लोकसभा-ऑपरेशन सिंदूर
लोकसभा म आज ऑपरेसन सिंदूर उपर बिसेस चर्चा सुरू होइस। रक्षा मंत्री राजनाथ सिंह ह जम्मू-कश्मीर के पहलगाम म होय आतंकवादी हमला के विरूध्द ए कार्रवाई ल भारत के सशक्त, सफल अउ निर्णायक सैन्य कार्रवाई बतइन हे। चर्चा के सुरूआत करत ओमन किहीन कि ऑपरेसन सिंदूर देस के संप्रभुता, भारत के पहचान अउ नागरिक मन बर सरकार के कर्तव्य अउ आतंकवाद के खिलाफ भारत के कड़ा नीति के एक ठन निर्णायक प्रदर्सन रिहीस।
रक्षा मंत्री ह किहीन कि पहलगाम आतंकवादी हमला के खिलाफ ऑपरेसन सिंदूर देस के सशस्त्र बल डहार ले करे गे सैन्य कार्रवाई रिहीस, जेमा नौ ठन आतंकवादी ठिकाना ल ध्वस्त करे गीस।
रक्षा मंत्री ह किहीन कि ऑपरेसन सिंदूर ल पहलगाम म पाकिस्तान प्रायोजित आतंकवादी हमला म अपन परिवार ल खोने वाला निरदोस लोगन ल न्याय देवाय खातिर सुरू करे गे रिहीस। ओमन किहीन कि ए सैन्य अभियान के उद्देस्य आतंकवादी ठिकाना अउ उंखर सिविर ल निसाना बनाके नष्ट करना रिहीस। एखर माध्यम ले पाकिस्तान ल ए संदेश घलो दे गीस, कि भारत आतंकवाद ल बिलकुल भी बर्दास्त नइ करही।
हेपेटाइटिस दिवस
केंद्रीय स्वास्थ्य मंत्री जेपी नड्डा ह आज विश्व हेपेटाइटिस दिवस के मउका म किहीन कि भारत ए खतरनाक बीमारी के खिलाफ मजबूती ले आगू बाढ़त हे। ओमन बतइन कि प्रधानमंत्री नरेंद्र मोदी के अगुवई म चलत राष्ट्रीय वायरल हेपेटाइटिस नियंत्रण कारीकरम के माध्यम ले लोगन ल जान बचाय के अउ बीमारी ल खतम करे के परयास करे जावत हे।
खबर के मुताबिक हर बछर अट्ठाईस जुलाई के विश्व हेपेटाइटिस दिवस मनाय जाथे, जेखर उद्देस्य वायरल हेपेटाइटिस के बारे म जानकारी बढ़ाना अउ एखर ले निपटे बर रोकथाम, जांच अउ इलाज के परयास ल मजबूत करना होथे।
गौ विज्ञान परीक्षा अभियान‘
मुख्यमंत्री विष्णुदेव साय ह आज रईपुर म छत्तीसगढ़ राज्य गौ संरक्षण अउ संवर्धन समिति डहार ले आयोजित ‘गौ विज्ञान परीक्षा अभियान‘ के सुरूआत करीन। ए मउका म ओमन ह अभियान के पोस्टर के घलो अनावरण करीन।
ए मउका म समिति के प्रदेस अध्यक्ष सुबोध राठी ह बतइन कि अवइया चार नवंबर के प्रदेसभर म गौ विज्ञान परीक्षा आयोजित करे जाही, जेखर उद्देस्य लोगन म गौवंश के महत्व, पारिस्थितिक तंत्र म उंखर भूमिका, ग्लोबल वार्मिंग के रोकथाम म योगदान अउ पंचगव्य के वैज्ञानिक पक्ष के प्रचार-प्रसार ल बढ़ावा देना हे। ए परीक्षा म प्रथम पुरस्कार म इंक्यावन हजार रूपिया दे जाही। प्रतियोगिता म स्कूल अउ कालेज के लइका मन भाग ले सकही।
न्यायिक अधिकारी-सेमिनार
