केन्द्र सरकार के ग्यारह बछर पूरा होय म प्रदेस के भारतीय जनता पार्टी डहार ले अवइया नौ जून ले ‘‘संकल्प से सिद्धि‘‘ अभियान चलाय जाही। ए संबंध में आज रायपुर स्थित एकात्म परिसर म प्रदेस स्तरीय कार्यशाला के आायोजन करे गीस। ए कार्यशाला म पार्टी के प्रदेस अध्यक्ष किरण सिंह देव के संग पार्टी के आने पदाधिकारी अउ कार्यकर्ता सामिल होइन। इक्कीस जून तक चलइया ‘‘संकल्प से सिद्धि‘‘ अभियान के तहत केन्द्र सरकार के उपलब्धि ल लोगन मन तक पहुंचाय जाही। ए अभियान ‘‘विकसित भारत का अमृतकाल और सेवा, सुशासन तथा गरीब कल्याण के ग्यारह साल‘‘ म आधारित होही।
अभियान के दउरान विश्व योग दिवस ल ध्यान म राखत हुए योग सिविर के आयोजन करे जाही। उहें, गांव, वार्ड अउ बूथ स्तर म पन्द्रह ले सत्रह जून तक सबो सक्ती केन्द्र मन म चौपाल लगाय जाही। संगेसंग सहर म मोहल्ला चौपाल अउ पंचायत केन्द्र मन म ग्राम चौपाल के आयोजन होही। ए दउरान आयुष्मान वय वंदन योजना म शत-प्रतिशत वरिष्ठ नागरिक मनके पंजीकरण अउ कार्ड बांट के लोगन मन ल विकसित भारत के संकल्प दिलाय जाही। अभियान के दउरान भाजपा कार्यकर्ता मोदी सरकार के ग्यारह बछर के उपलब्धि के साहित्य घलो घर-घर म बांटही।
उहें, उपमुख्यमंत्री अरूण साव ह बतईन कि प्रधानमंत्री नरेन्द्र मोदी के ग्यारह बछर के नेतृत्व म आम लोगन मनके जीवन म खुसहाली आए हे। ओमन ह कहिन कि मोदी सरकार म भारत के तेज गति ले विकास होवत हे अउ देश, दुनिया के चौथइया बड़का अर्थव्यवस्था बन गेहे।
विकसित कृषि संकल्प अभियान
विकसित कृषि संकल्प अभियान के तहत ए बेरा प्रदेस के आने-आने जगह मन म किसान मन ल जागरूक करे बर सिविर के आयोजन करे जात हे। इही कड़ी म आज दुरूग जिला के धमधा विकासखंड के गांव रहटादाह म होवइया सिविर म किसान मन ल बीज उपचार अउ जैविक उत्पाद बनाय के जानकारी दे गीस। संगेसंग मृदा स्वास्थ्य कार्ड अउ आने-आने प्रकार के प्रचार-प्रसार सामान घलो दे गीस। ए सिविर म साजा विधायक ईश्वर साहू सामिल होइन।
विकसित कृषि संकल्प अभियान के तहत कृषि वैज्ञानिक के टीम आज गौरेला-पेण्ड्रा-मरवाही जिला के अंधियारखोर अउ दहीबहरा गांव घलो पहुंचीन। इहां किसान मन ल जैविक खेती, फसल चक्र परिवर्तन, प्राकृतिक बीज चयन, संतुलित उर्वरक उपयोग, जल संरक्षण, पशुपालन, मत्स्य पालन, उद्यानिकी अउ समन्वित कृषि प्रणाली जइसन बिसय म प्रसिक्षण दे गीस।
नीट/पीजी-स्थगित
नेशनल बोर्ड ऑफ एग्जामिनेशन इन मेडिकल साइंसेज-एन.बी.ई.एम.एस. ह नीट-पीजी के परीक्षा ल स्थगित कर देहे। ए परीक्षा ए महीना के पन्द्रह तारीख के होना रिहीस हे। सर्वोच्च न्यायालय के आदेस के पालन करत हुए बोर्ड ह नीट-पीजी परीक्षा ल एके शिफ्ट म आयोजित करे के फैसला करे हे। बोर्ड ह कहिन कि परीक्षा बर ज्यादा केन्द्र अउ जरूरी बुनियादी ढांचा के व्यवस्था करे के उद्देश्य ले एला स्थगित कर दे गेहे। बोर्ड ह किहीन कि परीक्षा के तिथि जल्दी घोषित करे जाही।
विश्व साइकिल दिवस
आज विश्व साइकिल दिवस हे। ए बेरा म प्रदेस के कतकोन जिला मन म कार्यक्रम के आयोजन करे जात हे। भिलाई म आज केन्द्रीय औद्योगिक सुरक्षा बल-सी.आई.एस.एफ. डहार ले सायकल रैली निकाले गीस।
उहें, गौरेला-पेण्ड्रा-मरवाही जिला म होय साइकिल रैली म आमजन, आने-आने खेल संघ के संग एथलेटिक्स, ताइक्वांडो, कबड्डी अउ फुटबॉल जइसन खेल के कोच, मैनेजर अउ खिलाड़ी सामिल होइन।
युवक-मौत
दुर्ग जिला म स्थित मरोदा डैम म डूबे ले भिलाई के दू युवक के मउत होगीस। भिलाई के नगर पुलिस अधीक्षक सत्य प्रकाश तिवारी ह बतईन कि काली संझा चार युवक मरोदा डैम गे रिहीस। ए दउरान चारों दोस्त नहाय बर डैम म उतरीन। एमा ले जब दू युवक डूबे लागीस, तब आसपास के लोगन मन ह ओमन ल बाहिर निकालीन अउ इलाज बर दूनों ल उतई स्थित अस्पताल लेगीन, जिहां डॉक्टर मन ह दूनों युवक मन ल मृत घोषित कर दीस।
