प्रधानमंत्री नरेन्द्र मोदी ह आज वाराणसी ले किसान सम्मान निधि के बीसवां किस्त जारी करीन अउ देसभर के नौ करोड़ सत्तर लाख ले जादा किसान मनके बैंक खाता म बीस हजार पांच सौ करोड़ रूपिया अंतरित करीन। ए मउका म प्रधानमंत्री ह एक जनसभा म बोलत किहीन कि सरकार सरलग किसान मन बर काम करत हे।
प्रधानमंत्री ह किहीन कि पीएम किसान सम्मान निधि किसान मनके कल्याण बर सरकार के प्रतिबद्धता देखाथे। ओमन किहीन कि उंखर सरकार ह पाछु दसक भर म किसान मनके हर समस्या के समधान खातिर मेहनत ले काम करीन हे।
प्रधानमंत्री ह बतईन कि सरकार ह किसान मन बर छोटे जिला म ध्यान दे खातिर नवा पीएम धन-धान्य योजना सुरू करीन हे। ए योजना म चौबीस हजार करोड़ रूपिया खरचा करे जाही। श्री मोदी ह सबो झन ले किहीन कि ए तिहार के मौसम म स्थानीय उत्पाद ल प्राथमिकता देवय।
पीएम किसान सम्मान-मुख्यमंत्री
प्रधानमंत्री किसान सम्मान निधि योजना के फायदा छत्तीसगढ़ के पच्चीस लाख सैंतालीस हजार ले जादा किसान मन ल मिले हे। आज प्रधानमंत्री ह ए योजना म पांच सौ तिरपन करोड़ चौंतीस लाख रूपिया के रकम सोझे किसान मनके खाता म अंतरित करीन। रईपुर के इंदिरा गांधी कृषि विश्वविद्यालय म राखे गे कार्यक्रम म मुख्यमंत्री विष्णुदेव साय संघरीन। ए मउका म मुख्यमंत्री ह प्रधानमंत्री बर आभार जतात सबो किसान संगी मन ल सुभकामना दीन।
खबर के मुताबिक प्रधानमंत्री किसान सम्मान निधि योजना म अभी तक राज्य के किसान मन ल नौ हजार सात सौ पैंसठ करोड़ रूपिया ले जादा के रकम दे गेहे।
रायपुर-जबलपुर एक्सप्रेस ट्रेन
प्रदेसवासी मन ल रईपुर-जबलपुर के बीच काली ले एक नवा एक्सप्रेस ट्रेन के सुभीता मिलही। मुख्यमंत्री विष्णुदेव साय काली बिहनिया नौ बजे रईपुर रेलवे स्टेसन ले ए ट्रेन ल हरियर झंडी दिखाके रवाना करही। रेल मंत्री अश्विनी वैष्णव वर्चुअल माध्यम ले ए कार्यक्रम ले जुड़ही। कार्यक्रम म विधानसभा अध्यक्ष डॉक्टर रमन सिंह, सांसद बृजमोहन अग्रवाल, दक्षिण-पूर्व मध्य रेलवे के महाप्रबंधक तरूण प्रकाश अउ मंडल रेल प्रबंधक दयानंद मौजूद रइही।
मुख्यमंत्री ह ए ट्रेन बर रेलमंत्री के आभार जतात किहीन कि केन्द्र सरकार के मदद ले राज्य म रेल नेटवर्क के बढ़वार तेजी ले होवत हे, जेखर ले जनता ल सुभीता अउ आधुनिक रेल सेवा के फायदा मिलत हे। वर्तमान म राज्य म चवालीस हजार करोड़ रूपिया ले जादा के लागत ले आने-आने रेल परियोजना के काम चलत हे। एसो के बजट म छत्तीसगढ़ ल रेल परियोजना खातिर करीबन छह हजार नौ सौ पच्चीस करोड़ रूपिया के मंजूरी दे गेहे।