छत्तीसगढ़ राज्य न्यायिक अकादमी डहार ले रईपुर संभाग के न्यायिक अधिकारी मन बर एक दिन के संभागीय न्यायिक सेमिनार के आयोजन रईपुर म करे गीस। ए सेमिनार म रईपुर संभाग के चार ठन िंजला के एक सौ छब्बीस न्यायिक अधिकारी मन ह भाग लीन। ए सेमिनार के सुरूआत छत्तीसगढ़ उच्च न्यायालय के मुख्य न्यायाधीश रमेश सिन्हा ह करीन। सेमिनार म बोलत मुख्य न्यायाधीश ह किहीन कि न्यायपालिका कानून के शासन ल बनाय राखे बर अउ समाज के सबो वर्ग बर न्याय सुनिश्चित करे म एक बड़े भूमिका निभाथे।
नीट-काउंसलिंग
नीट यूजी पाठ्यक्रम म प्रवेस बर राज्य स्तरीय काउंसिलिंग के प्रक्रिया काली उनतीस जुलाई ले सुरू होही। ए प्रक्रिया चार चरण म ऑनलाइन होही। राष्ट्रीय चिकित्सा परामर्श समिति डहार ले नीट यूजी के अंतिम प्रवेस तिथि तीन अक्टूबर निर्धारित करे गेहे। छात्र मन ल सलाह दे गेहे कि ओमन ह सिरिफ आधिकारिक पोर्टल म उपलब्ध जानकारीच ल प्रमाणित मानय अउ ओखरे अनुसार आवेदन करय।
सावन-सोमवार
सावन महिना के तीसर सम्मार म आज प्रदेस के शिव मंदिर मन म श्रध्दालु मनके अब्बड़ भीड़ देखे जावत हे। सबो वर्ग के लोगन भगवान भोलेनाथ के पूजा-पाठ करे बर मंदिर पहुंचत हे। दूरिहा-दूरिहा ले कांवड़िया मन ह भगवान के अभिषेक करे बर मंदिर पहुंचिन।
मुख्यमंत्री विष्णुदेव साय ह आज कबीरधाम जिला के भोरमदेव मंदिर अवइया हजारों कांवड़िया मन उपर हेलीकॉप्टर ले पुष्प वर्षा करके उंखर मनके स्वागत करीन। ए मउका म विधानसभा अध्यक्ष डॉक्टर रमन सिंह, उप मुख्यमंत्री अरूण साव अउ विजय शर्मा घलो मौजूद रिहीन। ए ह दूसर बछर हे जब मुख्यमंत्री खुदे कांवड़िया मनके सुवागत बर भोरमदेव पहुंचे रिहीन। ओमन ह भोरमदेव मंदिर म जाके पूजा-पाठ करीन अउ लोगन के सुख-समृध्दि के कामना करीन। श्री साय ह अमरकंटक ले एक सौ इंक्यावन किलोमीटर के पद यात्रा करके भोरमदेव मंदिर म जल अभिषेक करइया पंडरिया के विधायक भावना बोहरा ल घलो सम्मानित करीन।
मुख्यमंत्री ह ए मउका म बतइन कि स्वदेस दर्सन योजना म भोरमदेव कॉरीडोर विकास बर एक सौ छियालीस करोड़ रूपिया के परियोजना ल मंजूरी दे दे गेहे। एखर अलावा छत्तीसगढ़ ले अमरकंटक जाने वाला श्रध्दालु मनके सुविधा बर मध्यप्रदेस के अनूपपुर म पांच एकड़ जमीन आवंटन के प्रक्रिया चलत हे।
जवान-रक्षा सूत्र
भारतीय जनता पार्टी सैन्य प्रकोष्ठ ह सीमा उपर देस के सुरक्षा बर तैनात जवान मन बर राखी भेजे हे। काली रईपुर म आयोजित एक कारीकरम म भाजपा सैन्य प्रकोष्ठ के अध्यक्ष महेन्द्र प्रताप सिंह राणा ह बतइन कि रक्षासूत्र यात्रा के तहत ए राखी सुकमा, दंतेवाड़ा, बीजापुर, जगदलपुर अउ रईपुर जिला ले इकट्ठा करे गेहे। ए सबो राखी ह पूर्व सैनिक संगठन ‘‘सिपाही‘‘ के अभियान ‘‘ऑपरेशन सिपाही रक्षासूत्र‘‘ के तहत देस के आने-आने राज्य के सहर मन ले होवत रक्षा बंधन ले पहिली दिल्ली पहुंचही, दिल्ली ले ए राखी मन ह सेना के जवान मन तक पहुंचाय जाही।
