बीजापुर जिला के उसूर क्षेत्र म नक्सल ऑपरेसन के दउरान शहीद होय कोबरा बटालियन के जवान सोलंकी मेहुल भाई नंदलाल ल मुख्यमंत्री विष्णुदेव साय ह आज रईपुर के माना स्थित चौथी वाहिनी छत्तीसगढ़ सशस्त्र बल परिसर म श्रध्दांजलि दीन अउ नमन करीन। ओमन शहीद जवान के पार्थिव सरीर ल कांधा देके उंखर गृहग्राम बर रवाना करीन। मुख्यमंत्री ह उंखर परिवार वाले मन बर अपन संवेदना जतइन हे। मुख्यमंत्री ह किहीन कि पाछू बछर भर ले नक्सल विरोधी अभियान तेज होय हे, अउ हमर जवान मन ह नक्सलवाद ले डट के मुकाबला करत बड़े सफलता पाय हे। ओमन यहू किहीन कि मार्च दू हजार छब्बीस तक नक्सलवाद ल पूरा खतम करे के संकलप ल हम पूरा करबो। जवान मनके सहादत बेकार नइ जाय। सरकार शहीद परिवार संग खड़े ह अउ हरसंभव ओखर मदद करही। ए बेरा म गृहमंत्री विजय शर्मा, विधायक मोतीलाल साहू, पुरंदर मिश्रा अउ पुलिस महानिदेसक अरूणदेव गौतम मौजूद रिहीन।
माओवादी-मुठभेड़
सुकमा जिला के बीच होय मुठभेड़ म एक माओवादी मारे गेहे। खबर के मुताबिक ए मुठभेड़ जिला के किस्टाराम क्षेत्र म होइस। ए क्षेत्र म माओवादी मनके रेहे के जानकारी मिले म सुकमा ले डिस्ट्रिक्ट रिजर्व गार्ड-डीआरजी, स्पेसल टास्क फोर्स अउ केंद्रीय रिजर्व पुलिस बल- सीआरपीएफ के कोबरा बटालियन के संयुक्त टीम रवाना करे गे रिहीस। पाछू दिन संझा ले सुरक्षाबल अउ माओवादी मनके बीच रूक-रूकके गोलाबारी होवत रिहीस हे। घटना के जघा ले तलासी के दउरान एक माओवादी के शव बरामद करे गेहे। मुठभेड़ के जघा अउ तीर-तखार म सुरक्षाबल कोति ले तलासी अभियान चलत हे।
माओवादी-आत्मसमर्पण
बीजापुर जिला म म आज चौबीस झिन माओवादी मन ह आत्मसमर्पण करीन हे। ए सबो झन उपर सतासी लाख रूपिया के इनाम घोसित रिहीस। राज्य सरकार के नियद नेल्लानार अउ पुर्नवास नीति ले प्रभावित होके कंपनी नंबर दू के डिप्टी कमांडर राकेश समेत चौबीस झिन माओवादी मन ह आत्मसमर्पण करीन हे। आत्मसमर्पण करइया ए माओवादी मन उपर गोलीबारी, बम ब्लास्ट, आगजनी जइसन कतकोन घटना म सामिल रहय के आरोप हे। आत्मसमर्पण करइया सबो माओवादी मन ल राज्य शासन के पुर्नवास नीति के तहत पचास-पचास हजार रूपिया के प्रोत्साहन रासि दे गेहे। उहें, खबर के मुताबिक एसो जिला म अभी तक कुल दू सौ सत्ताईस माओवादी मन ह आत्मसमर्पण करीन हे। उहें , दू सौ सैंतीस माओवादी मन ल गिरफ्तार करे गेहे। उहें, एक सौ उन्नीस माओवादी मन ह आने-आने मुठभेड़ म मारे गेहे।
उहें, दंतेवाड़ा जिला म आज नौ झिन माओवादी मन ह पुलिस के आगू आत्मसमर्पण करीन हे। एमा ले चार झिन माओवादी मन ह माओवादी मन उपर तीन लाख रूपिया के इनाम घोसित रिहीस। ए माओवादी मन ह पुलिस अधीक्षक गौरव राय के आगू आत्मसमर्पण करीन हे। ए माओवादी मन उपर रद्दा खोदे, पेड़ कांटे अउ नक्सली बैनर-पोस्टर लगाय जइसन घटना म सामिल रहय के आरोप हे।
