आज संविधान हत्या दिवस मनाय जात हे। आजे के दिन ह हमन ल ओ घटना के सुरता देवाथे, जउन पच्चीस जून उन्नीस सौ पचहत्तर के संविधान के गला घोटके देस उपर आपातकाल थोप दे गे रिहीस। प्रधानमंत्री नरेन्द्र मोदी ह किहीन हे कि आज भारत के लोकतांत्रिक इतिहास के सबले काला अध्याय म एक ठिन आपातकाल लागू होय के पचास साल पूरा होगे हे। सोशल मीडिया पोस्ट म प्रधानमंत्री ह किहीन कि ए दिन भारतीय संविधान म निहित मूल्य, मौलिक अधिकार अउ प्रेस के स्वतंत्रता ल खत्म कर दे गीस अउ कतकोन राजनीतिक नेता, सामाजिक कार्यकर्ता, छात्र अउ आम लोगन मन ल जेल म डाल दे गीस।
त उहें, केन्द्रीय गृहमंत्री अमित शाह ह किहीन कि आपातकाल कांग्रेस के सत्ता के भूख ले प्रेरित अन्याय के युग रिहीस। श्री शाह ह ए संघर्ष म अपन प्राण गंवइया लोगन मन ल श्रद्धांजलि दीन।
संविधान हत्या दिवस उपर आज छत्तीसगढ़ म घलो कतकोन कार्यक्रम करे जात हे। रईपुर म छत्तीसगढ़ साहित्य अकादमी डहार ले राखे गे कार्यक्रम म मुख्यमंत्री ह किहीन कि पूर्व प्रधानमंत्री इंदिरा गांधी ह देस म आपातकाल लागू करके लोकतंत्र के हत्या करे रिहीन।
ओति, उपमुख्यमंत्री अरूण साव ह रायपुर के एकात्म परिसर स्थित प्रदेस भाजपा कार्यालय म पत्रकार मन ले गोठबात करत किहीन कि बछर उन्नीस सौ पचहत्तर म तत्कालीन प्रधानमंत्री इंदिरा गांधी के सरकार ह आपातकाल के घोसना करे रिहीन, जेखर ले पूरा देस ह हिल गे रिहीस।
प्रधानमंत्री-आपातकाल पुस्तक
केन्द्रीय गृहमंत्री अमित शाह आज नई दिल्ली म ‘‘आपातकाल डायरी-वर्ष जिसने एक नेता को जन्म दिया‘‘ नाव के पुस्तक के विमोचन करीन। ए पुस्तक तत्कालीन युवा आर.एस.एस. प्रचारक प्रधानमंत्री नरेन्द्र मोदी के बड़का भूमिका ल बताथे। श्री मोदी ह आपातकाल के विरूद्ध लड़ाई म बड़का भूमिका निभाय रिहीन। पुस्तक म लोकतंत्र के आदर्श बर संघर्ष करइया श्री मोदी के जीवंत फोटू पेस करे गेहे।
मध्य क्षेत्रीय परिषद-बैठक
उत्तरप्रदेश के वाराणसी म काली होय मध्य क्षेत्रीय परिषद के पच्चीसवां बइठका म फइसला ले गीस कि ए परिषद के अवइया बइठका छत्तीसगढ़ के बस्तर म होही। ए फइसला देस के दूरदराज वाले जघा मन ल राष्ट्रीय नीति-निर्धारण के मुख्यधारा म लाय के दिसा म एक ठिन बड़का पहल के रूप म देखे जात हे। मुख्यमंत्री विष्णुदेव साय ह ए फइसला के स्वागत करत किहीन कि बस्तर म अइसन प्रकार के उच्च स्तरीय बइठका के आयोजन होना गौरव के बात हे। ओमन विश्वास जतईन कि केन्द्र सरकार के मदद ले बस्तर ह अब संघर्ष के जघा म संभावना के प्रतीक बने कोति आगू बाढ़त हे।
