प्रधानमंत्री नरेंद्र मोदी ह किहीन कि विश्व के अलग-अलग भाग म तनाव, असांति अउ अस्थिरता के स्थिति हे, अइसे म योग सांति के मार्ग देखाथे। आंध्रप्रदेस के विशाखापट्टनम म ग्यारहवां अंतर्राष्ट्रीय योग दिवस समारोह के नेतृत्व करत हुए प्रधानमंत्री ह विश्व समुदाय ले योग दिवस ल मानवता बर ‘‘योग टू प्वाइंट ओ‘‘ के सुरूआत के रूप म मनाय के बिसेस आह्वान करीन, जिहां आंतरिक सांति, वैश्विक नीति बनय। ओमन किहीन कि योग अब व्यक्तिगत अभ्यास नइ रही के वैश्विक भागीदारी के माध्यम के रूप म उभरे हे।
आधुनिक योग के माध्यम ले योग के विज्ञान ल वैश्विक स्तर म मजबूत करे के भारत के प्रयास उपर प्रकाश डालत हुए प्रधानमंत्री ह किहीन कि देस के मुख्य चिकित्सा संस्थान योग अनुसंधान म सक्रिय रूप ले लगे हुए हे, जेखर उद्देस्य समकालिन चिकित्सा पध्दति मन म एखर वैज्ञानिक प्रासंगिकता स्थापित करना हरय।
प्रधानमंत्री ह किहीन कि ए बछर योग दिवस के बिसय -‘‘एक पृथ्वी एक स्वास्थ्य‘‘ बर योग स्मरण कराथे कि कइसे वर्तमान अउ भावी पीढ़ी के सुखद भविष्य सुनिश्चित करे बर पूरा विश्व एकजुट हे। विशाखापट्टनम म मुख्य योग दिवस कारीकरम म दू लाख बहत्तर हजार लोगन मन भागीदारी करीन।
योग दिवस-छत्तीसगढ़-01
छत्तीसगढ़ म घलो आज अंतर्राष्ट्रीय योग दिवस उपर सामूहिक योगाभ्यास समेत आने-आने कारीकरम आयोजित करे गीस। रायपुर के इंदिरा गांधी कृषि विश्वविद्यालय परिसर म आयोजित योगाभ्यास कारीकरम म राज्यपाल रमेन डेका सामिल होइन। कारीकरम म ओमन सबले पहिली प्रधानमंत्री नरेंद्र मोदी के संदेस के वाचन करीन। एखर बाद ओमन सामूहिक योगाभ्यास म हिस्सा लीन। अपन संबोधन म राज्यपाल ह किहीन कि योग आज के भागदौड़ अउ तनावपूर्ण जिनगी म खुद ल स्वस्थ रखे के सबले आसान उपाय हरय। ए अवसर म राज्यपाल ह ‘‘एक पेड़ मां के नाम‘‘ अभियान के तहत विश्वविद्यालय परिसर म पौधारोपण करीन।
उहे, मुख्यमंत्री विष्णुदेव साय ह आज जशपुर के रणजीता स्टेडियम म आयोजित अंतर्राष्ट्रीय योग दिवस कारीकरम म हजारों लोगन के संग योगाभ्यास करीन। ए दउरान योग प्रसिक्षक मन आने-आने आसन मनके अभ्यास करइन। ए बेरा म मुख्यमंत्री ह किहीन कि ये हमर बर गर्व के बात हरय कि आज एक सौ पचहत्तर ले जादा देस म योग के गुंज सुनाई देवत हे। ओमन लोगन मन ले स्वस्थ जीवन बर योग ल दिनचर्या के हिस्सा बनाय के अपील करीन। ए दउरान मुख्यमंत्री ह नागरिक मनले ‘‘एक पेड़ मां के नाम‘‘ अभियान के तहत स्टेडियम परिसर म सिंदूर के पौधा लगाके पर्यावरण संरक्षण के संदेस दीन। कारीकरम म महिला अउ बाल विकास मंत्री लक्ष्मी राजवाड़े अउ योग आयोग के अध्यक्ष रूपनारायण सिंह घलो मौजूद रिहीन।
योग दिवस-छत्तीसगढ़-02
रायपुर समेत आने-आने जिला म अंतर्राष्ट्रीय योग दिवस के मउका म योगाभ्यास के कारीकरम आयोजित करे गीस। राष्ट्रीय सांख्यिकी कार्यालय के रायपुर स्थित क्षेत्रीय कार्यालय म आयोजित योगाभ्यास कारीकरम म अधिकारी अउ करमचारी मन ह सक्रिय भागीदारी निभाइन।
उहें, केंद्रीय संचार ब्यूरो के प्रोदसिक कार्यालय अउ भरतीय योग संस्थान डहार ले रायपुर गायत्री नगर म एक बिसेस योगाभ्यास कारीकरम के आयोजन करे गीस।
अंतर्राष्ट्रीय योग दिवस उपर कवर्धा म आयोजित जिला स्तरीय योगाभ्यास कारीकरम म उप मुख्यमंत्री विजय शर्मा ह भाग लीन। ए दउरान ओमन नागरिक अउ विद्यार्थी मन संग सामूहिक योगाभ्यास कर सबो झन ल स्वस्थ जीवन सैली अपनाय के संदेस दीन।
उहें, मुंगेली के योगाभ्यास कारीकरम म उपमुख्यमंत्री अरूण साव उपस्थित रिहीन। ए मउका म ओमन लोगन मनले योग ल केवल एक दिन तक सीमित नइ रखे अपन जीवन सैली के हिस्सा बनाय के अपील करीन।
