मुख्यमंत्री विष्णुदेव साय के अध्यक्षता म आज मंत्रालय म आयोजित कैबिनेट बइठका म कतकोन महत्वपूर्ण निर्णय ले गीस। मंत्रिपरिषद डहार ले राष्ट्रीय राजधानी क्षेत्र के तर्ज म छत्तीसगढ़ राजधानी क्षेत्र के विकास बर संबंधित प्राधिकरण के स्थापना बर विधेयक के प्रारूप के अनुमोदन करे गीस। ए प्राधिकरण रईपुर, दुरूग, भिलाई अउ नवा रायपुर म तेजी ले बाढ़त आबादी अउ सहरीकरण ल देखत ए क्षेत्र के सुव्यवस्थित अउ योजनाबध्द विकास बर काम करही।
कैबिनेट बइठका म जनजातीय समूह अउ दूसर वंचित वर्ग के गरीब युवा, महिला अउ तृतीय लिंग के लोगन मनके संस्थागत विकास बर छत्तीसगढ़ शासन अउ पैन आईआईटी एलुमनी रीच फॉर इंडिया फाउंडेशन के मध्य संयुक्त उद्यम कंपनी के गठन ल मंजूरी प्रदान करे गेहे।
मंत्रिपरिषद ह राज्य के युवा मन ल स्टार्टअप अउ नवाचार के जरिया सशक्त बनाय बर छात्र स्टार्टअप अउ नवाचार नीति लागू करे के एक महत्वपूर्ण निर्णय लेहे। ए नीति के लक्ष्य राज्य के सौ ठिन तकनीकी संस्थान के पचास हजार छात्र तक पहुंच बनाना हे।
मंत्रिपरिषद कोति ले पुराना वाहन ले होवइया सड़क दुर्घटना के रोकथाम अउ वायु प्रदूषण ल नियंत्रित करे बर छत्तीसगढ़ मोटरयान कराधान अधिनियम उन्नीस सौ इंक्यानवे म संशोधन विधेयक अउ छत्तीसगढ़ मोटरयान नियम-उन्नीस सौ चौरानवे म संशोधन के अनुमोदन करे गीस।
मंत्रिमंडल निर्णय-02
मंत्रिपरिषद डहार ले राज्य के छोटे अउ मध्यम व्यापारी मन ल प्रोत्साहित करे अउ न्यायालय म लंबित कर संबंधी मामला मनके जल्दी निपटारा करे बर छत्तीसगढ़ बकाया कर, ब्याज अउ शास्ति के निपटान संबंधी विधेयक के प्रारूप के अनुमोदन करे गेहे। एखर अलावा मंत्रिपरिषद डहार ले छत्तीसगढ़ निजी विश्व विद्यालय स्थापना-संचालन-संशोधन विधेयक, छत्तीसगढ़ कृषि उपज मंडी संशोधन विधेयक, छत्तीसगढ़ मालसेवा कर संशोधन विधेयक, छत्तीसगढ़ भू-राजस्व संहिता संशोधन विधेयक के अनुमोदन करे गीस।
मंत्रिपरिषद डहार ले राज्य पुलिस सेवा संवर्ग के उचित प्रबंधन बर अर्हकारी सेवा अवधि पूरा कर चुके अधिकारी मन ल वरिष्ठ प्रवर श्रेणी वेतनमान प्रदान करे जाय बर तीस सांख्येतर पद बनाके वरिष्ठ प्रवर श्रेणी वेतनमान देके निर्णय ले गेहे।
बिजली-नई दरें
छत्तीसगढ़ विद्युत नियामक आयोग ह बछर दू हजार पच्चीस-छब्बीस बर बिजली के नवा दर घोसित कर देहे। विद्युत नियामक के अध्यक्ष हेमंत वर्मा ह बतइन कि राज्य के बिजली दर म औसतन एक दसमलव आठ नौ प्रतिसत के वृध्दि ल मंजूरी दे गेहे। घरेलू उपभोक्ता मनके विद्युत दर ल दस ले बीस पइसा प्रति यूनिट बढ़ाय गेहे। नवा दर एक जुलाई ले लागू हो गेहे। आयोग ह ए निर्णय राज्य के बिजली उत्पादन, पारेषण, वितरण कंपनी अउ भार प्रेषण केंद्र के वार्षिक राजस्व आवश्यकता के मूल्यांकन के बाद लेहे।
