी जिला शिक्षा अधिकारी डीएन मिश्रा ल तत्काल प्रभाव ले निलंबित कर दे गेहे। ए संबंध म स्कूल शिक्षा विभाग ह आदेस जारी करे हे। आदेस के अनुसार सूरजपुर जिला के प्रभारी जिला शिक्षा अधिकारी अजय कुमार मिश्रा ल रामानुजगंज-बलरामपुर के घलो अतिरिक्त प्रभार सौंपे गेहे।
जीएसटी-स्वास्थ्य बीमा
वस्तु अउ सेवाकर जीएसटी के दर म करे गे सुधार के नारायणपुर के वरिष्ठ बीमा सलाहकार राजेश सोनसर्वे ह सुवागत करीन हे। ओमन किहीन कि बाईस सितंबर ले स्वास्थ्य बीमा म जीएसटी के दर सून्य हो जही, जेखर ले आम लोगन मन के स्वास्थ्य बीमा के क्षेत्र म बचत होही।