केंद्रीय गृहमंत्री अमित शाह ह बीजापुर जिला म तेलंगाना के सीमा म स्थित कर्रेगुट्टा पहाड़ी म ‘‘ऑपरेशन ब्लैक फॉरेस्ट‘‘ ल सफल बनाय वाले सीआरपीएफ, छत्तीसगढ़ पुलिस, डीआरजी अउ कोबरा बटालियन के जवान मन ल सम्मानित करीन हे। केंद्रीय गृहमंत्री ह ए सबो जवान मनके संग नई दिल्ली म भेंट करीन अउ ए अभियान ल सफल बनाय म बड़ भूमिका निभाय म सुभकामना दीन हे। ए बेरा म मुख्यमंत्री विष्णुदेव साय अउ उपमुख्यमंत्री विजय शर्मा ह घलो मौजूद रिहीन।
श्री शाह ह किहीन कि कर्रेगुट्टा पहाड़ी म बने माओवादी मनके मटेरियल डंप अउ सप्लाई चेन ल जवान मन ह कतकोन चुनौती के बाद घलो अपन पराक्रम ले नष्ट करीन, जउन कि सराहनीय हे। ओमन ह किहीन कि प्रधानमंत्री नरेंद्र मोदी के नेतृत्व म हमन भारत ल नक्सल मुक्त बनाके ही रहिबो।
माओवादी-आत्मसमर्पण
सुकमा जिला म आज नौ झिन माईलोगिन समेत बीस माओवादी मन ह आत्मसमर्पण करे हे। ए सबो माओवादी मन उपर कुल तैंतीस लाख रूपिया के इनाम राखे गे रिहीस। सुकमा पुलिस अधीक्षक कार्यालय म केंद्रीय रिजर्व पुलिस बल-सीआरपीएफ के उप पुलिस महानिरीक्षक राजेश कुमार पांडेय अउ जिला के पुलिस अधीक्षक किरण चव्हाण समेत आने वरिष्ठ अधिकारी मनके आगू म ए सबो माओवादी मन ह आत्मसमर्पण करीन हे। अब एमन ल राज्य सरकार के पुनर्वास नीति के चलत पचास-पचास हजार रूपिया के प्रोत्साहन रासि अउ आने सुविधा दे जाही। आत्मसमर्पण करइया माओवादी मन म पीएलजीए बटालियन म सक्रिय एक झिन हार्डकोर महिला माओवादी समेत आने कतकोन जघा म सक्रिय माओवादी मन सामिल हे। ए सबो मन ल आत्मसमर्पण कराय म जिला पुलिस बल, डीआरजी, सीआरपीएफ अउ कोबरा बटालियन के जवान मनके मुख्य भूमिका रहे हे।
केंद्रीय राज्यमंत्री-बैठक/प्रेसवार्ता
केंद्रीय सामाजिक न्याय अउ अधिकारिता राज्य मंत्री रामदास अठावले ह आज रायपुर म राज्य सरकार के अधिकारी मनके बइठका लेके कतकोन विभागीय योजना के समीक्षा करीन। बाद म पत्रकार मन ले चर्चा करत हुए केंद्रीय राज्य मंत्री ह बतइन कि सामाजिक न्याय अउ अधिकारिता मंत्रालय, दलीत अउ सवर्ण मनके संबंध ल मजबूत करे बर काम करत हे। ओमन ह बतइन कि छत्तीसगढ़ म बछर दू हजार तेईस-चौबीस म उत्पीड़न के एक हजार चौहत्तर मामला दरज होय हे अउ बछर दू हजार चौबीस-पच्चीस म उत्पीड़न के ग्यारा सौ ले जादा मामला दरज होय हे।
केंद्रीय राज्य मंत्री श्री अठावले ह रायपुर ले रायगढ़ बर रवाना होइन, जिंहा ओमन ह आज चक्रधर समारोह म सामिल होही।
मुख्यमंत्री-भवन शिलान्यास
