राज्यपाल रमेन डेका ह प्रदेस के जम्मों मनखे मन ले हर घर तिरंगा कारीकरम म भाग ले के अपील करे हे। ओमन लोगन मन ल आग्रह करे हे कि ओ अपन घर म तिरंगा फहराएं अउ स्वतंत्रता दिवस ल सम्मान अउ गर्व के संग मनाय। राज्यपाल ह किहीन कि ए कारीकरम सिरिफ झंडा फहराय के परंपरा नोहय हे, बल्कि हमर राष्ट्र भक्ति, एकता अउ गौरव के प्रतीक आय। तिरंगा के संग हमर जुड़ाव, हमर संविधान, संप्रभुता अउ गौरवसाली विरासत के प्रति हमर प्रतिबध्दता ल दर्साथे।
खबर के मुताबिक उनयासीवां स्वतंत्रता दिवस के मउका म छत्तीसगढ़ के हर-घर तिरंगा कारीकरम के आयोजन दू ले पंद्रह अगस्त तक करे जावत हे।
भाजपा-मोर तिरंगा मोर अभियान
इही बीच, भारतीय जनता पार्टी ह घलो स्वतंत्रता दिवस के मउका म आज ले तिरंगा अभियान के सुरूआत कर देहे। ए अभियान के नांव ‘‘मोर तिरंगा मोर अभियान‘‘ दे गेहे। आज रायपुर स्थित कुशाभाऊ ठाकरे परिसर म ए अभियान ल लेके एक बड़का बइठका राखे गे रिहीस। बइठका म क्षेत्रीय संगठन महामंत्री अजय जामवाल, प्रदेस संगठन महामंत्री पवन साय अउ प्रदेस महामंत्री संजय श्रीवास्तव समेत बड़ संख्या म संगठन पदाधिकारी मन मौजूद रिहीन।
तिरंगा अभियान के संयोजक नीलू शर्मा ह बतइन हे कि ए बार भाजपा ह प्रदेस के साठ लाख घर मन म तिरंगा फहराय के लक्ष्य राखे हे। ओमन बतइन कि ए अभियान ऑपरेसन सिंदूर के सफलता ले प्रेरित होके आगू बढ़ाय जाय। एखर संग भाजपा चौदह अगस्त के विभाजन विभीषिका दिवस के रूप म मनाही।
नवनिर्मित कर्तव्य पथ-उद्घाटन
प्रधानमंत्री नरेंद्र मोदी काली नई दिल्ली म कर्तव्य पथ म नवा बनाय कर्तव्य भवन के उद्घाटन करही। ए मउका म प्रधानमंत्री सार्वजनिक कारीकरम ल घलो संबोधित करही। कर्तव्य भवन सेंट्रल विस्टा परियोजना के ही एक हिस्सा हरय। प्रधानमंत्री कार्यालय ह एक बयान म बतइन कि कर्तव्य भवन के निर्माण के उद्देस्य आने-आने मंत्रालय अउ विभाग ल संग लेके दक्षता, नवाचार अउ सहयोग ल बढ़ावा देना हे। अभी म कतकोन मंत्रालय अउ विभाग राजधानी दिल्ली के अलग-अलग क्षेत्र म स्थित हे।
डीजीएमएल-खोज
मेसर्स डेक्कन गोल्ड माइनिंग लिमिटेड-डी.जी.एम.एल. ह प्रदेस म निकल, क्रोमियम अउ प्लेटिनम समूह के तत्व के खोज करे हे। ए खोज महासमुंद जिला के भालुकोना-जामनीडीह म निकल, क्रोमियम अउ पीजीई ब्लॉक म करे गीस, जउन करीबन तीन हजार हेक्टेयर क्षेत्र म फइले हे। ए क्षेत्र के प्रारंभिक अन्वेषण भारतीय भू-वैज्ञानिक सर्वेक्षण-जीएसआई डहार ले जी-फोर स्तर म करे गे रिहीस, जेमा ए खनिज के मौजूदगी के संभावना के पता चलीस। ए आधार म छत्तीसगढ़ सरकार के खनिज साधन विभाग के अंतर्गत भू-विज्ञान अउ खनिकर्म संचालनालय-डीजीएम ह ब्लॉक के ई-नीलामी प्रक्रिया ल संपन्न करईस।
