अंतर्राष्ट्रीय योग दिवस-01
काली अंतर्राष्ट्रीय योग दिवस मनाय जाही। प्रधानमंत्री नरेंद्र मोदी काली आंध्रप्रदेस के विशाखापट्टनम म ग्यारहवां अंतर्राष्ट्रीय योग दिवस कारीकरम म हिस्सा लिही। ए कारीकरम खुला म योग करे के अब तक के सब ले बड़का आयोजन म ले एक होही।
ऐति छत्तीसगढ़ म अंतर्राष्ट्रीय योग दिवस के आयोजन ल लेके तियारी पूरा कर ले गेहे। जिला मुख्यालय ल लेके ग्राम पंचायत स्तर तक काली इक्कीस जून के ए दारी ‘‘योग संगम-हरित योग‘‘ थीम उपर सामूहिक योगाभ्यास कारीकरम म राज्यपाल, मुख्यमंत्री, उपमुख्यमंत्री, मंत्री, सांसद अउ विधायक सामिल होही। सामान्य प्रशासन विभाग डहार ले जारी आदेस के अनुसार जिला मुख्यालय म आयोजित होवइया सामूहिक योगाभ्यास म मुख्य अतिथि नामांकित करे गेहे।
राजधानी रायपुर म राखेगे अंतर्राष्ट्रीय योग दिवस कारीकरम के मुख्य अतिथि राज्यपाल रमेन डेका होही। उहें, मुख्यमंत्री विष्णुदेव साय जशपुर जिला के रणजीता स्टेडियम म बिहनिया सात बजे ले सामूहिक योगाभ्यास करही। ए कारीकरम के अध्यक्षता महिला अउ बाल विकास मंत्री लक्ष्मी राजवाड़े करही।
उपमुख्यमंत्री अरूण साव जिला मुख्यालय मुंगेली अउ विजय शर्मा कबीरधाम म आयोजित कारीकरम म हिस्सा लिही। उहें, विधानसभा अध्यक्ष डॉ. रमन सिंह, राजनांदगांव म अंतर्राष्ट्रीय योग दिवस कारीकरम के मुख्य अतिथि होही। अइसने मंत्री रामविचार नेताम बलरामपुर-रामानुजगंज, दयालदास बघेल बेमेतरा, केदार कश्यप नारायणपुर, लखनलाल देवांगन कोरबा, श्याम बिहारी जायसवाल मनेन्द्रगढ़-चिरमिरी-भरतपुर, ओपी चौधरी रायगढ़ अउ टंकराम वर्मा गरियाबंद म मुख्य अतिथि के रूप म अंतर्राष्ट्रीय योग दिवस के कारीकरम म सामिल होही।
अंतर्राष्ट्रीय योग दिवस-02
इही बीच, वित्त मंत्री ओपी चौधरी ह आज रायपुर स्थित भाजपा कार्यालय म एक पत्रकारवार्ता म किहीन कि दस साल म केंद्र सरकार अउ प्रधानमंत्री नरेंद्र मोदी के परयास ले योग ल दुनिया म अपन सही जघा मिले हे। श्री चौधरी ह किहीन कि सरकार के परयास के ही परिणाम हे कि भारत के योग आधारित अर्थव्यवस्था कुल बीस हजार करोड़ रूपिया ले जादा के हो चुके हे अउ एक लाख ले जादा प्रमाणित योग शिक्षक दुनिया के एक सौ नब्बे देस मन म योग सिखे-सिखाय के काम करत हे। श्री चौधरी ह किहीन कि योग अइसे माध्यम हे, जेखर ले हम सब एक स्वस्थ्य संतुलित अउ खुशहाल जीवन जी सकत हन।
उहें, भाजपा प्रदेस महामंत्री अउ राज्य नागरिक आपूर्ति निगम के अध्यक्ष संजय श्रीवास्तव ह किहीन कि भाजपा जिला ल लेके मंडल स्तर तक पूरा जोस के संग योग दिवस मनाही।
राशनकार्ड-ई-केवायसी
