आज दिनभर के खबर ल अपन गुरतुर छत्तीसगढ़ी भाखा म पढ़व

विधानसभा अनपूरक बजट
मुख्यमंत्री भूपेश बघेल ह आज सदन म चालू वित्तीय बछर बर पहिली अनुपूरक बजट पेस करीन। ए अनुपूरक बजट करीबन तीन हजार आठ सौ सात करोड़ रूपिया के हवय। ए अनुपूरक बजट म काली सदन म चर्चा होही। एखर पहिली, आज सदन के कार्यवाही सुरू होय म विधानसभा अध्यक्ष डाॅक्टर चरणदास महंत ह जम्मों विधायक मन ले विधानसभा परिसर म ही कोरोना जांच के कराय गे बेवस्था म जांच कराय बर किहीन।
विधानसभा-ध्यानाकर्षण सूचना
विधानसभा म आज मानसून सत्र के दूसर दिन विपक्षी सदस्य मन ह ध्यानाकर्षण सूचना ले कतकोन मुद्दा ल उठाईन।
नेता प्रतिपक्ष धरमलाल कौशिक ह अपन ध्यानाकर्षण सूचना म धान अउ मक्का के हाईब्रिड बीज बिसाय के मुद्दा उठावत किहीन कि सासन कोति ले तय समय-सीमा म बीज के आपूर्ति नइ करे गेहे। एखर बावजूद बीज निगम के ए फर्म के विरूद्ध आज कोनों किसम के कार्रवाई नइ करीन। जवाब म कृषि मंत्री रविन्द्र चैबे ह किहीन कि बीज बिसाय म कोनों किसम के गड़बड़ी नइ होय हे।
एक आने ध्यानाकर्षण सूचना म भाजपा सदस्य बृजमोहन अग्रवाल, अजय चंद्राकर अउ नारायण चंदेल ह हाथी मनके मउत के मामला उठाईन। ओमन हाथी के मउत बर किहीन कि ए योजनाबद्ध ढंग ले होय हे। एखर जवाब म वनमंत्री मोहम्मद अकबर ह किहीन कि ए दसों हाथी के मउत आने-आने कारण ले होय हे। पोस्टमार्टम म हाथी मनके मउत के कारण करेंट अउ जहरखुरानी पाय गेहे।
जेईई/नीट
संयुक्त इंजीनियरिंग भर्ती परीक्षा जेईई मेन्स अउ चिकित्सा विज्ञान राष्ट्रीय पात्रता परीक्षा-नीट यूजी अपन तय कारीकरम के मुताबिक सितंबर म होही। जेईई मेन्स के प्रवेस परीक्षा एक ले छह सितंबर तक अउ नीट यूजी परीक्षा तेरह सितंबर के होही। राष्ट्रीय परीक्षा एजेंसी ह ए दूनों परीक्षा बर परीक्षा केन्द्र के संख्या म बढ़वार करे हे। एसो करीबन साढ़े आठ लाख परीक्षार्थी मन जेईई मेन्स अउ करीबन सोलह लाख मन नीट यूजी बर पंजीयन कराय हे।
कोरोना-मरीज
प्रदेस म कोरोना संक्रमित नवा मरीज मिले के आंकड़ा म सरलग बढ़वार होवत हे। उच्च न्यायालय के एक न्यायाधीश के संगेसंग बिलासपुर कलेक्टर सारांश मित्तर अउ कांग्रेस के एक नेता कोरोना पाॅजिटिव पाय गेहे। उहें, बिलासपुर म ही सीपत थाना प्रभारी के कोरोना जांच रिपोर्ट पाॅजिटिव आय के बाद थाना ल सील कर दे गेहे। एखर कामकाज अभी मस्तुरी थाना ले होवत हे।
ओति, बीजापुर जिला चिकित्सालय के डाॅक्टर योगेश गवेल के मउत होय के बाद ओखर कोरोना जांच रिपोर्ट पाॅजिटिव आय हे। जिला म कोरोना संक्रमण ले अब तक पांच झिन के मउत होगे हे।
ऐति, दुरूग जिला म आज कोरोना संक्रमित पच्चीस झिन नवा मरीज के पहिचान करे गेहे। एमा लोक स्वास्थ्य यांत्रिकी विभाग के एक उप अभियंता, एक लैब असिस्टेंड अउ चैकीदार सामिल हे। आज जउन नवा मरीज मिले हे, ओमा मुख्य रूप ले दुरूग अउ पाटन ब्लाॅक के हवय।
उहें, दोहरा हत्याकांड के आरोप म रायगढ़ ले गिरफ्तार करे गे ओड़िसा के पूर्व विधायक घलो कोरोना संक्रमित पाय गेहे।
