चैतन्य बघेल-न्यायिक हिरासत
प्रदेस म कथित सराब घोटाला म गिरफ्तार पूर्व मुख्यमंत्री भूपेश बघेल के बेटा चैतन्य बघेल ल चौदह दिन के न्यायिक रिमांड म भेज दे गेहे। ओमन चार अगस्त तक न्यायिक हिरासत म रइही। प्रवर्तन निदेशालय-ईडी के पांच दिन के रिमांड अवधि खत्म होय के बाद चैतन्य बघेल ल आज रायपुर के विशेष अदालत म पेस करे गीस, जिहां ले कोर्ट ह ओला चौदह दिन के न्यायिक रिमांड म जेल भेज दीस।
खबर के मुताबिक ईडी ह पाछु अट्ठारह जुलाई के भिलाई स्थित बघेल निवास म छापा मारके चैतन्य बघेल ल गिरफ्तार करे रिहीस। उंखर उपर छत्तीसगढ़ म सराब घोटाला ले जुड़े मनी लॉन्ड्रिंग के आरोप हे।
कांग्रेस-चक्काजाम
कथित सराब घोटाला म पूर्व मुख्यमंत्री भूपेश बघेल के बेटा चैतन्य बघेल के खिलाफ प्रवर्तन निदेशालय-ईडी के कार्रवाई के विरोध म कांग्रेस ह आज प्रदेस के जम्मों संभागीय मुख्यालय म चक्काजाम करके आर्थिक नाकाबंदी करीन। चक्काजाम के दउरान यातायात प्रभावित होइस। कोनों अप्रिय घटना ले बांचे बर बड़ संख्या म पुलिसकर्मी तैनात करे गे रिहीस।
कांग्रेस कार्यकर्ता मन ह बड़ संख्या म रायपुर सहर के वीआईपी चौक, टाटीबंध, आरंग अउ आने-आने जघा के तीर राष्ट्रीय राजमार्ग म चक्काजाम करीन। एमा पूर्व मुख्यमंत्री भूपेश बघेल, पूर्व मंत्री शिवकुमार डहरिया, पूर्व विधायक विकास उपाध्याय, सहरी जिला कांग्रेस कमेटी के अध्यक्ष गिरीश दुबे, जिला कांग्रेस कमेटी के अध्यक्ष उधोराम वर्मा, प्रदेस कांग्रेस मीडिया प्रमुख सुशील आनंद शुक्ला अउ कांग्रेस के बड़का नेता मन सामिल होइन। उहें, बिलासपुर म नेता प्रतिपक्ष डॉक्टर चरणदास महंत, विधायक अटल श्रीवास्तव अउ कार्यकर्ता मन चक्काजाम करीन। प्रदेस कांग्रेस अध्यक्ष दीपक बैज ह बस्तर अउ पूर्व उपमुख्यमंत्री टी.एस. सिंहदेव समेत कतकोन नेता मन ह सरगुजा म विरोध प्रदर्सन करीन।
अमित शाह-राष्ट्रीय सहकारिता नीति
केन्द्रीय गृह अउ सहकारिता मंत्री अमित शाह ह चौबीस जुलाई के नई दिल्ली म राखे गे कार्यक्रम म राष्ट्रीय सहकारिता नीति के घोषणा करही। ए मउका म ओमन राष्ट्रीय सहकारिता नीति के प्रारूप ल तैयार करइया समिति के सदस्य, राष्ट्रीय सहकारी संघ के चेयरमैन अउ प्रबंध निदेशक, मंत्रालय के वरिष्ठ अधिकारी, राष्ट्रीय सहकारी विकास निगम के संग प्रशिक्षण परिषद के बड़का अधिकारी मन मौजूद रइही। ए नीति के उद्देश्य सहकारी संस्था मन ल समावेशी बनाना हे। संगेसंग उंखर प्रबंधन अउ भविष्य बर एला तैयार करके गांव वाले मन ल बड़ पैमाना म रोजगार अउ आजीविका म सक्षम बनाना हे।
