राष्ट्रीय बुनकर अधिवेशन आज ले राजधानी रायपुर म सुरू हो गेहे। सहकारी भारती डहार ले आयोजित दू दिवसीय ए अधिवेशन के उद्घाटन सत्र म उपमुख्यमंत्री अरूण साव, सहकारिता मंत्री केदार कश्यप अउ श्रम मंत्री लखनलाल देवांगन सामिल होइन। ए मउका म मुख्यमंत्री विष्णुदेव साय के वीडियो संदेस के प्रसारण करे गीस। अपन संदेस म मुख्यमंत्री ह छत्तीसगढ़ म सहकारिता ल मजबूत करे बर, करे जात काम मनके जानकारी दीन। ओमन अधिवेसन के सफलता बर आयोजक अउ प्रतिभागी मन ल सुभकामना दीन।
उद्घाटन सत्र ल संबोधित करत हुए उपमुख्यमंत्री श्री साव ह किहीन कि देस के आर्थिक तरक्की म बुनकर मनके बड़ योगदान हे। बुनकर मन कडी़ मेहनत अउ लगन ले कपड़ा उद्योग मन ल मजबूती देवत हे। ओमन किहीन कि सहकारिता के माध्यम ले बुनकर मनके आर्थिक अउ सामाजिक स्थिति ल नवा आयाम दे जा सकत हे।
उहें, सहकारिता मंत्री केदार कश्यप ह किहीन कि सहकार ले समृध्दि के तहत छत्तीसगढ़ म चौव्वन ठन पहल करे गेहे, जउन ह सीधा गांव-गरीब अउ किसान मन ले जुड़े हुए हे। ओमन बतइन कि राज्य म बीस हजार हथकरघा कार्यरत हे, जेखर माध्यम ले साठ हजार ले जादा लोगन मन ल रोजगार मिलत हे। राज्य म तीन सौ उनतीस पंजीकृत प्राथमिक बुनकर सहकारी समिति महासंघ ले जुड़े हुए हे, जउन ह सरकारी वस्त्र उत्पादन म सक्रिय हे।
अधिवेशन ल श्रम मंत्री लखनलाल देवांगन, सहकार भारती के राष्ट्रीय महामंत्री दीपक कुमार चौरसिया अउ अध्यक्ष डॉक्टर उदय जोशी ह घलो संबोधित करीन। ए अधिवेशन म अट्ठाईस राज्य मन ले आने-आने बुनकर संघ के एक हजार ले जादा प्रतिनिधि मन भाग लेवत हे।
मुख्यमंत्री-जापान
मुख्यमंत्री विष्णुदेव साय के नेतृत्व म छत्तीसगढ़ के एक ठन प्रतिनिधिमंडल ह ए बेरा म जापान अउ दक्षिण कोरिया के दउरा म हे। ए दौरान मुख्यमंत्री ह आज टोक्यो म जापान एक्सटर्नल ट्रेड ऑर्गनाइजेशन-जेट्रो के अधिकारी-नाकाजो काजुया, एंडो युजी अउ हारा हारूनोबू के संगे बइठका करीन। ए मउका म मुख्यमंत्री ह आईटी टेक्सटाइल, ऐयरो स्पेस, ऑटोमोबाइल, इलेक्ट्रानिक्स अउ स्वच्छ ऊर्जा के क्षेत्र म छत्तीसगढ़ के संभावना मन उपर चर्चा करीन। मुख्यमंत्री जेट्रो ल प्रदेस म निवेस बर आमंत्रित करीन। जेट्रो के अधिकारी मन ह किहीन कि जेट्रो जापान अउ दुनिया के बीच व्यापार अउ निवेस ल बढ़ावा देथे। जेखर ले कंपनी ल वैश्विक स्तर म विस्तार करे म मदद मिलथे। जेट्रो के अधिकारी मन छत्तीसगढ़ के संग व्यापारिक संबंध ल सशक्त करे म रूची देखइन।