एखर पहिली, काली मध्य क्षेत्रीय परिषद के बइठका ल संबोधित करत मुख्यमंत्री ह किहीन कि ए परिषद केन्द्र अउ राज्य के बीच मदद अउ समन्वय के मंच बन चुके हे। छत्तीसगढ़ के अर्थव्यवस्था, आतंरिक सुरक्षा, पर्यटन अउ बुनियादी ढांचा के विकास म परिषद के भूमिका निर्णायक बने हे। श्री साय ह नक्सल समस्या उपर किहीन कि केन्द्रीय गृहमंत्री अमित शाह के संकलप अउ राज्य के बीच बढ़िया सामंजस्य ले छत्तीसगढ़ म नक्सलवाद के विरूद्ध बड़का सफलता मिले हे।
मुख्यमंत्री ह बइठका म बतईन कि पाछु बइठका म दे गे सुझाव उपर तेजी ले अमल होवत हे। नक्सल प्रभावित क्षेत्र मन म अट्ठाईस ठिन नवा बैंक साखा, डॉयल-एक सौ बारह सेवा के विस्तार अउ बयासी हजार ले जादा लइका मन ल कुपोषण ले बाहिर निकालना जइसन सफलता राज्य के विकास के प्रति सरकार के प्रतिबद्धता के प्रमाण हे। मुख्यमंत्री ह किहीन कि बस्तर पंडुम अउ बस्तर ओलंपिक जइसन आयोजन ह स्थानीय खेल अउ सांस्कृतिक प्रतिभा ल मंच देहे।
राज्य ओपन स्कूल परीक्षा
छत्तीसगढ़ राज्य ओपन स्कूल डहार ले अगस्त-सितंबर म होवइया परीक्षा के समय-सारिणी घोषित कर दे गेहे। हायर सेकेंडरी अउ हाईस्कूल के परीक्षा अट्ठारह अगस्त ले सुरू होही। हायर सेकेंडरी के परीक्षा तीन सितंबर अउ हाईस्कूल के परीक्षा एक सितंबर तक चलही।
शुभांशु शुक्ला-एक्सिओम-फोर मिशन
भारत के शुभांशु शुक्ला ह तीन झिन आने अंतरिक्ष यात्री के संग स्पेसएक्स ड्रैगन अंतरिक्ष यान म बइठ के एक्सिओम-फोर मिशन बर कैनेडी अंतरिक्ष केन्द्र ले आज मंझनिया बारह बजके एक मिनट म उड़ान भरीन। ए बड़का उपलब्धि के बाद ग्रुप कैप्टन शुक्ला ह अंतरिक्ष ले एक ठिन संदेस भेजीन, जेमा ओमन किहीन कि ए ह एक ठिन अद्भूत यात्रा हरय। ओमन किहीन कि भारत ह इकचालीस साल बाद ए घांव फेर अंतरिक्ष म हवय। ग्रुप कैप्टन शुक्ला ह यहू किहीन कि ए यात्रा अंतर्राष्ट्रीय अंतरिक्ष के सुरूआत नइ हरय, भलूक भारत के मानव अंतरिक्ष कार्यक्रम के सुरूआत हरय। तीन अप्रैल उन्नीस सौ चौरासी के राकेश शर्मा के बाद शुभांशु शुक्ला ह अंतरिक्ष म जवइया पहिली भारतीय हरय।
इसरो ह एक ठिन सोशल मीडिया पोस्ट म बतईन कि एक्सिओम-फोर ह काली भारतीय समय के मुताबिक संझा साढ़े चार बजे अंतर्राष्ट्रीय अंतरिक्ष स्टेसन ले डॉक करही। अंतर्राष्ट्रीय अंतरिक्ष स्टेसन म चालक दल मन करीबन दू हफ्ता बिताही, जिहां ओमन माइक्रोग्रैविटी अनुसंधान, प्रौद्योगिकी प्रदर्शन अउ आउटरीच कार्यक्रम करही।