अरपा भैंसाझार-आरटीओ निलंबित
बिलासपुर जिला के अरपा-भैंसाझर नहर निर्माण म भू-अर्जन के नाम म करे गे घोटाला के मामला म राज्य सरकार ह कोटा के तत्कालीन एसडीएम अउ आरटीओ आनंदरूप तिवारी ल निलंबित कर देहे। ए संबंध म सामान्य प्रशासन विभाग डहार ले आदेश जारी कर दे गेहे। आदेस म केहे गेहे कि अरपा-भैंसाझार-चकरभाठा वितरक नहर निर्माण बर करे गे भू-अर्जन के कार्यवाही म अनियमितता के कारण शासन ल आर्थिक क्षति होय हे। निलंबन अवधि म आनंदरूप तिवारी के मुख्यालय आयुक्त कार्यालय बिलासपुर संभाग निर्धारित करे गेहे।
साइबर ठगी-गिरफ्तारी
कबीरधाम पुलिस ह साइबर ठगी के मामला म एक आरोपी ल गिरफ्तार करे हे। आरोपी तीर ले अट्ठारह बैंक खाता के जानकारी मिले हे, जेला ओ ह ठग मन ल किराए म देत रिहीस। ठग गिरोह ए खाता के इस्तेमाल ऑनलाइन धोखाधड़ी म करत रिहीन। एखर बदला म ठग आरोपी मन ल दस प्रतिशत कमीशन देवत रिहीन। कवर्धा के पुलिस अधीक्षक धर्मेन्द्र छवैया ह बतईन कि ए खाता ले डेढ़ करोड़ रूपिया ले जादा के ट्रांजेक्शन होय हे। पुलिस ह आरोपी मन तीर ले आने-आने बैंक के पासबुक, चेकबुक अउ आने दस्तावेज बरामद करे हे। आरोपी मनके खिलाफ भारत के आठ आने-आने राज्य मन म मुकदमा दर्ज हे।
बेमेतरा-आम महोत्सव
बेमेतरा के कृषि उपज मंडी परिसर म आज ले दू दिवसीय आम महोत्सव सुरू होगे हे। ए महोत्सव के सुभारंभ स्थानीय विधायक दीपेश साहू ह करीन। ए महोत्सव म आम के सत्ताईस प्रजाति के संग आम ले बने आने-आने व्यंजन अउ पेय पदार्थ के प्रदर्शन करे जात हे। विधायक ह महोत्सव के भ्रमण करके आम के सबो प्रजाति अउ व्यंजन के अवलोकन करीन।
उद्यानिकी विभाग के सहायक संचालक हितेन्द्र मेश्राम ह बतईन कि ए महोत्सव म जिला के किसान अपन उपज अउ व्यंजन के प्रदर्सन निःशुल्क करत हे। ओमन ह बतईन कि स्कूल-कॉलेज के विद्यार्थी, स्व-सहायता समूह के माईलोगिन अउ आम लोगन ए महोत्सव के अवलोकन बिहनिया ग्यारह बजे ले संझा पांच बजे तक कर सकत हे।
अउ अब मौसम के हाल…
मौसम विभाग के अनुसार अरब सागर ले अवइया मानसूनी हवा कमजोर होय के कारण मानसून के गतिविधि आगू नइ बाढ़त हे। प्रदेस म अवइया चार ले पांच दिन तक ए स्थिति बने रेहे के संभावना हे।
मौसम विभाग ह जानकारी देहे कि एक ऊपरी हवा के चक्रवाती घेरा बिहार के ऊपर बने हे। एखर असर ले काली प्रदेस के कुछ जघा म हल्का ले मध्यम बरसा होय अउ गरज-चमक के संग छींटा पड़े के संभावना हे। उहें, एक-दू जघा म अंधड़ चले अउ आकाशीय बिजली गिरे के आसार हे। बरसा के मुख्य क्षेत्र उत्तर छत्तीसगढ़ रइही।
अउ अब थोरकुन समाचार सार म –
– मुख्यमंत्री विष्णुदेव साय के अध्यक्षता म काली चार जून के मंत्रालय म मंत्रिपरिषद के बइठका होही।
– खाद्य मंत्री दयालदास बघेल ह आज बेमेतरा जिला के भंसुली गांव म चावल उत्सव के सुभारंभ करीन। ए मउका म ओमन बतईन कि राज्य सरकार डहार ले सार्वजनिक वितरण प्रणाली के तहत जून, जुलाई अउ अगस्त महीना के चाउर एके संग आवंटित करे जावत हे।
– सरायपाल ले सारंगढ़ जावत एक यात्री बस आज नवरंगपुर गांव तीर अनियंत्रित होके पलट गीस। ए हादसा म एक यात्री के मउत होगे हे। उहें, करीब पांच लोगन मन घायल होय हे। बस म करीब पन्द्रह लोगन सवार रिहीन।
– रायगढ़ जिला के बोहिदार पारा स्थित एक बर्फ फैक्ट्री आज गैस सिलेंडर म ब्लॉस्ट होय ले बार फैक्ट्री के संचालक के मउत होगीस। फेर एक सहायक गंभीर रूप ले घायल होगे हे।
– सक्ती जिला के करही गांव म रेत के अवैध उत्खनन करत तीन चैन माउंटेन मसीन ल जब्त कर ले गेहे।