आज दिनभर के खबर ल अपन गुरतुर छत्तीसगढ़ी भाखा म पढ़व

 राजीव गांधी किसान न्याय योजना म प्रदेश के उन्नीस लाख किसान मनके खाता म अवइया बीस अगस्त के पंद्रा करोड़ रूपिया के दूसर किस्त दे जाही। मुख्यमंत्री भूपेश बघेल ह अपन मंत्रिमंडल के सहयोगी मन संग पूर्व प्रधानमंत्री स्वर्गीय राजीव गांधी के जयंती म वीडियो कॅान्फ्रेसिंग ले अपन निवास कार्यालय म ये राशि किसान मनके खाता म आॅनलाईन जमा करही।

 मुख्यमंत्री ह ये मउका म तेंदूपत्ता सकलइया मन ल बछर दू हजार अठारा के प्रोत्साहन पारिश्रमिक के रूप म दू सौ बत्तीस करोड़ ले जादा के रकम उंखर खाता म जमा करहीं। संगेसंग गोधन न्याय योजना म गोबर बेचइया मन ल दूसर पारी म बेचे गे गोबर के पइसा आॅनलाइन दे जाही।

 प्रदेश म पाछू तीन दिन ले होवत सरलग बरसा ले लोगन के जनजीवन प्रभावित होय हे। कई ठिन गांव के जिला मुख्यालय ले सड़क संपर्क टूट गेहे। मुंगेली जिला म बरसा के सेती नंदिया नरवा उफान म हवय अउ निचली बस्ती मन म पानी भर गेहे। आज बीहनिया नगर के परमहंस वार्ड म पानी भरे के सेती पंद्रा ठिन परिवार ल रेसक्यू करके सुरक्षित जगा म पहुुंचाय गीस। कलेक्टर ह प्रशासनिक अमला ल तियार रेहे बर केहे हे।

 उंहें बेमेतरा जिला म संकरी नंदिया उफान म हवय। पचभइया, सुरूंग दाहरा समेत आधा दर्जन ले जादा गंाव के संपर्क जिला मुख्यालय ले टूट गेहे।

 ओति कबीरधाम जिला के वनांचल म भारी बरसा के सेती नंदिया नरवा लबालब हवय। पहाड़ी क्षेत्र म जादा बरसा ले हाफ, आगर अउ सकरी नंदिया उफान म हे। जउन क्षेत्र ले ये नंदिया निकलथे उंहा बाढ़ जइसन हालात हे।

 कवर्धा म रायपुर जबलपुर रद्दा के पुलिया उपर ले पानी बोहात हे। स्थिति ल देखत मउका म पुलिस बल तैनात करे गेहे। रायपुर, जबलपुर के संग कवर्धा ले बिलासपुर, मुंगेली समेत कई ठन जिला के संपर्क टूट गेहे। कवर्धा म ही निचली बस्ती म पानी भरे ले जनजीवन परभावित होय हे।

 इही बीच खराब मौसम के सेती मंत्री जयसिंह अग्रवाल अउ कवासी लखमा के आज बीजापुर दौरा रद्द होगे हे। वोमन क्षेत्र म बाढ़ ले होय नकसान के समीक्षा करे बर बीजापुर जवइया रीहिन।

 मौसम विभाग ह अवइया चैबीस घंटा म प्रदेश के कतकोन जगा म हल्का ले मध्यम बरसा अउ गरच चमक संग छींटा बौछार होय के संभावना जताय हे।  उंहें विभाग ह प्रदेश के दक्षिणी क्षेत्र म एक दू जगा म भारी बरसा के चेतावनी देहे।

 केंद्रीय मानव संसाधन विकास मंत्रालय के नाव बदल के शिक्षा मंत्रालय होगे हे। काली प्रकाशित गजट अधिसूचना के मुताबिक राष्ट्रपति रामनाथ कोविंद ह मंत्रालय के नाव बदले के मंजूरी दीन। नवा शिक्षा नीति म मंत्रालय के नाव बदले के सिफारिश करे गे रीहिस। मंत्रिमंडल ह पाछू महीना ये नीति ल मंजूरी दे रीहिन।

 छत्तीसगढ़ म कोरोना संक्रमण के  मामला सरलग बाढ़त जात हे। आज घलो आने आने जिला ले कोरोना संक्रमित नवा मरीज मिले के पुष्टि होय हे। अब तक मिले जानकारी मिले के मुताबिक कोरबा जिला म आज जिला पंचायत के महिला अधिकारी अउ दू कर्मचारी समेत बारा झिन नवा कोरोना संक्रमित मरीज के चिन्हारी होय हे। एमा छै झिन नगर निगम कर्मचारी सामिल हे।

 दीपका के प्रीमैट्रिक बालक छात्रावास क्वारंटाइन सेंटर ले एक अउ करतला ले दू संक्रमित मिले हे। जम्मों झन ल इलाज बर कोरबा के विशेष कोविड अस्पताल म भर्ती करे जात हे।

 खबर के मुताबिक काली रतिहा स्वास्थ्य विभाग कोति ले जारी बुलेटिन के मुताबिक सोमवार के आने आने जिला ले चार सौ चार कोरोना पाॅजीटिव मरीज के चिन्हारी करे गेहेे। उंहें तीन सौ तिरसठ झिन मरीज स्वस्थ होगे। एमा सबले जादा रायपुर जिला ले एक सौ नब्बे मरीज हवय।

