राष्ट्रीय कृषि सम्मेलन रबी अभियान काली पंद्रह सितंबर ले नई दिल्ली म राखे गेहे। दू दिन वाले ए सम्मेलन के पगरइती कृषि अउ किसान कल्याण मंत्री शिवराज सिंह चौहान करही। समारोह के माध्यम ले देस के कृषि बिसेसज्ञ, वैज्ञानिक अउ नीति निर्माता रबी फसल के चुनौती मन उपर गोठबात करही। ए सम्मेलन म छत्तीसगढ़ के कृषि मंत्री रामविचार नेताम घलो सामिल होही। सम्मेलन म श्री नेताम ह प्रदेस म किसान मनके हित म ले गे निर्णय, नीति अउ विकास काम मनके संगे केंद्र अउ राज्य सरकार डहार ले चलत योजना मन के प्रगति बारे म जानकारी दिही।
ए सम्मेलन म देसभर के कृषि विसेसज्ञ वैज्ञानिक, नीति निर्धारक अउ राज्य मनके प्रतिनिधि आही।
राजिम रायपुर-मेमू ट्रेन
रेलवे ह राजिम-रईपुर मेमू ट्रेन सेवा ल मंजूरी दे देहे। ए ट्रेन ह अट्ठारा सितंबर ले नवा ब्राडगेज रेल लाइन म रईपुर ले नवा रायपुर अउ अभनपुर होवत राजिम तक चलही। मुख्यमंत्री विष्णुदेव साय ह ए मेमू ट्रेन ल बिहनिया ग्यारा बजे हरा झंडी दिखाके राजिम ले रईपुर बर पठोही। रेलवे ह मेमू ट्रेन सेवा के टाइम टेबल घलो जारी कर देहे। ए ट्रेन के स्टापेज मंदिर हसौद, सीबीडी, केन्द्री, अभनपुर, मानिकचौरी अउ राजिम म रइही। राजिम के ब्राडगेज नेटवर्क ले जुड़े ले ए क्षेत्र म रेल सहुलियत बाढ़ही। संगे धार्मिक अउ पर्यटन के दृष्टि ले राजिम के पहुंच ह बड़का सहर मन तक होही।
रईपुर रेल मंडल के अपर मंडल रेल प्रबंधक बजरंग अग्रवाल अउ वरिष्ठ मंडल वाणिज्य प्रबंधक अवधेश कुमार त्रिवेदी ह काली राजिम टेसन पहुंचके पार्किंग अउ अवइया मनके अवई-जवई के बेवस्था बारे म जायजा लीन।
समझौता-ज्ञापन
मुख्यमंत्री विष्णुदेव साय के उपस्थिति म जशपुर जिला प्रशासन अउ विज्ञान भारती बीच एक ठिन समझौता ज्ञापन उपर दस्तखत करे गेहे। ए समझौता के उद्देस्य जिला के पढ़इया लइका मन म वैज्ञानिक दृष्टिकोण ल बढ़ावा देना अउ ओमन ल विज्ञान अउ टेक्नालॉजी ले जोड़ना हे। ए पहल ले स्कूल मन म विज्ञान शिक्षा ल बढ़ावा दे खातिर कई ठिन कारीकरम चलाय जाही।
कारीकरम म बोलत मुख्यमंत्री ह किहीन कि ए समझौता ह जिला के पढ़इया लइका मन बर नवा मउका दिही। ओमन यहू किहीन कि जशपुर जिला प्रशासन अउ विज्ञान भारती के ए संघरा प्रयास ह न केवल स्कूली पढ़ई-लिखई ल मजबूत बनाही। भलुक पढ़इया लइका मन ल विज्ञान अउ नवाचार के दुनिया म नवा उड़ान देही।
डीजीपी-गरियाबंद दौरा
