प्रदेस के बीजापुर, कांकेर, दंतेवाड़ा, नारायणपुर अउ सुकमा जिला म आज दू़ करोड़ सत्ताईस लाख रूपिया ले जादा के छैंसठ झिन इनामी माओवादी मन ह पुलिस के आगू आत्मसमर्पण करे हे। बीजापुर जिला म पच्चीस झिन माओवादी मन ह बस्तर पुलिस महानिरीक्षक पी.सुंदरराज, अतिरिक्त पुलिस महानिरीक्षक कमलोचन कश्यप अउ पुलिस अधीक्षक जितेन्द्र यादव के आगू आत्मसमर्पण कर लीन हे। ए माओवादी मन उपर एक करोड़ पंद्रह लाख रूपिया के इनाम घोसित रिहीस। आत्मसमर्पण करइया माओवादी मन म ओडिसा म सक्रिय माओवादी नेता रमन्ना, नेशनल पार्क एरिया कमेटी के सदस्य सुक्खू अउ कमलू के संगेसंग बड़का कैडर के माओवादी सामिल हवय।
उहें, दंतेवाड़ा जिला म घलो लोन वर्राटू अभियान ले परभावित होके पंद्रह झिन माओवादी मन ह आत्मसमर्पण करे हे, जेमा ले पांच झिन माओवादी मन उपर सत्रह लाख रूपिया के इनाम घोसित रिहीस। आत्समर्पण करइया माओवादी मन म एक झिन दंपत्ति घलो सामिल हे। ए माओवादी मन ह करीबन बीस बछर ले माओवादी संगठन म सक्रिय रिहीन। एखर मन उपर कतकोन घटना म सामिल रेहे के आरोप हे।
ओति, कांकेर जिला म माओवादी मनके मीलिट्री कंपनी नंबर एक के कमांडर के संगेसंग तेरह झिन इनामी माओवादी मन ह आत्मसमर्पण करे हे। ए जम्मों झिन मन उपर बैंसठ लाख रूपिय के इनाम घोसित रिहीस। ए जम्मों माओवादी मन कांकेर जिला के रावघाट-परतापुर एरिया कमेटी अउ माड़ डिवीजन म सक्रिय रिहीन।
उहें, नारायणपुर जिला म आज कुल तैंतीस लाख रूपिया के इनामी आठ झिन माओवादी मन ह आत्मसमर्पण करे हे, जेमा पीएलजीए बटालियन के प्लाटून-वन अउ प्लाटून-सिक्सटीन के पांच झिन माओवादी सामिल हे। हथियार बनइया टीम के कमांडर मुकेश अउ ओखर संगवारी मन ह घलो आत्मसमर्पण करे हे। आत्मसमर्पण करइया माओवादी मन म चार झिन माईलोगिन घलो सामिल हे।
ऐति, सुकमा जिला म सरकार के पुनर्वास नीति ले परभावित होके पांच झिन माओवादी मन ह आत्मसमर्पण करे हे। ए जम्मों झिन जगरगुंडा अउ चिंतलनार जघा म सक्रिय रिहीन।
आत्मसमर्पण करइया जम्मों माओवादी मन ल पचास-पचास हजार रूपिया के प्रोत्साहन रासि दे गीस। ए जम्मों मन ल राज्य शासन के पुनर्वास नीति के फायदा दे जाही।
आरटीई-लॉटरी
स्कूल शिक्षा विभाग ह चालू शैक्षणिक बछर बर शिक्षा के अधिकार अधिनियम आरटीई के तहत पढ़इया छात्र मनके सीट के आबंटन अउ दूसर दउर के लॉटरी के तारीख ल बढ़ा देहे। पहिली लॉटरी अउ सीट बांटे के काम बाईस अउ तेइस जुलाई के होना रिहीस, फेर अब लॉटरी इकतीस जुलाई के होही। त, उहें प्रवेस के काम इकतीस जुलाई ले दस अगस्त तक होही।
किसान-नैनो डीएपी
चालू खरीफ मौसम म खेती-किसानी बर ठोस डीएपी खातू के कमी ल पूरा करे बर राज्य सरकार डहार ले वैकल्पिक खातु के पूरा बेवस्था करे गेहे। राज्य सरकार ह चालु खरीफ मौसम म रासायनिक खातु के निर्धारित लक्ष्य ले अभी तक चौरानवे प्रतिसत खातु के भंडारण कर लेहे। एखर संगेसंग जमा खातु ले सत्तर प्रतिसत खातु बांटिन। राज्य म यूरिया, एनपीके, पोटाश, सुपरफास्फेट जइसन रासायनिक खातु परयाप्त मात्रा म उपलब्ध हे अउ किसान मन ल ओखर मांग के अनुसार सरकारी समिति मन ले सरलग मिलत हे।
