अमेरिका-शुल्क
इही बीच, भारत ह उपराहा सुल्क लगाय के अमरीका के कार्रवाई ल गलत अउ अन्यायपूर्ण बतइन हे। अमरीका के राष्ट्रपति डॉनल्ड ट्रंप के भारत उपर पचीस प्रतिसत उपराहा सुल्क लगाय के बाद भारत के ए प्रतिक्रिया आय हे। विदेस मंत्रालय ह किहीन हे कि भारत अपन राष्ट्रीय हित ल बचाय बर जरूरी कदम उठाही। मंत्रालय के कहना हे कि भारत के आयात ह बाजार के स्थिति उपर निर्भर हे अउ एहा भारत के एक अरब चालीस करोड़ लोगन मनके ऊर्जा सुरक्षा ल ठीक करे के उद्देस्य ले करे जात हे।
उपराष्ट्रपति-नामांकन
निर्वाचन आयोग ह आज उपराष्ट्रपति चुनई बर नामांकन दाखिल करे के अधिसूचना जारी कर दीन। उपराष्ट्रपति पद बर नामांकन इक्कीस अगस्त तक दाखिल करे जा सकथे। नामांकन पत्र के जांच बाईस अगस्त के होही अउ नाम वापिस लेके आखिरी तारीख पच्चीस अगस्त राखे गेहे। मतदान नौ सितंबर के होही। पाछू महिना उपराष्ट्रपति पद ले जगदीप धनखड़ के इस्तीफा देके बाद उपराष्ट्रपति के पद ह खाली हवय। उपराष्ट्रपति पद के ए सत्रहवां चुनाव होही। उपराष्ट्रपति के चुनाव निर्वाचक मंडल डहार ले करे जात हे, जेमा लोकसभा अउ राज्यसभा के सदस्य सामिल होथे।
अनुसूचित जाति विकास प्राधिकरण-बैठक
मुख्यमंत्री विष्णुदेव साय के अगुवई म आज जांजगीर-चांपा जिला म अनुसूचित जाति विकास प्राधिकरण के बइठका होइस। बइठका म प्राधिकरण के कामकाज के समीक्षा करे गीस, जेखर बाद पत्रकार मनले गोठबात करत मुख्यमंत्री ह बतइन कि अनुसूचित जाति विकास प्राधिकरण के बजट ल पचास करोड़ रूपिया ले बढ़ाके पचहत्तर करोड़ रूपिया करे जाही।
उहें, गुरूघासीदास के जनम स्थल गिरौधपुरी के विकास बर दू करोड़ के घोसना करे गेहे। अनुसूचित जाति के पढ़इया लइका मन बर प्रतियोगी परीक्षा के तियारी बर पचास लाख रूपिया के प्रावधान करे गेहे। हर बछर समाज के पांच लइका मन ल पायलट के प्रसिक्षण देवाय बर मदद करे जाही। मुख्यमंत्री ह बतइन कि समाज के मांग उपर जैतखाम ल सीमेंट क्रांकीट के अलावा अब लकड़ी ले घलो बनाय जा सकही।
मुख्यमंत्री-कर्मयोगी अभियान
मुख्यमंत्री विष्णुदेव साय ह काली मंत्रालय म आदि कर्मयोगी अभियान के समीक्षा करीन। बइठका म ओमन अधिकारी मन ल निरदेस दीन कि आदि कर्मयोगी अभियान के माध्यम ले आदिवासी वाले गांव के विकास जनभागीदारी के माध्यम ले करे जाय। मुख्यमंत्री ह किहीन कि ए अभियान के तहत प्रदेस म एक लाख बत्तीस हजार ले जादा वॉलटियर मन ल प्रसिक्षित करे के लक्ष्य राखे गेहे। मुख्यमंत्री ह किहीन कि जनजातीय बहुल गांव मन म बुनियादी अधोसंरचना अउ सुविधा मन म जउन अंतर बने हे, ओखर पहिचान दू अक्टूबर ले होवइया ग्रामसभा म ए बिसय उपर बिसेस गोठबात करे जाही।
मुख्यमंत्री-समीक्षा
मुख्यमंत्री विष्णुदेव साय ह बनत सिंचाई परियोजना मन ल प्राथमिकता ले पूरा करे के निरदेस देहे। मुख्यमंत्री ह काली जल संसाधन विभाग के कतकोन चलत परियोजना मनके समीक्षा करत अधिकारी मन ल किहीन कि ए बेरा निर्माण काम म तेजी लाय जाय अउ ओमन किहीन कि जल परियोजना के अधुरा रेहे ले किसान मन ल बेरा म सिंचई वाले योजना के पूरा फायदा नइ मिल पात हे। मुख्यमंत्री ह किहीन कि लंबित परियोजना मनके पूरा होय ले सिंचाई के रकबा बाढ़ही अउ किसान मन ल पानी बेरा म मिल पाही।
राष्ट्रीय हथकरघा दिवस
आज ग्यारहवां राष्ट्रीय हथकरघा दिवस हरय। केंद्रीय कपड़ा मंत्री गिरिराज सिंह ह आज नई दिल्ली म संत कबीर हथकरघा पुरस्कार अउ राष्ट्रीय हथकरघा पुरस्कार दीन। ए पुरस्कार के उद्देस्य ए क्षेत्र म बढ़िया योगदान देवइया बूनकर, काम करइया अउ कम उत्पादक कंपनी मनके प्रयास ल सम्मान देना हवय। ओमन किहीन कि ए बेरा दुनिया म बढ़िया कपड़ा के मांग हवय अउ भारतीय हथरकघा उद्योग ह एला पूरा करत हे।