सत्यपाल मलिक-निधन
जम्मू-कश्मीर के पूर्व राज्यपाल सत्यपाल मलिक के आज मंझनिया दिल्ली के राममनोहर लोहिया अस्पताल म निधन होगे हे। उनयासी बछर के श्री मलिक लंबा बेरा ले बीमार रिहीन। श्री मलिक ह गोवा अउ मेघालय के राज्यपाल के रूप म घलो काम करीन। उंखर निधन म देस के प्रमुख नेता समेत छत्तीसगढ़ के मुख्यमंत्री विष्णदेव साय ह घलो दुख जताय हे।
ईडी-संपत्ति सीज
प्रवर्तन निदेशालय-ईडी ह दवा खरीदी घोटाला म मोक्षित कार्पोरेशन के संचालक शशांक चोपड़ा अउ उंखर परिवार के सदस्य मनके चालीस करोड़ रूपिया के संपत्ति सीज कर लेहे। खबर के मुताबिक शशांक चोपड़ा समेत छह झिन आने-आने लोगन तीन महीना ले जेल बंद हे। ईडी ह पाछु तीस अउ इकतीस जुलाई के छापामारी करके शशांक चोपड़ा, उंखर परिवार के सदस्य के संगेसंग स्वास्थ्य अधिकारी के कुल बीस ठिकाना म छापेमार कार्रवाई करे रिहीन। ए पूरा मामला म चालीस करोड़ के सपंत्ति जब्त करे गेहे।
मुख्यमंत्री-कौशल विकास विभाग
मुख्यमंत्री विष्णुदेव साय ह आज मंत्रालय म राखे गे कौशल विकास विभाग के समीक्षा बैठक म अधिकारी मन ल निरदेस दीन कि युवा मन ल कौशल प्रशिक्षण के बाद रोजगार अउ स्वरोजगार ले जोडे़ जाय। ओमन किहीन कि सरकार के उद्देश्य सिरिफ प्रसिक्षण देना नइ हे, बल्कि युवा मन ल आत्मनिर्भर अउ सक्षम बनाना हे। बइठका म श्री साय ह मुख्यमंत्री कौशल विकास योजना, प्रधानमंत्री कौशल विकास योजना अउ प्रधानमंत्री विश्वकर्मा योजना म चलत प्रसिक्षण कार्यक्रम के जानकारी लीन।
बिजली योजना-कांग्रेस-प्रदर्शन
राज्य सरकार डहार ले बिजली बिल हाफ योजना म बदलाव करे जाय के विरोध म प्रदेश कांग्रेस अवइया सात अगस्त के जम्मों जिला मुख्यालय मन म बिजली आफिस के कार्यालय के आगू विरोध-प्रदर्शन करही। एखर पहिली, छह अगस्त के कांग्रेस डहार ले जिला मुख्यालय म पत्रकारवार्ता करे जाही। प्रदेस कांग्रेस अध्यक्ष दीपक बैज ह केहे हे कि बिजली बिल योजना म बदलाव ले आम जनता उपर उपरहा बोझ पड़ही। कांग्रेस ए योजना ल पहिली जइसन लागू करे के मांग करत हे।
इही बीच, भारतीय राष्ट्रीय छात्र संगठन-एनएसयूआई ह राज्य सरकार डहार ले योजना म संशोधन करे के विरोध म आज रईपुर स्थित डंगनिया बिजली आफिस के आगू प्रदर्सन करीन।
ट्रेन परिचालन
