प्रदेस म एक जुलाई ले सुरू होवइया वित्तीय समावेशन संतृप्ति अभियान के तहत अब तक करीब साढ़े पांच हजार नवा जन-धन खाता खोले गेहे। संगेसंग सात हजार छै सौ इकयासी नागरिक मन ल प्रधानमंत्री जीवन ज्योति बीमा योजना अउ दस हजार सात सौ ले जादा नागरिक मन ल प्रधानमंत्री सुरक्षा बीमा योजना के तहत पंजीकृत करे गेहे। उहें, बाईस सौ ले जादा लोगन मन ल अटल पेंशन योजना म पंजीकृत करे गेहे। एखर अलावा करीब उन्नीस सौ निष्क्रिय जन-धन खाता मन ल केवाईसी कर फेर सक्रिय करे गेहे।
भारतीय स्टेट बैंक के उप महाप्रबंधक अउ राज्य स्तरीय बैंकर समिति के संयोजक राकेश कुमार सिन्हा ह आज एक ठन पत्रकारवार्ता म बतइन कि केंद्रीय वित्तीय सेवा प्रभार डहार ले सुरू करे गे, ए राष्ट्रव्यापी अभियान के उद्देस्य सबो पात्र लोगन मन ल प्रधानमंत्री जन-धन योजना ले जोड़के उनला वित्तीय रूप ले सशक्त बनाना आय। ओमन बतइन कि प्रदेस म अब तक एक हजार आठ सौ तैंतालीस सिविर मनके आयोजन करे गेहे। ए अभियान तीस सितंबर तक चलही।
राज्यपाल-कुलपति बैठक
राज्यपाल रमेन डेका ह शैक्षणिक गुणवत्ता ल बेहतर बनाय बर कुलपति मन ले दू महिना के भीतर रोडमैप मांगे हे। ओमन आज राजभवन म कुलपति मन के संग विचार विमर्स कर छात्र मनके हित म जरूरी निरदेस दीन। ए मउका म राज्यपाल ह कुलपति मनले किहीन कि जउन पाठ्यक्रम म छात्र अउ शिक्षक नइ हे, उनला बंद करे जाय। ओमन निजी विश्वविद्यालय के कुलपति मन ले किहीन कि ओमन मैनेजमेंट के संग बइठका कर, गुणवत्ता सुधार के कार्ययोजना बनाके, सितंबर म उपलब्ध करावंय। राज्यपाल ह विश्वविद्यालय अनुदान आयोग के मापदंड अउ नियम मनके कड़ाई ले पालन करे बर, घलो निरदेस दीन। ओमन किहीन कि जेन विश्वविद्यालय नेक ग्रेडिंग बर पात्र हो चुके हे, ओहा अनिवार्य रूप ले ग्रेडिंग के प्रक्रिया म सामिल होवय। श्री डेका ह किहीन कि राष्ट्रीय शिक्षा नीति के बारे म विद्यार्थी मन ल घलो जागरूक करे जाय।
बइठका म निर्णय ले गीस कि शासकीय अउ निजी विश्वविद्यालय मन बर पोर्टल बनाय जाही, जेमा प्रवेस ले लेके हर गतिविधि मन ल विश्वविद्यालय अपलोड करही।
मिशन अस्पताल-याचिका खारिज
छत्तीसगढ़ उच्च न्यायालय ह बिलासपुर स्थित मिशन अस्पताल प्रबंधन के याचिका ल खारिज कर देहे। कोर्ट ह जिला प्रशासन डहार ले करे जात कार्रवाई ल सही ठहराय हे। न्यायालय ह अपन फइसला म प्रबंधन के रवइया ल लेके नाराजगी घलो जताय हे।
बतादन कि कमीशनर कोर्ट के फइसला ल चुनौती देवत हुए क्रिश्चियन वूमन बोर्ड ऑफ मिशन अउ नितिन लारेंस ह हाईकोर्ट म याचिका दायर करे रिहीस। कोर्ट ह नितिन लारेंस डहार ले पेस करे पावर ऑफ अटॉर्नी ल घलो माने ले इंकार कर देहे। मिशन अस्पताल के स्थापना बछर अट्ठारा सौ पचासी म होय रिहीस। अस्पताल ल लीज म दे गे रिहीस। लीज बछर दू हजार चौदह म खतम होगे रिहीस, तभो अस्पताल प्रबंधन ह लीज के नवीनीकरण नइ कराइन। नवीनीकरण बर पेस करे गे आवेदन ल नजूल कोर्ट ह पाछू बछर खारिज कर दे रिहीन। नजूल कोर्ट के निर्णय ल चुनौती देवत हुए मिशन प्रबंधन ह कमिश्नर कोर्ट म अपील दायर करे रिहीस। कमिश्नर कोर्ट ह घलो मिशन के अपील खारिज कर दे रिहीन। ए फइसला ल हाईकोर्ट म चुनौती दे गे रिहीस।
कांग्रेस-चक्काजाम
पूर्व मुख्यमंत्री भूपेश बघेल के बेटा चैतन्य बघेल के खिलाफ कथित सराब घोटाला म प्रवर्तन निदेशालय, ईडी के कार्रवाई के विरोध कांग्रेस बाईस जुलाई के राज्य के सबो संभागीय मुख्यालय मन म चक्काजाम करही। आज रायपुर स्थित प्रदेस कांग्रेस कार्यालय म आयोजित एक ठन पत्रकारवार्ता म पार्टी के प्रदेस अध्यक्ष दीपक बैज ह बतइन कि कांग्रेस के प्रदेस पदाधिकारी अउ विधायक मनके होय बइठका म पांचों संभागीय मुख्यालय म आर्थिक नाकेबंदी करे के निर्णय ले गेहे।