राष्ट्रीय हथकरघा दिवस के मउका म छत्तीसगढ़ बुनकर समाज के प्रतिनिधि मंडल मन ह आज मुख्यमंत्री विष्णुदेव साय ले ओखर कार्यालय म मिलिन। ए मउका म मुख्यमंत्री ह किहीन कि राज्य सरकार ह बुनकर मनके समृध्दि, सशक्तिकरण अउ आत्मनिर्भरता बर परयास करत हे।
हर घर तिरंगा
प्रदेस के संगेसंग पूरा देस म दू ले पंद्रह अगस्त तक हर घर तिरंगा अभियान चलाय जात हे। इही कड़ी म बस्तर जिला के बकावंड, लोहंडीगुड़ा, जगदलपुर, दरभा, तोकापाल, बस्तर अउ बास्तानार म बिहान समूह के दीदी मन डहार ले तिरंगा झंडा फहराय गीस। ए दउरान ओमन गांव के लोगन मन ल ए अभियान म सामिल होय कि विनती करीन। समूह के दीदी मन ह हर घर तिरंगा अभियान ल जन-जन तक पहुंचाय के संकलप घलो लीन। अभियान के दउरान ओमन रंगोली बनाय उ रैली निकाले के संगेसंग कतकोन रचनात्मक तरीका ले काम करत हे।
ऐति, केंद्रीय रिजर्व पुलिस बल सीआरपीएफ के जवान मन ह काली भिलाई ले रईपुर तक तिरंगा रैली निकालिन। ए दउरान जवान मन ह फटफटी म तिरंगा लेके निकले रिहीन।
कांग्रेस-प्रदर्शन
राज्य सरकार डहार ले बिजली बिल हाफ योजना म बदलाव करे जाय के विरोध म प्रदेस कांग्रेस ह आज जम्मों जिला मुख्यालय मन म विद्युत मंडल के आफिस के आगू विरोध प्रदर्सन करीन। राजधानी रईपुर म जिला कांग्रेस अध्यक्ष गिरिश दुबे के अगुवई म कांग्रेस नेता अउ कार्यकर्ता मन ह बूढ़ापारा के बिजली आफिस के आगू प्रदर्सन करीन।
उहें, बिलासपुर जिला के तिफरा विद्युत मंडल आफिस के कांग्रेस नेता मन ह घेराव करके ज्ञापन सौंपिन। कांग्रेस ह अपन पाछू के कार्यकाल म जउन चार सौ यूनिट तक के बिजली बिल हाफ योजना लागू करे रिहीन, उही ल जस के तस राखे के मांग करे हे।
एनटीपीसी-हादसा
बिलासपुर जिला के सीपत स्थित राष्ट्रीय ताप विद्युत निगम-एनटीपीसी प्लांट म काली होय हादसा म मृतक के संख्या दू हो गेहे। गंभीर रूप ले घायल दूसर मजूर के पाछू रतिहा अपोलो अस्पताल म इलाज के दउरान मउत होगे। एनटीपीसी प्रबंधन डहार ले मृतक के परिजन ल संविदा म रोजगार दे अउ मुआवजा देके आस्वासन दे गेहे।
सीपत के थाना प्रभारी गोपाल सतपथी ह बतइन कि काली एनटीपीसी प्लांट म प्लेट टूटे ले वजन वाले कूपर ह मजूर के उपर गिर गे, ए घटना म पांच झिन मजूर घायल होय रिहीन, जेमा ले दू झिन मजूर के स्थिति गंभीर हवय।
शोएब ढेबर-प्रतिबंध
रईपुर केंद्रीय जेल डहार ले शोएब ढेबर ल कोनो भी जेल म बंद बंदी ले मिले उपर तीन महिना के रोक लगाय गेहे। शोएब ढेबर डहार ले जेल अधिकारी मनके मंजूरी के बिना जबरदस्ती मिले के कक्षा म जाके सरकारी काम म बाधा करे के आरोप म ए रोक लगाय गेहे। ए आदेस जेल अधीक्षक डहार ले जारी करे गेहे। जानबा के मुताबिक शोएब ढेबर ह सराब घोटाला के आरोपी अनवर ढेबर के बेटा हरय।
अउ अब थोरकुन समाचार सार म –
– केंद्र सरकार ह लोगन मन ल राष्ट्रीयध्वज के बारे म जागरूक कराय बर एखर ले जुड़े राष्ट्रीय स्तर के ऑनलाइन प्रश्नोत्तरी प्रतियोगिता राखे हे। युवा मामला अउ खेल मंत्रालय ह किहीन हे कि ए प्रतियोगिता ‘‘मेरा युवा भारत‘‘ पहल के अंतर्गत कराय जात हे।
– जशपुर जिला के गांव तिरसोंठ के शासकीय प्राथमिक शाला म पदस्थ प्रधान पाठक ल सरलग गैरहाजिर रेहे के सेति निलंबित कर दे गेहे।
अउ
– गौरेला-पेण्ड्रा-मरवाही जिला के करसिवां गांव के तीर आज होय सड़क दुर्घटना म एक झिन मनखे के मउत हो गेहे।
अउ अब मौसम के हाल…
मौसम विभाग के मुताबिक अवइया बारह अगस्त ले प्रदेस म बने बरसा होय के संभावना हे। उहें, काली ले कतकोन जघा म हल्का ले मध्यम बरसा हो सकथे। मौसम विभाग के मुताबिक उत्तर छत्तीसगढ़ के एक-दू जघा म गरज-चमक के संग गाज गिरे अउ भारी बरसा होय के चेतावनी देहे।