उहें, छत्तीसगढ़ के मुख्यमंत्री विष्णुदेव साय ह घलो आज रईपुर स्थित अपन निवास कार्यालय म डॉक्टर मुखर्जी के फोटो उपर हारफूल चढ़ाके उनला अपन श्रध्दांजलि दीन हे। मुख्यमंत्री श्री साय ह किहीन हे कि डॉक्टर मुखर्जी के जीवन ह राष्ट्रभक्ति, निःस्वार्थ सेवा अउ अखंड भारत के प्रति अटूट संकल्प के चिन्हारी हे।
अइसने, छत्तीसगढ़ विधानसभा परिसर स्थित सेंट्रल हाल म डॉक्टर श्यामा प्रसाद मुखर्जी के फोटू उपर राज्य विधानसभा सचिव दिनेश शर्मा ह पुष्पांजलि अर्पित करीन। विधानसभा परिसर स्थित प्रेक्षागृह के मुख्य द्वार म स्थापित डॉक्टर मुखर्जी के मूर्ति उपर विधानसभा सचिवालय के बड़का अधिकारी मन फूलमाला चढ़ाके उनला सुरता करीन।बारिश
प्रदेसभर म मानसून पूरा तरह ले सक्रिय हे। एखर असर ले राज्य के कतकोन जघा म सरलग बरसा होवत हे, ए पाय के नरवा-नदिया उफनावत हे अउ जनजीवन घलो अस्त-व्यस्त हो गेहे। राजधानी रईपुर तीर-तखार के जघा कालीच ले रही-रही के पानी गिरत हे।
ओति, बलरामपुर जिला के राजपुर क्षेत्र घलो काली रतिहा ले सरलग बरसा के सेति ओकरा गेउर नदिया उफनावत हे। जिला म गागर, गोपालपुर अउ बासेन नदिया के संगेसंग छोट-बड़े पुलिया अउ नरवा मन घलो भरगे हवय।
इही बीच, राजपुर-अंबिकापुर रद्दा म आज बिहनिया एक ठिन गाड़ी ह अंतेतंते होके गागर नदी म गिरगे। फेर ड्राइवर अउ आने मनखे मन ल नदिया ले सुरक्षित बाहिर निकाल ले गीस।
उहें, कोरबा जिला म बीते चार दिन ले सरलग होवत रजरजहा बरसा ले न केवल रद्दाबाठ भलूक घर-द्वार दुकान मन म घलो पानी अमागेहे। पुल-पुलिया बोहाय ले कई ठिन गांव के संपर्क मुख्य सड़क ले टूट गेहे। कुसमुंडा के लक्ष्मण नाला म पानी ह पुलिया ले चार फीट उपर बोहावत हे। तेज पानी के बहाव ले कुचेना पुल ह घलो टूट गेहे। खबर मिले हे कि तीर-तखार के इलाका म पानी भरे के सेति बड़ झिन मनखे घरे भीतरी फंदाय हे।
अइसनहे, कोरिया अउ बस्तर जिला के बड़ अकन जघा म बीते चौबीस घंटा ले झमाझम बरसा होय के समाचार हे।
इही बीच, मौसम विभाग ह चेताय हे कि अवइया दू दिन के दउरान प्रदेस के कई ठिन जघा म जोरदरहा बरसा हो सकत हे। संगे प्रदेस म कहू-कहू तेज हवा चले के संगे गाज घलो गिर सकत हे।
मुख्यमंत्री समीक्षा बैठक
मुख्यमंत्री विष्णुदेव साय ह किहीन हे कि नवा रईपुर के सुघ्घर विकास ह सरकार के पहिली प्राथमिकता हे। नवा रईपुर जघा म अवइया बेरा के जरूरत ल धियान म राखत सुघ्घर विकास करे जाही। श्री साय ह ए गोठ ल मंत्रालय म आवास अउ पर्यावरण विभाग के समीक्षा बइठका म किहीन। ओमन नवा रईपुर विकास प्राधिकरण के तहत चलइया कामकाज के जानकारी लेवत अधिकारी मन ल जरूरी दिसा-निरदेस घलो दीन।
मुख्यमंत्री ह परमालकसा-खरसिया के बीच प्रस्तावित नवा रेल लाइन ल नवा रईपुर ले जोड़े के मंसा जाहिर करीन। श्री साय ह भारतमाला प्रोजेक्ट के तहत विशाखापट्टनम ल जोड़इया एक्सप्रेस-वे ले आयात अउ निर्यात याने जिनिस ल बाहिर भेजई अउ बाहिर ले इंहा लवई एला प्रोत्साहित करे बर नवा रईपुर म लॉजिस्टिक हब बनाय के जरूरत बतइन। बइठका म अधिकारी मन ह बतइन कि छत्तीसगढ़ ले क्रास होके जवइया एक्सप्रेस-वे के निर्माण काम ह करीबन पंचानवे फीसदी पूरा हो गेहे। एखर बने ले रईपुर ले विशाखापट्टनम के दूरी सौ किलोमीटर कमती हो जही। मुख्यमंत्री ह यहू किहीन कि प्रदेस के नवा औद्योगिक नीति ले बड़ भारी अकन निवेसक मन रिझत हे, जेखर ले इंहा के जवान लइका मन ल कामकाज मिलही।
