संसद के मानसून सत्र ह आज ले सुरू हो गेहे। ए सत्र ह इक्कीस अगस्त तक चलही। ए बेरा म कुल इक्कीस बइठका होही।
प्रधानमंत्री नरेंद्र मोदी ह आसा जताय हे कि ए संसद के मानसून सत्र ह सार्थक अउ सकारात्मक चर्चा ले भरपूर होही। ए सत्र ह देस के लोकतंत्र ल सशक्त बनाही। संसद के मानसून सत्र के सुरूआत ले पहिली संवाददाता मन ल संबोधित करत हुए श्री मोदी ह किहीन कि ए सत्र ह राष्ट्र बर एक ठिन गौरवपूर्ण क्षण हवय।
प्रधानमंत्री श्री मोदी ह किहीन कि भारत ह आतंकवाद ले लेके नक्सलवाद तक कतकोन हिंसक चुनौती के सामना करे हे। फेर आज नक्सलवाद अउ माओवाद के प्रभाव ह तेजी ले कम होवत हे।
राज्यपाल-पीएम जनमन अभियान
राज्यपाल रमेन डेका ह आज राजभवन म प्रधानमंत्री जनमन अभियान के क्रियान्वयन के प्रगति के समीक्षा करीन। ओमन ह अधिकारी मन ले किहीन कि ग्रामस्तर म जाके योजना मनके क्रियान्वयन ल देखंय।
राज्यपाल ह प्रदेस के पीएम जनमन क्षेत्र म कतकोन विभाग के काम के समीक्षा करीन अउ चलत काम ल देखे बर घलो गांव भर के दउरा करे बर संबंधित अधिकारी मन ल निरदेस दीन। ओमन ह किहीन कि योजना के मूल उद्देस्य बिसेस पिछड़ा जनजाति ल केंद्र कोति ले दे जात सुविधा के लाभ पहुंचाना हे। ए सबो वर्ग तक मूलभूत सुविधा, शिक्षा, स्वास्थ्य, रद्दा आदि देना पहिली प्राथमिकता हे, जउन योजना ह चलत हे, ओ हा बेरा राहत पूरा हो जावय। ए बइठका म राज्यपाल ह पीएम जनमन क्षेत्र म आंगनबाड़ी निर्माण के प्रगति के जानकारी लीन अउ किहीन कि आंगनबाड़ी मन म लाइवलीहुड बर काम होना चाही।
ईडी-चैतन्य बघेल
प्रवर्तन निदेशालय-ईडी डहार ले करीबन ढाई हजार करोड़ रूपिया के सराब घोटाला के संबंध म गिरफ्तार होय चैतन्य बघेल के रिमांड के अवधि ह काली बाईस जुलाई के खतम होवत हे। ईडी कोति ले काली चैतन्य बघेल ल एक घांव फेर रईपुर स्थित पीएमएलए बिसेस न्यायालय म पेस करे जाही।
एखर ले पहिली, आज ईडी ह एक ठिन प्रेस विज्ञप्ति जारी करके दावा करे हे कि ओमन ल अभू तक करे गे जांच म ए पता चले हे कि चैतन्य बघेल ल अवैध रूप ले सोलह करोड़ सत्तर लाख रूपिया मिले रिहीस। ईडी के अनुसार चैतन्य ह ए पइसा के उपयोग अपन रियल इस्टेट ले जुड़े प्रोजेक्ट म करे हे। एखर अलावा ईडी ह ए घलो दावा करे हे कि चैतन्य बघेल ह सराब घोटाला ले संबंधित करीबन एक हजार करोड़ रूपिया के लेनदेन म घलो सामिल रहे हे।
जानबा के अनुसार ईडी ह सराब घोटाला मामला म अभू तक पूर्व आबकारी मंत्री कवासी लखमा अउ पूर्व आईएएस अनिल टूटेजा समेत सात झिन आरोपी मन ल गिरफ्तार करे हे।
ईओडब्ल्यू-गिरफ्तार
सराब घोटाला मामला म आर्थिक अपराध अन्वेषण ब्यूरो-ईओडब्ल्यू ह मनीष मिश्रा, संजय कुमार मिश्रा अउ अभिषेक सिंह ल गिरफ्तार करे हे। बताय जात हे कि संजय अउ मनीष एफएल टेन लाइसेंस लेके प्रदेस म माहंगी ब्रांड के अंग्रेजी सराब के आपूर्ति करत रिहीन। तीनों आरोपी मन ल ईओडब्ल्यू के बिसेस कोर्ट म पेस करे जाही, जिंहा ले तीनों ल रिमांड म लेके पूछताछ घलो करे जा सकत हे। हालहे म ईडी ह सराब घोटाला मामला म पूर्व मुख्यमंत्री भूपेश बघेल के बेटा चैतन्य बघेल ल गिरफ्तार करे हे अउ ओमन ल रिमांड म लेके पूछताछ करत हे।
ओति एंटीकरप्शन ब्यूरो-एसीबी के टीम ह आज सूरजपुर तहसील कार्यालय म छापा मार के लिपिक जुगेश्वर राजवाड़े ल पच्चीस हजार रूपिया के रिस्वत लेवत गिरफ्तार करे हे। ए लिपिक ह एक झिन मनखे ले भुंईया के नामांतरण बर रिस्तव मांगे रिहीस।
कांग्रेस-चक्काजाम