मुख्यमंत्री-बासिंग
मुख्यमंत्री विष्णुदेव साय ह आज नारायणपुर जिला के बासिंग कैम्प पहुंच के अबूझमाड़ म दू दिन पहिली होय सफल ऑपरेसन म सामिल होय जवान मनले भेंट करीन। मुख्यमंत्री अउ गृहमंत्री विजय शर्मा ह जवान मन ल तिलक लगाके उंखर हौसला बढ़ाइन। ए बेरा म मुख्यमंत्री ह बासिंग सुरक्षा कैम्प म राखे गे कारीकरम म सुरक्षाबल ल पेट्रोलिंग करे खातिर पचास मोटर साइकिल संग रवाना करीन। ए दउरान मुख्यमंत्री ह एक करोड़ रूपिया ले जादा के विकास काम के घोसना करीन। ओमन ग्राम मुरहापदर म पुलिया बनाय बासिंग म खेल मैदान अउ बालक आश्रम के संगेसंग शाला भवन के मरम्मत ल मंजूरी दीन। उहें, मुख्यमंत्री ह गांव मुरहापदर अउ एहनार म नवा आंगनबाड़ी भवन अउ बासिंग म हाट बाजार ले बस्ती तक रद्दा बनाय के काम गांव कुंदला, बासिंग अउ मुरहापदर म नवा घोटुल बनाय के मंजूरी दीन।
मुख्यमंत्री-समीक्षा बैठक
मुख्यमंत्री विष्णुदेव साय ह किहींन हे कि जनहितकारी सरकारी योजना ल बने ढंग ले चलइया जिला ल इनाम दे जाही। मुख्यमंत्री ह ए बात सुशासन तिहार म अंबिकापुर म सरगुजा, बलरामपुर, रामानुजगंज अउ जशपुर जिला म चलत योजना के समीक्षा करत किहीन। मुख्यमंत्री ह तीनों जिला के कलेक्टर, पुलिस अधीक्षक अउ आने अधिकारी मनले किहीन हे कि ओमन जनता के सेवक हे उंखर जिम्मेदारी हवय कि समस्या के समय राहत समाधान करय। ओमन अधिकारी मन ल किहीन कि नियमित रूप ले जघा के दउरा करत उहें, राजस्व ले जुड़े प्रकरण के समय-सीमा म निराकरण करे जाय। संगेसंग अवैध रेत खनन के मामला म कार्रवाई होवय।
दुर्घटना पीड़ित-नगदी रहित उपचार
केंद्र सरकार ह सड़क दुर्घटना म घायल होवइया पीड़ित मन बर नगदी रहित उपचार योजना सुरू करे हे। ए संबंध म प्रदेस के स्वास्थ्य मंत्री श्याम बिहारी जायसवाल ह किहीन कि ए योजना म रद्दा दुर्घटना होय म पीड़ित ल नगदी रहित मुफत उपचार के सुविधा दे जाही। एमा कोनो भी पीड़ित परिवार ल सात दिन के अवधि म आयुष्मान स्वास्थ्य योजना ले जुड़े हास्पिटल म डेढ़ लाख रूपिया तक के इलाज मुफत मिलही। श्री जायसवाल ह बतइन कि ए निसुल्क इलाज हरेक मनखे बर डेढ़ लाख रूपिया तक होही। एमा ओ सबो हास्पिटल होही जउन ल आयुष्मान योजना म सामिल करे गेहे।
बातों-बातों में
प्रादेसिक समाचार एकांश के समसामयिक बिसय म आधारित कारीकरम ‘‘बातों-बातों में‘‘ ए बखत 29 मई ले सुरू होवइया विकसित कृषि संकल्प अभियान म रईपुर के इंदिरागंधी कृषि विश्वविद्यालय के कुलपति डॉक्टर गिरीश चंदेल ले लेगे भेंटवार्ता प्रसारित करे जाही। एखर प्रसारण काली चौबीस मई के एफएम चैनल म बिहनिया नौ बजे ले करे जाही। उहें, प्रायमरी चैनल म ए कारीकरम के प्रसारण बिहनिया साढ़े दस बजे ले होही। एला छत्तीसगढ़ स्थित आकाशवाणी के जम्मों केंद्र रिले करही।