माओवादी-आत्मसमर्पण
नारायणुपर जिला म आज बाईस झिन माओवादी मन पुलिस के आगू आत्मसमर्पण करे हे। एमन उपर कुल सैंतीस लाख पचास हजार रूपिया के इनाम घोसित रिहीस। जिला के पुलिस अधीक्षक रोबिनसन गुड़िया ह बतइन कि आत्मसमर्पण करइया माओवादी मन म बड़का माओवादी नेता डीवीसीएम, एसीएम, पार्टी मेंबर अउ जनताना सरकार अध्यक्ष समेत चौदह पुरूष अउ आठ महिला माओवादी सामिल हे। ए जम्मों माओवादी माड़ डिवीजन के कुतुल, नेलनार, इन्द्रावती एरिया कमेटी म सक्रिय रिहीन। ए माओवादी मन ल राज्य सरकार के पुनर्वास नीति के तहत प्रोत्साहन रासि के रूप म पचास-पचास हजार रूपिया के चेक अउ दूसर जम्मों प्रकार के सुविधा दे जाही।
मुख्यमंत्री विष्णुदेव साय ह सोसल मीडिया म पोस्ट करत किहीन कि अब तक कुल एक हजार चार सौ छिहत्तर माओवादी आत्मसमर्पण करे चुके हे। ओमन किहीन कि लोगन अब बंदूक नइ विकास के रद्दा म संग चलना चाहथे। श्री साय ह किहीन कि डबल इंजन के सरकार मार्च दू हजार छब्बीस तक नक्सलवाद ल जड़ ले खतम करे बर प्रतिबध्द हरय।
दुर्घटना
कबीरधाम जिला म आज बोरवेल वाहन के खाई म गिरे ले पांच मनखे मन के मउत हो गेहे। उहें, चार झिन दूसर मन घायल हो गेहे। मिले जानकारी के अनुसार ए वाहन मध्यप्रदेस ले छत्तीसगढ़ कोति आत रिहीस, इही दउरान कुकदूर थाना क्षेत्र के अगरपानी चाटा म वाहन अनियंत्रित होके गहरा खाई म गिर गे। घटना स्थल ले पांच लोगन मन के शव बरामद करे गेहे। चार झिन दूसर मनखे मन गाड़ी के नीचे दबे ले गंभीर रूप ले घायल हो गेहे, जेमन ल उपचार बर अस्पताल म भर्ती कराय गेहे।
मुख्यमंत्री विष्णुदेव साय ह ए सड़क दुर्घटना म पांच लोगन मनके निधन अउ चार झिन दूसर मनके घायल होय म गहरा दुख जतइन हे। ओमन घायल मनके समुचित चिकित्सा अउ जरूरी मदद के निरदेस जिला प्रशासन ल दीन हे।
ओति, कोंडागांव जिला के पासंगी गांव म आज स्कूल बस ल एक तेज रफ्तार चारपहिया वाहन ह टक्कर मार दीस। ए हादसा म बारह लइका मन घायल हो गेहे, जेमा ले दू झिन लइका गंभीर हे। जम्मों घायल मन ल फरसगांव सामुदायिक स्वास्थ्य केंद्र म भर्ती कराय गेहे।
राज्यपाल जवान-मुलाकात
राज्यपाल रमेन डेका ह आज रईपुर के एक निजी अस्पताल पहुंच के सीआरपीएफ के घायल जवान मंटू नाथ अउ राजवीर िंसंह ले मुलाकात करीन। ए जवान पाछू आठ जुलाई के माओवादी मन कोति ले बीजापुर म करे गे आईईडी बिस्फोट म घायल हो गे रिहीन। राज्यपाल ह जवान मनके इलाज करत चिकित्सक मन ले गोठबात करके ओमन के जरूरी उपचार के निरदेस दीन।
