विधानसभा सत्र
छत्तीसगढ़ विधानसभा के मानसून सत्र काली ले सुरू होही। अठाईस अगस्त तक चलइया ये सत्र के दउरान चार बइठका होही। ए सत्र म वित्तीय कामकाज के संगेसंग सरकारी काम ल घलो निपटाय जाही। कोरोना संक्रमण के सेती ए बार सत्र के दउरान सोशल डिस्टेसिंग के संगेसंग केंद्र अउ राज्य सरकार डहार ले जारी दिशा-निर्देश के पालनकरे जाही।
सदन म मुख्यमंत्री, मंत्री के संगेसंग जम्मों विधायक मनके आसन के आगू ग्लास लगाके छेका करे जाही। विधानसभा अध्यक्ष डॅाक्टर चरणदास महंत ह कोरोना संक्रमण ल रोके बर जउन जरूरी उपाय करे जात हे, ओखर पालन करे के निर्देश जारी करे हे।
कोरोना मरीज
छत्तीसगढ़ म कोरोना संक्रमण के मामला सरलग बाढ़त हे। आज घलो आने आने जिला ले कोरोना संक्रमित नवा मरीज मिले के पुष्टि होय हे। धमतरी म आज चार झिन कोरोना संक्रमित मरीज मिले हे। जेमा ले दू झिन जिला अस्पताल ले हे।
एति जांजगीर चंापा जिला के चंद्रपुर म कोरोना संक्रमण के बाढ़त मामला ल देखत काली ले इकतीस अगस्त तक नगर म प्रतिबंधात्मक आदेश लागू करे जाही। ए दउरान दुकान अउ आने व्यवसाय मन बर खोले के बेरा तय कर दे गेहे। ओति कोरिया जिला म स्वास्थ्य विभाग ह नियम शर्त राखके जिला म कोरोना पाॅजीटिव मरीज मन ल होम आइसोलेशन के सुविधा देके मंजूरी दे देहे।
जानबा के मुताबिक काली रतिहा स्वास्थ्य विभाग डहार ले जारी बुलेटिन के मुताबिक आने आने जिला ले सात सौ चार कोरोना पाॅजीटिव मरीज के पहिचान करे गेहे। एला मिलाके प्रदेश म कोरोना संक्रमित मरीज मनके संख्या इक्कीस हजार के तीर पहुंच गेहे। ए बेरा सात हजार सात सौ नब्बे कोरोना संक्रमित मरीज के इलाज चलत हे। त उंहें कोरोना ले अब तक प्रदेश म एक सौ संतानबे लोगन के मउत होगे हे।
कोरोना बुलेटिन सराहना
कोरोना संक्रमण ले जुड़े आंकड़ा अउ तथ्य देबर वांलिटियर्स के संस्था कोविड नाइंटिन इंडिया- ओआरजी ह छत्तीसगढ़ सरकार के स्वास्थ्य विभाग डहार ले रोजे जारी करे गे मीडिया बुलेटिन ल देश के सबले बढ़िया बुलेटिन म बताय हे। संस्था ह अपन ट्वीटर हैंडल म प्रदेश के मीडिया बुलेटिन के प्रशंसा करत लिखें हे कि कोविड नाइंटिन ले जुड़े जरूरी डाटा के बारे म बात करे जाथे त तमिलनाडु अउ कर्नाटक जइसन राज्य के नाव ले जाथे। फेर छत्तीसगढ़ ह सबले बढ़इया डाटा जारी करइया राज्य म हवय।
जानबा के मुताबिक राज्य कोविड कंट्रोल अउ कमंाड सेंटर डहार ले पाछू आठ मार्च ले रोजे मीडिया बुलेटिन जारी करे जात हे।
कोरोना मौत-समिति गठित
धमतरी जिला म कोरोना संक्रमित मनखे के मउत होय के बाद शव के निराकरण बर समिति गठित करे गेहे। गठित समिति ह शासन डहार ले जारी एसओपी के पालन करत उंखर परिवार अउ कार्यपालक मजिस्ट्रेट के आगू म अंत्येष्टी के कार्यवाही करही। समिति म मुख्य चिकित्सा अउ स्वास्थ्य अधिकारी आयुक्त नगर पालिक निगम धमतरी, जम्मों अनुविभागीय अधिकारी राजस्व, नायब तहसीलदार अउ जम्मों कार्यपालिक दण्डाधिकारी मन ल सामिल करे गेहे।
डीजे संचालक-प्रदर्शन
धमतरी, बेमेतरा अउ राजनांदगंाव जिला मुख्यालय मन म लाॅकडाउन के दउरान डीजे अउ लाउड स्पीकर उपर रोक लगाय ले परेशान संचालक मन ह आज प्रदर्शन करीन।
धमतरी म प्रदर्शनकारी मन ह रैली निकाल के कलेक्टर आॅफिस के आगू प्रदर्शन करीन अउ गणेश उत्सव के संगेसंग आने आने सार्वजनिक कार्यक्रम मनम डीजे अउ आने बाजा ल लगाय के मांग करीन। उंहें बेमेतरा जिला म कलेक्टोरेट के आगू डीजे साउंड सिस्टम वाले मन ह नाराबाजी करके प्रदर्शन करीन।
त ओति राजनंादगंाव म घलो साउंड सिस्टम अउ टेन्ट हाउस संचालक मन ह आज एक घंाव फेर प्रदर्शन करीन। तीन दिन पहिली घलो ए लोगन मन ह प्रदर्शन करके अपन मंाग ल राखे रीहिन।
लोकवाणी