इही बीच, महासमुंद जिला म एक डिप्टी कलेक्टर समेत दू झिन अधिकारी कोरोना पाॅजिटिव पाय गेहे। एखर बाद कलेक्ट्रेट कार्यालय म इकतीस अगस्त तक लोगन के अवई-जवई म रोक लगा दे गेहे। एखर संगेसंग महासमुंद नगर पालिका ल सील कर दे गेहे। जिला म पाछु रतिहा कोरोना संक्रमण के चालीस झिन नवा मरीज मिले हे।
प्रदेस म काली कोरोना पाॅजिटिव बारह सौ सत्यासी नवा मरीज के पहिचान करे गे रिहीस।
कोरोना-आईबीआरएस
कोरोना संक्रमित मरीज मनके स्वास्थ्य म निगरानी राखे बर राजनांदगांव जिला म ‘इंटर एक्टिव वाईस रिस्पांस‘ सिस्टम सुरू करे जात हे। एमा कोरोना संक्रमित मरीज मनके होम क्वारेंटाइन या फेर होम आइसोलेशन म रेहे या अस्पताल ले छुट्टी होय के बाद उंखर स्वास्थ्य के संबंध म जानकारी जुटाय जाही। एखर सुरूवात प्रदेस म सबले जादा कोरोना संक्रतिम मिलइया सहर ले करे जात हे। राजधानी रईपुर म ए सुभिता पहिलीच सुरू होगे हे।
किसान-पंजीयन
प्रदेस म एसो समर्थन मूल्य म धान बिसाय बर पहिली ले पंजीयन होय किसान मन ल फेर पंजीयन कराय के जरूरत नइ पड़ही। एखर बर सिरिफ नवा किसान मन ल ही पंजीयन कराना हे। राजनांदगांव जिला प्रसासन कोति ले सहकारी बैंक के जम्मों साखा म पहिली ले पंजीयन होय किसान मनके सूची तियार करे जात हे। अवइया इकतीस अक्टूबर तक धान बिसाय बर नवा किसान मन अपन पंजीयन करा सकही।
विमान सेवा-स्वागत
बिलासपुर ले भोपाल के बीच वाणिज्य विमान सेवा सुरू करे जाही। केन्द्रीय नागरिक उड्डयन मंत्रालय के ए फइसला के मुख्यमंत्री भूपेश बघेल ह सुवागत करीन हे। श्री बघेल ह किहीन कि ए सेवा सुरू होय ले छत्तीसगढ़ ल हवाई सेवा के फायदा मिलही। मुख्यमंत्री ह केन्द्रीय राज्यमंत्री ले विमानसेवा ले बिलासपुर ल दिल्ली अउ मुंबई जइसन महानगर ले जोड़े बर किहीन।
स्कूल मान्यता
राज्य म हाईस्कूल अउ हायर सेकेंडरी म चालू सैक्षणिक सत्र बर बैसठ ठिन प्राईवेट स्कूल ल नवा मान्यता दे गेहे। राज्य माध्यमिक सिक्षा मंडल के प्रोफेसर वी.के. गोयल ह बतईन कि एक सौ तिहत्तर प्राईवेट स्कूल ह मान्यता खातिर अर्जी दे रिहीस, जांच के बाद बैसठ ठिन स्कूल पात्र पाय गीस।
महासमुंद-हाथी आतंक
महासमुंद जिला मुख्यालय ले बारह किलोमीटर दुरिहा खट्टी गांव म इक्कीस ठिन हाथी के एक दल उत्पात मचात हे। हाथी मन खड़े फसल अउ फार्म हाउस म लगे फसल ल नकसान पहुंचाय हे। वन विभाग के टीम मउका म पहुंच के हाथी मन उपर नजर राखे हे। संगेसंग फसल के नकसान के जांच करे जात हे।
मौसम
मौसम विभाग ह अवइया चैबीस घंटा म बिलासपुर अउ सरगुजा संभाग के कुछेक जघा म भारी बरसा होय के चेतावनी देहे। दुरूग अउ रईपुर संभाग के एक-दू जघा म घलो भारी बरसा हो सकत हे।
मौसम विभाग के मुताबिक उत्तर-बंगाल के खाड़ी अउ ओखर तीर-तखार के क्षेत्र म निम्नदाब के क्षेत्र बने हे। संगेसंग उपरी हवा म चक्रवाती घेरा घलो बने हे, जेखर असर ले प्रदेस के कतकोन जघा म सरलग बरसा होवत हे।
