केंद्रीय प्रत्यक्ष कर बोर्ड ह आयकर विवरण दाखिल करे गे आखिरी तारीख ल पंद्रह सितंबर तक बर घूंचा दे गेहे। पहिली ले भरे गे विवरण अउ सरल आधार ओटीपी के संगे वेबसाइट म ऑनलाइन आयकर रिटन फाइल दाखिल करे जा सकही। फेर देरी ले आयकर विवरणी आईटीआर दाखिल करे उपर जुर्माना अउ ब्याज लगथे।
जीएसटी-फायदा
वस्तु अउ सेवाकर यानी जीएसटी के रेट म हाले म होय सुधार ह ए महिना के बाईस तारीख ले लागू होही। नवा जीएसटी रेट के अनुकूल प्रभाव चिकित्सा क्षेत्र म घलो पड़े के संभावना हे। नवा जीएसटी सुधार के संगे अब सबो मेडिकल डिवाइस अउ उपकरण मन उपर अट्ठारा परसेंट के जघा अब सिरिफ पांचे परसेंट जीएसटी लगही। उहें, पट्टी डायग्नोस्टिक किट, ग्लूकोमीटर अउ आने जरूरी मेडिकल जिनिस मन उपर जीएसटी बारह परसेंट ले घटाके पांच परसेंट कर दे गेहे। तैंतीस ठिन जीवन रक्षक दवा मन उपर जीएसटी ल बारह परसेंट ले घटाके सून्य कर दे गेहे। कैंसर, दुर्लभ अलकरहा रोग अउ गंभीर बीमारी मनके इलाज म काम अवइया तीन ठिन दवा मन उपर घलो जीएसटी ल पांच परसेंट ले घटाके सून्य कर दे गेहे।
ऐति, छत्तीसगढ़ के आम जनता मन घलो जीएसटी म करे गे सुधार के सुवागत करे हे।
पुलिस कमिश्नर प्रणाली
एक नवंबर ले रईपुर म पुलिस कमिश्नर प्रणाली सुरू होही। गृह विभाग अउ पुलिस मुख्यालय ह एखर बर तियारी सुरू कर देहे। कई ठिन राज्य मनके सिस्टम के ल अध्ययन करे बाद छत्तीसगढ़ म सुघ्घर कार्य योजना बनाय के परयास करे जात हे। ए बेरा रईपुर म आईजी अउ एसएसपी ल मिलाके दू झिन आईपीएस मन लॉ एंड आर्डर ल संभालत हे। फेर पुलिस कमिश्नर सिस्टम लागू होय बाद अब आईपीएस अधिकारी मनके संख्या बाढ़के सात ठिन हो जही। अइसने राज्य पुलिस सेवा के घलो करीबन बारह झिन ले जादा अधिकारी मन ल अपराध मन उपर अंकुश लगाय खातिर पदस्थ करे जाही।
इंहा ए बतादन कि राज्य कैबिनेट के बइठका म एखर बर प्रस्ताव पारित होय हवय।
बीजापुर-माओवादी सामान
बीजापुर जिला म सुरक्षा बल मन ह माओवादी मन डहार ले जंगल भीतरी लुका के राखे गे हथियार उपकरण अउ बड़अकन बिस्फोटक जिनिस बरामद करे हे। मिले जानकारी मुताबिक केंद्रीय रिजर्व पुलिस बल कोबरा बटालियन अउ बस्तरिया बटालियन के संघरा टीम ह उसूर थाना क्षेत्र के गूंजेपर्ती के जंगल भीतरी तलासी अभियान म निकले रिहीस। तभे जंगल ले लेथ मसीन इलेक्ट्रीक जनरेटर, वाटर पंप इलेक्ट्रीक कटर, हाइड्रोलिक सिलेंडर, मोटर पार्ट्स, टूल बॉक्स, ड्रिल बिट्स, कंटेनर समेत बिस्फोटक बनाय के जिनिस अउ दवई बरामद करीस, जेला नष्ट कर दे गेहे।
ग्रामीण-चक्काजाम
बलरामपुर जिला के लुत्ती बांध टूटे के मामला म आज बड़ भारी संख्या म आज ग्रामीण मन ह तातापानी स्थित राष्ट्रीय राजमार्ग क्रमांक- तीन सौ तिरालिस म चक्काजाम करीन। ए ग्रामीण मन मउत होय मनखे मनके परिवार वाले मन ल उचित मुआवजा, सरकारी नौकरी अउ प्रभावित परिवार मन ल राहत देके मांग करीन। सूचना मिले बाद एडीसनल एसपी अउ एसडीएम समेत पुलिस अउ प्रशासनिक अधिकारी मन मउका म पहुंचके आंदोलन करइया मन ले चर्चा करीन, जेखर बाद गंवई के मनखे मन चक्काजाम ल समाप्त करीन।
दुर्घटना
खैरागढ़-छुईखदान-गंडई जिला म ढाबा तीर अज्ञात गाड़ी के टक्कर ले फटफटी सवार दू झिन मनखे के मउकाच म मउत होगे। उहें, दू झिन आने लइका घायल होगे, जेमन ल अस्पताल म भर्ती कराय गेहे। मिले जानकारी मुताबिक एमा ले तीन झिन लइका अउ उंखर पिताजी ह फटफटी म सवार होके राजनांदगांव जावत रिहीन, तभे ए एक्सीडेंट होइस।