प्रदेस म राशनकार्ड धारक मन ल तीस जून तक ई-केवायसी करवाना अनिवार्य होही। खाद्य विभाग के अनुसार प्रदेस के जम्मों उचित मूल्य दुकान मन म संचालित ई-पास मशीन म ई-केवायसी के सुविधा उपलब्ध हरय। एखर अलावा केंद्र सरकार डहार ले जारी ‘‘मेरा ई-केवायसी‘‘ ऐप के माध्यम ले राशन कार्ड धारी अपन ई-केवायसी करा सकत हे।
चरण पादुका योजना
मुख्यमंत्री विष्णुदेव साय काली इक्कीस जून के जशपुर जिला के तपकरा म आयोजित कारीकरम म प्रदेसव्यापी चरण पादुका वितरण योजना के सुभारंभ करही। ए मउका म तेदुपत्ता संग्राहक परिवार के महिला मन ल चरण पादुका दे जाही।
बतादन कि ए योजना के क्रियान्वयन बर राज्य सरकार ह चालीस करोड़ रूपिया के स्वीकृति देहे। ए योजना राज्य के बारह लाख चालीस हजार तेंदूपत्ता संग्राहक परिवार के महिला मन ल फायदा पहुंचाही, जेमन ल चरण पादुका के निसुल्क वितरण करे जाही।
बातों-बातों में
प्रादेसिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ म ए बखत अंतर्राष्ट्रीय योग दिवस म योग आचार्य मंजू झा ले लेगे भेंटवार्ता के प्रसारण करे जाही। ए कारीकरम के दूसरइया कड़ी के प्रसारण काली इक्कीस जून के एफएम चैनल म बिहनिया नौ बजे ले करे जाही। उहें, प्रायमरी चैनल म ए कारीकरम के प्रसारण बिहनिया साढ़े दस बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करही।
माओवादी-मुठभेड़
कांकेर जिला म आज सुरक्षाबल अउ माओवादी मनके बीच होय मुठभेड़ म एक महिला माओवादी मारे गीस। ए मुठभेड़ जिला के आमाटोला अउ कालपर इलाका के जंगल म होइस। खुफिया जानकारी के आधार म डिस्ट्रिक्ट रिजर्व गार्ड-डीआरजी अउ सीमा सुरक्षा बल-बीएसएफ के संयुक्त टीम ल अभियान बर रवाना करे गीस। जिला के अतिरिक्त पुलिस अधीक्षक कल्याण एलेसेला ह बतइन कि सुरक्षाबल अउ माओवादी मनके बीच रूक-रूक के गोलीबारी होइस। जवान मन घटनास्थल ले एक महिला माओवादी के शव के संघरा एक ठिन रायफल, एक देशी बीजीएल लांचर, सात कारतूस, वॉकीटॉकी अउ पिट्ठू बरामद करीन हे।
इही बीच, छत्तीसगढ़ के प्रतिबंधित संगठन सीपीआई-माओवादी के बारह सदस्य मन तेलंगाना के भद्राद्री कोठागुडेम जिला म समर्पण कर देहे।
कवासी लखमा-रिमांड
शराब घोटाला मामला म पूर्व आबकारी मंत्री कवासी लखमा ल आज आर्थिक अपराध अन्वेषण ब्यूरो-ईओडब्ल्यू के बिसेस कोर्ट म पेस करे गीस, जिहां दूनों पक्ष ल सुने के बाद कवासी लखमा के न्यायिक रिमांड तीस जून तक बढ़ा दे गेहे। तीस जून के एसीबी-ईओडब्ल्यू कोति ले कवासी लखमा के खिलाफ पूरक चालान पेस करे जाही। ईडी ह पाछू हफ्ता ही लखमा के साढ़े सौ करोड़ रूपिया के संपत्ति अटैच करे रिहीस।
एसीबी-ईई गिरफ्तार
