प्रदेस के बस्तर संभाग म पाछु दू दिन ले जोरदरहा बरसा होय के सेती इहां के लोगन मन उपर असर पड़े हे। जगदलपुर म सोमवार रतिहा ले होवत बरसा के सेती इंद्रावती के संगेसंग कतकोन नंदियां-नरवा म पानी बाढ़ गेहे। जिला म बाढ़ के स्थिति ल देखत सात ठिन जघा म राहत सिविर खोले गेहे, जिहां पीड़ित मन ल राखे गेहे। राज्य आपदा मोचन बल के जवान मन ह पैंसठ झिन लोगन मन ल बाढ़ वाले जघा ले सुरक्षित निकालीन। इहां कोनों-कोनांं गांव के लोगन मन ह घर के ऊपर छत म फंसे रिहीन, जेमा माईलोगिन अउ लइका मन घलो रिहीन। जिला प्रशासन ह वायुसेना ले तुरते मदद मांगे बाढ़ म फंसे छह झिन गांव के लोगन मन ल निकालीन।
ऐति, कांगेर घाटी राष्ट्रीय उद्यान क्षेत्र म राष्ट्रीय राजमार्ग क्रमांक-तीस म कुटुमसर ले दरभा जवइया रद्दा म नरवा पार करत बेरा कार सवार एके परिवार के चार झिन लोगन मन बोहा गे। हमर बस्तर संवाददाता ह बतईन कि चारों लोगन के सव बरामद कर ले गेहे। एमा दू झिन लइका घलो सामिल हे। ए परिवार तमिलनाडु के रहइया हरय।
उहें, सरलग बरसा के सेती बास्तानार क्षेत्र के सांवगेल-बीजापारा गांव म घर के गिरे ले एक झिन मनखे के मउत होगे।
ऐति, सुकमा जिला म पाछु छत्तीस घंटा ले होवत बरसा के सेती सुकमा और दोरनापाल के बीच कतकोन जघा म पानी भर गेहे। संगेसंग गीदम नाला, झीरम अउ दरभा रद्दा म अवई-जवई प्रभावित होय हे। जिला प्रसासन ह भारी बरसा ल देखत आम लोगन मन ल सतर्क रेहे अउ सुरक्षा नियम के पालन करे के अपील करे हे।
मुख्यमंत्री विष्णुदेव साय ह अपन जापान प्रवास के दउरान बस्तर संभाग म होय जोरदरहा बरसा के सेती बाढ़ के स्थिति के जानबा लीन। ओमन राजस्व सचिव अउ आपदा राहत आयुक्त रीना बाबासाहेब कंगाले अउ बस्तर संभाग के आयुक्त डोमन सिंह ले फोन म गोठबात करके राहत अउ बचाव काम के जानबा लीन अउ जरूरी दिसा-निरदेस दीन। मुख्यमंत्री ह अधिकारी मन ल किहीन कि एसडीआरएफ के टीम ल हाईअलर्ट म रखे जाय अउ राहत काम म कोनों प्रकार के कोताही झन बरतें। ओमन बस्तर संभाग के जम्मों कलेक्टर मन ल निचला इलाका म मुनादी कराके लोगन मन ल सावधान रेहे अउ सुरक्षित जघा म जल्दी पहुंचाय के निरदेस दीन।
कैबिनेट-पीएम स्वनिधि
केन्द्रीय मंत्रिमंडल ह आज प्रधानमंत्री स्ट्रीट वेंडर्स आत्मनिर्भर निधि – पीएम स्वनिधि योजना के पुनर्गठन ल मंजूरी दे देहे। मंत्रिमंडल ह करजा के बेरा ल इकतीस दिसंबर दू हजार चौबीस ले बढ़ाके इकतीस मार्च दू हजार तीस तक कर देहे। ए योजना के कुल खरचा सात हजार तीन सौ बत्तीस करोड़ रूपिया हवय।
