छत्तीसगढ़ विधानसभा के मानसून सत्र के दूसर दिन आज सदन म जल जीवन मिशन के मुद्दा गूंजीस। प्रश्नकाल म पूर्व मुख्यमंत्री भूपेश बघेल ह जल जीवन मिशन के मामला ल उठावत ए मिशन के असफल होय के आरोप लगाइन। जवाब म उपमुख्यमंत्री अउ विभागीय मंत्री अरूण साव ह किहीन कि राज्य सरकार ह दस लाख नल कनेक्सन देहे। एखर बाद विपक्षी सदस्य मन ह गलत जानकारी देके बात किहीन अउ मंत्री के जवाब ले असंतुष्ट होके सदन ले बहिर्गमन कर दीन।
उहें, नेता प्रतिपक्ष डाक्टर चरणदास महंत ह आज सदन म ध्यानाकर्षण के माध्यम ले रेडी टू ईट फूड के मामला उठाइन। ओमन गलत तरीका ले स्व-सहायता समूह के चयन अउ भ्रष्टाचार के आरोप लगाइन। संगेसंग गड़बड़ी करइया विभागीय अधिकारी मन उपर कड़ा कार्रवाई करे के मांग करीन। जवाब म महिला अउ बाल विकास मंत्री लक्ष्मी राजवाड़े ह किहीन कि नियम के तहत रेडी टू ईट के काम महिला स्व-सहायता समूह ल दे गेहे। एखर बाद मंत्री के जवाब ले असंतुष्ट विपक्षी सदस्य मन सदन ले बहिर्गमन कर दीन।
विधानसभा समाचार-02
सदन म आज विपक्षी सदस्य मन ह शून्यकाल म रेत के अवैध उत्खनन अउ परिवहन के मामला उठाइन। नेता प्रतिपक्ष डॉक्टर चरणदास महंत ह किहीन कि पुलिस अउ खनिज अधिकारी मन के देखरेख म प्रदेस म रेती के अवैध उत्खनन करे जावत हे। ओमन अवैध उत्खनन करइया माफिया मन डहार ले कानून व्यवस्था बिगाड़े के आरोप लगावत ए विषय म चर्चा कराए के मांग करीन। विधानसभा अध्यक्ष डाक्टर रमन सिंह ह ए मुद्दा उपर सदन म चर्चा के ग्राहृता ल अस्वीकार कर दीन। एखर बाद विपक्षी सदस्य मन सदन ले बहिर्गमन कर दीन।
उहें, आज विधानसभा म ध्यानाकर्षण सूचना के माध्यम ले भाजपा सदस्य अजय चंद्राकर, धरमजीत सिंह अउ भावना बोहरा ह बांग्लादेसी घुसपैठियां के मामला उठाइन। श्री चंद्राकर ह किहीन कि करीबन पांच हजार घुसपैठिया छत्तीसगढ़ म हावय, जेमन आधार, राशन कार्ड अउ पासपोर्ट बनाके सरकारी योजना मन के फायदा लेवत हे। ओमन घुसपैठियां मन बर डिटेंशन सेंटर बनाए के मांग करीन। उहें, धरमजीत सिंह ह रोहिंग्या मुसलमान मन ल चिन्हारी करे के मांग रखीन। भावना बोहरा ह शिकायत के आधार म जांच करे के मांग उठाइए। एखर जवाब म गृह मंत्री विजय शर्मा ह किहीन कि कई ठिन जिला मन म एफआईआर करे के कार्रवाई करे गेहे। संगेसंग टोल फ्री नंबर जारी कर लोगन मन ल जानकारी देबर कहे गेहे।
सदन म आज प्रश्नकाल के दउरान बस्तर संभाग म उद्योग ले मिले सीएसआर मद के राशि ल भाजपा सदस्य किरण सिंहदेव ह उठाइन। ओमन किहीन कि सीएसआर मद ले इक्कीस करोड़ रूपिया के राशि जारी होय के जानकारी आए हे। ऐमा ले सात करोड़ चवालीस लाख रूपिया कोन मद म खरचा होय हे। जवाब म उद्योग मंत्री लखनलाल देवांगन ह किहीन कि तीन साल के आय के अनुपात म दू प्रतिशत के राशि सीएसआर मद म खरचा करे जाथे।
