माओवाद उन्मूलन बर प्रभावित राज्य मनके शीर्ष अधिकारी मनके आज जगदलपुर म एक उच्च स्तरीय रणनीतिक बइठका होइस। एमा महाराष्ट्र, तेलंगाना, आंध्रप्रदेश अउ ओडिसा के अलावा केंद्रीय रिजर्व पुलिस बल-सीआरपीएफ, आईबी अउ गृह मंत्रालय के वरिष्ठ अधिकारी सामिल होइन। बइठका म सांति प्रयास ल मजबूत करे अउ प्रभावित राज्य ले नक्सलवाद के उन्मूलन बर सुरक्षा बल, खुफिया एजेंसी अउ प्रशासन के बीच तालमेल बढ़ाय उपर चर्चा होइस। ए बइठका म सीआरपीएफ के महानिदेशक जीपी सिंह, छत्तीसगढ़ के डीजीपी अरूण गौतम, एडीजी विवेकानंद सिन्हा समेत वरिष्ठ पुलिस अधिकारी मौजूद रिहीन।
ओति, सीआरपीएफ के महानिदेशक ज्ञानेन्द्र प्रताप सिंह ह कोंडागांव स्थित एक सौ अट्ठाइसवीं बटालियन मुख्यालय के दउरा करीन। ए दउरान ओमन अधिकारी मनले रणनीतिक गतिविधि मनके जानकारी लीन अउ माओवाद उन्मूलन संबधी काम के समीक्षा करीन। ओमन जवान मनले मुलाकात कर उंखर साहस अउ समर्पण के सराहना करीन।
एयरोकॉन-शुभारंभ
मुख्यमंत्री विष्णुदेव साय ह आज राजधानी रायपुर स्थित मेडिकल कालेज म आयोजित दू दिवसीय संगोष्ठी ‘‘एयरोकॉन दो हजार पच्चीस‘‘ के सुभारंभ करीन। ए मउका म मुख्यमंत्री ह किहीन कि ए संगोष्ठी कैंसर के उपचार अउ सोध म उपयोगी साबित होही। ओमन किहीन कि जीएसटी म कैंसर के दवाई अउ उपकरण मन ल सस्ता करे ले मरीज मन ल बड़ राहत मिले हे। आजे एम्स रायपुर म रोबोटिक सर्जरी सिस्टम के सुभारंभ करे गीस, जउन ह ए बताय बर काफी हे कि सरकारी अस्पताल नवीनतम तकनीक अपनाय म आगू हे। मुख्यमंत्री ह किहीन कि एआई ह कैंसर के पहिचान म उपयोगी सिध्द होवत हे अउ राज्य सरकार स्वास्थ्य सेवा मन म एला तेजी ले सामिल करत हे।
ए मउका म मुख्यमंत्री ह मेडिकल कालेज रायपुर के छात्र मन बर पैंसठ करोड़ रूपिया के लागत ले नवा छात्रावास के निर्माण के घोसना घलो करीन। संगोष्ठी ल विधानसभा अध्यक्ष डॉक्टर रमन सिंह अउ स्वास्थ्य मंत्री श्याम बिहारी जायसवाल ह घलो संबोधित करीन।
केंद्रीय वित्त मंत्री-जीएसटी
वस्तु अउ सेवा कर-जीएसटी के नवा व्यवस्था उपर केंद्रीय वित्त मंत्री निर्मला सीतारमण ह किहीन कि एखर ले नागरिक मनके उपभोग म सुधार होही अउ जेखर ले पुंजीगत व्यय उपर कोई प्रभाव नइ पड़य।
वित्त मंत्री ह बतइन कि सरकार उन निर्यातक मन ल सहयोग देके प्रयास उपर काम करत हे, जिंखर मन उपर पचास प्रतिसत अमेरिकी आयात सुल्क के प्रभाव पड़े हे। ओमन किहीन कि आत्मनिर्भर भारत के उद्देस्य न केवल सबो वस्तु मनके देस म उत्पादन करना हरय, बल्कि अनिश्चित वैश्विक व्यापार नीति मनके आत्मसम्मान के संग सामना करना आय।
शिक्षा मंत्री-समीक्षा
स्कूल शिक्षा अउ ग्रामोद्योग मंत्री गजेन्द्र यादव ह रायपुर म ग्रामोद्योग विभाग के समीक्षा बइठका लीन। बइठका म निर्णय ले गीस कि दोना पत्तल, कांसा, गोबर ले जैविक खाद, पपीता ले गुलकंद अउ फर्नीचर जइसे छोटे उद्योग मनके स्थापना कर हितग्राही मन ल वित्तीय सहायता दे जाही। जेखर ले रोजगार के नवा अवसर पैदा होही। संगेसंग रायपुर, बिलासपुर अउ दुरूग म सिल्प ग्राम अउ सिल्प नगरी के निर्माण के योजना बनाय जाही, ताकि कारीगर मन ल बेचे के बेहतर सुविधा अउ राज्य के सिल्प कला ल राष्ट्रीय स्तर म पहिचान दिलाय जा सकही।
मुख्य न्यायाधीश-आवास गृह लोकार्पण
छत्तीसगढ़ उच्च न्यायालय के मुख्य न्यायाधीश रमेश सिन्हा ह आज बिलासपुर के बोदरी स्थित उच्च न्यायालय परिसर सेक्टर-दो म कर्मचारी मन बर नवनिर्मित अस्सी एच-टाइप आवास गृह मनके लोकार्पण करीन। ओमन कर्मचारी मन ल आवंटित आवास मनके चाबी घलो सौंपिन।
मनेन्द्रगढ़-रेल परियोजना