नैनो डीएपी के परयोग ले किसान मन ल प्रति एकड़ धान के फसल म करीबन पचहत्तर रूपिया के सोज्झे फायदा होवत हे। कृषि विसेसज्ञ के मुताबिक धान के एक एकड़ के फसल बर जरूरी पचास किलोग्राम ठोस डीएपी खातु के जघा म सिरिफ पच्चीस किलोग्राम ठोस डीएपी अउ आधा लीटर नैनो डीएपी के एक बोतल परयाप्त हवय। नैनो डीएपी के परयोग बर किसान मन ल जानबा दे गेहे। ओमन ल डेमो देखाके एखर बारे म बताय जात हे। राज्य सरकार ह नैनो डीएपी के परयोग ल लेके किसान मनके बीच जागरूकता अभियान चलावत हे। कृषि विभाग के मैदानी अमला, कृषि विज्ञान केंद्र के वैज्ञानिक अउ प्रगतिसील किसान के मदद ले खेत मन म ठोस डीएपी के संग नैनो डीएपी के घलो परयोग के विधि किसान मन ल बताय जात हे।
हरेली
छत्तीसगढ़ के लोक परब तिहार हरेली आज प्रदेस म उछाह के संग मनाय जात हे। सावन महिना के अमावस के दिन मनाय जाय हरेली तिहार म किसान मन ह अपन कुल देवता अउ खेती-किसानी म परयोग करे जाय, औजार मनके पूजापाठ करथे, अउ संगेसंग लइका, जवान मन ह गेड़ी बनाके ओमा चढ़े के मजा लेथे। रईपुर स्थित मुख्यमंत्री निवास कार्यालय म घलो हरेली तिहार के कारीकरम राखे गीस। ए मउका म मुख्यमंत्री विष्णुदेव साय ह आज मुख्यमंत्री निवास म गौरी गणेश अउ नवग्रह के पूजा करके भगवान शिव के अभिषेक करीन। संगेसंग नांगर, रापा, कुदारी अउ आने कृषि यंत्र मनके पूजापाठ करके हरेली उत्सव के सुभारंभ करीन। ए मउका म मुख्यमंत्री ह प्रदेस के जम्मों लोगन मनके खुसहाली अउ सुख-समृध्दि के कामना करीन।
बस्तर दशहरा
हरेली अमावस के मउका म आज बस्तर के आराध्य देवी मां दंतेश्वरी मंदिर के आगू आज पाटजात्रा पूजा विधान के संगेसंग पचहत्तर दिन तक चलइया विश्व प्रसिध्द बस्तर-दशहरा परब सुरू हो गेहे। बस्तर दसहरा परब के पहिली पूजा विधान म बस्तर सांसद अउ बस्तर दसहरा समिति अध्यक्ष महेश कश्यप, जगदलपुर विधायक किरन सिंह देव के संगेसंग आने-आने जन प्रतिनिधि अउ बस्तर दसहरा परब समिति के पारंपरिक सदस्य मांझी-चालकी, पुजारी, पटेल अउ सेवादार मनके संगेसंग बड़ संख्या म लोगन मन सामिल होइन। बस्तर दसहरा परब के पहिली पूजा विधान पाटजात्रा म रथ बनाय बर औजार ठुरलू खोटला अउ आने औजार मनके परंपरागत ढंग ले पूजा-पाठ के रसम पूरा करे गीस।
कृषि-प्रशिक्षण कार्यशाला
इंदिरा गांधी कृषि विश्वविद्यालय म होय तीन दिन के क्षमता विकास प्रसिक्षण कार्यसाला काली सिरागे। कृषि वैज्ञानिक अउ प्रसार कार्यकर्ता मन बर होय ए कार्यसाला म प्रतिभागी मन ल संवाद कौशल, संभाषण कौशल अउ प्रस्तुतीकरण कौशल विकास के संगेसंग ग्राफिक डिजाइनिंग, पावर पाइंट प्रेजेंटेशन बनाय, वीडियो प्रोडक्शन तकनीक, खेती म आर्टिफिसियल इंटेलिजेंस के परयोग के बारे म प्रसिक्षण दे गीस। समारोह ल संबोधित करत इंदिरा गांधी कृषि विश्वविद्यालय के कुलपति डॉक्टर गिरिश चंदेल ह किहीन कि खेती म आर्टिफिसियल इंटेलिजेंस के बाढ़त महत्ता ल देखत कृषि वैज्ञानिक अउ प्रसार कार्यकर्ता मन बर खेती म आर्टिफिसियल इंटेलिजेंस के परयोग के बारे म जानना बहुते जरूरी हे।
अउ अब मौसम के हाल…
मौसम विभाग के मुताबिक एक ठिन निम्नदाब के क्षेत्र उत्तर बंगाल के खाड़ी के उपर बने हे अउ एखरे संगेसंग उपरी हवा के चक्रवाती घेरा घलो बने हे। अवइया चौबीस घंटा म ए ह निम्नदाब के क्षेत्र म बदले के संभावना हे। जेखर असर ले काली प्रदेस के कतकोन जघा म हल्का ले मध्यम बरसा होय के संभावना हे। उहें, मध्य छत्तीसगढ़ के जिला मन म भारी ले अतिभारी बरसा अउ गाज गिरे के चेतावनी दे गेहे।