मुख्यमंत्री विष्णुदेव साय के पगरइति म आज रायपुर म राज्य मंत्रिमंडल के बइठका होइस। बइठका म मंत्रिपरिषद ह अनुसूचित जनजाति अउ अनुसूचित जाति सूची म तकनीकी कारण ले सामिल होय ले वंचित जाति मन मिलइया सुविधा के बारे म महत्वपूर्ण फइसला लेहे। एखर मुताबिक डिहारी कोरवा, बघेल क्षत्री, संसारी उरांव अउ पबिया, पविया अउ पवीया समाज के विद्यार्थी मन ल अनुसूचित जनजाति के समान अउ डोमरा जाति के विद्यार्थी मन ल अनुसूचित जाति के समान राज्य मद ले छात्रवृत्ति दे जाय अउ छात्रावास-आश्रम म मंजूर सीट के अधीन म प्रवेस दे जाय के सुविधा देके मंजूरी दे गेहे।
उहें, मंत्रिपरिषद ह नक्सली हिंसा म शहीद पुलिस सेवक के प्रकरण म उंखर परिवार के कोनों भी पात्र सदस्य ल विकल्प के आधार म पुलिस विभाग के संगेसंग कोनों भी आने विभाग म, राज्य के कोनों भी जिला अउ संभाग म अनुकंपा नियुक्ति देके फइसला लेहे।
एक आने फैसला म मंत्रिपरिषद ह प्रधानमंत्री सूर्यघर मुफ्त बिजली योजना म घर के छत म सोलर रूफटाप संयंत्र लगाय म उपभोक्ता मन ल वित्तीय सहायता देके निर्णय घलो लेहे। उहें, राज्य म वन्यजीव, खासकर बाघ के संरक्षण अउ ईको-पर्यटन ल बढ़ावा दे बर ‘‘छत्तीसगढ़ टाइगर फाउंडेशन सोसायटी‘‘ के गठन करे जाही। ए सोसायटी वन्यप्राणी संरक्षण अधिनियम उन्नीस सौ बहत्तर के तहत काम करही। बइठका म उद्यानिकी महाविद्यालय के स्थापना बर बेमेतरा जिला के बेलगांव म सौ एकड़ भूमि उद्यानिकी विभाग ल निःशुल्क प्रदान करे के निर्णय ले गेहे।
राज्य मंत्रिमंडल-बैठक-02
मंत्रिपरिषद के बइठका म ‘‘विवेकानंद इंस्टीटयूट ऑफ सोशल हेल्थ वेलफेयर अउ सेवा ल नारायणपुर स्थित रामकृष्ण मिशन आश्रम म मर्ज करे के अनुमोदन करे गेहे। उहें, जशपुर जिला म जशप्योर ब्रांड के तहत महिला स्व-सहायता समूह डहार ले तैयार करे जावत हर्बल अउ महुआ चाय जइसन उत्पाद ल बाजार उपलब्ध कराय बर राज्य सासन अउ सीएसआईडीसी ल देके प्रस्ताव के अनुमोदन करे गीस। एखर संगेसंग राज्य म गौण खनिज के सुव्यवस्थित अन्वेषण, पूर्वेक्षण अउ अधोसंरचना के विकास बर ‘‘स्टेट मिनरल एक्सप्लोरेशन ट्रस्ट‘‘ के गठन के अधिसूचना के प्रारूप के अनुमोदन घलो करे गीस।
फास्टैग-आधारित वार्षिक पास
केन्द्र सरकार ए बछर पन्द्रह अगस्त ले तीन हजार रूपिया के कीमत वाले फास्टैग-आधारित सालाना पास के सुरूआत करही। एखर ले देशभर म राष्ट्रीय राजमार्ग म सुघ्घर यात्रा संभव होही। ए सालाना पास लागू होय के तारीख ले एक बछर या जादा ले जादा दू सौ यात्रा बर वैध होही। केन्द्रीय सड़क परिवहन अउ राजमार्ग मंत्री नितिन गडकरी ह सोशल मीडिया पोस्ट म एखर जानकारी दीन। ए पास विशेष रूप ले गैर-व्यावसायिक निजी वाहन जइसन – कार, जीप अउ वैन बर तैयार करे गेहे।
माओवादी मुठभेड़
सुकमा जिला के सीमा ले लगे आंध्रप्रदेश के मारेडपल्ली के जंगल म सुरक्षा बल अउ माओवादी मनके बीच मुठभेड़ होय हे। आंध्रप्रदेश के अल्लुरी-सीताराम जिला के पुलिस अधीक्षक अमित बरदार ह ए मुठभेड़ के पुष्टि करे हे। ए मुठभेड़ म माओवादी के सेंट्रल कमेटी के सदस्य गजराला रवि अउ चलपती के पत्नी समेत अउ माओवादी मनके मारे जाय के खबर हे।
ओति, बीजापुर जिला म माओवादी मन ह एक झिन छात्र समेत तीन ग्रामीण के हत्या कर दीन। उहे, सात झिन गांव वाले मन संग मारपीट करके ओमन ल घायल अवस्था म छोड़ देहे। पुलिस के मुताबिक माओवादी मन ह काली संझा बारह झिन गांव वाले मन ल अगवा कर ले रिहीन, जेमा ले आत्मसमर्पित नक्सली नेता के परिवार के तीन सदस्य के गला घोट के हत्या कर दीन। पुलिस ह मामला के जांच सुरू कर देहे।
भाजपा विधायक दल-बैठक