जानबा के मुताबिक सरकार ह कोविड-नाइंटीन महामारी के दउरान परेसानी के सामना करइया रेहड़ी-पटरी वाला मनके मदद बर एक जून दू हजार बीस के प्रधानमंत्री स्वनिधि योजना सुरू करे रिहीन।
माओवादी-मुठभेड़
छत्तीसगढ़ के नारायणपुर और महाराष्ट्र के गढ़चिरौली सीमा म आज सुरक्षा बल मनके संग होय मुठभेड़ म तीन महिला के संग चार माओवादी मारे गेहे। जम्मों माओवादी मनके सव बरामद कर ले गेहे। गढ़चिरौली के डीआईजी अंकित गोयल ह बतईन कि सी-सिक्सटी अउ केन्द्रीय रिजर्व पुलिस बल-सीआरपीएफ के संयुक्त टीम डहार ले ए कार्रवाई करे गीस। ओमन बतईन कि घटना वाले जघा ले सुरक्षा बल मन ह एक ठिन एस.एल.आर., दू इंसास अउ एक थ्री नॉट थ्री राइफल बरामद करे हे।
माओवादी-आत्मसमर्पण
बीजापुर जिला म आज तीस झिन माओवादी मन ह आत्मसमर्पण करे हे, जेमा ले बीस माओवादी मन उपर इक्यासी लाख रूपिया के इनाम राखे गे रिहीस। ए माओवादी मन ह दंतेवाड़ा रेंज के पुलिस उप महानिरीक्षक कमलोचन कश्यप, केन्द्रीय रिजर्व पुलिस बल के उप महानिरीक्षक बी.एस. नेगी अउ बीजापुर जिला के पुलिस अधीक्षक जितेन्द्र यादव के आगू आत्मसमर्पण करीन। ए जम्मों माओवादी मन उपर आने-आने घटना म सामिल रेहे के आरोप हे। आत्मसमर्पण करइया ए माओवादी मन ल राज्य सरकार के पुनर्वास नीति के तहत पचास-पचास हजार रूपिया के प्रोत्साहन राशि दे गीस।
नगर पालिका/सूरत भ्रमण
राज्य के जम्मांं पचपन नगर पालिका मनके अध्यक्ष अउ मुख्य नगर पालिका अधिकारी मन देस के सबले साफ सहर म सामिल गुजरात के सूरत के तीन दिवसीय अध्ययन भ्रमण म जाही। पहिली बैच काली अट्ठाईस अगस्त के निकलही, जउन मन तीस अगस्त तक सूरत म साफ-सफाई के बारे म जानबा लीहीं। ए बैच म अट्ठाईस नगर पालिका के अध्यक्ष अउ मुख्य नगर पालिका अधिकारी मन सामिल होही। त उहें, दूसर बैच म सत्ताईस नगर पालिका के अध्यक्ष अउ मुख्य नगर पालिका अधिकारी मन एक ले तीन सितंबर तक जनप्रतिनिधि, अधिकारी अउ उहां के लोगन मन ले गोठबात करके सहर ल साफ अउ सुंदर बनाय के तरीका सीखही। अपन अध्ययन प्रवास के दउरान एमन उहां के नगर निगम के सफाई व्यवस्था, कचरा सकेले अउ अपशिष्ट प्रबंधन के संगेसंग सहर ल साफ-सुथरा राखे बर अपनाय गे कायदा के बारे म बने ढंग ले जानबा लीहीं।
राज्य पुलिस-आईपीएस पदोन्नत
राज्य पुलिस सेवा के सात झिन अधिकारी मन ल भारतीय पुलिस सेवा-आईपीएस म प्रमोशन करे गेहे। ए बारे म केन्द्रीय गृह मंत्रालय डहार ले अधिसूचना जारी कर दे गेहे। जउन अधिकारी मन ल आईपीएस बनाय गेहे, ओमा पंकज चंद्रा, भावना पांडेय, विमल कुमार बैस, हरीश ठाकुर, वेदव्रत सिरमौर, राजश्री मिश्रा अउ श्वेता श्रीवास्तव सिन्हा सामिल हे।
