नारायणपुर, बीजापुर अउ दंतेवाड़ा जिला के सीमावर्ती क्षेत्र म सुरक्षा बल के संग होय मुठभेड़ म सत्ताईस झिन माओवादी मारे गेहे, जिखर सव बरामद कर ले गेहे। घटना के जघा ले हथियार समेत आने माओवादी जिनीस बरामद करे गेहे। ए मुठभेड़ म डिस्ट्रिक्ट रिजर्व गार्ड-डीआरजी के एक जवान शहीद होगे। उहें, कुछेक जवान मनके घायल होय के खबर हे।
खबर के मुताबिक नारायणपुर जिला के अबूझमाड़ क्षेत्र म बड़ संख्या म माओवादी मनके रेहे के सूचना मिले म चार जिला – नारायणपुर, दंतेवाड़ा, बीजापुर अउ कोंडागांव ले डीआरजी के टीम एक संघरा अभियान बर रवाना करे गे रिहीस। इही दउरान आज बिहनिया अबूझमाड़ क्षेत्र म माओवादी अउ सुरक्षा बल के बीच मुठभेड़ होइस, जेमा माओवादी मनके एक बड़े नेता सीपीआई माओइस्ट के जनरल सेक्रेटरी बसवराजू के मारे जाय के खबर हे। एखर उपर एक करोड़ रूपिया ले जादा के इनाम घोसित रिहीस। क्षेत्र म सर्चिंग अभियान अभी घलो चलत हे।
सुरक्षा बल के ए सफलता म केन्द्रीय गृहमंत्री अमित शाह ह ट्वीट करके एला ऐतिहासिक उपलब्धि बतईन। ओमन लिखीन कि नक्सलवाद के खिलाफ जारी लड़ाई के तीन दसक म ए पहिली घांव हे कि सुरक्षा बल ह एक महासचिव स्तर के नेता नंबाला केशव राव उर्फ बसवराजू समेत सत्ताईस झिन माओवादी मन ल मार गिराय हे। ए सफलता बर सुरक्षा बल के जवान अउ एजेंसी के प्रसंसा करत हव। श्री शाह ह ए बार फेर दोहरईन कि केन्द्र सरकार इकतीस मार्च दो हजार छब्बीस ले पहिली देस ले नक्सलवाद ल खतम करे बर दृढ़ संकल्पित हे।
माओवादी मुठभेड़-02
केन्द्रीय गृहमंत्री के ट्वीट ल री-ट्वीट करत प्रधानमंत्री नरेन्द्र मोदी ह लिखीन कि ए सफलता बर सैन्य बल उपर गर्व हे। श्री मोदी ह किहीन कि केन्द्र सरकार माओवाद ल खतम करे अउ लोगन बर सांति अउ विकास सुनिश्चित करे बर प्रतिबद्ध हवय।
उहें, मुख्यमंत्री विष्णुदेव साय ह सोशल मीडिया म पोस्ट करके लिखीन कि नक्सलवाद के खात्मा बर विजय के शंखनाद होवत हे। ओमन किहीन कि डीआरजी के जवान मन कठिन भौगोलिक परिस्थिति अउ कतकोन चुनौती के बादों वामपंथी उग्रवाद के खिलाफ अभियान ल दृढ़ संकलप के संग पूरा करत हे। संगेसंग ओमन ऑपरेशन के दउरान एक जवान के सहादत म दुख जतईन हे अउ घायल जवान मनके बने इलाज के निरदेस दीन।
अमृत भारत स्टेशन योजना