दक्षिण पूर्व मध्य रेलवे के अंतर्गत बिलासपुर ले झारसुगुड़ा के बीच चौथा लाइन बिछाय के काम अउ यार्ड मॉडिफिकेशन के चलत उनतीस अगस्त ले पन्द्रह सितंबर तक छब्बीस एक्सप्रेस ट्रेन रद्द रइही। उहें, छह ट्रेन ल बदले हुए रद्दा ले चलाय जाही। एखर तहत नॉन इंटरलॉकिंग डहार ले रायगढ़ रेलवे स्टेसन ल चौथा रेललाइन ल जोड़े के काम करे जाही। ए रद्दा ले चलइया टाटानगर-बिलासपुर-टाटानगर एक्सप्रेस, संतरागाछी-पुणे एक्सप्रेस, कामख्या-कुर्ला एक्सप्रेस, पटना-बिलासपुर एक्सप्रेस, हावड़ा-मुबंई-हावड़ा एक्सप्रेस ट्रेन रद्द रइही। उहें, इकतीस अगस्त ले पन्द्रह सितंबर तक रायगढ़-बिलासपुर-रायगढ़ मेमू पैसेंजर घलो रद्द रइही। एखर संगेसंग तीस अगस्त ले हावड़ा-पुणे दुरंतो एक्सप्रेस बदले रद्दा ले रायपुर होके चलही।
एम्स रायपुर-प्रयोगशाला
रायपुर स्थित अखिल भारतीय आयुर्विज्ञान संस्थान-एम्स के वायरल अनुसंधान अउ निदान प्रयोगशाला-वीआरडीएल ल पहिली बखत राष्ट्रीय परीक्षण अउ अंशांकन प्रयोगशाला मनके प्रत्यायन बोर्ड-एनएबीएल ले मान्यता मिल गेहे। एनएबीएल ह ए प्रयोगशाला ल बारह प्रमुख मानव विषाणु संक्रमण मन के चिन्हारी बर मान्यता दीन हे, जेमा कोविड-नाइंटीन ले होवइया वायरल निमोनिया, स्वाइन फ्लू, इन्फ्लुएंजा-बी, हेपेटाइटिस-बी अउ सी वायरल लोड, अउ डेंगू जइसन विषाणु संक्रमण सामिल हे। ए प्रयोगशाला के स्थापना बछर दू हजार अट्ठारा म करे गेहे।
एम्स रायपुर के कार्यकारी निदेशक अउ सेवानिवृत्त लेफ्टिनेंट जनरल अशोक जिंदल ह ए उपलब्धि उपर पूरा टीम ल बधाई दीन। ओमन एला छत्तीसगढ़ के जनता ल अत्याधुनिक निदान सेवाएं प्रदान करे के दिसा म एक बिसेस कदम बताय हे।
अवैध शराब-जब्त
पंजाब ले एक ठन ट्रक म जशपुर के रद्दा बिहार ले जावत अंगेजी शराब के एक बड़का खेप ल जशपुर पुलिस ह काली रतिहा जब्त करे हे। जिला के बड़का अधीक्षक शशि मोहन सिंह ह बतइन कि मुखबिर ले खबर मिले के बाद गांव आगडीह के तिर एक ठन ट्रक ल रोकके उंखर तलासी ले गीस। पूछताछ के दउरान पुलिस ह ट्रक ले साढ़े छै हजार लीटर ले जादा अवैध सराब बरामद करे हे, जेखर कीमत पचास लाख रूपिया ले जादा बताय जात हे। ए मामला म पुलिस ह एक आरोपी ल गिरफ्तार कर ट्रक ल घलो जब्त कर लेहे। संगेसंग आरोपी ल न्यायिक हिरासत म भेज दे गेहे।
अउ अब मौसम के हाल…
मानूसन द्रोणिका के पूर्वी छोर अरूणाचल प्रदेस कोति जाय ले प्रदेस म मानसून के गतिविधि म कमी आय हे। एला मानसून ब्रेक कहे जा सकत हे। एखर सेति प्रदेस के कुछेक जिला म गर्मी अउ उमस बाढ़ गेहे। मौसम विभाग के मुताबिक अवइया चौबीस घंटा के दउरान प्रदेस म हल्का ले मध्यम बरसा होय या गरज-चमक के संग सिटीर-साटर पानी गिरे के संभावना हे। उहें, एक-दू जघा म गाज गिर सकत हे।