राज्य के पुलिस महानिदेशक अरूण देव गौतम बीते ग्यारा सितंबर के सुरक्षा बल मन डहार ले चलाय गे नक्सल ऑपरेसन म सामिल जवान मनले मिले बर आज गरियाबंद पहुंचिन। ए दउरान ओमन जवान मनले नक्सल आपरेसन उपर चर्चा करीन। ओमन जवान मनके सफलता उपर बधई देत किहीन कि बिना कोनो नसकान के अतका बड़ सफलता ह सुरक्षा बल मनके सटीक रननीति पाय के ही मिले हे। ए मउका म एडीजीपी विवेकानंद सिन्हा अउ रईपुर रेंज के आईजी अमरेश मिश्रा घलो मौजूद रिहीन।
इंहा, ए बतादन कि गरियाबंद जिला के मैनपुर इलाका म बीते ग्यारा सितंबर के सुरक्षाबल मन संग होय मुठभेड़ म करीबन एक करोड़ रूपिया के इनामी माओवादी कमांडर समेत दस झिन माओवादी मारे गे रिहीस।
युक्तियुक्तकरण-शिक्षक निलंबित
युक्तियुक्तकरण के बाद कार्यभार ग्रहण नइ करइया अउ काम म लापरवाही बरतइया वाले शिक्षक मन उपर कार्रवाई सुरू हो गेहे। इही कड़ी म कोरबा जिला के चार झिन शिक्षक मन ल निलंबित कर दे गेहे। उहें, कई झिन शिक्षक मन ल कारण बताओ नोटिस जारी करत उंखर दू महिना के वेतन रोक दे गेहे। जिला शिक्षा अधिकारी ह अइसन शिक्षक मन ल तुरतेच आवंटित करे गे स्कूल मन म उपस्थिति देके लइका मन ल पढ़ाय के निरदेस दीन हे।
हिन्दी दिवस-गृह मंत्री
आज हिन्दी दिवस हरय। ए मउका म केंद्रीय गृह मंत्री अमित शाह गुजरात के गांधीनगर म हिन्दी दिवस अउ पांचवां अखिल भारतीय राजभाषा सम्मेलन म सामिल होइन। सम्मेलन म बोलत श्री शाह ह हिन्दी ल अउ सरल बनाय बर किहीन अउ एखर संग म क्षेत्रीय भाखा मनके चिन्हारी ल बढ़ावा देके अपील करीन। ओमन लोगन मनले मातृभाषा के सम्मान करत हिन्दी के समर्थन करे बर घलो आरो दी।
गृह मंत्री ह किहीन कि केंद्र सरकार ह हिन्दी ल जादा ले जादा मनखे तक पठोय बर सारथी मंच अउ हिन्दी सब्द सिंधूकोष के सुरूआत करे हे। श्री शाह ह किहीन कि हिन्दी ल विज्ञान टेक्नालॉजी, न्याय अउ पुलिस के भाखा घलो बनना होही। गृहमंत्री ह भरोसा जतइन कि बछर दू हजार उनतीस तक हिन्दी सब्द सिंधूकोष ह दुनिया के सबले बड़का विश्वकोष बन जही। गृहमंत्री ह माता-पिता मन ले घर म मातृभाषा ल अपनाय के अपील घलो करीन।
मुख्यमंत्री-जशपुर
मुख्यमंत्री विष्णुदेव साय ह आज जशपुर जिला के देओबोरा, केरे, दनगरी, छिछली अउ घोघरा गांव मन म होम-स्टे योजना के सुभारंभ करीन। ए मउका म मुख्यमंत्री ह किहीन कि होम-स्टे नीति ह पर्यटन ल नवा चिन्हारी देही। संगे उहें, के जवान लइका अउ सामुदाय मन बर रोजगार के संगे उद्यमसीलता के मउका घलो देही। ए मउका म ट्रेनिंग पाय पर्यटन मित्र मन ल प्रमाण पत्र बांटे गीस।
