आज दिनभर के खबर ल अपन गुरतुर छत्तीसगढ़ी भाखा म पढ़व

विधानसभा सत्र
छत्तीसगढ़ विधानसभा के मानसून सत्र आज ले शुरू होगे हे। सत्र शुरू होय के पहिली विधानसभा कार्यमंत्रणा समिति के एक ठिन बइठका होइस। विधानसभा अध्यक्ष डॅाक्टर चरणदास महंत के अध्यक्षता म होय ये बइठका म मुख्यमंत्री भूपेश बघेल, संसदीय कार्यमंत्री रविंद्र चैबे केसंग नेता प्रतिपक्ष धरमलाल कौशिक ह घलो मौजूद रीहिन। संगेसंग लोक निर्माण मंत्री ताम्रध्वज साहू, पंचायत अउ ग्रामीण विकास मंत्री टी.एस. सिंहदेव, वनमंत्री मोहम्मद अकबर, नगरीय प्रशासन मंत्री डॅाक्टर शिव डहरिया घलो सामिल रहिन।
सदन म पहिली दिन दिवंगत नेता मन ल श्रद्धंाजलि दे गीस। पूर्व मुख्यमंत्री अजीत जोगी सहित चार आने आने दिवंगत नेता मन ल श्रद्धंाजलि दे गीस। एमा अविभाजित मध्यप्रदेश शासन के पूर्वमंत्री डेरहू प्रसाद धृतलहरे, पूर्वमंत्री बलिहार सिंह अउ लोकसभा के पूर्व सांसद रजनीगंधा देवी सामिल हे। उंहें सदन म जून म लद्दाख के गलवान घाटी म शहीद जवान मन ल श्रद्धंाजलि दे गीस। ए बेरा म मुख्यमंत्री भूपेश बघेल ह पूर्व मुख्यमंत्री अजीत जोगी ल सुरता करत कीहिन कि प्रदेश के पहिली मुख्यमंत्री अजीत जोगी ह बहुमुखी प्रतिभा के धनी रीहिन। एखर बाद विधानसभा के कार्यवाही काली तक बर स्थगित कर दे गीस।
बतादन कि विधानसभा म कोरोना संक्रमण ल देखत ए दारी के सत्र के दउरान सोशल डिस्टेसिंग के संगेसंग केंद्र अउ राज्य सरकार डहार ले जारी करे गे दिशा निर्देश के पालन करे जात हे। सदन म मुख्यमंत्री सहित सबो मंत्री अउ विधायक मनके आसन के आगू ग्लास के पार्टिशन लगाय गेहे। सत्र अवधि म सदन अउ परिसर ल हर रोज सेनेटाइज करे जाही।
लाइसेंस परमिट वैधता
केंद्रीय सड़क परिवहन अउ राजमार्ग मंत्रालय ह मोटर गाड़ी के दस्तावेज के वैधता इकतीस दिसंबर तक बढ़ाय के फैसला लेहे। जेमा फिटनेस, परमिट, लाइसंेस, पंजीकरण, या फेर कोनो आने आने संबंधित दस्तावेज सामिल हे।
देश म कोरोना वायरस महामारी ले आय स्थ्तिि ल देखत ए फैसला ले गीस हे। कानून प्रर्वतन अधिकारी मन ल सलाह दे गीस हे कि अब अइसे दस्तावेज के वैधता इकतीस दिसंबर तक वैध माने जाही। ए फैसला ले लोगन मन ल परिवार संबंधित सेवा हासिल करे म मदद मिले के संभावना हे।
जानबा के मुताबिक कोरोना महामारी लाॅकडाउन के सेती दस्तावेज मनके वैधता अवधि तीसर घांव बढ़ाय गीस हे। एखर ले पहिली ये अवधि तीस सितंबर रीहिस हे।
मनरेगा राशि
केंद्रीय ग्रामीण विकास मंत्रालय डहार ले महात्मा गांधी राष्ट्रीय ग्रामीण रोजगार गारंटी योजना-मनरेगा के तहत प्रदेशभर के मजदूर मन ल भुगतान बर पैंतालिस करोड़ अस्सी लाख रूपिया जारी करे गेहे।
राज्य म चालू वित्तीय बछर म मनरेगा के अंतर्गत अब तक पच्चीस लाख अंठानबे हजार परिवार मन ल सीधा रोजगार देवत दू हजार इंक्यानबे करोड़ रूपिया ले जादा के मजूरी भुगतान करे जा चुके हे। एमा राज्य सरकार डहार ले मनरेगा मजदूर मन ल उपलब्ध कराय गे उपराहा पचास दिन के रोजगार के एवज म चैरानबे करोड़ बंयासी लाख रूपिया के मजदूरी भुगतान घलो सामिल हे। सामग्री मद म घलो तीन सौ चैरासी करोड़ बारा लाख रूपिया के भुगतान करे गेहे।
एति पंचायत अउ ग्रामीण विकास मंत्री टी.एस. सिंहदेव ह बताइन हे कि चालू वित्तीय बछर म पांच महीना ले कमती बेरा म बछर भर के लक्ष्य के करीबन सत्तर फीसदी हासिल कर ले गेहे।
धान खरीदी पंजीयन
प्रदेश म धान खरीदी बर किसान मनके पंजीयन अवइया इकतीस अक्टूबर तक करे जाही। चालू खरीफ मौसम म समर्थन मूल्य म धान खरीदे के पहिली पाछू बछर जइसन किसान मनके पंजीयन करे जाही। एखर बर नवा किसान मनके पंजीयन के संगेसंग पाछू खरीफ मौसम के पंजीकृत किसान मनके विवरण ल घलो दर्ज करे जाही। ए सबो काम ल सतरा अगस्त ल लेके इकतीस अक्टूबर तक पूरा करे के लक्ष्य राखे गेहे ।