मुख्यमंत्री-जशपुर
मुख्यमंत्री विष्णुदेव साय ह अपन जशपुर जिला के प्रवास के दउरान रणजीता स्टेडियम म आयोजित एक ठन कारीकरम म नालंदा परिसर समेत एक सौ आठ करोड़ रूपिया के आने-आने विकास काम मनके भूमिपूजन अउ लोकार्पण करीन। ए मउका म मुख्यमंत्री ह किहीन कि नालंदा परिसर के बने ले ग्रामीण अउ आर्थिक रूप ले कमजोर विद्यार्थी मन ल बिसेस लाभ मिलही। लगभग साढ़े ग्यारा करोड़ रूपिया के लागत ले बने ए परिसर म पांच सौ विद्यार्थी एके संघरा पढ़ाई कर सकही।
कारीकरम म मुख्यमंत्री ह ‘‘गजरथ यात्रा‘‘ ल घलो हरी झंडी दिखाके रवाना करीन। ए बेरा म श्री साय ह किहीन कि मानव अउ हाथी मनके बीच बाढ़त टकराव ल कम करे बर सामुदायिक भागीदारी अउ जागरूकता बहुत जरूरी हे। गजरथ यात्रा ए दिसा म एक ठन सार्थक कदम बनही।
उहें, दुलदुला, म आयोजित एक ठन कारीकरम म मुख्यमंत्री ह ए विकासखंड बर तीन करोड़ रूपिया ले जादा के विकास काम मनके लोकार्पण अउ भूमिपूजन करीन। एमा करीब बाईस लाख रूपिया के लागत ले ग्रामीण हाट-बाजार सेड के लोकार्पण अउ आने-आने विकास काम सामिल हे। ए मउका म श्री साय ह बतइन कि मुख्यमंत्री ग्रामीण बस योजना के तहत मयूरचुंदी ले दुलदुला तक बस सेवा सुरू करे जाही। कारीकरम म मुख्यमंत्री ह पर्यटन स्थल नगेराटुक्कु के विकास अउ डूमरडीह म सांस्कृतिक मंडप निर्माण के घोसना करीन।
मुख्यमंत्री ह कुनकुरी विकासखंड के गिनाबहार म करीब नौ करोड़ रूपिया लागत ले बनइया पचास बिस्तरीय मातृ शिशु अस्पताल अउ ब्लाक पब्लिक हेल्थ यूनिट के भूमिपूजन घलो करीन।
केंद्रीय गृहमंत्री अमित शाह काली बाईस जून ले दू दिवसीय प्रवास म छत्तीसगढ़ आवत हे। श्री शाह ह काली रायपुर म नेशनल फॉरेंसिक साइंर्स यूनिवर्सिटी अउ सेंट्रल फॉरेंसिक साइंर्स लेबोरेट्री परिसर के सिलान्यास करही। चालीस एकड़ क्षेत्र म बनइया ए विश्वविद्यालय म चार सौ करोड़ रूपिया खर्च करे जाही। एखरे संग श्री शाह नेशनल फॉरेंसिक साइंर्स यूनिवर्सिटी के अस्थाई परिसर के ई-उद्घाटन घलो करही।
अपन प्रवास के दउरान श्री शाह छत्तीसगढ़ अउ पड़ोसी राज्य मनके पुलिस महानिदेसक अउ अतिरिक्त पुलिस महानिदेसक के संग सुरक्षा संबंधी मुद्दा ल लेके बइठका करही। श्री शाह तेइस जून के नारायणपुर जिला के अबूझमाड़ क्षेत्र के ग्रामीण मन संग गोठबात करही। एखर अलावा केंद्रीय मंत्री ह इही जिला के इरकभट्ठी बीएसएफ कैम्प के दउरा कर जवान मन संग घलो गोठबात करही।
दूसर डहार, छत्तीसगढ़ कांग्रेस के प्रदेस प्रभारी सचिन पायलट तेईस अउ चौबीस जून के दू दिवसीय दउरा म छत्तीसगढ़ आवत हे। ए दउरान ओमन संगठन के समीक्षा करही। संगेसंग आगामी रणनीति ल लेके पार्टी के नेता मन संग चर्चा घलो करही।
बस्तर-मलेरिया प्रकरण गिरावट
मलेरिया मुक्त छत्तीसगढ़ अभियान ल बस्तर संभाग म बड़ सफलता मिले हे। बस्तर जइसे संवेदनसील क्षेत्र म बछर दू हजार पंद्रह के तुलना म बछर दू हजार चौबीस म मलेरिया के मामला म बहत्तर फीसदी के गिरावट दर्ज करे गेहे। राज्य शासन डहार ले जारी आंकड़ा के अनुसार बस्तर संभाग म मलेरिया के दर चार दसमलव छै सून्य प्रतिसत ले घटके सून्य दसमलव चार-छै प्रतिसत रही गेहे।
अउ अब पेस हे मौसम के हाल…
प्रदेस म अवइया चौबीस घंटा के दौरान कुछेक जघा म हल्का ले मध्यम बरसा होय या गरज-चमक के संग छींटा पड़े के संभावना हे। मौसम विभाग ले मिले जानकारी के अनुसार प्रदेस म एक-दू जघा म अंधड़ चले अउ गाज गिरे के घलो आसार हे। बरसा के क्षेत्र मुख्य रूप ले उत्तर छत्तीसगढ़ रेहे के संभावना हे।