आज दिनभर के खबर ल अपन गुरतुर छत्तीसगढ़ी भाखा म पढ़व

केन्द्र/राज्य-अनलाॅक
केन्द्रीय गृह सचिव ह सबो राज्य के मुख्य सचिव मन ल लिखे चिट्ठी म ए स्पष्ट करे हे कि राज्य के बीच अउ राज्य के भीतर लोगन के अउ सामान के अवई-जवई म कोनो रोक नइ हे। अनलाॅक-तीन के निरदेस ल बतावत ओमन किहीन कि पड़ोसी देस मनके संग होय सीमापार करे के समझौता म लोगन अउ उंखर सामान ल लाय-जाय बर कोनों प्रकार के ई-परमिट के या कोनों प्रकार के मंजूरी के जरूरत नइ हे।
चिट्ठी म केहे गे हवय कि कोनों-कोनों राज्य अउ जिला म स्थानीय रूप म अवई-जवई म रोक लगाय गेहे, जेखर ले राज्य मनके बीच सामान अउ सुविधा के परिवहन म परेसानी आवत हे। एखर ले लोगन के रोजगार के अवसर म घलो परभाव पड़े हे।
चक्रधर समारोह
रायगढ़ म आज ले छत्तीसवां चक्रधर समारोह सुरू होवत हे। ए समारोह रायगढ़ के महान संगीतज्ञ राजा चक्रधर सिंह के सुरता म मनाय जाथे। कोरोना संक्रमण ल देखत ए बखत ऐतिहासिक चक्रधर समारोह ल वर्चुअल रूप म मनाय जाही। अब ले थोरकुन देर बाद श्रीगणेश के आरती अउ वंदना के संग एखर सुरूवात होही।
पहिली दिन आज स्मिता मौकासी डहार ले वोकल, जयपुर के शर्मिला शर्मा डहार ले कत्थक अउ लखनऊ के अनीस शाबरी डहार ले कव्वाली के प्रस्तुति दे जाही। एला यू-ट्यूब म लाईव देखे जा सकत हे।
बारिश
प्रदेस म पाछु कुछेक दिन ले सरलग होवत बरसा के रूके के बाद अब जनजीवन सामान्य होय बर लगे हे। उहें, कुछेक इलाका म पुल-पुलिया अउ सड़क मनके टूटे ले अवई-जवई प्रभावित होय हे।
बस्तर जिला म आज बरसा नइ होय ले लोगन ल राहत मिले हे। नदी-नाला के जलस्तर घलो कमती आवत हे। फेर, जगदलपुर म इंद्रावती नदी के पानी अभी घलो जुन्ना पुल ले करीबन डेढ़ मीटर उपर बोहात हे। बाढ़ प्रभावित लोगन ल राहत सिविर म राखे गे हवय, जेमा ले कोनो-कोनो परिवार अपन घर लहुट गे हवय।
राजनांदगांव जिला के मानपुर विकासखंड ले औंधी क्षेत्र के करीबन चालीस गांव के सड़क संपर्क टूट गे हवय। मानपुर-औंधी रद्दा म चंदन नाला के तीर सड़क अउ पुलिया ह बरसा म बोहा गे, जेखर ले इहां आवागमन बाधित होय हे।
बिलासपुर जिला कलेक्टर डाॅक्टर सारांश मित्तर ह आज तखतपुर के बाढ़ प्रभावित क्षेत्र के निरीक्षण करीन। ए दउरान ओमन ह प्रभावित लोगन ले चरचा करीन अउ उंखर समस्या के तुरते निपटारा करे के निरदेस दीन।
इही बीच, मौसम विभाग ह अवइया चैबीस घंटा के दउरान प्रदेस के अधिकांश जघा म हल्का ले मध्यम बरसा होय के संभावना जताईन हे। संगेसंग एक-दू जघा म आकाशीय बिजली गिरे अउ भारी बरसा होय के चेतावनी घलो दे गे हवय।