हाईकोर्ट-निजी स्कूल फीस
छत्तीसगढ़ उच्च न्यायालय ह अपन एक फैसला म केहे हे कि राज्य सरकार ल प्राईवेट स्कूल के फीस तय करे बर कानून बनाय के अधिकार हे। हाईकोर्ट ह ए फैसला गैर सरकारी विद्यालय सुल्क विनियमन अधिनियम अउ नियम दू हजार बीस ल संवैधानिक ठहरात प्राईवेट स्कूल कोति ले दायर करे गे याचिका के सुनवाई के दउरान सुनईन। अदालत ह किहीन कि फीस बर नियम तय करना राज्य सरकार के अधिकार हे।
हर घर तिरंगा
स्वतंत्रता दिवस के मउका म आज ले प्रदेसभर म ‘‘हर घर तिरंगा‘‘ अभियान सुरू होगे हे, जउन तीन चरण म होही। पहिली चरण दू ले आठ अगस्त, दूसर चरण नौ ले बारह अगस्त अउ तीसर चरण तेरह ले पन्द्रह अगस्त तक आयोजित करे जाही। ए अभियान ‘‘हर घर तिरंगा-हर घर स्वच्छता, स्वतंत्रता के उत्सव स्वच्छता के संग‘‘ थीम म आधारित हे। अभियान के दउरान हर घर म राष्ट्रीय ध्वज फहराय बर प्रेरित करे जाही।
पहिली चरण म स्कूल अउ सार्वजनिक जघा ल तिरंगा आर्ट ले सजाय जाही। ए बेरा म रंगोली प्रतियोगिता, तिरंगा के स्थानीय इतिहास म प्रश्नोत्तरी अउ तिरंगा राखी बनाय खातिर कार्यशाला राखे जाही। उहें, दूसर पारी म सार्वजनिक जघा म जनसहभागिता ले तिरंगा मेला अउ तिरंगा कंस्लट के आयोजन होही। एखर संगेसंग तिरंगा रैली, बाईक अउ साइकिल रैली निकाले जाही। तिसरइया अउ आखिरी चरण म सरकारी भवन स्कूल-कालेज, कार्यालय, होटल, बांध अउ पुल म तिरंगा फहराय जाही अउ रोशनी होही। ए बेरा म स्वच्छता अउ जल संरक्षण ले जुड़े कतकोन कार्यक्रम होही।
नन-जमानत
मानव तस्करी अउ धर्मांतरण के आरोप म दुरूग रेलवे स्टेशन ले गिरफ्तार करे गे दू झिन नन अउ एक आने आरोपी ल जमानत मिल गेहे। बिलासपुर एनआईए कोर्ट ह दूनां नन ल पचास-पचास हजार रूपिया के मुचलका म जमानत देहे। एखर संगेसंग ओमन ल अपन पासपोर्ट कोर्ट म जमा कराय बर पड़ही। नन कोति ले पूर्व डिप्टी सॉलिसिटर जनरल बी. गोपाकुमार ह अपन पक्ष राखीन। उहें, एनआईए कोति ले वकील दाऊ चंद्रवंशी अउ परांकुश मिश्रा मौजूद रिहीन।
खबर के मुताबिक पाछु पच्चीस जुलाई के दुरूग रेलवे स्टेसन ले एमन ल गिरफ्तार करे गे रिहीस। इंखर मन उपर मानव तस्करी के आरोप म एफआईआर दरज कराय गे रिहीस। ए मामला दुरूग कोर्ट ले खारिज होय के बाद बिलासपुर एनआईए कोर्ट पहुंचे रिहीस।
भाजपा सम्मान-समारोह
भारतीय जनता पार्टी ह छत्तीसगढ़ ले साठ लाख नवा सदस्य ल जोड़े बर आज नवा रईपुर के मुख्यमंत्री निवास म बिसेस कार्यक्रम राखे गीस। मुख्यमंत्री ह ए अभियान म बने काम करइया नेता अउ कार्यकर्ता मन ल सम्मानित करीन।