अपन जशपुर दउरा बेरा मुख्यमंत्री ह कृषि क्रांति अभियान के चलत क्यूआर कोड वाले जीकॉम इंडिया के सुभारंभ बगिया स्थित अपन निवास कार्यालय ले करीन। कृषि क्रांति अभियान के उद्देस्य किसान काल सेंटर एग्रीबिड अउ बाजार बेवस्था ल सरल बनाना हे। ए मउका म झारखंड के पूर्व मुख्यमंत्री अर्जुन मुंडा घलो मौजूद रिहीन।
लोक अदालत
प्रदेस के सबो जिला अउ व्यवहार न्यायालय मन म काली राष्ट्रीय लोक अदालत राखे गे रिहीस। ए लोक अदालत म सैंतालीस लाख ले जादा के मामला के निपटारा आपसी सहमति ले करे गीस अउ सात अरब उनचालीस करोड़ रूपिया ले जादा के रासि के अवार्ड पारित होइस।
उहें, रईपुर म नौ लाख सैंतीस हजार मामला के निराकरण करे गीस। एमा सबले जादा सात लाख इक्यासी हजार मामला राजस्व विभाग ले संबंधित रिहीस।
बीजापुर-सुरक्षा कैम्प
बीजापुर जिला के उल्लूर अउ चिल्लामरका गांव म सुरक्षा बल मनके मदद ले नवा सुरक्षा अउ जन सुविधा कैम्प के स्थापना करे गेहे। ए गंवई मन म सुरक्षा कैम्प बने ले उंहा के रहवइया मन ल स्वास्थ्य, शिक्षा, बिजली अउ पिये के पानी के संगे पीडीएस दुकान असन सहुलियत मिलही। ए कैम्प ल ‘‘नियद नेल्लानार‘‘ योजना के तहत स्थापति करे गेहे। जिला म अब तक छत्तीस ठिन नवा सुरक्षा कैम्प स्थापित करे जा चुके हे।
स्वास्थ्य-कार्यशाला
प्रदेस म स्वास्थ सेवा मन ल मजबूत करे अउ सामुदायिक स्वास्थ्य कार्य मन ल सुघ्घर बनाय म रईपुर म राखे गे राज्य स्तरीय मास्टर प्रसिक्षण कार्यसाला के समापन हो गेहे। आठ ले तेरह सितंबर तक राखे गे ए कार्यसाला म मितानिन कारीकरम के कारीकरम समन्वयक, जिला समन्वयक अउ एरिया कोआर्डिनेटर समेत छत्तीस झिन प्रतिभागी सामिल होइन। ए कार्यसाला के उद्देस्य मास्टर ट्रेनर तियार करना हे, जउन आगे चलके ब्लाक अउ जिला स्तर म ट्रेनिंग दिही, जेखर ले सामुदायिक स्वास्थ्य सेवा ह जादा प्रभावी बनही।
जीएसटी-गृह मंत्री
केंद्र सरकार डहार जीएसटी के दर म करे गे सुधार के फायदा कई ठिन क्षेत्र मनके संगे करदाता मन ल घलो मिलही। उपमुख्यमंत्री अउ गृहमंत्री विजय शर्मा ह किहीन कि जीएसटी म करे गे सुधार मन ले इन्कम टेक्स जमा करे के सिस्टम पहिली ले अउ सुघ्घर होही।
अउ अब थोरकुन समाचार सार म –
– बलरामपुर जिला के छब्बीस झिन जवान लइका मन के चयन अग्निवीर बर होय हे। ए जवान लइका मन आज रईपुर म मुख्यमंत्री विष्णुदेव साय ले मुलाकात करीन।
अउ
– उपमुख्यमंत्री अरूण साव ह जांजगीर-नैला नगर पालिका अउ चांपा नगर पालिका म उन्नीस करोड़ तिरपन लाख रूपिया ले जादा के लागत के कई ठिन विकास काम मनके भूमिपूजन अउ लोकार्पण करीन।