ऐति, राष्ट्रपति द्रौपदी मुर्मु ह किहीन कि ग्रुप कैप्टन शुभांशु शुक्ला ह अंतरिक्ष म भारत बर एक ठिन नवा मील के पत्थर स्थापित करे हे।
ओति, प्रधानमंत्री नरेन्द्र मोदी ह सोशल मीडिया पोस्ट म किहीन कि गु्रप कैप्टन शुक्ला ह अपन संग एक सौ चालीस करोड़ भारतीय मनके उम्मीद ल लेके आय हे।
प्रदेस के मुख्यमंत्री विष्णुदेव साय ह घलो एक्सिओम-फोर मिशन के ऐतिहासिक सफलता उपर पायलट ग्रुप कैप्टन शुभांशु शुक्ला ल बधाई अउ सुभकामना देहे।
स्थानातंरण-समय/सीमा
राज्य सासन ह कर्मचारी मनके ट्रांसफर बर छूट के बेरा ल तीस जून तक बढ़ा देहे। स्थानांतरण बर पहिली पच्चीस जून तक समय-सीमा राखे गे रिहीस। सामान्य प्रसासन विभाग ह जम्मों विभागाध्यक्ष मन ल स्थानांतरण नीति के बारे म पत्र जारी कर देहे, जेमा केहे गेहे कि ए बेरा म जिला स्तर म जारी स्थानांतरण आदेश ल तीस जून तक एखर ले जुड़े जिला या विभाग के वेबसाइट म अपलोड कर सकथे।
कार्यशाला
मानसून-खेती किसानी
प्रदेस म मानसून के दस्तक के संगेसंग खेती-किसानी के काम म तेजी आ गेहे। मुख्यमंत्री विष्णुदेव साय ह कृषि विभाग के अधिकारी मन ल किसान मनके मांग के मुताबिक प्रमाणित खाद-बीज देके निरदेस देहे। ओमन खातू-बीजा बांटे के व्यवस्था म कोनो प्रकार के लापरवाही होय उपर कड़ा कार्रवाई करे बर केहे हे। जानबा के मुताबिक किसान मन ल अब तक साढ़े छह लाख मीटरिक टन ले जादा खातू अउ तीन लाख अड़सठ हजार कुंटल प्रमाणित बीजा दे जा चुके हे।
माओवादी गिरफ्तार-स्मारक ध्वस्त
बीजापुर जिला म फरसेगढ़ थाना क्षेत्र के कोपनझर्री के जंगल ले सुरक्षा बल मन ह चार झिन माओवादी मन ल गिरफ्तार करे हे। एखर मन उपर आईईडी लगाय अउ विस्फोट करे के संग बनत काम म लगे गाड़ी मन म आगी लगाय के आरोप हे। ए माओवादी मन उपर दस-दस हजार रूपिया के इनाम घोषित रिहीस।
इही जिला म नेलसनार थाना क्षेत्र के बांगोली गांव म पुलिस ह माओवादी मन डहार ले बनाय गे करीबन पन्द्रह फीट ऊंचा माओवादी स्मारक ल नष्ट करे हे।
अउ अब मौसम के हाल…
मौसम विभाग के मुताबिक एक ठिन ऊपरी हवा के चक्रवाती घेरा उत्तर-पश्चिम बंगाल के खाड़ी अउ ओखर ले लगे तटीय उत्तर ओड़िशा के संगेसंग तटीय पश्चिम बंगाल के उपर बने हे। अवइया चौबीस घंटा म एखर मजबूत होय अउ एक ठिन निम्नदाब के क्षेत्र म बदले के संभावना हे। एखर असर ले अवइया चौबीस घंटा के दउरान प्रदेस के कतकोन जघा म हल्का ले मध्यम बरसा होय या गरज-चमक के संग बूंदाबांदी पड़ सकथे। मौसम विभाग ह प्रदेस के एक-दूज जघा म अंधड़ चले, गाज गिरे अउ भारी बरसा होय के चेतावनी देहे।