मुख्यमंत्री भूपेश बघेल के मासिक रेडियो वार्ता – लोकवाणी के दसवंा कड़ी के प्रसारण तेरा सितंबर के होही। मुख्यमंत्री ह एबार समावेशी विकास आपकी आस विषय उपर प्रदेश के लोगन मनले गोठबात करही।
ए कार्यक्रम म शामिल होय बर कोनो भी मनखे ह आकाशवाणी रायपुर के टेलिफोन नंबर शून्य सात सात एक दो चार तीन शून्य पांच शून्य एक अउ दू चार तीन शून्य पांच शून्य दो दो चार तीन शून्य पांच शून्य तीन म पच्चीस, छब्बीस अउ सत्ताइस अगस्त के मंझनिया तीन बजे ले चार बजे के बीच अपन सवाल रिकार्ड करा सकत हे। लोकवाणी के प्रसारण छत्तीसगढ़ स्थित आकाशवाणी के जम्मों केंद्र एफ.एम. अउ क्षेत्रीय न्यूज चैनल मनले बीहनिया साढ़े दस बजे ले ग्यारा बजे तक करे जाही।
ंिसंहदेव-हमर ग्राम सभा
पंचायत अउ ग्रामीण विकास मंत्री टी.एस. सिंहदेव ह रेडियो म प्रसारित ग्राम पंचायत विकास योजना के बारे म विस्तार ले जानबा दीन। काली संझा आकाशवाणी रायपुर ले प्रसारित हमर ग्राम सभा कार्यक्रम म ओमन कीहिन कि आर्थिक संसाधन ल बने ढंग ले बनाके हरएक ग्राम पंचायत ल बिकास के प्राथमिकता तय करना चाही।
पंचायत मंत्री ह कहिन कि संवैघानिक व्यवस्था के तहत गठित वित्त आयोग के सिफारिश के आधार उपर पंचायत मन ल वित्तीय संसाधन दे जाथे। श्री सिंहदेव ह कार्यक्रम म ग्राम पंचायत मनके कार्यक्षेत्र अउ अधिकार के बारे म विस्तार ले जानबा दीन।
नेता प्रतिपक्ष-बाढ़ सहायता
नेता प्रतिपक्ष धरमलाल कौशिक ह कीहिन हे कि प्रदेश म कतकोन जगा सरलग होवत बरसा ले अब्बड़ अकन जगा म बाढ़ आगे हे। नदिया, नरवा के पानी बाढ़े ले लोगन मन परेशान होवत हे। अउ जादा बरसा ले कतकोन जगा के फसल मन ल घलो नकसान पहुंचे हे। ओमन राज्य सरकार ले बाढ़ प्रभावित क्षेत्र अउ फसल मन ल होय नकसान के सर्वे कराके प्रभावित परिवार मन ल मुआवजा देके मांग करे हे ।
डॅाक्टर-एफआईआर
पूर्व डीएमई डॅाक्टर एस.एल. आदिले के खिलाफ रायपुर के महिला पुलिस थाना म दुष्कर्म के मामला दर्ज कर लेहे। पीडित महिला ले पूछताछ के बाद पुलिस ह डॅाक्टर के खिलाफ अपराध दर्ज करे हे। जानबा के मुताबिक पाछू दिन डीकेएस अस्पताल म काम करइया एक झिन माइलोगिन ह एसएसपी अजय यादव ले डॅाक्टर आदिले के खिलाफ दुष्कर्म के शिकायत करे रीहिन। ए मामला म राज्य सरकार ह पहिलीच ले डॅाक्टर आदिले ल डीएमपी के पद ले हटा देहे।
संक्षिप्त समाचार
अउ अब थोरकुन समाचार सार म-
– जांजगीर ंचापा जिला के पुलिस अधीक्षक पारूल माथुर ह चार थाना प्रभारी अउ चार झिन उप निरीक्षक मनके बतादला आदेश जारी करे हे।
– अइसने दुर्ग जिला के पुलिस अधीक्षक प्रशांत ठाकुर ह घलो तीन झिन निरीक्षक मनके तबादला आदेश जारी करे हे।
– जांजगीर-चंापा जिला के सख्ती स्थ्ति उप पंजीयक कार्यालय म पचास लाख रूपिया के गबन के आरोप म एक झिन भृत्य ल गिरप्तार करे गेहे। उंहें तीन झिन आने आरोपी मन फरार हवय।
– बिलासपुर जिला म कोटा थाना के गांव चढ़ापारा म मनरेगा योजना ले बने एक ठिन डबरी म दू झिन लईका के डूबे ले मउत होगे।
– बालोद जिला म डोंडीलोहारा थाना क्षेत्र के गांव बुरामी म दू ठिन फटफटी के बीच होय टक्कर म एक झिन मनखे के मउत होगे अउ चार झिन मनखे मन घायल होगे।
– महासमुंद जिला म सरायपाली पुलिस ह बाप-बेटा ल गिरप्तार करके उंखर तीर ले पंद्रा किलो गांजा जब्ती करे हे। ए गांजा के भाव बाजार म डेढ़ लाख रूपिया बताय जात हे।
– महासमुंद साइबर सेल अउ सरायपाली थाना के संयुक्त टीम ह झिलमिला के तीर जुआ खेलत छै झिन लोगन मन ल गिरप्तार करके उंखर मन तीर ले करीबन तीन लाख पैंसठ हजार रूपिया जब्त करे हे।
अउ
– बालोद जिला म पुलिस ह महाराष्ट्र के गाड़ी ले करीबन चैबीस ठिन मवेशी मन ल ले जात चार झिन पशु तस्कर मन ल गिरप्तार करे हे।