ए बइठका म छत्तीसगढ़ के मुख्यमंत्री विष्णुदेव साय के संग आने-आने राज्य के मुख्यमंत्री समेत केंद्रशासित प्रदेस के उपराज्यपाल, केंद्रीय मंत्री अउ नीति आयोग के उपाध्यक्ष, सदस्य अउ सीईओ घलो सामिल होइन।
नीति आयोग के बइठका म जाय ले पहिली मुख्यमंत्री विष्णुदेव साय ह मीडिया ले गोठबात करत हुए राज्य के विकास बर रोडमैप, नक्सलवाद के अंत अउ नवा औद्योगिक नीति ल लेके अपन प्राथमिकता बताइन। श्री साय ह किहीन कि विकसित भारत के प्रधानमंत्री के लक्ष्य बर राज्य सरकार के उद्देस्य ‘‘विकसित छत्तीसगढ़‘‘ के दिसा म ठोस कदम बढ़ाना हे। मुख्यमंत्री ह बोलिन कि छत्तीसगढ़ सरकार ह बस्तर समेत आने जघा के पूरा विकास बर लगन ले काम करत हे। ओमन किहीन कि केंद्र अउ राज्य सरकार के नीति के कारण अब छत्तीसगढ़ म नक्सलवाद ह खतम होवत हे।
मन की बात
प्रधानमंत्री नरेंद्र मोदी ह काली बिहनिया ग्यारा बजे आकाशवाणी ले ‘‘मन की बात‘‘ कारीकरम म अपन बिचार साझा करही। ए मासिक रेडियो कारीकरम के एक सौ बाइसवां कड़ी होही। आकाशवाणी अउ दूरदर्सन के जम्मों नेटवर्क, आकाशवाणी समाचार के वेबसाइट अउ न्यूज ऑन एआईआर मोबाइल ऐप म ए कारीकरम सीधा प्रसारित होही। उहें, आकाशवाणी समाचार, दूरदर्सन समाचार, प्रधानमंत्री कार्यालय अउ सूचना और प्रसारण मंत्रालय के यू-ट्यूब चैनल मन म घलो एखर सीधा प्रसारण करे जाही। आकाशवाणी ले हिन्दी प्रसारण के तुरते बाद ‘‘मन की बात‘‘ कारीकरम के क्षेत्रीय भाखा मन म प्रसारण होही।
अरपा-भैंसाझार नहर
बिलासपुर जिला म अरपा-भैंसाझार नहर परियोजना म कथित मुआवजा घोटाला मामला के जांच आर्थिक अपराध अन्वेषण ब्यूरो-याने ईओडब्ल्यू ह करही। ए बारे म मुख्यमंत्री विष्णुदेव साय ह आदेस जारी कर देहे। मुख्यमंत्री ह सिंचाई विभाग के समीक्षा बइठका म ए बारे म पूछ परख करीन, जेखर बाद जांच के आदेस जारी करे गेहे।
आरोप हे कि अरपा-भैंसाझार नहर परियोजना म अधिकारी मन ह किसान मन के जघा एक झन व्यापारी ल कागज म जमीन मालिक बनाके अड़तालिस गुणा जादा कीमत म करीब तीन करोड़ बयालिस लाख रूपिया के मुआवजा दे दीन अउ जेन किसान मनके जमीन उपर नहर बने हे, ओमन मुआवजा बर भटकत हे। ए मामला के जांच जिला स्तर म होय रिहीसर, जेमा कोटा के ओ समय के एसडीएम समेत राजस्व विभाग के छै अउ सिंचाई विभाके पांच झन अधिकारी मन दोषी पाय गे रिहीस।
यूपीएससी-परीक्षा
संघ लोक सेवा आयोग याने-यूपीएससी के सुरूआती परीक्षा काली पच्चीस मई के होही। एखर बर सबो तियारी पूरा कर ले गेहे। सुरक्षा जांच समेत अउ आने चीज बर कड़ाई रखे के संगेसंग परीक्षार्थी मन के प्रसाधन उपयोग बर घलो नियम बनाय गेहे। अभ्यर्थी मन बस काला रंग के बाल पेन के उपयोग कर सकही। एमन ल पहिली पाली म बिहनिया नौ बजे अउ दूसरइया पाली म मंझनिया दू बजे ले पहिली परीक्षा केंद्र म पहुंचना होही।
यूपीएससी ऑबजर्वर प्रियंका शुक्ला अउ रईपुर कलेक्टर डॉक्टर गौरव सिंह ह काली परीक्षा के तियारी के बारे म बइठका करीन। जेमा केंद्राध्यक्ष मन ल नियम के जानकारी देवत हुए एला कड़ाई ले पालन करे के निरदेस घलो दीन हे।
कांग्रेस-न्याय पदयात्रा