ट्रेन परिचालन-प्रभावित
दक्षिण पूर्व मध्य रेलवे के झलवारा म एक ले नौ जून तक नॉनइंटरलॉकिंग के काम करे जाही, जेखर सेति कुछेक गाड़ी रद्द रइही। उहें, कुछेक गाड़ी ल आने रद्दा ले चलाय जाही। रद्द होवइया ट्रेन म बिलासपुर-भोपाल- बिलासपुर एक्सप्रेस, जबलपुर-अंबिकापुर-जबलपुर, रीवा-चिरमिरी-रीवा, लखनऊ-रईपुर-लखनऊ एक्सप्रेस सामिल हे। अइसने दुरूग-निजामुद्दीन-दुरूग, दुरूग-अजमेर-दुरूग, दुरूग-नवतनवा-दुरूग एक्सप्रेस अउ चिरमिरी-अनुपपुर-चिरमिरी, कटनी-चिरमिरी-कटनी पैसेंजर ल रद्द करे गेहे। उहें, बरौनी-गोंदिया-बरौनी एक्सप्रेस ल आने रद्दा ले चलाय जाही।
अमृत भारत स्टेशन योजना
आयुष मंत्रालय भारत सरकार के तत्वाधान म छत्तीसगढ़ के मीडिया करमचारी मनके दल ह आज गरियाबंद जिला के आने-आने स्वास्थ्य केंद्र मनके आयुर्वेद स्वास्थ्य केंद्र घूमिन। ए दउरान ए दल ह छुरा के अटलवारा आयुष्मान आरोग्य मंदिर दउरा करीन। ए संस्था ह रईपुर संभाग म कायाकल्प म अव्वल स्थान बनाय हे। ए संबंध म आयुष विभाग के संयुक्त निदेसक डॉक्टर सुनील कुमार दास ह बतइन कि मीडिया करमचारी मन ह गरियाबंद के संगेसंग दुरूग जिला के कतकोन आयुर्वेद स्वास्थ्य केंद्र ल देखिन।
मौसम विभाग के मुताबिक दक्षिण-पश्चिम मानसून के अवइया दू दिन म केरल पहुंचे के संभावना हरय। इही बीच रईपुर स्थित मौसम विज्ञानी एच.पी. चंद्रा ह बतइन कि प्रदेस म बंगाल के खाड़ी ले नमी आवत हे, जेखर प्रभाव ले प्रदेस म काली चौबीस मई के कुछेक जघा म गरज-चमक संग छींटा-बौछार होय के संभावना हे। उहें, एक-दू जघा हवा गरेर अउ गाज गिरे के चेतावनी दे गेहे।
अउ अब थोरकुन समाचार सार म –
– महासमुंद पुलिस ह साइबर ठगी म उपयोग करे बर खोले गे म्यूल खाता के मामला म तीन झिन आरोपी ल गिरफ्तार करे हे। पुलिस ह बतइन कि ए खाता म डेढ़ करोड़ रूपिया के ट्रांजक्सन करे गेहे।
– गौरेला-पेण्ड्रा ले निकलइया भारी वाहन के प्रवेस अब बिहनिया छै बजे ले ग्यारा बजे तक प्रतिबंधित रइही।
– मुंगेली पुलिस ह ब्राउन सुगर अउ अफीम के संग चार झिन तस्कर ल गिरफ्तार करे हे। इंखर तीर ले तीन नग मोबाइल, दू फटफटी समेत साढ़े तीन लाख रूपिया ले जादा के समान जब्त करे हे।
– जांजगीर-चांपा पुलिस ह चोरी के मामला म आरक्षक समेत आठ झिन आरोपी ल गिरफ्तार करे हे।
अउ
– सरगुजा जिला के अंबिकापुर बस स्टैण्ड ले हाथी दांत के तस्करी करइया दू झिन तस्कर मन ल वन विभाग के संयुक्त टीम ह गिरफ्तार करे हे। आरोपी मनके तीर ले कुल चार किलो छै सौ साठ ग्राम हाथी दांत बरामद करे गेहे।