पूर्व मुख्यमंत्री भूपेश बघेल के बेटा चैतन्य के खिलाफ कथित सराब घोटाला म प्रवर्तन निदेशालय-ईडी के कार्रवाई विरोध म कांग्रेस ह काली बाईस जुलाई के राज्य के सबो संभागीय मुख्यालय म चक्काजाम करहीं। पार्टी के प्रदेस अध्यक्ष दीपक बैज ह बतइन कि पांचो संभागीय मुख्यालय म आर्थिक नाकाबंदी करे के फइसला ले गेहे। प्रदेस म सबो राष्ट्रीय राजमार्ग, जिला अउ प्रमुख सहर के मुख्य मार्ग म काली मंझनिया बारह बजे ले लेके दू बजे तक चक्काजाम करके आर्थिक नाकाबंदी करे जाही।
बुनकर-सम्मान
प्रदेस के रायगढ़ के बुनकर आकाश कुमार देवांगन ल राष्ट्रीय हथकरघा पुरस्कार बर चुने गेहे। अवइया सात अगस्त के राष्ट्रीय हथकरघा दिवस के मउका म नई दिल्ली म आयोजित कारीकरम म राष्ट्रपति द्रौपदी मुर्मु ह आकाश देवांगन समेत देसभर ले चुने गे चौबीस झिन बुनकर मन ल ए पुरस्कार दीही।
ए पुरस्कार देस के हथकरघा के क्षेत्र म उत्कृष्ट योगदान देवइया बुनकर डिजाइनरों अउ कंपनी मन ल दे जात हे।
आकाश देवांगन ल जनजातीय बस्तर जाला कोसा साड़ी बर ए पुरस्कार दे जाही।
माओवादी-ग्रामीण हत्या
बीजापुर जिला म माओवादी मन ह दू झिन ग्रामीण मनके हत्या कर देहे। जानबा के अनुसार पाछू रतिहा छुटवाई गांव के रहइया कवासी जोगा अउ बड़ा तर्रेम के रहइया मंगलू कुरसम के चार ले पांच झिन माओवादी मन ह धारदार हथियार ले हत्या कर दीन। अब पुलिस टीम कोति ले जांच करे जात हे।
सावन सोमवार
सावन के दूसर सोमवार म आज देसभर म बोलबम अउ हर-हर महादेव के जयकारा लगत हे। उहें, प्रदेस के सबो शिव मंदिर मन म भक्त मनके भीड़ घलो देखे बर मिलत हे। सबो शिव मंदिर म बिहनिया ले ही लोगन मन ह पहुंचत हे। ए सबो लोगन मन ह दूर-दूर ले भगवान भोलेनाथ के दर्सन करे बर मंदिर म पहुंचत हे। कतकोन जघा म आज कांवड़ यात्रा घलो निकाले गीस।
ओति, कबीरधाम म पंडरिया विधायक भावना बोहरा ह मा नर्मदा के जल के संग एक सौ इंक्यावन किलोमीटर लंबा पदयात्रा के सुरूआत करीन। अमरकंटक ले कांवर लेके निकले विधायक ह अपन ए यात्रा के दउरान डांगरिया के जलेश्वर महादेव अउ प्रसिध्द भोरमदेव मंदिर म पूजा करही।
अउ अब मौसम के हाल…
प्रदेस म काली एक-दू जघा म गरज-चमक के संग भारी बरसा हो सकत हे। भारी बरसा के क्षेत्र ह मुख्य रूप ले दक्षिण छत्तीसगढ़ रहे के संभावना हे। उहें, काली प्रदेस के जादातर जघा म हल्का ले मध्यम बरसा होय के संग बूंदाबांदी घलो हो सकत हे।
इही बीच, बलरामपुर जिला के बेलसर गांव म काली गाज गिरे ले खेत म काम करत दू झन लोगन के मउत होगे, जेमा एक झन नाबालिक ह घलो सामिल हे। उहें, ए हादसा म छै झिन आने लोगन मन ह गंभीर रूप ले घायल हो गेहे, जेखर इलाज शंकरगढ़ सामुदायिक स्वास्थ्य केंद्र म चलत हे।
अउ अब थोरकुन समाचार सार म –
– मुख्यमंत्री विष्णुदेव साय ह काली रईपुर स्थित सरदार बलबीर सिंह जुनेजा इंडोर स्टेडियम म होय वाको इंडिया राष्ट्रीय किक बॉक्सिंग चैम्पियनशिप के समापन अउ पुरस्कार वितरण समारोह म सामिल होइन। ए चैम्पियनशिप म छत्तीसगढ़ ह आठ ठिन स्वर्ण, तेरह ठिन रजत अउ सैंतीस कांस्य पदक प्राप्त करके छटवां स्थान पाय हे।
– वित्त मंत्री ओपी चौधरी ह काली रायगढ़ जिला के सरिया म नवा बने तहसील कार्यालय, उप पंजीयक कार्यालय अउ अटल परिसर के लोकार्पण करीन।
– कोरबा जिला के केसला घाट जलप्रपात म काली बूडे़ एक झिन जवान लइका के शव ल बरामद कर ले गेहे। जानबा के अनुसार नदिया म नहाय बर उतरे तीन झिन लोगन मन ले एक झिन ह पानी के तेज बहाव म बोहा गे रिहीस।
– बलरामपुर जिला के वाड्रफनगर पुलिस ह पाछू रतिहा कीबन नौ लाख रूपिया के गांजा के तस्करी करत चार झिन आरोपी मन ल गिरफ्तार करे हे। तस्कर मन ह ए सबो गांजा ल थैला म भरके उत्तर प्रदेस कोति ले जात रिहीन।
– जांजगीर-चांपा जिला के बलौदा पुलिस ह भुईयां के धोखाधड़ी करे के मामला म भागे एक झिन आरोपी ल गिरफ्तार करे हे। अभी तक ए मामला म पांच झिन आरोपी मनके गिरफ्तारी हो चुके हे।