मौसम विभाग के अनुसार मानसून द्रोणिका ह राजस्थान के जैसलमेर, उत्तर-पश्चिम मध्यप्रदेश, कोलकाता अउ ओखर बाद दक्षिण-पूर्व दिसा के डहार ले उत्तर-बंगाल के खाड़ी तक स्थित हे, जेखर प्रभाव ले छत्तीसगढ़ म घलो कई जघा म बरसा होवत हे।
कोरोना-मरीज
छत्तीसगढ़ म कोरोना संक्रमण के मामला बाढ़ते जावत हे। आज घलो आने-आने जिला ले कोरोना संक्रमित नवा मरीज मिले के पुष्टि होय हे।
दुरूग जिला म आज तेईस झन नवा कोरोना संक्रमित मनके के पहिचान करे गीस, जेमा ले जादा मरीज सहरी क्षेत्र ले हवय।
उहें, रायगढ़ जिला म घलो आज छब्बीस झिन नवा मरीज मिले हे। एमा सफाई कर्मी अउ स्वच्छता दीदी मन घलो सामिल हे।
इही बीच, बस्तर म आज कोरोना संक्रमित एक अउ मरीज के मउत होगे। जिला म अब तक कोरोना संक्रमण ले दू झिन मनखे के मउत होय हे।
ओति, कोरिया जिला म कोरोना संक्रमण के बाढ़त मामला ल देखत शिवपुर-चरचा नगर पालिका क्षेत्र ल काली तेईस अगस्त के रतिहा बारह बजे तक बर कंटेनमेंट जोन घोषित कर दे गे हवय।
हमर ग्राम सभा
पंचायत अउ ग्रामीण विकास मंत्री टी.एस. सिंहदेव काली संझा साढ़े सात बजे आकाशवाणी रायपुर ले प्रसारित विशेष कार्यक्रम ‘‘हमर ग्राम सभा‘‘ म ग्राम पंचायत विकास योजना-जीपीडीपी के बारे म विस्तार ले जानकारी दीही। ए कार्यक्रम ल मीडियम वेब नौ सौ इक्यासी किलोहटर््ज म सुने जा सकत हे। ए कारीकरम ल प्रदेस के सबो आकाशवाणी केन्द्र मन ह एके संघरा रिले करही।
एनटीए-जेईई-नीट
राष्ट्रीय परीक्षा एजेंसी-एनटीए ह केहे हे कि नीट अउ जेईई परीक्षा कराय बर शिक्षा मंत्रालय के निरदेस के पालन बर बड़ इंतजाम करे गे हवय। जेईई मेन परीक्षा एक ले छह सितंबर तक अउ नीट परीक्षा तेरह सितंबर के कराय जाही।
एनटीए ह बतईन कि परीक्षा ले पहिली अउ बाद म परीक्षा केन्द्र मन ल सैनेटाईज करे जाही अउ परीक्षार्थी मन ह परीक्षा केन्द्र म नवा मास्क अउ दस्ताना ले सकही। एनटीए ह कानून बेवस्था अउ बिजली सप्लाई राखे बर, परीक्षा केन्द्र के बाहिर लोगन के भीड़ ल रोके बर अउ विद्यार्थी मनके अवई-जवई के बेवस्था बर राज्य के अधिकारी मन ले मदद मांगीन हे। एजेंसी ह प्रवेस बर एडमिड कार्ड जारी करे के संग जरूरी निरदेस अउ कोरोना संबंधी सलाह घलो भेजीन हे।
मुख्यमंत्री-जन्मदिन
मुख्यमंत्री भूपेश बघेल अपन जन्मदिन के मउका म काली तेईस अगस्त के वीडियो कान्फ्रेंसिंग के माध्यम ले मंझनिया बारह बजे ले डेढ़ बजे तक लोगन ले जुड़ही।