हाईकोर्ट-याचिका
तिहार के मउका म सड़क ल रोकके बिना मंजूरी के पंडाल अउ स्वागत द्वार लगाय ल लेके दायर करे गे याचिका के सुनवाई मुख्य न्यायाधीश रमेश सिन्हा अउ न्यायाधीश बीडी गुरू के डिवीजन बेंच म होइस। राज्य शासन ह कोर्ट ले नवा गाइडलाइन बर उपराहा बेरा मांगे हे। राज्य शासन ह कोर्ट ल बइतन कि नवा गाइडलाइन ल आने-आने विभाग मनके मदद ल तियार करे जावत हे। राज्य शासन के मांग ल मंजूरी करत हुए डिवीजन बेंच ह नवा गाइडलाइन अवइया तक जुन्ना बेवस्था अउ निरदेस मनके पालन करे ल किहीन हे।
सीबीएसई-सीसीटीवी कैमरा
केन्द्रीय माध्यमिक शिक्षा बोर्ड-सीबीएसई ह विद्यार्थी मनके सुरक्षा बर अपन जम्मों विद्यालय मन म ऑडियो-विजुअल रिकॉर्डिंग वाले उच्च क्षमता के सीसीटीवी कैमरा लगाना जरूरी कर देहे। नवा मानदंड के मुताबिक प्रवेस अउ निकास द्वार, गलियारा, सीढ़ही, कक्षा, प्रयोगसाला, पुस्तकालय, कैंटिन अउ खेल मैदान म कैमरा लागय जाही। कैमरा म रीयल टाइम रिकॉर्डिंग अउ कम ले कम पन्द्रह दिन के डेटा उपलब्ध रइही, जेखर उपयोग जरूरत पड़े म करे जा सकही।
वित्त मंत्री-लैलूंगा
वित्त मंत्री ओ.पी. चौधरी ह रायगढ़ जिला के नगर पंचायत लैलूंगा म दू करोड़ बहत्तर लाख रूपिया ले जादा के आने-आने विकास काम मनके लोकार्पण अउ भूमिपूजन करीन। ए मउका म श्री चौधरी ह लैलूंगा म पंजीयन कार्यालय खोले के घोसना करीन। ए कार्यालय के खुले ले जमीन रजिस्ट्री के काम स्थानीय स्तर म ही होही, जेखर ले लोगन मनके समय अउ ऊर्जा के बचत होही।
ए मउका म श्री चौधरी ह किहीन कि लैलूंगा म स्पोर्ट्स कॉम्प्लेक्स, ऑक्सीजन जोन, मुक्तिधाम अउ बायपास सड़क निर्माण जइसन काम ल प्राथमिकता के संग मंजूरी दे जाही। उहें, स्कूल के उन्नयन बर हरसंभव मदद करे जाही।
हसदेव जलाशय-एक्वा पार्क
कोरबा जिला के हसदेव बांगो डुबान जलाशय म प्रदेस के पहिली एक्वा पार्क बनाय जाही। एखर बर प्रधानमंत्री मत्स्य संपदा योजना के तहत केन्द्र सरकार ह सैंतीस करोड़ दस लाख रूपिया ले जादा के रासि मंजूर करे हे। ए एक्वा पार्क एतमा नगर अउ सतरेंगा क्षेत्र म फइले सैकड़ों एकड़ डुबान जलाशय म विकसित होही। ए पार्क के विकसित होय ले राज्य म मछली पालन के क्षेत्र म बड़ बदलाव आही। उहें, मछली उत्पादन प्रोसेसिंग, विक्रय, निर्यात अउ एक्वा टूरिज्म ले ग्रामीण मनके आय घलो बाढ़ही। मुख्यमंत्री विष्णुदेव साय ह एक्वा पार्क बर रासि मंजूर करे म प्रधानमंत्री नरेन्द्र मोदी समेत केन्द्र सरकार ल धन्यवाद देहे।