गणेश चतुर्थी
प्रदेस के संगेसंग आज पूरा देस म गणेश चतुर्थी के परब भक्तिभाव अउ उछाह के संग मनाय जात हे। बुद्धि, विवेक अउ सौभाग्य-समृद्धि के प्रतीक गणपति जी के दस दिन के उत्सव आज ले सुरू होके चतुर्दशी तक चलही। राजधानी रायपुर के संगेसंग प्रदेश के जम्मों जिला मन म भगवान गणेश के मूर्ति विराजित होवत हे। जघा-जघा ढोल-नगाड़ा अउ गणपति बप्पा मोरिया के जयकारा के संग गणेश मूर्ति मन ल सार्वजनिक पंडाल अउ घर मन म बइठाय जात हे।
राष्ट्रपति द्रौपदी मुर्मु, प्रधानमंत्री नरेन्द्र मोदी, छत्तीसगढ़ के राज्यपाल रमेन डेका अउ मुख्यमंत्री विष्णदेव साय ह गणेश चतुर्थी के मउका म लोगन मन ल बधाई अउ सुभकामना दे हवय।
चक्रधर समारोह
रायगढ़ के रामलीला मैदान म अब ले थोरिक देर बाद चक्रधर समारोह के सुभारंभ राज्यपाल रमेन डेका करही। दस दिन तक चलइया ए समारोह म देस-प्रदेस के बड़का कलाकार मन अपन प्रस्तुति दीहीं समारोह के पहिली दिन केन्द्रीय पर्यटन अउ संस्कृति मंत्री गजेन्द्र सिंह शेखावत के संगेसंग केन्द्रीय आवासन अउ सहरी कार्य राज्यमंत्री तोखन साहू घलो सामिल होही।
चक्रधर समारोह के सुभारंभ के मउका म स्वर्गीय वेदमणि सिंह ठाकुर के शिष्य मन डहार ले गणेश वंदना करे जाही, जेखर बाद दिल्ली के पंडित राजेन्द्र गंगानी ह कथक नृत्य पेस करही अउ संगेसंग जाने-माने कवि डॉक्टर कुमार विश्वास डहार ले काव्यपाठ सुनाय जाही। ए समारोह म पहिली बार केन्द्रीय संस्कृति मंत्रालय डहार ले इंपैनल्ड लोक कलाकार अउ दक्षिण मध्य सांस्कृतिक केन्द्र के कलाकार मन घलो अपन प्रस्तुति दीहीं।
रायपुर स्टेशन-एमयूटीएस मशीन
दक्षिण पूर्व मध्य रेलवे के रायपुर रेलमंडल म मोबाइल यू.टी.एस. मशीन के सुविधा सुरू करे गेहे। रायपुर रेलमंडल के मंडल रेल प्रबंधक दयानंद ह ए सेवा के सुरूआत खुदे टिकट काट के करीन।
ए मउका म रायपुर रेलमंडल के वरिष्ठ मंडल वाणिज्य प्रबंधक अवधेश कुमार त्रिवेदी ह किहीन कि मोबाइल यू.टी.एस. मसीन के सुविधा सुरू होय ले रेलवे स्टेसन म टिकट बर लगइया भीड़ ह कम हो जही।
अब मौसम के हाल…
मौसम विभाग के मुताबिक एक ठिन निम्नदाब के क्षेत्र उत्तर पश्चिम बंगाल के खाड़ी अउ ओड़िशा तट म बने हे अउ संगेसंग ऊपरी हवा म चक्रीय चक्रवाती घेरा घलो बने हे। उहें, मानसून द्रोणिका बीकानेर, जयपुर, छत्तीसगढ़ के पेण्ड्रा रोड अउ जमशेदपुर ले चिन्हित निम्नदाब के केन्द्र ले होके गुजरत हे। मौसम विज्ञानी एच.पी. चन्द्रा ह बतईन कि एखर प्रभाव ले अवइया चौबीस घंटा के दउरान दक्षिण छत्तीसगढ़ के कोनों-कोनों जिला म भारी ले अतिभारी बरसा हो सकथे।