मुख्यमंत्री ह कोरोना संक्रमण के प्रकोप ल देखत लोगन ले अपील करीन हे कि ओमन बधाई दे बर मुख्यमंत्री निवास म झन आवय, जेखर ले सोसल डिस्टेंसिंग बने रहय अउ कोरोना के खतरा ल टाले जा सकय।
साइबर अपराध-अभियान
साइबर अपराध ल रोके बर अउ लोगन ल आॅनलाइन ठगी के सिकार होय ले बचाय खातिर बिलासपुर पुलिस डहार ले आज ले जागरूता अभियान चलाय जात हे, जउन ह सात दिसंबर तक चलही। एखर बर जिला के सबो थाना प्रभारी मन ल नोडल अधिकारी बनाय गे हवय। थाना के प्रत्येक कर्मचारी मन ह पच्चीस-पच्चीस लोगन ल ए संबंध म प्रशिक्षण दीहीं। प्रशिक्षित होय लोगन ल साइबर मितान के नाव ले जाने जाही अउ ए साइबर मितान मन ह ग्रामीण मन ल साइबर अपराध ले बाचे बर जागरूक करही।
खबर के मुताबिक बिलासपुर जिला म पाछु सात महीना म ढाई सौ ले जादा लोगन आॅनलाइन ठगी अउ साइबर अपराध के सिकाय होय हे।
सुपोषण अभियान
बस्तर जिला के करीबन दू हजार आंगनबाड़ी केन्द्र मन म सुपोषण अभियान म चालीस हजार ले जादा लइका मन ल अब मूंगफली अउ गुड़ ले बने लडडू अउ गुड़ वाले काजू दे जाही। राष्ट्रीय ग्रामीण आजीविका मिशन-बिहान म काम करइया स्व-सहायता समूह मन ल एखर आपूर्ति के जिम्मेदारी दे गे हवय। जिला के पच्चीस ठिन स्व-सहायता समूह के माईलोगिन मन ए खाद्य सामग्री तैयार करही।
उहें, राजनांदगांव जिला म लइका मन म कुपोषण ल दूर करे बर आंगनबाड़ी केन्द्र अउ मितानिन मनके माध्यम ले चिन्हांकित लाभार्थी मनके घर तक सूखा रासन पहुंचाय जावत हे।
गणेश-चतुर्थी
देसभर म आज गणेश चतुर्थी के परब ल बड़ उछाह के संग मनाय जावत हे। बुद्धि, विवेक अउ समृद्धि के प्रतीक गणपति के ग्यारह दिन के तिहार आज ले सुरू होके चतुर्दशी के दिन संपन्न होथे।
प्रदेस के आने-आने जघा म भगवान गणेश के मूर्ति स्थापित करे जावत हे। कोरोना संक्रमण के सेती ए बछर सार्वजनिक जघा म गणेश भगवान के मूर्ति ल नइ बईठारे जावत हे। उहें, प्रसासन डहार ले गणेश प्रतिमा के स्थापना म कोरोना संक्रमण ले बचाव के निरदेस के पालन करे बर केहे गे हवय।
ईको फ्रेंडली मूर्ति
राष्ट्रीय ग्रामीण आजीविका मिशन-बिहान म रोजगार अउ उद्यमिता विकास ल बढ़ावा दे बर स्व-सहायता समूह मन ल मदद दे जावत हे। एमा लोगन ल व्यक्तिगत रूचि के काम अउ रोजगार के मउका दे जावत हे।
इही कड़ी म बलरामपुर जिला के ग्राम राधाकृष्ण नगर म लवली समूह के सदस्य निमई मंडल डहार ले भगवान गणेश के ईको फ्रेंडली मूर्ति बनाय जावत हे। मंडल ल एसवीईपी परियोजना म आर्थिक सहायता दे गे हवय अउ अब ओमन ह मूर्ति बनाके बने कमावत हे।