आज दिनभर के खबर ल अपन गुरतुर छत्तीसगढ़ी भाखा म पढ़व

राजीव गांधी किसान न्याय योजना
राजीव गांधी किसान न्याय योजना म आज प्रदेस के उन्नीस लाख किसान मन ल पन्द्रह सौ करोड़ रूपिया के दूसर किश्त जारी करे गीस। संगेसंग तेंदूपत्ता सकलइया मन ल दू सौ तैंतीस करोड़ रूपिया के प्रोत्साहन पारिश्रमिक अउ   गोधन न्याय योजना म गोबर बेचइया मन ल साढ़े चार करोड़ रूपिया के भुगतान करे गीस।
पूर्व प्रधानमंत्री भारतरत्न राजीव गांधी के जयंती के मउका म मुख्यमंत्री निवास म राखे गे एक ठिन कारीकरम म मुख्यमंत्री भूपेश बघेल ह ए रकम जारी करीन। ए कारीकरम म सांसद राहुल गांधी घलो वीडियो कान्फ्रेंसिंग ले सामिल होईन। ओमन किहीन कि किसान, गरीब, आदिवासी अउ जरूरतमंद लोगन के मदद बर योजना चलाय म छत्तीसगढ़ सबले आगू हे। ओमन प्रदेस सरकार कोति ले करे जात काम के प्रसंसा करत बधाई दीन। ए बेरा म मुख्यमंत्री ह किहीन कि राज्य म आने-आने योजना ले जम्मों वरग तक मदद पहुंचा के राज्य सरकार राजीव गांधी के सपना ल पूरा करे के दिसा म आगू बढ़त हे।
स्वच्छ सर्वेक्षण
देस म स्वच्छ सर्वेक्षण दू हजार बीस के पहिली पुरस्कार मध्यप्रदेश के इंदौर सहर ल मिले हे। इंदौर ल ए इनाम चैथइया घांव मिलत हे। केन्द्रीय सहरी विकास मंत्री हरदीप सिंह पुरी ह ए पुरस्कार दीन।
गंगा नदी के तट म बसे सहर म वाराणसी ल सबले स्वच्छ सहर के इनाम मिलीस। नई दिल्ली ल देस के सबले स्वच्छ राजधानी सहर बर इनाम मिले हे। छत्तीसगढ़ ल सौ ले जादा सहर वाले राज्य के श्रेणी म पहिली स्थान मिलीस अउ झारखंड ल सौ ले कमती सहर वाले राज्य के श्रेणी म पहिली पुरस्कार मिले हे।
ए बेरा म केन्द्रीय मंत्री श्री पुरी ह किहीन कि स्वच्छ सर्वेक्षण म स्वच्छता अउ पूरा प्रबंधन बर नगरीय क्षेत्र मन म कतकोन नया परयोग करे गेहे। श्री पुरी ह छत्तीसगढ़ म कचरा ले खातू बनाय के तकनीक अउ एला रोजगार ले जोड़े खातिर बधाई दीन हे।
स्वच्छता सर्वेक्षण छत्तीसगढ़
छत्तीसगढ़ ह देस के कई ठिन बड़े राज्य ल पाछु छोड़त स्वच्छ सर्वेक्षण म एक घांव फेर देस के स्वच्छ राज्य होय के दर्जा पाय हे। केन्द्रीय आवासन अउ सहरी कार्य मंत्रालय कोति ले राखे गे स्वच्छ सर्वेक्षण दू हजार बीस म छत्तीसगढ़ ह आने-आने श्रेणी म चैदह ठिन पुरस्कार पाय हे। केन्द्रीय आवासन अउ सहरी कार्य मंत्रालय कोति ले राखे गे वर्चुअल आॅनलाइन पुरस्कार वितरण समारोह म केन्द्रीय मंत्री हरदीप सिंह पुरी ह ए पुरस्कार दीन।
मुख्यमंत्री भूपेश बघेल अउ नगरीय प्रसासन मंत्री डाॅक्टर शिवकुमार डहरिया घलो ए कारीकरम म आॅनलाईन संघरीन। पहिली घांव लानलाईन तरीका ले ए राष्ट्रीय पुरस्कार दे गीस। आज छत्तीसगढ़ के जउन सहर अउ नगर पंचायत ल स्वच्छ सर्वेक्षण पुरस्कार मिले हे, ओमा दुरूग जिला के पाटन नगर पंचायत, जशपुर, धमतरी, अंबिकापुर, भिलाई, चदौरा, चिरमिरी, बीरगांव, कवर्धा, अकलतरा, नरहरपुर, सारागांव अउ पिपरिया सामिल हे। एखर संगेसंग छत्तीसगढ़ देसभर म ओडीएफ प्लस-प्लस होवइया पहिली प्रदेस हवय। केन्द्र सरकार ह स्वच्छता के मामला म अंबिकापुर ल फाईव स्टार सहर के दर्जा अउ नौ ठिन सहर ल थ्री स्टार अउ पांच ठिन सहर ल वन स्टार सहर के दर्जा दे गेहे। पुरस्कार बांटे के बेरा मुख्यमंत्री श्री बघेल ह केन्द्रीय मंत्री श्री पुरी ल छत्तीसगढ़ म चलाय जाता गोधन न्याय योजना अउ गोबर बिसाय के जानकारी दीन। केन्द्रीय मंत्री ह प्रसंसा करत एला आने राज्य बर अनुकरणीय बतईन।
राजीव गांधी-जयंती
पूर्व प्रधानमंत्री भारत रत्न राजीव गांधी के जयंती आज प्रदेसभर म सद्भावना दिवस के रूप म मनाय जात हे। ए बेरा म मुख्यमंत्री निवास म राखे गे एक ठिन कारीकरम म मुख्यमंत्री भूपेश बघेल अउ विधानसभा अध्यक्ष डाॅक्टर चरणदास महंत समेत मंत्रिमंडल के सदस्य मन ह सद्भावना दिवस के सपथ लीन।