अमृत भारत स्टेशन योजना म प्रधानमंत्री नरेन्द्र मोदी काली बाईस मई के वीडियो कॉन्फ्रेंसिंग ले एक सौ तीन पुनर्विकसित रेलवे स्टेसन के उद्घाटन करही। एमा छत्तीसगढ़ के पांच स्टेशन शामिल हे। प्रदेस के जउन स्टेसन के काली उद्घाटन होही। ओमा बिलासपुर मंडल के अंबिकापुर स्टेशन, रायपुर मंडल के उरकुरा, भिलाई अउ भानुप्रतापपुर स्टेशन अउ नागपुर मंडल के डोंगरगढ़ स्टेशन सामिल हे। ए स्टेसन मन म भव्य प्रवेश द्वार, हाईमास्ट लाइटिंग, आधुनिक प्रतीक्षालय, टिकट काउंटर, दिव्यांगजन बर सुगम रैम्प जइसन सुभीता बढाय गेहे। उहें, प्लेटफॉर्म म शेल्टर, कोच इंडिकेशन सिस्टम अउ सूचना बर डिजिटल डिस्प्ले लगाय गेहे। जम्मों सुभीता ल दिव्यांगजन मनके मुताबिक घलो बनाय गेहे। उहें, हरेक स्टेसन म स्थानीय लोककला, संस्कृति अउ परंपरा के झलक देखे बर मिलत हे।
अंबिकापुर रेलवे स्टेशन म राखे गे कार्यक्रम म मुख्यमंत्री विष्णुदेव साय सामिल होही।
प्री-डीएलएड-प्री-बीएड
छत्तीसगढ़ व्यावसायिक परीक्षा मंडल-व्यापमं कोति ले सरकारी अउ प्राईवेट संस्थान म प्रवेस खातिर प्री-डीएलएड अउ प्री-बीएड परीक्षा काली बाईस मई के होही। प्रवेस परीक्षा बर बनाय गे केन्द्र म प्री-बीएड के परीक्षा बिहनिया दस बजे ले मंझनिया सवा बारह बजे तक होही। उहें, प्री-डीएलएड के परीक्षा मंझनिया दू बजे ले सुरू होके संझा पांच बजे तक चलही। ए प्रवेस परीक्षा बर ऑनलाइन एडमिड कार्ड जारी कर दे गेहे। पात्र उम्मीदवार अपन प्रवेस पत्र व्यापमं के आधिकारिक वेबसाइट ले डाउनलोड कर सकत हे।
मुख्यमंत्री-सुशासन तिहार
मुख्यमंत्री विष्णुदेव साय ह किहीन कि प्रधानमंत्री आवास योजना के सर्वें सूची म जउन हितग्राही मनके नाव हे ओ सबो झन बर आवास मंजूर करे जाही। ओमन ए बात आज जशपुर जिला के गांव दोकड़ा म सुशासन तिहार म राखे गे समाधान सिविर म किहीन। ए बेरा म मुख्यमंत्री ह दोकड़ा म कालेज खोले अउ मिनी स्टेडियम बनाय के घोसना करीन। संगेसंग गांव के प्राथमिक स्वास्थ्य केन्द्र अउ वनवासी कल्याण आश्रम के बढ़वार अउ डोरियामुड़ा जलाशय के सुघरई बढ़ाय अउ मंगलभवन के जीर्णोद्वार खातिर बीस लाख रूपिया के मंजूरी दीन।
ए मउका म मुख्यमंत्री ह किहीन कि सुशासन तिहार म राखे गे सिविर म लोगन बे समस्या अउ मांग के समाधान करे जात हे। कार्यक्रम म मुख्यमंत्री ह प्रधानमंत्री आवास योजना के हितग्राही मन ल घर के चाबी अउ घर बनाय बर मंजूरी दीन। संगेसंग मुद्रालोन, सामाजिक सुरक्षा पेंशन, नवा राशन कारड, किसान क्रेडिट कार्ड, मछली जाल अउ आईस बॉक्स, मनरेगा जॉब कार्ड, वॉलीबॉल अउ क्रिकेट खिलाड़ी मन ल किट दीन।
मुख्यमंत्री-निर्देश