उहें, मुख्यमंत्री ह आज राष्ट्रीय अंतरिक्ष दिवस म ‘‘इंडियन ईएमबी टोक्यो‘‘ डहार ले आयोजित ‘‘डीप स्पेस-टू द मून एंड बियॉन्ड‘‘ प्रदर्सनी के अवलोकन घलो करीन।
राज्याल-संगोष्ठी
राज्यपाल रमेन डेका ह किहीन हे कि जलवायु परिवर्तन इक्कीसवीं सदी के सबले बड़े चुनौती हरय अउ एखर समाधान बर सामूहिक प्रयास जरूरी हे। ओमन किहीन कि जब हम प्रकृति के रक्षा करबो, तभे प्रकृति हमर रक्षा करही। श्री डेका ह पंडित रविशंकर शुक्ल विश्वविद्यालय दक्षिण एशियाई जलवायु परिवर्तन जर्नलिस्ट फोरम अउ विश्वविद्यालय के संयुक्त तत्वावधान म आयोजित संगोष्ठी ल संबोधित करत रिहीन।
राज्यपाल ह किहीन कि धरती के तापमान असामान्य रूप ले बाढ़त हे। जेखर ले मौसम चक्र असंतुलित हो गेहे। छत्तीसगढ़ ह घलो एखर ले अछूता नइ हे। ओमन किहीन कि कोयला आधारित उद्योग, जंगल के कटाई अउ रासायनिक उर्वरक मनके बहुत जादा उपयोग, ग्रीन हाउस गैस के उत्सर्जन ल बढ़ावत हे। जेखर ले पर्यावरण के संगेसंग कृषि, जल स्त्रोत अउ आजीविका उपर प्रतिकूल प्रभाव पड़त हे।
हाईकोर्ट-रोस्टर प्रणाली
छत्तीसगढ़ उच्च न्यायालय ह नया रोस्टर जारी करे हे, जउन ह अवइया छब्बीस अगस्त ले लागू होही। आधिकारिक जानकारी के अनुसार बिसेस पीठ के जिम्मेदारी मुख्य न्यायाधीश न्यायमूर्ति रमेश सिन्हा स्वयं संभालही। उहें, डिवीजन बेंच-दू के जिम्मेदारी न्यायमूर्ति संजय के. अग्रवाल अउ न्यायमूर्ति संजय कुमार जायसवाल ल दे गेहे। फेर, एकल पीठ-तीन के दायित्व न्यायमूर्ति पार्थ प्रतिम साहू ल सौंपे गेहे।
रेलवे-पूजा स्पेशल ट्रेन
रेलवे प्रशासन ह राष्ट्रीय तिहार के मउका म रेलगाड़ी म होवत भीड़ ल देखत हुए अउ हजरत निजामुद्दीन स्टेसन के बीच आठ फेरा बर पूजा स्पेशल ट्रेन चलाय के निर्णय लेहे। ए ट्रेन पांच अक्टूबर ले तेईस नवंबर तक चलही। ए ट्रेन के ठहराव दक्षिण-पूर्व मध्य रेलवे के रायपुर, उसलापुर, पेण्ड्रा रोड, अनूपपुर, शहडोल, उमरिया, कटनी, मुरवाड़ा, दमोह, सागर, झांसी, आगरा कैंट, मथुरा जंक्शन अउ पलवार स्टेसन म दे गेहे।
उहें, दुर्गा पूजा के दउरान नेताजी सुभाषचंद्र बोस-इतवारी अउ शालीमार के बीच स्पेशल ट्रेन के परिचालन पांच फेरा बर करे गेहे। ए ट्रेन अट्ठाईस सितंबर ले दू अक्टूबर तक चलही।
पोला तिहार
छत्तीसगढ़ के लोकपरब पोरा आज प्रदेसभर म पारंपरिक उल्लास के संग मनाय जात हे। ए मउका म किसान मन अच्छा फसल के कामना के संग अपन नांगर अउ बइला के पूजापाठ करीन। लइका मन माटी ले बने बइला अउ जाता जइसन खिलौना मनके आनंद उठाइन। पोरा तिहार, कृषि संस्कृति म पशुधन के महत्व ल दर्साने वाला परब हरय।