राज्य शासन के फैसला के मुताबिक पाछू बछर म होय धान खरीदी बर पंजीकृत किसान मन ल चालू बछर म धान खरीदी बर पंजीकृत माने जाही। उंहें ए घांव फेर ले पंजीयन कराय के जरूरत नइ होही।
 जीएसटी छूट
केंद्रीय वित्त मंत्रालय ह कीहिन हे कि चालीस लाख रूपिया तक के सालाना कारोबार ल वस्तु अउ सेवाकर जीएसटी ले छूट दे गेहे। एखर ले पहिली ए सीमा ह बीस लाख रूपिया तक रीहिस। वित्त मंत्रालय ह कीहिन हे कि एखर अलावा डेढ़ लाख रूपिया तक के सालाना कारोबार म संयोजन योजना के विकल्प चुने जा सकत हे। ए योजना के तहत सिरिफ एक प्रतिशत कर देबर पड़थे।
कोरोना मरीज
छत्तीसगढ़ म कोरोना संक्रमण के मामला सरलग बाढ़त जात हे। आज घलो आने आने जिला ले कोरोना ले संक्रमित नवा मरीज मिले के पुष्टि होय हे।
राजनंादगंाव म जिला कंाग्रेस अध्यक्ष समेत उनसठ झिन नवा मरीज मिले हे। एमा ले तीस झिन राजनंादगंाव शहरी क्षेत्र ले हवय जबकि बाकि उनतीस झिन मरीज तीर तखार के हवय। ए सबो मन ल पेण्ड्री के कोविड अस्पताल म भर्ती कराय गेहे । इही जिला के जेल म घलो एक झन कोरोना मरीज के पहिचान करे गीस हे।
कंाकेर जिला म आज तेईस झिन नवा कोरोना मरीज के पहिचान करे गीस। जेमा तालबेड़ा शिविर म पदस्थ बीएसएफ के तेरा झिन जवान सामिल हे । अइसने बीजापुर जिला के पुसगुड़ी रहइया कोरोना संक्रमित एक झिन सियान के रायपुर के मेकाहारा अस्पताल म इलाज के बेरा मउत होगे। त उंहें कबीरधाम जिला म घलो काली रतिहा एक झिन कोरोना मरीज के मउत होगे।
ओति महासमुंद जिला म कोरोना मरीज के इलाज बर दू ठिन नवा एंबुलेंस के सुविधा उपलब्ध कराय गेहे।
ई-लोक अदालत
कोरोना महामारी अउ लाॅकडाउन के सेती प्रदेश के आने आने अदालत मन म लंबित प्रकरण के पक्षकार मन ल  तुरते न्याय दिलाय खातिर छत्तीसगढ़ राज्य विधिक सेवा प्राधिकरण बिलासपुर ह बारा सितंबर के पूरा प्रदेश भर म ई-लोक अदालत के आयोजन करही।
प्राधिकरण के मुख्य संरक्षण अउ छत्तीसगढ़ उच्च न्यायालय के मुख्य न्यायाधीश न्यायमूर्ति पी.आर. रामचंद्र मेनन के मार्गदर्शन म ए ई-लोक अदालत के प्रकिया पूरा करे जाही। जेमा पक्षकार मन अपन मोबाईल फोन ले जउन जगा म हावय उंहा ले एक ठिन लिंक ले जुड़के अपन प्रकरण के निराकरण करा सकत हे। एखर बारे म अउ जादा जानकारी राज्य विधिक सेवा प्राधिकरण के वेबसाईट ले ले जा सकत हे।
मन की बात
प्रधानमंत्री नरेंद मोदी ह इतवार के आकाशवाणी के मन की बात कार्यक्रम म देश अउ विदेश के मनखे मन ले अपन विचार साझा करही। ए मासिक रेडियो कार्यक्रम के अड़सठवा कड़ी होही।
श्री मोदी ह ट्वीट म कीहिन कि ओमन ल ए कार्यक्रम बर लोगन मनके विचार अउ सुझाव के अगोरा हे । ओमन कीहिन कि लोगन मन माई जीओव्ही ओपन फोरम या फेर नमो एप म अपन विचार साझा कर सकत हे। एखरे संग टोल फ्री नंबर – एक आठ शून्य शून्य एक एक सात आठ शून्य शून्य म फोन करके संदेस रिकार्ड करा सकत हे। त उंहें लोगन मन प्रधानमंत्री ल सीधा अपन सुझाव देबर एक नौ दू दू म मिस्ड काॅल देके एस एम एस म मिले लिंक ल फाॅलो कर सकत हे।
गा्रमीण सड़क विकास अभिकरण-आवेदन
राज्य शासन के पंचायत अउ गा्रमीण विकास विभाग के एजेंसी छत्तीसगढ़ ग्रामीण सड़क विकास अभिकरण ह स्टेट क्वालिटी माॅनिटर्स ल कार्यान्वित करे बर आवेदन मंगाय हे।
एखर बर कार्यपालन अभियंता या सेवानिवृत्त अभियंता अउ छत्तीसगढ़ के संगेसंग पड़ोसी राज्य के इंजीनियरिंग या पाॅलिटेक्निक काॅलेज के सेवानिवृत्त         प्राध्यापक मनले आवेदन मंगाय गीस हे। आवेदक मन ल ये व्यावसायिक योग्यता के संगेसंग रद्दा निर्माण अउ एखर रखरखाव के अनुभव होना घलो जरूरी हे। आवेदन के आखरी तारीख नौ सितंबर हे। ए बारे म अउ जादा जानकारी  छत्तीसगढ़ गा्रमीण सड़क विकास अभिकरण के गुणवत्ता नियंत्रण प्रकोष्ठ ले ले जा सकत हे।