हसदेव बांगो जलाशय के डुबान क्षेत्र म विकसित होवइया एक पार्क म दू तरह के सुविधा होही। एतमा नगर म फीड मिल, फिश प्रोसेसिंग प्लांट, हेचरी अउ रिसर्कुलेटरी एक्वा कल्चर सिस्टम स्थापित होही। उहें, सतरेंगा म एक्वा टूरिज्म ल बढ़ाय बर म्यूजियम अउ आने सुविधा विकसित करे जाही।
नवलीन कौर-तीरंदाजी
महासमुंद जिला के तीरंदाज नवलीन कौर ह राष्ट्रीय खेल म अपन स्थान बनाय हे। ओमन ए बछर फरवरी म आयोजित राज्य स्तरीय प्रतियोगिता म स्वर्ण पदक जीते रिहीन। बछर दू हजार अट्ठारह म नवलीन ह बागबाहरा स्थित बिहाझर बालाश्रम म तीरंदाजी के प्रसिक्षण सुरू करीन अउ महासमुंद जिला के पहली महिला तीरंदाज बनीन।
राष्ट्रीय खेल म स्थान बनाय म मुख्यमंत्री विष्णुदेव साय ह नवलीन ल बधाई दीन हे। ओमन किहीन कि प्रदेस के हर खिलाड़ी ल उंखर मेहनत, लगन अउ क्षमता के मुताबिक मउका, संसाधन अउ मंच देवाय जाही।
सुब्रतो मुखर्जी कप फुटबॉल स्पर्धा
जगदलपुर स्थित पंडित श्यामाप्रसाद मुखर्जी सभागार म पच्चीसवां राज्य स्तरीय शालेय क्रीडा प्रतियोगिता के तहत आज ले सुब्रतो मुखर्जी कप फुटबॉल स्पर्धा के सुरूआत होइस। विधायक किरण सिंह देव ह ए प्रतियोगिता के उद्घाटन करीन। ए मउका म ओमन किहीन कि बस्तर जइसे आदिवासी अउ दूरस्थ अंचल म खेल प्रतिभा के कोनों कमी नइ हे। सुब्रतो कप जइसन स्पर्धा खिलाड़ी मन ल शालेय स्तर ले राष्ट्रीय स्तर तक पहुंचाय के मउका प्रदान करथे। चार दिवासीय ए प्रतियोगिता म प्रदेस के पांच जोन – बस्तर, रायपुर, बिलासपुर, दुरूग अउ सरगुजा के दू सौ चालीस खिलाड़ी अउ पचास खेल प्रसिक्षक अउ टीम मैनेजर सामिल होवत हे। ए स्पर्धा के विजेता टीम राष्ट्रीय स्तर के प्रतियोगिता म छत्तीसगढ़ के अगुवई करही।
अउ अब मौसम के हाल…
मौसम विभाग के मुताबिक प्रदेस म काली अधिकांश जघा म हल्का ले मध्यम बरसा होय या फेर गरज-चमक के साथ सिटिर-साटर पानी गिरे के संभावना हे। मौसम विज्ञानी एच.पी. चन्द्रा ह आकाशवाणी समाचार ल बतईन कि एक ऊपरी हवा के घेरा दक्षिण छत्तीसगढ़ अउ ओखर तीर-तखार म बने हे। एखर अवइया अड़तालीस घंटा म एक कमती दबाव के क्षेत्र बने के संभावना हे। श्री चन्द्रा ह बतईन कि एखर असर ले काली दक्षिण छत्तीसगढ़ के कुछेक जिला म भारी बरसा होय अउ गाज गिरे के आसंका हे।
संक्षिप्त समाचार
थोरकुन समाचार सार म –
– महिला अउ बाल विकास मंत्री लक्ष्मी राजवाड़े ह सूरजपुर वनमंडल के अंतर्गत आयोजित जिला स्तरीय वन महोत्सव अउ एक पेड़ मां के नाम कारीकरम म चरण पादुका योजना के सुभारंभ करीन।