रेल मंत्रालय ह चिरमिरी-नागपुर हॉल्ट रेल परियोजना बर दावा-आपत्ति के बाद भू-अर्जन के प्रक्रिया पूरा कर लेहे। ए संबंध म अधिसूचना जारी कर दे गेहे। एखर तहत छत्तीस हेक्टेयर ले जादा रकबा के एक सौ अंठानवे भूमि खंड मन ल परियोजना बर अधिग्रहित करे जाही। भू-प्रभावित मन ल जल्द ही मुआवजा बांटे के काम घलो सुरू करे जाही।
बच्चे-मौत
कोरबा जिला के ग्राम रिसदी करा तालाब म पाछू संझा नहाय बर गे तीन झन लइका मनके बूड़े ले मउत होगे। मिले जानकारी के अनुसार कोरबा पुलिस लाइन म रहइया पुलिसकर्मी मन के तीन झन लइका अपन परिजन मन ल बिना बताय तालाब म नहाय बर गे रिहीन। नहाय के दउरान गहराई म जाय ले लइका मनके मउत होगे। आसपास के लोगन मन शव ल पानी के उपर देखिन, तब एखर सूचना पुलिस ल दीन। एखर बाद पुलिस अधीक्षक सिध्दार्थ तिवारी समेत आला अधिकारी मन मउका म पहुंचिन अउ शव ल बाहर निकालिन।
कांग्रेस-मंत्री चुनौती
छत्तीसगढ़ उच्च न्यायालय ह राज्य मंत्रिमंडल म चौदहवां मंत्री ल सपथ देवाय के खिलाफ प्रदेस कांग्रेस के रिट याचिका ल मंजूरी कर लेहे। ए याचिका उपर सोमवार के सुनवाई होही। प्रदेस कांग्रेस कमेटी डहार ले संचार विभाग के अध्यक्ष सुशील आनंद शुक्ला ह ए रिट पिटीशन दायर करे हे। कांग्रेस ह संविधान के आने-आने धारा मन के हवाला देवत हुए मंत्रिमंडल म चौदहवां सदस्य ल सपथ देवाय उपर आपत्ति जताय हे।
साक्षरता-सप्ताह
देशव्यापी साक्षरता सप्ताह के सातवां अउ अंतिम दिन काली पूरा प्रदेस म महिला साक्षरता उपर केंद्रित आने-आने कारीकरम मनके आयोजन करे जाही। ए अवसर म सामुदायिक रेडियो, स्थानीय सिनेमा हाल अउ लाउड स्पीकर बैंड के माध्यम ले रेडियो जिंगल अउ लघु फिल्म मनके प्रसारण करे जाही। उहें, हर जिला म महिला साक्षरता ल बढ़ावा देबर संगोष्ठी, भाषण प्रतियोगिता, व्यवसायिक कौशल समाग्री मनके प्रदर्सन अउ जागरूकता आधारित सांस्कृतिक कारीकरम आयोजित करे जाही। ए आयोजन म महिला स्व-सहायता समूह, नव साक्षर महिला, छात्रा अउ अलग-अलग सामाजिक संगठन सामिल होही।
उहें, जांजगीर-चांपा कलेक्टर जनमेजय महोबे ह उल्लास साक्षरता कारीकरम के तहत आज कलेक्ट्रेट परिसर ले राष्ट्रव्यापी उल्लास साक्षरता रथ ल हरा झंडी दिखाके रवाना करीन।
मुख्यमंत्री-चक्रधर समारोह
रायगढ़ म आयोजित दस दिवसीय चक्रधर समारोह के काली संझा समापन होगे। समापन समारोह ल संबोधित करत हुए मुख्यमंत्री विष्णुदेव साय ह किहीन कि महाराजा चक्रधर सिंह ह संगीत ल राष्ट्रीय अउ अंतर्राष्ट्रीय पहिचान दिलाइन। ओमन किहीन कि रायगढ़ म कला अउ संगीत महाविद्यालय के घोसना पाछू बछर करे गे रिहीस, एखर बर बजट म प्रावधान कर दे गेहे। कुछ महिना बाद ए महाविद्यालय अस्तित्व म आ जाही।
अनंत चतुर्दशी
आज अनंत चतुर्दशी हरय। एखरे संग आज ले ही छोटे गणेश प्रतिमा मनके विजर्सन के सिलसिला सुरू हो गेहे। श्रध्दालु मन पूजा-अर्चना के संग गणपति बप्पा ल बिदाई दीन। प्रदेस के अलग-अलग जघा म आज हवन के संग ही भंडारा के घलो आयोजन करे गीस। राजधानी रायपुर म बड़े प्रतिमा मनके विसर्जन झांकी के संग आठ सितंबर के होही।
राज्यपाल रमेन डेका अउ मुख्यमंत्री विष्णुदेव साय ह प्रदेसवासी मन ल अनंत चतुर्दशी के बधाई अउ सुभकामना देहे।
पूर्व प्रांत प्रचारक-निधन
राष्ट्रीय स्वयं सेवक संघ के वरिष्ठ प्रचारक अउ छत्तीसगढ़ के पूर्व प्रांत प्रचारक शांता राम के काली संझा निधन होगे। उंखर निधन उपर मुख्यमंत्री विष्णुदेव साय, विधानसभा अध्यक्ष डॉक्टर रमन सिंह समेत राज्य मंत्रिमंडल के सदस्य, विधायक अउ बुध्दिजीवी मन श्रध्दांजलि अर्पित करीन।
जिले की चिट्ठी
आकाशवाणी रईपुर के प्रादेशिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के जम्मों केंद्र एके संगरा रिले करही। ए बखत के अंक म ‘‘कांकेर‘‘ जिला के गतिविधि के बारे म जानकारी दे जाही।