शुभांशु शुक्ला-वापसी
भारतीय अंतरिक्ष यात्री शुभांशु शुक्ला एक्सियोम-फोर मिशन के तीन आने अंतरिक्ष यात्री मनके संग आज पृथ्वी म सकुसल आगे हे। अंतर्राष्ट्रीय अंतरिक्ष स्टेसन म अट्ठारह दिन के अंतरिक्ष यात्री अमेरिका के कैलिफोर्निया तट म उतरीन।
प्रधानमंत्री नरेन्द्र मोदी, विज्ञान और प्रौद्योगिकी मंत्री जितेन्द्र सिंह ह गु्रप कैप्टन शुभांशु शुक्ला के सफल अंतरिक्ष यात्रा म खुशी व्यक्त करत ओमन ल बधाई दीन हे।
छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह घलो मिशन के ऐतिहासिक सफलता अउ सुरक्षित वापसी बर गु्रप कैप्टन शुभांशु शुक्ला अउ उंखर अंतरिक्ष यात्री साथी मन ल बधाई दीन हे।
ईडी-छापा
प्रवर्तन निदेसालय-ईडी के टीम ह आज रायपुर म रेलवे कांट्रेक्टर अउ दुरूग के होटल कारोबारी के दीपक नगर स्थित घर म छापा मारे के कार्रवाई करीन। सूत्र ले मिले जानकारी के मुताबिक आज ईडी के टीम ह रायपुर अउ दुरूग स्थित कारोबारी के घर पहुंचीन, जिहां जांच चलत रिहीस हे। बताए जावत हे मनी लान्ड्रिंग ले जुड़े मामला के जांच ईडी के टीम ह करत हे।
श्रीरामलला दर्शन योजना
मुख्यमंत्री विष्णुदेव साय ह आज श्रीरामलला दर्शन योजना के अंतर्गत रायपुर रेलवे स्टेसन ले बिसेस ट्रेन ह हरियर झण्डा देखाके रवाना करीन। ए ट्रेन ले रायपुर संभाग के आठ सौ पचास झिन श्रद्धालु श्रीराम जन्मभूमि अयोध्या धाम के दर्शन करे बर रवाना होइस। ए मउका म मुख्यमंत्री ह किहीन कि मार्च दू हजार चौबीस ले सुरू होय ए योजना म बीस हजार ले जादा श्रद्धालु मन ल अयोध्या धाम के दर्सन कराए जा चुके हे। ओमन किहीन कि राज्य सरकार ह ए बछर छत्तीस करोड़ रूपिया के बजट ए योजना बर मंजूर करे हे।
केंद्रीय सचिव-बैठक
मुख्यमंत्री विष्णुदेव साय ह आज विधानसभा परिसर स्थित कार्यालय में केन्द्र सरकार के भूमि संसाधन के सचिव मनोज जोशी ले भेंट करीन। ए मउका म भू-अभिलेख प्रणाली ल मजबूत करे, भूमि सर्वेक्षण म तकनीकी नवाचार के उपयोग अउ राजस्व न्यायालय म लंबित मामला मन के तुरते निराकरण ल लेके विस्तार ले गोठबात होइस। खबर के मुताबिक केंद्रीय सचिव श्री जोशी चौदह ले सोलह जुलई तक छत्तीसगढ़ के प्रवास म हे।
उहें, केंद्रीय सचिव मनोज जोशी अउ संयुक्त सचिव कुणाल सत्यार्थी ह आज नवा रायपुर म डिजिटल इंडिया लैंड रिकार्ड्स माडनाइजेशन प्रोग्राम अउ नक्सा परियोजना के प्रगति के समीक्षा करीन। ए बइठका म केंद्रीय सचिव ह विभागीय अधिकारी मनके संग भू अभिलेख के संधारण, सर्वे आदि के प्रगति के समीक्षा अउ परियोजना मनके क्रियान्वयन बर दिसा-निरदेस दीन। ओमन राजस्व न्यायालय के लंबित प्रकरण ल तुरते निराकरण करे बर किहीन। केंद्रीय सचिव ह किहीन कि जिओरिफ्रेंसिंग के काम ल जल्दीच पूरा करके किसान मन के हित म उपयोग करे जाए। संगेसंग लंबित प्रकरण मन के निराकरण बर बिसेस राजस्व अधिकारी मनके नियुक्ति करे के बात घलो किहीन।