मुख्यमंत्री विष्णुदेव साय ह आज नवा रायपुर के सेक्टर चौबीस म छत्तीसगढ़ स्टेट पावर कंपनीज के संयुक्त मुख्यालय भवन के सिलान्यास करीन। ए मउका म मुख्यमंत्री ह उम्मीद जतइन हे कि ए भवन ह तीनों पावर कंपनी के बीच तालमेल ल मजबूत करही। ओमन ह किहीन कि ए भवन ह उपभोक्ता मन ल एके छत के नीचे सबो सेवा उपलब्ध कराही। ए मउका म मुख्यमंत्री ह एक पेड़ मां के नाम अभियान के चलत मौलश्री के पउधा घलो लगइन।
बस्तर अस्पताल-एमओयू
बस्तर म दू सौ करोड़ रूपिया के लागत ले बने दू सौ चालीस बिस्तर वाले हाई-टेक सुपर स्पेशियलिटी अस्पताल सुरू होवइया हे। एखर बर आज मंत्रालय म मुख्यमंत्री विष्णुदेव साय अउ स्वास्थ्य मंत्री श्याम बिहारी जायसवाल के उपस्थिति म छत्तीसगढ़ चिकित्सा शिक्षा विभाग अउ कॉन्टिनेंटल हॉस्पिटल तेलंगाना के बीच एमओयू म हस्ताक्षर करे गीस। ए अनुबंध ह प्रधानमंत्री स्वास्थ्य सुरक्षा योजना के चलत होय हे।
ए मउका म मुख्यमंत्री ह किहीन कि राज्य सरकार के लक्ष्य हे कि आदिवासी अंचल समेत प्रदेस के हर मनखे तक विश्व स्तरीय स्वास्थ्य सुविधा पहुंचय।
बलरामपुर-हादसा
बलरामपुर जिला के धनेशपुर गांव म लुत्ती म माटी ले बने बांध के टूट जाय ले सास-बहु समेत तीन झिन लोगन मनके मउत होगे। उहें, तीन झिन आने लोगन मन ह घायल होय हे। जबकि दू झिन गायब हे।
जानबा के अनुसार ए जिला म पाछू दू दिन ले सरलग होत बरसा के सेति नदिया-नरवा ह उफान म हवय। एखर चलत बछर उन्नीस सौ इक्यासी म बने लुत्ती के बांध के एक हिस्सा ल टूट के बोहागे। भारी बरसा के सेति बांध के पानी ह खतरा के निसान ले उपर बोहात रिहीस। पाछू रतिहा जब ए बांध ह टूटिस, त सबले पहिली पानी ह निचला इलाका म बसे गांव तक पहुंचिस अउ दू मकान ह एखर चपेट म आगे। ए मकान म राहत दू परिवार के आठ झिन मनखे ह बोहागे। जेमा ले तीन झिन के शव ल बरामद करे गेहे। उहें, तीन झिन आने लोगन के इलाज चलत हे, जबकि दू झिन आने लोगन ल खोजे जात हे। घटना के सूचना मिलतेच जिला कलेक्टर अउ पुलिस अधीक्षक ह मउका म पहुंचिन। ऐति जिला प्रशासन, एनडीआरएफ, एसडीआरएफ अउ स्थानीय टीम ह राहत अउ बचाव काम म लगे हे।
मख्यमंत्री विष्णुदेव साय ह ए घटना बर दुख जतात हुए भरोसा दे हे कि ए कठिन बेरा म राज्य सरकार ह शोकाकुल परिवार के संग खड़े हे। ओमन ह किहीन कि तेज बरसा के सेति आय ए प्राकृतिक आपदा ले जनहानि होय के संग मकान अउ फसल ल घलो नुकसान पहुंचे हे। मुख्यमंत्री ह जिला प्रशासन ल निरदेस दीन हे कि ए घटना म होय जनहानि बर नियमानुसार सहायता रासि के संग मकान, फसल अउ पशु हानि के सर्वे कराके प्रभावित मन ल सहायता उपलब्ध कराय जाय।