दुर्घटना
कांकेर जिला म पाछू रतिहा होय एक ठन सड़क हादसा म चार झन लोगन मनके मउत होगे, फेर दू झन गंभीर रूप ले घायल होगे हे, जेन ल जिला अस्पताल म भर्ती कराय गेहे।
मिले जानकारी के अनुसार कांकेर जिला के राष्ट्रीय राजमार्ग क्रमांक-तैंतालीस म कुलगांव करा पाछू रतिहा एक ठन तेज रफ्तार कार अनियंत्रित होके पुल ले जा टकराइस। ए हादसा अतका भीषण रिहीस कि पुल ले टकराते ही कार म आगी लग गे। ए हादसा म चार झन युवक मनके के जिंदा जले ले मउत होगे। उहें, कार म सवार दू झन दूसर युवक मन कइसनो करके बाहिर आइन। घटना के सूचना मिलते ही, पुलिस अउ फायर ब्रिगेड के टीम मउका म पहुंचिन अउ आगी म काबू पा लीन, तब तक चार झिन युवक मन बुरी तरह ले जल गे रिहीन। वरिष्ठ पुलिस अधीक्षक आई. कल्याण ऐलेसेला ह किहीन कि मृतक मनके पहिचान डीएनए के माध्यम ले करे जाही। ओमन बतइन कि कार म सवार पांच झन युवक कोंडागांव जिला के ढोंढरापाल अउ एक झन युवक कांकेर जिला के बांडाटाल गांव के रहइया रिहीन।
माओवादी-शिनाख्त
नारायणपुर जिला म काली होय मुठभेड़ म मारे गे छै झन माओवादी मन ले एक झन के पहिचान प्लाटून नंबर एक के कमांडर राहुल पुनेम के रूप म करे गेहे। ए माओवादी मन उपर हत्या, आगजनी, मुठभेड़, आईईडी बिस्फोट जइसे कई ठन वारदात म सामिल होय के आरोप हे। ए मुठभेड़ महाराष्ट्र अउ छत्तीसगढ़ के सीमा उपर अबूझमाड़ के जंगल म होय रिहीस।
नमी राय पारिख-स्वर्ण पदक
जापान म पांच ले चौदह जुलाई तक आयोजित अंतर्राष्ट्रीय पावर लिफि्ंटग चैंपियनशिप म भिलाई के नमी राय पारिख ह स्वर्ण पदक जीते हे। ओहा महिला मनके संतावन किलो ग्राम वर्ग म एक सौ पचयासी किलो डेडलिफ्ट कर स्वर्ण पदक म कब्जा जमइन। इकतीस सदस्यीय भारतीय दल म सब जूनियर, जूनियर, सीनियर अउ मास्टर वर्ग के अट्ठारा महिला अउ तेरह पुरूष खिलाड़ी सामिल रिहीन। भारतीय टीम के ओव्हरऑल चैंपियनशिप म छह स्वर्ण, आठ रजत अउ छै कांस्य पदक के संग तीसरइया स्थान हासिल होय हे।
राष्ट्रीय मंथन सत्र
‘‘भारतीय कृषि में जैविक और अजैविक तनाव प्रबंधन पर नीति पत्र‘‘ बिसय उपर इक्कीस अउ बाईस जुलाई के रायपुर म राष्ट्रीय मंथन सत्र के आयोजन करे जाही। ए सत्र राष्ट्रीय जैविक स्ट्रेस प्रबंधन संस्थान रायपुर के सहयोग ले राष्ट्रीय अजैविक स्ट्रेस प्रबंधन संस्थान, बारामती अउ भारतीय कृषि अर्थशास्त्र समिति मुंबई डहार ले आयोजित होही। ए सत्र म देस के कृषि वैज्ञानिक, अर्थशास्त्री, नीति निर्माता अउ अलग-अलग हितधारक सामिल होही।
जिले की चिट्ठी
आकाशवाणी रईपुर के प्रादेशिक समाचार एकांश, डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ म आकाशवाणी के सबो केंद्र एके संग रिले करही। ए बखत के अंक म ‘‘कोरिया‘‘ जिला के गतिविधि के बारे म जानकारी दे जाही।
अउ अब पेस हे मौसम के हाल…
मौसम विभाग ह प्रदेस म तेईस जुलाई ले बरसा के गतिविधि तेज होय के संभावना जताय हे। मौसम विभाग के अनुसार एक ठन द्रोणिका बिहार के मध्य भाग ले ओडिशा होवत हुए झारखंड तक विस्तारित हे। एखर असर ले प्रदेस म बदली-बरसा के स्थिति बने हुए हे। काली प्रदेस के कुछेक जघा म हल्का ले मध्यम बरसा होय या गरज-चमक के संग छींटा पड़े के संभावना हे। उहें, एक-दू जघा म गाज गिरे के घलो संभावना हे।
इही बीच, राजधानी रायपुर के खम्हारडीह इलाका म आज आकाशीय बिजली गिरे ले एक झन युवक के मउत होगे। मिले जानकारी के अनुसार ए युवक छत म मोबाइल म गेम खेलत रिहीन। इही दउरान गाज गिरे ले मोबाइल फटगे अउ मउका म ही युवक के मउत होगे।