खबर के मुताबिक भाजपा के प्रदेस अध्यक्ष किरण सिंह देव ह तीन सितंबर दू हजार चौबीस के सदस्यता अभियान के सुरूआत करे रिहीन।
मोटापा-अभियान
राज्य सरकार ह प्रदेस म मोटापा के समस्या ले निपटे खातिर प्रधानमंत्री नरेन्द्र मोदी के आह्वान ‘‘फीट इंडिया अउ स्वस्थ जीवनशैली‘‘ बर अभियान सुरू कर देहे। एमा स्कूल के पढ़ईया लइका मन ल पोस्टर ले फास्ट फूड अउ मीटा पेय पदार्थ के सेती होवइया मोटापा कोति जागरूक करे जाही।
केन्द्रीय माध्यमिक शिक्षा बोर्ड-सीबीएसई ह स्कूल मन ल ऑयल बोर्ड अउ शुगर बोर्ड लगाय के निरदेस देहे, जेखर ले लइका मन ल जादा तेल अउ सक्कर खाय ले होवइया बीमारी के संबंध म जागरूक करे जा सकही। संगेसंग स्कूल ले स्वास्थ्य बढ़ईया भोजन अउ सारीरिक गतिविधि जइसन सिढ़ही चढ़ना, व्यायाम अउ पैदल चलना एला प्रोत्साहित करे बर केहे गेहे। सरकार ह घलो पोषण अभियान अउ ईट राईट इंडिया जइसन कार्यक्रम ले पौष्टिक आहार, मोटा अनाज- ज्वार-बाजार ल बढ़ावा देहे। नवा सिक्षा नीति म स्कूल म स्वास्थ्य अउ पोषण सिक्षा ल पाठ्यक्रम के हिस्सा बनाय गेहे।
कौशल तिहार
राज्य कौशल विकास प्राधिकरण कोति ले इक्कीस ले इकतीस जुलाई तक प्रदेस के सबो जिला म ‘‘कौशल तिहार‘‘ राखे गे रिहीस। ए प्रतियोगिता म ढाई हजार ले जादा युवा मन भाग लीन, जेमा ले दू सौ अठासी प्रतिभागी मन ल राज्य स्तरीय चयन प्रतियोगिता बर चुने गेहे। ए मा प्रदेस के युवा मन ल अपन हुनर देखाय के मउका मिलीस। उहें, आत्मनिर्भर अउ रोजगार सीखे के प्रेरणा घलो मिलीस। राज्य स्तर म चुने गे युवा मन ल राष्ट्रीय प्रतियोगिता म अपन हुनर देखाय के मउका मिलही अउ राष्ट्रीय स्तर म चुने जाय के बाद अवइया बछर चीन के संघाई म होवइया वर्ल्ड स्कील्स म भारत के अगुवई करही।
सीजीएमएससी-स्पष्टीकरण
छत्तीसगढ़ मेडिकल सर्विसेज कॉर्पोरेशन लिमिटेड-सीजीएमएससी ह स्पष्ट करे हे कि कोनों भी मरीज या अस्पताल ल गुणवत्ताहीन कैल्शियम के गोली नइ बांटे गेहे। सीजीएमएससी ह ए बात कोरबा वेयर हाउस ल गुणवत्ताहीन कैल्शियम विटामिन-डी गोली भेजे जाय के मामला आगू आय के बाद किहीन हे। संस्थान ह केहे हे कि मामला के जानकारी मिलतेच ए जम्मों गोली के जम्मों बैच ल ब्लॉक कर दे गेहे। संगेसंग ए खेप के अभी तक कोनो किसम के मटेरियल प्राप्ति प्रमाण पत्र तियार नइ करे गेहे। बिना मटेरियम सर्टिफिकेट के कोनों भी दवा, कोनों संस्थान ल नइ बांटे जाय। ए गोली के आपूर्ति करइया संस्थान ल सैम्पल दिखाय अउ स्पष्टीकरण दे बर निरदेस दे गेहे।