जशपुर-दुर्घटना
जशपुर जिला के जुरूडांड गांव म गणेश विसर्जन के बेरा निकले जुलूस म अचानक तेज रफ्तार ले आत चारपहिया गाड़ी के घुसे ले तीन झिन लोगन के मउत होगे, जबकि अट्ठाईस झिन आने मनखे मन ह घायल हो गेहे, जेमा ले करीबन बारह झिन लोगन मनके हालत गंभीर बताय जात हे।
जानबा के अनुसार पाछू रतिहा जुरूडांड गांव के लोगन मन ह भगवान गणेश के मूर्ति ल ठंडा करे बर गाजा-बाजा के संग करीबन डेढ़ सौ मनख्े मन ह जुलूस निकाल के जात रिहीन, फेर इही बीच, बगीचा-जशपुर रद्दा म नसा म एक झिन गाड़ी चलइया ह अपन गाड़ी ल चलात हुए इही भीड़ म घुसा दीस, जेखर बाद लोगन मन ह ऐति-ओति भागे ल लगिन अउ इही बेरा म ए गाड़ी के चपेट म आय ले मउका म ही तीन झिन मनखे के मउत होगे।
घटना के सूचना मिलतेच जशपुर कलेक्टर रोहित व्यास अउ वरिष्ठ पुलिस अधीक्षक शशिमोहन सिंह समेत आने वरिष्ठ अधिकारी मन ह घटना स्थल म पहुंचिन अउ स्थिति के जानकारी लीन। आरोपी गाड़ी चलइया ल गिरफ्तार कर ले गेहे। उहें, गंभीर रूप ले घायल मरीज ल अच्छा इलाज बर अंबिकापुर भेजे गेहे।
ऐति, मुख्यमंत्री विष्णुदेव साय ह ए हादसा बर दुख जतात हुए मृतक मनके घरवाला मन बर दुख जताय हे। ओमन ह जिला प्रशासन ले घायल मनके पूरा इलाज कराय के बेवस्था करे अउ एमन ल जरूरी मदद देके निरदेस दीन हे। राज्य सरकार कोति ले मृतक मनके घरवाला मन ल पांच-पांच लाख रूपिया अउ घायल मन बर पचास-पचास हजार रूपिया के सहायता रासि दे जाही।
ईडी छापा
प्रवर्तन निदेशालय-ईडी के टीम ह आज रायपुर, भिलाई, राजिम अउ बिलासपुर म कृषि कारोबारी मनके ठिकाना म छापा मारिन। बताय जात हे कि कृषि कारोबार के जरिया ले मनि लॉन्ड्रिंग अउ वित्तीय अनियमितता के सेति ए कार्रवाई करे गेहे। ईडी के आने-आने टीम ह छापा मारके कारोबारी मनके इंहा कागजात के जांच पड़ताल करीन।
फुटबॉल
नारायणपुर के रामकृष्ण मिशन आश्रम म चलत राष्ट्रीय सब जूनियर गर्ल्स फुटबॉल चैंपियनशिप के खिताब ल उत्तर प्रदेस के टीम ह जीते हे। काली खेले गे फाइनल मुकाबला म उत्तर प्रदेस के टीम ह केरल ल एक के मुकाबला दू गोल ले हराइन। समापन अवसर म सांसद महेश कश्यप ह विजेता टीम अउ खिलाड़ी मन ल इनाम दीन।
ऑल इंडिया फुटबॉल फेडरेशन कोति ले होय ए प्रतियोगिता ह पाछू सोलह अगस्त ले सुरू होय रिहीस। ए प्रतियोगिता म देस के कुल चौदह टीम ह भाग लीन।