राज्यपाल खिलाड़ी-मुलाकात
राज्यपाल रमेन डेका ले पैरा कैनो एथलीट प्राची यादव, मनीष कौरव अउ दूसर खिलाड़ी मन भेंट करीन। राज्यपाल ह खिलाड़ी मनके उज्जवल भविष्य बर सुभकामना दीन। प्रदेस के दिव्यांग खिलाड़ी मन बर पहिली घांव राजधानी रईपुर म दू दिन के पैरा कैनो वर्कशॉप के आयोजन करे गीस।
श्रावण मास
भगवान शिव के आराधना के पावन सावन महिना आज ले सुरू हो गेहे। मुख्यमंत्री विष्णुदेव साय ह सावन महिना के सुभारंभ म प्रदेसवासी मन ल सुभकामना दीन हे। ओमन किहीन कि सावन के दउरान शिव मंदिर मन म श्रध्दालु मनके भीड़ उमड़थे अउ आने-आने जघा ले श्रध्दालु कांवर यात्रा म निकलथे। मुख्यमंत्री श्री साय ह किहीन कि भगवान शिव के कृपा जम्मों झन म बने रहय अउ ए पावन महिना प्रदेसवासी मनके जीवन म नवा उर्जा अउ सांति के संचार करे।
बातों-बातों में
प्रादेसिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ म ए बखत बरसात के मौसम म होवइया बीमारी अउ ओखर बचाव उपर एम्स रायपुर के डॉक्टर तुषार भरत जगझापे ले लेगे भेंटवार्ता के प्रसारण करे जाही। ए कारीकरम के प्रसारण काली बारह जुलाई के एफएम चैनल म बिहनिया नौ बजे ले अउ प्रायमरी चैनल म बिहनिया साढ़े दस बजे ले करे जाही। एला छत्तीसगढ स्थित आकाशवाणी के जम्मों केंद्र रिले करही।
अउ अब मौसम के हाल….
मौसम विभाग के अनुसार अवइया चौबीस घंटा के दउरान प्रदेस के एक-दू जघा म गरज-चमक के संग भारी बरसा होय के संभावना हे। भारी बरसा के क्षेत्र प्रमुख रूप ले उत्तर छत्तीसगढ़ संभावित हे। उहें, प्रदेस के बहुतअकन जघा म हल्का ले मध्यम बरसा होय या गरज-चमक के संग छींटा पड़े के संभावना हे। मानसूनी तंत्र के उत्तर छत्तीसगढ़ के उपर स्थित होय के सेति प्रदेस के मध्य अउ दक्षिणी हिस्सा म वर्षा के गतिविधि म कमी होय के उम्मीद हे।
इही बीच, प्रदेस म पाछू कुछ दिन ले होवत सरलग बरसा ले कई ठिन नदी-नाला उफान म हे।
अउ अब थोरकुन समाचार सार म –
– राज्य शासन ह स्वतंत्रता दिवस के आयोजन के संबंध म जम्मों जिला अउ संस्थान मन ल विस्तृत दिसा-निरदेस जारी करे हे।
– राज्य शिक्षक सम्मान स्मृति पुरस्कार दू हजार पच्चीस बर शिक्षक मनले तीस जुलाई तक ऑनलाइन आवेदन आमंत्रित करे गेहे।
– जशपुर कलेक्टर रोहित व्यास ह बगिया शासकीय अनुसूचित जनजाति बालक आश्रम के प्रभारी अधीक्षक ठाकुर दयाल सिंह ल कर्तव्य म लापरवाही बरते के मामला म निलंबित कर देहे।