 कोरोना के जांच ल लेके स्वास्थ्य विभाग ह लोगन के अफवाह, भरम वाले खबर ले सावधान होय के अपील करे हे सोशल मीडिया म निजी लैब म कोरोना के जांच ल लेके भरम फैलाय जात हे कि उंहा जांच करवइया लोगन ल कोरोना पाॅजीटिव नइ होय के बाद कोरोना पाॅजीटिव पाय के रिपोर्ट दे जावत ह।

 एखर संगेसंग यहू अफवाह हवय कि जादा पैकेज के लालच म लैब कोति ले अइसन किसम के गलत रिपोर्ट दे जावत हे।   स्वास्थ्य विभाग ह ये खबर ल गलत बताय हे अउ लोगन ले अइसन भरम ले बांचे के अपील करीन हे।

 राज्यपाल अनुसूइया उइके अउ मुख्यमंत्री भूपेश बघेल ह विश्व प्रसिद्ध शास्त्रीय गायक पद्मविभूषण पंडित जसराज के निधन म शोक जताइन हे। मुख्यमंत्री ह अपन शोक संदेश म कीहिन कि पंडित जसराज ह शास्त्रीय संगीत के परंपरा ल आगू बढ़ाके भारत के विश्व मंच म मान बढ़ाय हे।  खबर के मुताबिक पंडित जसराज के काली अमेरिका के न्यूजर्सी म निधन होगे रीहिस। ओमन नब्बे बछर के रीहिन।

  प्रदेशभर पोरा परब आज उछाह के संग मनाये जात हे। ये तिहार किसानी म पशुधन के महत्ता ल बताथे। आज के दिन किसान भाई मन बने फसल के मनौती मानत बैला ल सुघ्घर सजाके पूजा पाठ करथें अउ ठेठरी, खुरमी, चिला के भोग लगाये जाथे। लईका मन माटी के बने बैला अउ पोरा बिसाके घरघुंदिया खेलथे।

 राजधानी रायपुर के बाजार हाट म सुघ्घर-सुघ्घर माटी के खिलौना, चुकिया, पोरा, जाता अउ बैला मिलत हे। पोला परब के मउका म मुख्यमंत्री भूपेश बघेल ह रायपुर के अपन निवास स्थान म तीजा पोरा तिहार के आयोजन करीन। ओमन कोरोना संक्रमण ले बांचत तीजा मनाय के संदेस दीन।

 मुख्यमंत्री ह कहिन कि छत्तीसगढ़ म राम वनगमन पथ के प्रचार प्रसार बर आज पांचों संभाग बर प्रचार रथ भेजे गेहे। ओमन कीहिन कि जनभागीदारी बर राम वनगमन पर्यटन परिपथ विकास कोस के गठन करे गेहे। ये कोस म इकट्ठा रकम देवालय, देवगुड़ी के विकास म खरच करे जाही।

 ये मउका म प्रदेशभर ले बहिनी मन ल तीजा पोरा परब बर बलाय गे रीहिस अउ मुख्यमंत्री कोति ले लुगरा अउ छत्तीसगढ़ी कलेवा के उपहार दे गीस। संगेसंग कार्यक्रम म छत्तीसगढ़ी लोक कलाकार मन कर्मा,सुआ अउ राउत नाचा अउ पंथी नृत्य प्रस्तुत करीन।

स्कूल इन आॅडियो

 प्रदेश म कोरोना संक्रमण के बेरा स्कूल के लईका मन तक शिक्षा अमराय बर नवा-नवा तरीका अपनावत हे। सरकार ह जिहां पढई तुहर दुआर शुरू करे हे, उंहें कुछएक जगा म शिक्षक आॅनलाईन तरीका ले लईका मन ल पढ़ावत हे। अइसने परयास रायपुर जिला के सेजबहार गांव के सरकारी स्कूल ह करे हे। ये स्कूल के प्राचार्या वीना भसीन, शिक्षक अउ स्कूल लिपिक अपन आवाज म मोबाईल  म विसय के व्याख्या रिकार्ड करत हे।

 ये अभियान ल स्कूल इन आॅडियो नाव दे गेहे। उंहें स्कूल के शिक्षक मन कोति ले आनलाईन कक्षा लेके संगेसंग पढ़ई तुहंर दुआर म मोहल्ला स्कूल अभियान चलाये जात हे।

 अउ अब थोरकुन समाचार सार म-

– प्रदेश के शासकीय औद्योगिक प्रशिक्षण संस्थान आईटीआई अउ विशेष औद्योगिक प्रशिक्षण संस्था म सत्र अगस्त दू हजार बीस-इक्कीस अउ दू हजार बीस-बाईस म प्रवेश बर लोगन पच्चीस अगस्त तक आॅनलाईन रजिस्ट्रेशन करा सकत हे।

– आईएएस जितेन्द्र शुक्ला ल नवगठित गौरेला, पेण्ड्रा मरवाही जिला के प्रभारी सचिव के प्रभार सौंपे गेहे। सामान्य प्रशासन विभाग ह ए संबंध म आदेश जारी कर देहे।

– स्टेट पाॅवर डिस्ट्रीब्यूशन कंपनी के प्रबंध निदेशक अउ डायरेक्टर हर्ष गौतम ह पदभार ले लेहेे। ओमन ये कंपनी म कार्यपालक निदेशक पद म काम करत हे।

– राजनंादगंाव जिला के गांव अरसीटोला म आज बीहनिया जंगली सुअर के हमला म एक लईका समेत तीन झिन घायल होगे , जउन मन ल इलाज बर राजनांदगंाव के मेडिकल अस्पताल म भर्ती कराय गेहे।