गोधन न्याय योजना
गोधन न्याय योजना म प्रदेस के पशुपालक अउ किसान मन ले बिसाय गे गोबर ले गौठान मन म वर्मी कम्पोस्ट बनाय के काम सुरू होगे हे। सरगुजा जिला के गौठान म घलो गौठान समिति के सदस्य अउ स्व-सहायता समूह के माईलोगिन मन वर्मी टाका म गोबर डार के वर्मी कम्पोस्ट बनाय के काम जूट गेहे।
औषधीय पौधा
राज्य औषधीय पादप बोर्ड ह प्रदेस म समूह ले गिलोय, तुलसी, एलिवोरा जइसन औषधि पौध लगाय बर बढ़ावा देके फइसला लेहे। ए संबंध म बोर्ड के अध्यक्ष बालकृष्ण पाठक के अगुवई म बइठका होईस। श्री पाठक ह अधिकारी अउ राज्य के वनवासी मन कोति ले एकट्ठा होवइया जड़ी-बुड़ी के सही कीमत देवाय अउ ओखर बाजार के बेवस्था करे के निरदेस दीन।
सीख-कार्यक्रम
कोरोना संक्रमण ले बांचे खातिर अभी स्कूल बंद हवय। अइसन स्थिति म लइका मनके पढ़ई खातिर प्रदेस के दस ठिन जिला म ‘‘सीख‘‘ कारीकरम चलाय जात हे। सूरजपुर जिला बर ए कारीकरम के आॅनलाईन सुरूवात स्कूल शिक्षा मंत्री डाॅक्टर प्रेमसाय सिंह टेकाम ह करीन। ए कारीकरम स्कूल सिक्षा विभाग अउ यूनिसेफ कोति ले जुलमिल के करे जात हे।
बाक्साइड खदान-विस्फोट
सरगुजा जिला के मैनपाट म बाल्को के एक बाक्साइड खदान म बारूद ल नष्ट करत बेरा जोरदरहा विस्फोट होगे। ए विस्फोट ले केसरा गांव म मकान अउ दू ठिन गाड़ी ल नकसान होय के समाचार मिले हे। बताय जात हे कि बाल्को के ए खदान पाछु दू बछर ले बंद रिहीस। इहां रखाय बारूद ल नष्ट करे के काम चलत रिहीस, तभे ए धमाका होगे। एमा काखरो हताहत होय के खबर नइ हे।
खैरागढ़-कला प्रदर्शनी
खैरागढ़ के इंदिरा कला संगीत विश्वविद्यालय म आर्ट एंड कल्चर फाउंडेशन भोपाल कोति ले आने-आने विधा म प्रदर्सनी लगाय गेहे। एमा खैरागढ़ के मूर्तिकात किशोर शर्मा के दू ठिन कांस्य मूर्ति ‘‘रहचूलि अउ छत्तीसगढ़ी लइका‘‘ नाव ले प्रदर्सित करे गीस। ए प्रदर्सनी म भाग लेवइया कलाकार मन अपन-अपन क्षेत्र म कला ल नवा पहिचान देहे।
टोल प्लाजा-फास्ट टैग
केन्द्र सरकार ह देस के राजमार्ग मन म टोल प्लाजा म कोन भी किसम के छूट बर फास्ट टैग जरूरी कर देहे। डिजिटल भुगतान ल बढ़ावा दे खातिर ए फइसला ले गीस। केन्द्रीय सड़क परिवहन अउ राजमार्ग मंत्रालय ह फास्ट टैग वाले गाड़ी ल चैबीस घंटा के भीतरी लहुटे म छूट दे खातिर राष्ट्रीय राजमार्ग शुल्क नियम दू हजार आठ म संसोधन करे हे।
माओवादी-गिरफ्तार
बीजापुर जिला म सुरक्षा बल ह दू झिन माओवादी मन ल गिरफ्तार करे हे। ए माओवादी मन दंतेवाड़ा जेल ले भाग गे रिहीन। सुरक्षा बल के टीम ह पोजेर-पमूलवाया गांव म गश्त के बेरा ए दूनांे झन ल गिरफ्तार करे हे।
सट्टा-आरोपी गिरफ्तार
दुरूग म कैरेबियन प्रीमियर लीग म सट्टा खेले अउ खेलवइया मनके एक अंतर्राज्यीय गिरोह के पता चले हे। पाछु रतिहा स्मृति नगर पुलिस ह ए गिरोह के पांच झिन आरोपी ल गिरफ्तार करे हे। इंखर तीर ले लैपटाॅप, एल.ई.डी. टीवी, मोबाइल अउ सट्टा पर्ची के संग नगद रकम बरामद करे गेहे।