कृषि मंत्री रामविचार नेताम के रायपुर स्थित निवास म आज पोरा तिहार धूमधाम ले मनाय गीस। कारीकरम म राज्यपाल रमेन डेका घलो सामिल होइन। ओमन भगवान शंकर के पूजापाठ करके प्रदेसवासी मन ल पोरा तिहार के सुभकामना दीन। ए मउका म केंद्रीय राज्यमंत्री तोखन साहू, उपमुख्यमंत्री अरूण साव, मंत्री गजेन्द्र यादव, खुशवंत साहेब, पूर्व राज्यपाल रमेश बैस समेत कई झन विधायक अउ जनप्रतिनिधि मन मौजूद रिहीन।
ऐति, पूर्व मुख्यमंत्री भूपेश बघेल के मुख्य आतिथ्य म रायपुर स्थित सुभाष स्टेडियम म तीजा-पोरा के तिहार मनाय गीस। कारीकरम म बड़ संख्या म महिला अउ लइका मन सामिल होइन।
उहें, पोरा तिहार के मउका म प्रदेस के ग्रामीण क्षेत्र मन म बइला दौड़ समेत दूसर पारंपरिक खेल मनके आयोजन करे जात हे।
डीएड/बीएड-काउंसिलिंग
राज्य के बी.एड., डी.एल.एड. बी.ए.-बी.एड. अउ बी.एस.सी.बी.एड. पाठ्यक्रम म प्रवेस बर ऑनलाइन आवंटन सूची जारी कर दे गेहे। ए परीक्षा मन म प्रवेस बर अभ्यर्थी एस.सी.ई.आर.टी. के वेबसाइट म काउंसिलिंग बर प्रक्रिया सुल्क के भुगतान कर विकल्प फार्म ऑनलाइन जमा कर सकत हे। एस.सी.ई.आर.टी. के संचालक ह बतइन कि ए पाठ्यक्रम मन म ऑनलाइन आवंटन बर फार्म भरे के तिथि उनतीस अगस्त ले चार सितंबर तक निर्धारित करे गेहे।
ओति, छत्तीसगढ़ लोक सेवा आयोग डहार ले वाणिज्य अउ कम्प्यूटर एप्लीकेसन बर प्राध्यापक परीक्षा के दस्तावेज मनके सत्यापन अब तीस अगस्त के करे जाही। पहिली ए सत्यापन अट्ठाईस अगस्त के होवइया रिहीस।
सीजीएमएससी-नोटिस
छत्तीसगढ़ मेडिकल सर्विसेस कार्पोरेसन लिमिटेड-सी.जी.एम.एस.सी. ह महासमुंद स्थित एक ठन निजी कंपनी डहार ले आपूर्ति करे गे पांच सौ अउ छै सौ पचास एम जी के पैरासिटामॉल टेबलेट के गुणवत्ता म कमी पाय हे। एखर उपर त्वरित कार्रवाई करत हुए सी.जी.एम.एस.सी. ह कंपनी ल नोटिस जारी करे हे। संगेसंग चेतावनी घलो देहे कि अगर कंपनी ह तय सर्त मनके अनुरूप कार्रवाई नइ करही, त निविदा नियम मनके अनुसार कठोर कार्रवाई करे जाही अउ एखर पूरा जिम्मेदारी कंपनी के होही।
फुटबॉल प्रतियोगिता
ऑल इंडिया फुटबॉल फेडरेशन अउ रामकृष्ण मिशन डहार ले आयोजित सब जूनियर गर्ल्स राष्ट्रीय फुटबॉल चैंपियनशिप के सेमीफाइनल मुकाबला म आज उत्तरप्रदेस के टीम ह तेलंगाना ल चार के मुकाबला एक गोल ले हराके फाइनल म प्रवेस कर लेहे। नारायणपुर स्थित रामकृष्ण मिशन फुटबॉल मैदान म आयोजित ए प्रतियोगिता म छत्तीसगढ़ समेत देस के चौदह ठन टीम ह भाग लीन। ए प्रतियोगिता के दूसर चरण पच्चीस अगस्त ले सुरू होही।