प्रदेस कांग्रेस अध्यक्ष दीपक बैज ह अवइया छब्बीस मई के किरंदुल ले न्याय पदयात्रा के सुरूआज करही। चार दिनी ए यात्रा म बस्तर संभाग के अलावा प्रदेसभर के कार्यकर्ता मन सामिल होही। ए यात्रा उनतीस मई के दंतेवाड़ा पहुंचही, जिहां कार्यकर्ता मन कलेक्टर कार्यालय के घेराव करके अपन आने-आने मांग के बारे म ज्ञापन सौंपही।
कांग्रेस अध्यक्ष श्री बैज ह बतइन कि बस्तर संभाग म आदिवासी मन अपन जल-जंगल-जमीन अउ खनिज ल बचाय बर न्याय पदयात्रा निकालत हे।
अंबेडकर अस्पताल-आगजनी
रईपुर के डॉक्टर भीमराव अंबेडकर अस्पताल यानी मेकाहारा के पैथोलॉजी विभाग के इनक्यूबेटर मसीन म पाछू रतिहा आगी लग गीस। ड्यूटी म लगे लोगन मन तुरते एखर सूचना अस्पताल के ही फायर फाइटर कर्मचारी मन ल दीन। ओमन फायर सिलेंडर ले आगी उपर काबू पा लीन, जेखर ले ए घटना म कोनो ल चोट नइ पहुंचिस। स्वास्थ्य मंत्री श्याम बिहारी जायसवाल ह अस्पताल प्रबंधन ले ए घटना के जानकारी लीन अउ जांच कराय के निरदेस दीन।
योग-बैठक
छत्तीसगढ़ योग आयोग ह राज्य म योग ल जनआंदोलन बनाय बर इकतालीस सदस्य के मार्गदर्सक मंडल बनाय हे। एखर पहिली बइठका रईपुर म होइस, जेमा पूर्व राज्यपाल रमेश बैस अउ योग आयोग के अध्यक्ष रूपनारायण सिन्हा ह सामिल होइन।
जिले की चिट्ठी
आकाशवाणी रईपुर के प्रादेशिक समाचार एकांश डहार ले प्रस्तुत कारीकरम जिले की चिट्ठी के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ म आकाशवाणी के सबो केंद्र एके संग रिले करही। ए दारी के अंक म ‘‘सक्ती‘‘ जिला के गतिविधि के बारे म जानकारी दे जाही।
दक्षिण-पश्चिम मानसून
दक्षिण-पश्चिम मानसून आज केरल म अपन तय तिथि ले आठ दिन पहिली पहुंच गेहे। वइसे केरल म मानसून ह सामान्य रूप ले एक जून तक पहुंचथे। मौसम विभाग ह केरल, माहे, तटीय कर्नाटक, कोंकण अउ गोवा म जोरदरहा बरसा के रेड अलर्ट जारी करे हे। संगेसंग मध्य, पूर्व अउ उत्तर-पश्चिम भारत के कुछेक जघा म तेज बरसा के अनुमान घलो लगाय गेहे।
इही बीच, राजधानी रईपुर अउ दुरूग समेत प्रदेस के कुछ जिला म आज बिहनिया गरज-चमक के संग मध्धम ले तेज पानी गिरीस। मौसम विभाग ह अवइया चौबीस घंटा म प्रदेस के कुछ जघा म हल्का ले मध्धम बरसा या गरज-चमक के संग छींटा पड़े के संभावना जताय हे। उहें, बस्तर संभाग म अवइया कुछेक दिन म भारी बरसा होय के आसार हे।
अउ अब थोरकुन समाचार सार म –
– छत्तीसगढ़ उच्च न्यायालय के निरदेस म राज्य के आने-आने जिला अदालत म अड़तालीस सिविल जज के परीवीक्षा नियुक्ति करे गेहे। ए नियुक्ति लोवर ज्यूडिशियल सर्विस के तहत करे गहे।
– जांजगीर-चांपा जिला म ड्यूटी के बीच लापरवाही करे के आरोप म पुलिस अधीक्षक ह छत्तीसगढ़ सशस्त्र बल याने सीएएफ के एक जवान ल निलंबित कर देहे।
– दुरूग पुलिस अउ स्पेसल टास्क फोर्स याने एसटीएफ के टीम ह दू बांग्लादेसी माईलोगिन ल गिरफ्तार करे हे। ए दूनों लगभग आठ बछर ले फर्जी दस्तावेज के आधार म अपन पहिचान छिपाके नाम बदलके रहत रिहीस।
– गौरेला जनपद के धनौली गांव म दू बैगा हितग्राही के आवास बनाय म पइसा गबन करे के आरोप म ठेकेदार के खिलाफ एफआईआर लिखे गेहे।
अउ
– कोरबा जिला के सीमा ले लगे हाटी अउ धरमजयगढ़ जंगल म हाथी मनके दू दल पहुंचे हे, जेखर ले वन अमला ह सतर्क हो गेहे। उहें, मुनादी कराके गांव वाले मन ल सावधान रहय के अपील करे गेहे।