खेल पुरस्कार
राज्य सरकार ह खेल पुरस्कार बछर दू हजार तेईस-चौबीस अउ दू हजार चौबीस-पच्चीस बर खिलाड़ी अउ प्रसिक्षक मनके सूची जारी कर देहे। ए बखत करीबन अस्सी झन खिलाड़ी मन ल सम्मानित करे जाही। निर्णायक समिति के सर्वसम्मति ले निर्णय ले बाद खेल अउ युवा कल्याण विभाग ह चयन होय खिलाड़ी अउ प्रसिक्षक मनके आखिरी सूची जारी करे हे।
चंद्रग्रहण
आज पूर्ण चंद्र ग्रहण रइही। ए गरहन ह जम्मों भारत म स्पष्ट रूप ले दिखही। ए चंद्र गरहन ह आज रतिहा आठ बजके अंठावन मिनट ले सुरू होके काली बिहनिया दू बजके पच्चीस मिनट म सिराही, जउन ह भारत म बयासी मिनट के होही। उहें, ए गरहन ह पांच घंटा ले जादा बेरा तक रइही। इंहा ए बतादन कि पृथ्वी ह जब सुरूज अउ चंदा के बीच आथे, तब चंद्र गरहन होथे।
टंकराम वर्मा-महतारी सदन
राजस्व मंत्री टंकराम वर्मा ह बलौदाबाजार जिला के ग्राम पंचायत रवान म महतारी सदन निर्माण काम के भूमि पूजन करीन। ए भवन के निर्माण चौबीस लाख सत्तर हजार रूपिया के लागत ले करे जाही। ए मउका म श्री वर्मा ह किहीन कि माईलोगन मन ल मजबूत बनाय खातिर ए महतारी सदन ह बड़का भूमिका निभाही।
हाथी-मौत
बलरामपुर जिला के रामानुजगंज वन परिक्षेत्र म काली रतिहा एक ठिन हाथी के लास मिले हे। सूचना मिलतेच डीएफओ, रेंजर अउ एसडीएम मउका म पहुंचिन। वन विभाग के अधिकारी मनके मुताबिक मउत होय हाथी ह वाड्रफ नगर के रजखेता क्षेत्र ले रामानुजगंज वन परिक्षेत्र सोज आय रिहीस, जेखर हालचाल के जानबा आगूच ले विभाग ल मिल गे रिहीस। जेखर बाद टीम ह सरलग निगरानी करत रिहीस। उहें, दिनभर ए हाथी ल बसकटिया जंगल अउ तीर-तखार के इलाका मन म देखे गे रिहीस। फिलहाल हाथी के मउत के कारण बारे म खुलासा नइ होय हे। फेर विभाग ह पंचनामा कार्रवाई के बाद जांच सुरू कर देहे।
जेल-योग प्रशिक्षण कार्यक्रम
गरियाबंद जिला म कैदी मन ल मानसिक अउ शारीरिक तनाव ले मुक्ति देवाय खातिर ‘आर्ट ऑफ लिविंग‘ के चलत योग प्रसिक्षण कारीकरम सुरू करे गेहे। एमा अनुभवी प्रसिक्षक मन डहार ले कैदी मन ल योग, प्राणायाम अउ धियान के तरीका बारे म प्रसिक्षण दे जात हे। एखर मुख्य उद्देस्य कैदी मन ल उंखर आपराधिक मामला ले होवइया मानसिक तनाव अउ शारीरिक परेसानी ले राहत देवाना हे। जेल प्रशासन के अधिकारी मन ए पहल ल लाभकारी बतावत किहीन कि एला छत्तीसगढ़ के आने जेल मन म घलो लागू करे के योजना बनाय जात हे।
अउ अब थोरकुन समाचार सार म –
– मुख्यमंत्री विष्णुदेव साय के पगरइती म नौ सितंबर के राज्य मंत्रीपरिषद के बइठका मंत्रालय म राखे जाही।
– गौरेला-पेण्ड्रा-मरवाही जिला के पर्यटन जघा लखनघाट सोननदी म बूड़े ले एक झिन जवान लइका के मउत होगे। घटना जघा म जिला अउ पुलिस प्रशासन ह आम लोगन मन बर सूचना पट्टी लगाके चेतावनी देहे कि लापरवाही झन करय।
– संस्कृत भारती छत्तीसगढ़ अउ सरयूपारिन ब्राम्हण सभा के संयुक्त तत्वाधान म आज विराट संस्कृत विद्वत सम्मेलन राखे गे रिहीस, जेमा मुख्यमंत्री विष्णुदेव साय अउ विधानसभा अध्यक्ष डॉक्टर रमन सिंह सामिल होइन।
अउ
– जांजगीर-चांपा जिला के नैला म एक झिन व्यापारी ले सात लाख रूपिया ले जादा के लूटपाट होय के मामला आगू आय हे, पुलिस म मामला के जांच करत हे।