मुख्यमंत्री विष्णुदेव साय ह राजस्व संबंधी समस्या ल झटकीन निपटाय के निरदेस कलेक्टर मन ल दीन हे। एखर बर ओमन कलेक्टर मन ल दीन तय करके नियमित रूप ले राजस्व न्यायालय के संचालन करे बर किहीन हे। श्री साय ह ए निरदेस काली दुरूग जिला मुख्यालय म कवर्धा, बेमेतरा अउ दुरूग जिला के अधिकारी मनके बइठका के दउरान दीन मुख्यमंत्री ह किहीन कि ओमन सुशासन तिहार के दउरान अभी तक उन्नीस जिला के निरीक्षण करके समाधान शिविर म सामिल होइन। श्री साय ह अधिकारी मन ले किहीन कि विकसित छत्तीसगढ़ के निर्माण खातिर जुर-मिलके काम करना ही सरकार के प्रतिबद्धता होना चाही।
भू-जल संवर्धन मिशन
मुख्यमंत्री विष्णुदेव साय ह काली रईपुर के पंडित दीनदयाल उपाध्याय ऑडिटोरियम म भू-जल संवर्धन मिशन-शहरी के शुभारंभ करीन। ए मिशन म प्रदेस के सबो नगरीय निकाय म भूजल अउ वर्षा जल के संरक्षण-संवर्धन म काम करे जाही। ए मउका म मुख्यमंत्री ह नगरीय प्रशासन अउ विकास विभाग कोति ले बनाय के भूजल संवर्धन मिशन के ब्रोशर के विमोचन करत वीडियो जारी करीन। ओमन राज्य के नौ नगरीय निकाय म सेवाकाल के दउरान दिवंगत अट्ठारह झिन कर्मचारी के परिवार वाले मन ल अनुकम्पा नियुक्ति पत्र सौंपीन।
कार्यक्रम म बोलत मुख्यमंत्री ह कहिन कि पानी के जरूरत के मुताबिक उपलब्ध रेहे के संसो करत नगरीय प्रशासन विभाग कोति ले ए महत्वाकांक्षी मिशन के सुरूआत करे गेहे। ओमन उम्मीद जतईन कि वर्षा जल अउ भूजल के संरक्षण अउ संवर्धन बर ए मिशन मील के पत्थर साबित होही।
विकसित कृषि संकल्प अभियान
देशभर म उनतीस मई ले ‘‘विकसित कृषि संकल्प अभियान‘‘ सुरू होही। बारह जून तक चलइया ए अभियान के लक्ष्य देश के सात सौ जिला के करीबन डेढ़ करोड़ किसान मन तक पहुंचना हे। ए अभियान ल लेके छत्तीसगढ़ म घलो तियारी सुरू होगे हे। प्रदेस म ए अभियान सबो विकासखंड म चलाय जाही, जेखर समन्वय आई.सी.ए.आर.-राष्ट्रीय जैविक तनाव प्रबंधन संस्थान कोति ले करे जाही।
आई.सी.ए.आर.-एन.आई.बी.एस.एम. के निदेशक डॉक्टर पीके राय ह बतईन कि ए अभियान के उद्देश्य आधुनिक अउ वैज्ञानिक कृषि पद्धति ल बढ़ावा देके किसान मनके आमदनी बढ़ाना हे। ओमन सबो किसान मन ले अभियान म सक्रिय रूप ले भाग ले अउ बने उत्पादन खातिर नवा तकनीक ल अपनाय के आग्रह करीन।
अउ अब पेश हे मौसम के हाल…
मौसम विभाग ले मिले जानकारी के मुताबिक दक्षिण अरब सागर अउ बंगाल के खाड़ी के कुछेक भाग म आज ले दक्षिण-पश्चिम मानसून सक्रिय होगे हे। इही बीच, उत्तर कनार्टक अउ गोवा तट म अवइया छत्तीस घंटा के दउरान एक चक्रवात बने के संभावना हे। मौसम विभाग ह काली बाईस मई के प्रदेस के कुछेक जघा म हल्का ले मध्यम बरसा होय गरज-चमक संग छींटा-बौछार पड़े के संभावना जताय हे। उहें, कहूं-कहूं हवा-गरेर चले अउ गाज गिरे के चेतावनी दे गेहे।