बइठका म वित्त मंत्री ओपी चौधरी अउ मुख्य सचिव अमिताभ जैन समेत आने बड़का अधिकारी मौजूद रिहीन।
उच्च न्यायालय डीजीपी नोटिश
छत्तीसगढ़ उच्च न्यायालय ह सहायक उपनिरीक्षक वाहन चालक के पद बर जारी प्रमोशन आर्डर के लागू करे उपर रोक लगावत पुलिस महानिदेशक अउ अतिरिक्त पुलिस महानिदेशक छत्तीसगढ़ सशस्त्र बल ले ए बारे म जवाब मांगे हे। रईपुर निवासी अउ बटालियन परसदा महासमुंद म पदस्थ प्रधान आरक्षक महेन्द्र सिंह कोरम के याचिका उपर न्यायाधीश रमेन्द्र कुमार अग्रवाल के बेंच म सुनवई होइस।
मुंगेली-वृक्षारोपण
एक पेड़ मां के नाम अभियान के चलत मुंगेली जिला के गांव लोहड़िया अउ रामपुर म प्रधानमंत्री आवास योजना के पचास हजार हितग्राही मनके निवास जघा म एक लाख ले जादा नान्हे पउधा रोपे गीस। हर अंगना म हरियाली बढ़ाय के ए पहल ल गोल्डन बुक ऑफ वर्ल्ड रिकॉर्ड दर्ज करे गीस। ए अभियान के जिला स्तरीय कारीकरम लोहड़िया अउ रामपुर स्थित महात्मा गांधी ऑक्सीजोन कैम्पस म राखे गे रिहीस, जेमा माई पहूना छत्तीसगढ़ के उपमुख्यमंत्री अरूण साव रिहीन।
ठगी-आरोपी गिरफ्तार
दुरूग पुलिस ह काल सेंटर खोलके ठगी करइया एक झिन बड़का गिरोह के पर्दाफास करे हे। ए मामला म दू झिन माईलोगिन समेत नौ झिन आरोपी ल गिरफ्तार कर ले गेहे। पुलिस ल सूचन मिले रिहीस कि भिलाई के चौहान टाउन म गैर कानूनी ढंग ले ऑनलाइन तरीका ले यूएसए अउ कनाडा के मनखे मन ले ठगी करे जात रिहीस।
जांजगीर-चांपा जिला के चांपा स्थित सार्वजनिक वितरण प्रणाली वाले रासन दुकान म करीबन सत्रह लाख रूपिया के गड़बड़ी के मामला म दुकान संचालक ल पुलिस ह गिरफ्तार करे हे।
उहें, इही जिला के शिवरीनारायण पुलिस ह म्यूल एकाउंट के मामला म तीन झिन आरोपी ल गिरफ्तार करे गेहे।
मोहर्रम
आज देसभर म मोहर्रम ल श्रध्दा अउ आस्था के संग मनाय जात हे। करबला म सत्य अउ न्याय के रक्षा बर पैगम्बर मोहम्मद के नाती हजरत इमाम हुसैन अउ उंखर साथी मनके शहादत के सुरता म मोहर्रम मनाय जाथे। ए मउका म ताजिया निकाले जाथे अउ करबला के शहीद मनके सर्वोच्च बलिदान के सुरता म मजलिस राखे जाथे।
ऐति, छत्तीसगढ़ म घलो मोहर्रम के मउका म राजधानी रईपुर समेत कई ठिन सहर मन म ताजिया निकाले जात हे। रईपुर के करबला म घलो हजरत हुसैन के बड़का कुर्बानी ल सुरता करत आज रतिहा मजलिस याने धार्मिक बइठका राखे जाही।
दुर्घटना
कोरबा जिला के कटघोरा-अंबिकापुर नेशनल हाइवे म एक ठिन तेज रफ्तार चारपहिया गाड़ी ल फटफटी संवार मनखे मन ल टक्कर मार दीस। ए हादसा म दू झिन मनखे मउत होगे। उहें, एक झिन आने जवान लइका के हालत गंभीर हे, फेर आरोपी ड्राइवर ल गिरफ्तार कर ले गेहे।
उहें, इही जिला के दीपका क्षेत्र म रैनपुर तीर आज बिहनिया यात्री बस अउ फटफटी के एक्सीडेंट होगे, जेमा फटफटी सवार जवान लइका के मउत होगे। उहें, एक झिन आने जवान लइका घायल होगे।
सहकारिता दिवस-संगोष्ठी
सहकारिता दिवस के मउका म नवा रईपुर स्थित राज्य सहकारी बैंक परिसर म एक दिन के संगोष्ठी राखे गे रिहीस। ए संगोष्ठी म सहकारिता मंत्री केदार कश्यप सामिल होइन अउ ओमन ‘एक पेड़ मां के नाम‘ अभियान के चलत पउधा लगाइन। एखर बाद श्री कश्यप ह मवेसी अउ मछरी पलइया किसान मन ल रूपे केसीसी कार्ड के संगे दुग्ध सहकारी समिति मन ल माइक्रो एटीएम बांटिन। ए संगोष्ठी म बोलत श्री कश्यप ह किहीन कि ‘एक पेड़ मां के नाम‘ ए अभियान ह सहकारिता के संग भारत म सामाजिक अउ पर्यावरण जागरूकता बर बड़का पहल हे।