किसान-प्रदर्शन
बालोद जिला के डौण्डीलोहारा म खातु के कमी के सेति सैकड़ों किसान मन ह आज धरना-प्रदर्सन अउ चक्काजाम करीन। ए आंदोलन म आठ ठन सेवा सहकारी समिति मनके किसान, स्थानीय किसान संघ के पदाधिकारी अउ ग्राम पंचायत के सरपंच संघरा दूसर जनप्रतिनिधि मन ह भाग लीन। किसान मन ह किहीन कि प्रशासन डहार ले ओमन ल सत्ताईस जुलाई तक खाद के आपूर्ति करे के आश्वासन मिले रिहीस, फेर ओमन ल अभी तक खाद नइ मिले हे। किसान मन ह चेतावनी दिन हे कि खाद के आपूर्ति तुरते सुरू नइ होइस त, ओमन ह बड़े आंदोलन बर बाध्य होही।
जिला अध्यक्ष-घोषणा
भारतीय जनता पार्टी के प्रदेस अध्यक्ष किरण सिंह देव ह बालोद, गरियाबंद अउ दंतेवाड़ा के जिलाध्यक्ष, उपाध्यक्ष अउ दूसर पदाधिकारी मन के घोसना कर देहे। बालोद म चेमन देसमुख, गरियाबंद म अनिल चंद्राकर अउ दंतेवाड़ा म संतोष गुप्ता ल भाजपा जिला अध्यक्ष बनाय गेहे।
नागपंचमी
सावन मास के नागपंचमी के परब काली मनाय जाही। ए दिन बिसेस रूप ले नागदेवता के पूजा-पाठ करे जाही। उहें, राजधानी रईपुर के जैतूसाव मठ, दंतेश्वरी अखाड़ा अउ गुढ़ियारी के अखाड़ा म कुस्ती प्रतियोगिता के आयोजन करे जाही। प्रतियोगिता के आयोजन बर अखाड़ा मन म जोर-सोर ले तियारी चलत हे।
मुख्यमंत्री विष्णुदेव साय ह प्रदेसवासी मन ल नागपंचमी के सुभकामना देत किहीन कि ए परब पर्यावरण संतुलन अउ जैव विविधता बर हमर जिम्मेदारी के सुरता देवाथे।
अउ अब थोरकुन समाचार सार म –
– वित्त मंत्री ओपी चौधरी ह आज रायगढ़ जिला के जनपद पंचायत पुसौर म नवीन उप पंजीयक कार्यालय के सुरूआत करीन। ए मउका म ओमन किहीन कि ए कार्यालय खुले ले अब इंहा के लोगन ल सुलभ, सस्ता अउ तेज रजिस्ट्री सेवा मिल सकही।
– स्वास्थ्य मंत्री श्याम बिहारी जायसवाल ह आज मनेन्द्रगढ़ जिला के प्राथमिक स्वास्थ्य केंद्र बंजारीडाड के निरीक्षण करीन अउ मरीज मन ल दे जावत स्वास्थ्य सेवा, दवई के उपलब्धता, साफ-सफाई, डॉक्टर मनके उपस्थिति अउ इलाज के गुणवत्ता के समीक्षा करीन।
– दंतेवाड़ा जिला प्रशासन अउ इंडियन रेडक्रास सोसाइटी के संघरा प्रयास म आज जिला अस्पताल म मेगा ब्लड डोनेसन कैम्प के आयोजन करे गीस।
– बस्तर जिला म सहायक पशु चिकित्सा क्षेत्र अधिकारी पद म भर्ती बर ग्यारा अगस्त तक आवेदन करे जा सकत हे। ए पद म एक बछर बर मासिक मानदेय म भर्ती करे जाही।
अउ
– खरीफ मौसम म उद्यानिकी फसल बर प्रधानमंत्री फसल बीमा योजना म बीमा कराय के इच्छुक किसान मन ह इकतीस जुलाई तक अपन आवेदन दे सकत हे।