एखर पहिली, मुख्यमंत्री ह स्वर्गीय राजीव गांधी के चित्र म फूलमाला चढ़ाके श्रद्धांजलि देवत राष्ट्र के निर्माण म उंखर योगदान ल सुरता करीन। प्रदेश के सबो सरकारी कार्यालय मन म अधिकारी अउ करमचारी मन एकता अउ सद्भावना बर काम करे के सपथ लीन।
इही बीच, दक्षिण पूर्व मध्य रेलवे रईपुर मंडल म राजीव गांधी के जयंती के बेरा म मंडल रेल प्रबंधक श्यामसुंदर गुप्ता ह अधिकारी अउ करमचारी मन ल भाषायी भेदभाव ल उपर उठ के राष्ट्र बर काम करे के सपथ देवाईन।
बारिश-01
प्रदेस म पाछु कुछ दिन होवत सरलग बरसा के सेती नंदियां-नरवा उफान म हवय। कई ठिन गांव के सड़क संपर्क जिला मुख्यालय ले टूट गेहे। दंतेवाड़ा जिला म बांगाबाड़ी पुल के उपर ले पानी बोहात हे, जेखर ले बचेली-नकुलनार रद्दा म अवई-जवई परभावित होवत हे। उहें, शंखनी-डंकनी नंदियां के जलस्तर बाढ़े ले नगर के निचला इलाका मन म पानी भर गेहे।
बीजापुर जिला म सरलग बरसा ले इंद्रावती नंदियां समेत छोटे-बड़े नाला लबालब भराय हे, जेखर ले जगदलपुर-भोपालपट्टनम रद्दा समेत जिला मुख्यालय ले जुड़इया जम्मों रद्दा म अवई-जवई म मुश्कल होवत हे। जिला कलेक्टर रितेश अग्रवाल ह लोगन ले अपील करीन हे कि ओमन बिन काम के घर ले बाहिर झन निकले।
सुकमा जिला म कई ठिन पुल अउ पुलिया के उपर ले पानी बोहाय के सेती अवई-जवई बंद होगे हे। पुसपाल थाना क्षेत्र म बारू नदी के पानी बाढ़े ले निचली बस्ती ल खाली कराय गेहे। कवासी पारा ग्राम पंचायत के कुछेक परिवार ल तालनार म सुरक्षित पहुंचाय गेहे। उहें, गादीरास थाना क्षेत्र म मलंगेर नंदियां के पुल उपर ले करीबन छह फीट पानी बोहात हे, जेखर ले ए रद्दा बंद होगे हे। केरलापाल ले मिसमा के बीच बोदागुड़ा नाला के उपर ले पानी बोहाय के सेती अवई-जवई रूक गेहे। एखरे संगेसंग किस्टाराम, चिंतलनार, कोंटा अउ दोरनापाल थाना क्षेत्र म कतकोन इलाका बरसा ले परभावित होय हे।
ओति, मुंगेली जिला के मनियारी नंदियां म पानी बाढ़त हे। लोरमी क्षेत्र के कतकोन गांव एखर चपेट म हवय।
ऐति, राजनांदगांव जिला म जोरदरहा बरसा ले नंदियां-नरवां उफान म हवय। मोहारा म शिवनाथ नंदियां के जुन्ना पुल उपर ले पानी बोहात हे।
उहें, महासमुंद जिला म बरसा ब्लाॅक के बिछिया गांव म गाज गिरे ले एक मनखे के मउत होगे।
बारिश-02
इही बीच, मौसम विभाग ह अवइया चैबीस घंटा म प्रदेस के कतकोन जघा म हल्का ले मध्यम बरसा होय अउ गरज-चमक के संग छीटा-बौछार होय के संभावना जताय हे। बिलासपुर संभाग अउ ओखर ले लगे कुछेक जिला के एक-दू जघा म भारी बरसा होय के चेतावनी दे गेहे।
विष्णुदेव साय-केन्द्र निर्णय
भारतीय जनता पार्टी के प्रदेश अध्यक्ष विष्णुदेव साय ह राष्ट्रीय भर्ती एजेंसी के गठन ल मंजूरी दे जाय के केन्द्र सरकार के फइसला ल युवा मन बर ऐहतिहासिक बतईन हे। ओमन ए फइसला के सुवागत करीन कि केन्द्र सरकार के ए फइसला ले करोड़ांे युवक मन ल फायदा मिलही अउ ओमन अपन प्रतिभा देखा सकही।
रेडियो श्रोता दिवस
आज रेडियो श्रोता दिवस हरय। भारत म बीस अगस्त उन्नीस सौ इक्कीस के होय पहिली रेडियो प्रसारण के सुरता म हर बछर प्रदेस म बीस अगस्त के रेडियो श्रोता दिवस मनाय जाथे। ए मउका म रेडियो श्रोता कल्याण समिति भोपाल के तत्वाधान म वर्चुअल सम्मेलन राखे गीस, जेमा देसभर के श्रोता मन ह भाग लीन। ए कारीकरम म छत्तीसगढ़ के रेडियो श्रोता मन घलो बढ़-चढ़के हिस्सा लीन।
हरलातिका-तीज
सुहाग के परब तीजा काली प्रदेसभर म मनाय जाही। माईलोगिन निर्जला व्रत राख के भगवान शंकर अउ माता पार्वती के पूजापाठ करथे। राज्यपाल अनुसुईया उइके अउ मुख्यमंत्री भूपेश बघेल ह तीजा के मउका म जम्मों बहिनी-बेटी मन ल बधाई अउ सुभकामना दीन हे।