भारतीय जनता पार्टी के विधायक दल के बइठका आज रायपुर के प्रदेस भाजपा कार्यालय कुशाभाऊ ठाकरे परिसर म होइस। बइठका म भाजपा के प्रदेस प्रभारी नितिन नबीन, राष्ट्रीय सह संगठन महामंत्री शिवप्रकाश, क्षेत्रीय महामंत्री अजय जामवाल, मुख्यमंत्री विष्णुदेव साय अउ प्रदेस अध्यक्ष किरण सिंह देव समेत कैबिनेट मंत्री अउ विधायक मौजूद रिहीन। बइठका म मोदी सरकार के ग्यारह बछर पूरा होय के मउका म पार्टी डहार ले चलाय जावत अभियान अउ कार्यक्रम के रूपरेखा तय करे गीस।
बइठका के बाद पत्रकार मन ले गोठबात करत उपमुख्यमंत्री अरूण साव ह बतईन कि प्रदेस म उनतीस जून तक आने-आने कार्यक्रम राखे जाही। ए दउरान केन्द्र्र सरकार के योजना अउ उपलब्धि ल जनता तक पहुंचाय जाही। ओमन बतईन कि अंतर्राष्ट्रीय योग दिवस के मउका म इक्कीस जून के बड़का पैमाना म योग के कार्यक्रम राखे जाही। उहें, तेईस जून के जनसंघ के संस्थापक डॉक्टर श्यामा प्रसाद मुखर्जी के पुण्यतिथि ल बलिदान दिवस के रूप म मनाय जाही। इही दिन ‘एक पेड़ मां के नाम‘ अभियान के तहत वृक्षारोपण घलो करे जाही। श्री साव ह बतईन कि पच्चीस जून के आपातकाल दिवस के रूप म आने-आने कार्यक्रम राखे होही। उहें, उनतीस जून के प्रधानमंत्री नरेन्द्र मोदी के ‘मन की बात‘ कार्यक्रम ल प्रत्येक बूथ स्तर तक सुने के व्यवस्था करे जाही।
जल संसांधन विभाग-आवेदन
छत्तीसगढ़ व्यावसायिक परीक्षा मंडल-व्यापमं डहार ले जल संसाधन विभाग के अंतर्गत उप अभियंता सिविल अउ उप अभियंता विद्युत-यांत्रिकी के पद के भर्ती बर ऑनलाइन आवेदन मंगाय गेहे। इच्छुक अभ्यर्थी बीस जून तक ऑनलाइन आवेदन कर सकत हे। परीक्षा के तारीख बीस जुलाई निर्धारित करे गेहे।
राज्यपाल-बीजापुर
राज्यपाल रमेन डेका ह अपन बीजापुर प्रवास के दउरान आज सेंट्रल लाईब्रेरी के अवलोकन करीन। ए दउरान ओमन कम्प्यूटर के प्रशिक्षण लेवत लइका मन ले गोठबात करके प्रसिक्षण के बारे म जानकारी लीन। ए मउका म राज्यपाल ह कहिन कि आज के युग म कम्प्यूटर सबो क्षेत्र बर जरूरी हवय। राज्यपाल ह लाइब्रेरी म राखे गे माईंड गेम अउ वीआर सेट के घलो अवलोकन करीन।
अपन बीजापुर प्रवास के दउरान राज्यपाल ह ‘‘एक पेड़ मां के नाम‘‘ अभियान के तहत कलेक्टारेट परिसर म वृक्षारोपण करीन। ए मउका ओमन जम्मों अधिकारी मन ल एक पेड़ लगाय अउ ओखर समुचित देख-रेख करे के संगेसंग लोगन मन ल घलो एक पेड़ लगाय बर प्रेरित करे बर कहिन।
दक्षिण-पश्चिम मानसून आज पूरा छत्तीसगढ़ म सक्रिय होगे हे। मौसम विभाग के मुताबिक एक ऊपरी हवा के चक्रवाती घेरा करीबन आठ किलोमीटर ऊंचाई तक बने हे। उहें, एक पश्चिमी विक्षोभ उत्तर दिसा म स्थित हे। एखर परभाव ले काली उन्नीस जून के प्रदेस म कतकोन जघा म हल्का ले मध्यम बरसा होय अउ गरज-चमक के संग सिटिर-साटर पानी गिरे संभावना हे। उहें, एक-दू जघा म हवा गरेर चले अउ गाज गिर सकत हे। बरसा के क्षेत्र मुख्य रूप ले उत्तर अउ मध्य छत्तीसगढ़ म रेहे के संभावना हे।
अउ अब थोरकुन समाचार सार म –
– छत्तीसगढ़ व्यावसायिक परीक्षा मंडल-व्यापमं डहार ले नगर सेना म महिला अउ पुरूष नगर सैनिक के भर्ती बर बाईस जून के परीक्षा आयोजित करे जाही। एखर बर प्रवेश पत्र जारी कर दे गेहे।
– प्रदेश म कोरोना वायरस के संक्रमण दर सात फीसदी के करीब पहुंच गेहे। अब तक एक हजार नौ सौ सैंपल के जांच म एक सौ इकतीस कोरोना संक्रमित मरीज मिले हे।
– बीजापुर जिला म आईटीआई कॉलेज के तीर आज ट्रैक्टर की चपेट म आय ले मोटर सायकिल सवार एक झिन सिक्षिका की मौत होगे।
अउ
– जांजगीर-चांपा जिला खनिज विभाग के टीम ह रेती के अवैध उत्खनन अउ परिवहन के मामला म एक सौ चार गाड़ी उपर कार्रवाई करे हे।