एंटी करप्शन ब्यूरो-एसीबी के टीम ह आज जगदलपुर के कार्यपालन अभियंता अजय कुमार ल दू लाख रूपिया के रिस्वत लेवत उंकर घर म रंगेहाथ गिरफ्तार करे हे। अजय कुमार लोक निर्माण विभाग के जगदलपुर डिवीजन म कार्यपालन अभियंता विद्युत यांत्रिकी के पद म पदस्थ हवय। बताय जात हे कि ठेकेदार ल काम देवाय के नांव म कार्यपालन अभियंता अजय कुमार ह दू लाख रूपिया के मांग करे रिहीस।
उहें, बिलासपुर एसीबी के टीम ह लोरमी क्षेत्र म पंद्रह हजार रूपिया के रिस्वत लेवत बिजली विभाग के जूनियर इंजीनियर ल रंगेहाथ गिरफ्तार करे हे।
मिले जानकारी के अनुसार जूनियर इंजीनियर ह पाली गांव के एक उपभोक्ता ले पचास हजार रूपिया के मांग करे रिहीस।
राज्यपाल बेमेतरा
बेमेतरा जिला के दू दिन के प्रवास के दूसर दिन राज्यपाल रमेन डेका आज अपन गोद ले ग्राम टेमरी पहुंचिन। ए दउरान पंचायत भवन परिसर म राखे गे जन संवाद कारीकरम म राज्यपाल ह सरपंच, स्व-सहायता समूह के महिला अउ ग्रामीण मनले सीधा गोठबात करीन। राज्यपाल ह सरपंच के मांग म गांव म पेयजल के समस्या ल दूर करे के निरदेस अधिकारी मन ल दीन।
बीजापुर युवा-मुख्यमंत्री मुलाकात
नक्सल प्रभावित बीजापुर जिला के छियानवे युवक-युवती मन आज मुख्यमंत्री विष्णुदेव साय ले रायपुर स्थित उंखर निवास म भेंट करीन। ए मउका म मुख्यमंत्री ह किहीन कि इच्छाशक्ति, संवेदना अउ समावेसी नीति ले हमन बस्तर म बदलाव के नवा सुरूआत करे हन। बस्तर के युवा मनके आत्मबल ही हमर प्रेरणा हरय अउ हम सब मिलके नवा बस्तर गढ़बो। मुख्यमंत्री ह युवा मनले किहीन कि राज्य सरकार बस्तर क्षेत्र म सांति व्यवस्था बनाय म जुटे हे अउ केंद्रीय मंत्री अमित शाह ह ठान लेहे कि मार्च दू हजार छब्बीस तक नक्सलवाद ल जड़ से खतम करना हे।
इही दउरान, बीजापुर जिला के सुदूर गांव ले राजधानी रायपुर पहुंचे युवा मन मुख्यमंत्री ले सार्थक गोठबात करीन अउ अपन अनुभव साझा करीन।
अउ अब मौसम के हाल…
प्रदेस म ए दिन म मानसून सक्रिय हो गेहे। आज राजधानी रायपुर समेत कुछेक जघा म हल्का ले मध्यम बरसा होइस।
मौसम विभाग के अनुसार एक ठिन निम्नदाब के क्षेत्र दक्षिण बिहार अउ ओखर तीर-तखार म मौजूद हे। संघरा उपरी हवा के एक चक्रीय-चक्रवाती घेरा घलो बने हे। एखर असर ले प्रदेस म काली कुछेक जघा मन म हल्का ले मध्यम बरसा होय के संभावना हे। उहें, एक-दू जघा म गरज-चमक के संग अंधड़ चले अउ गाज गिरे के चेतावनी दे गेहे।
अउ अब थोरकुन समाचार सार म –
– संचालनालय रोजगार अउ प्रसिक्षण कोति राज्य के शासकीय औद्योगिक प्रसिक्षण संस्था-आईटीआई म शैक्षणिक सत्र-दू हजार पच्चीस-छब्बीस बर प्रवेस खातिर पच्चीस जून तक ऑनलाइन आवेदन मंगाय जाही।
अउ
– सक्ती जिला के करही, मिरौनी अउ डोटमा म अवैध उत्खनन, परिवहन अउ भंडारण म कार्रवाई करत खनिज विभाग ह नौ ठिन ट्रैक्टर अउ एक जेसीबी समेत दस गाड़ी मन ल जब्ती करे हे।