हाईकोर्ट-जनहित याचिका
छत्तीसगढ़ उच्च न्यायालय ह जांजगीर-चांपा जिला म तरिया म बूड़े ले चार झिन लइका मन के मउत के मामला ल स्वतः संज्ञान म लेहे। मुख्य न्यायाधीश रमेश सिन्हा अउ न्यायाधीश विभु दत्त के डिवीजन बेंच ह ए मामला म मुख्य सचिव ले व्यक्तिगत सपथ पत्र के रूप म जवाब मांगे हे। हाईकोर्ट ह ए मामला ल जनहित याचिका के रूप म मंजूर कर लेहे। मामला के अवइया सुनवाई उनतीस जुलाई के होही।
उहें, उच्च न्यायालय ह एक आने जनहित याचिका उपर सुनवाई करत छत्तीसगढ़ म साइबर अपराध के जांच म अहम भूमिका निभइया इलेक्ट्रानिक साक्ष्य विशेषज्ञ-साइबर एक्सपर्ट के नियुक्ति नई होय ल लेके टिप्पणी करे हे। मुख्य न्यायाधीश रमेश सिन्हा अउ न्यायाधीश विभु दत्त के डिवीजन बेंच ह केन्द्र सरकार के अधिवक्ता ले पूछे हे कि साइबर एक्सपर्ट के नियुक्ति कब तक होही। एखर उपर केन्द्र सरकार के पक्ष राखत अधिवक्ता रमाकांत मिश्रा ह कोर्ट ल बतइन कि विशेषज्ञ मन के नियुक्ति तीन चरण के प्रक्रिया के बादे करे जा सकत हे।
शिक्षादूत-हत्या
बीजापुर जिला म आज माओवादी मन ह मुखबिरी के शक म दू झिन शिक्षादूत मनके हत्या करे देहे। जिला के पुलिस अधीक्षक जितेन्द्र यादव ह घटना के पुष्टि करत बतइन हे कि मृतक म कोंडापड़गु स्कूल म शिक्षादूत पीलूर निवासी विनोद मड़े अउ टेकमेट्टा गांव के निवासी सुरेश मेटटा सामिल हे। पुलिस मामला के जांच करत हे।
अउ अब थोरकुन समाचार सार म –
– छत्तीसगढ़ विद्युत नियामक आयोग डहार ले बिजली के दर म करे गे वृद्धि के विरोध म आज कांग्रेस डहार ले जिला स्तर म पत्रकारवार्ता के आयोजन करे गीस। मुंगेली म जिला स्तरीय पत्रकारवार्ता ल जिला कांग्रेस अध्यक्ष घनश्याम वर्मा ह संबोधित करत राज्य सरकार उपर कतकोन आरोप लगाइन।
– राजनांदगांव जिला म पुलिस ह तेरह बांग्लादेसी नागरिक मन ल पकड़े हे। एखर मन ले पूछताछ कर दस्तावेज मनके जांच करे जात हे।
– कांडागांव जिला के फरसगांव पुलिस ह आनलाइन अउ आफलाइन म करोड़ो रूपिया के ठगी करइया एक झिन आरोपी ल गिरफ्तार करे हे।
– बलौदाबाजार-भाटापारा जिला के पुलिस अधीक्षक भावना गुप्ता के निर्देस म म्युल खाता के पहिचान कर सात झिन आरोपी मन उपर कार्रवाई करे गेहे। अब तक होय जांच म एखर खाता मन ले तीन लाख रूपिया ले जादा के लेनदेन के जानकारी मिले हे।
अउ
– जांजगीर-चांपा जिला के नवागढ़ थाना क्षेत्र के सिऊंड़ गांव म गाज गिरे ले एक झिन युवक के मउत होगे।