मुख्यमंत्री विष्णुदेव साय ह आज गृह विभाग के अहम बइठका लेके छत्तीसगढ़ अउ तेलांगाना के सीमा म स्थित कर्रेगुट्टा के पहाड़ी मन म चलाय जात नक्सल उन्मूलन अभियान के समीक्षा करीन। ओमन किहीन कि नक्सल उन्मूलन न सिरिफ एक अभियान भलूक बस्तर अउ छत्तीसगढ़ के भविष्य ल सुरक्षित करे के मिसन हरय। मुख्यमंत्री ह किहीन कि केंद्रीय गृहमंत्री अमित शाह के नेतृत्व म प्रदेस ल नक्सलमुक्त बनाय के संकल्प के संग राज्य सरकार दृढ़ता ले काम करत हे। मुख्यमंत्री ह बइठका म अधिकारी मन ल नक्सल विरोधी अभियान म आपसी समन्वय अउ सूचना संकलन तंत्र ल अउ जादा मजबूत बनाय के निरदेस दीन। ओमन ह उम्मीद जताय हे कि अवइया बेरा म छत्तीसगढ़ ल नक्सलमुक्त अउ विकासोन्मुख प्रदेस के रूप म पूरा देस म एक नवा पहिचान मिलही। बइठका म उपमुख्यमंत्री अउ गृहमंत्री विजय शर्मा, मुख्य सचिव अमिताभ जैन, पुलिस महानिदेसक अरूण देव गौतम, सीआरपीएफ के संग आने सुरक्षा बल के अधिकारी उपस्थित रिहीन।
उहें, मुख्यमंत्री ह आज पंचायत अउ ग्रामीण विकास विभाग के घलो समीक्षा बइठका लीन अउ आने-आने योजना मनके समीक्षा करीन। बइठका म मुख्यमंत्री ह खासतौर ले प्रधानमंत्री आवास योजना के अंतर्गत चलत ‘‘मोर दुआर-साय सरकार‘‘ सर्वे के काम के समीक्षा करीन। खबर के मुताबिक ए योजना के अंतर्गत अब तक बीस लाख इंक्यानवे हजार के सर्वे पूरा हो चुके हे। मुख्यमंत्री ह किहीन कि पंचायत मन ल सशक्त कर राज्य के आखिरी मनखे तक विकास पहुचाना सरकार के प्राथमिकता हरय।
माओवादी-आत्मसमर्पण
बीजापुर जिला म आज चौदह झिन इनामी समेत करीबन चोबीस माओवादी ह आज आत्मसमर्पण करे हे। चौदह माओवादी मन उपर अट्ठाईस लाख पचास हजार रूपिया के इनाम घोसित रिहीस। ए माओवादी मन ह बीजापुर के केंद्रीय रिजर्व पुलिस बल सीआरपीएफ के उप महानिरीक्षक देवेन्द्र सिंह नेगी, पुलिस अधीक्षक जितेन्द्र कुमार यादव संग आने पुलिस अधिकारी मनके आगू आत्मसमर्पण करे हे। ए माओवादी मन ल सरकार के योजना के तहत पचास-पचास हजार रूपिया के चेक दे गीस।
वेव्स-प्रतिभागी
अवइया विश्व ऑडियो विजुअल एंटरटेनमेंट समिट-वेव्स म ‘‘इंडिया ए बर्ड्स आई व्यू चैलेंज‘‘ के शीर्ष पांच फाइनलिस्ट के घोसना काली कर दे गीस। ए चैलेंज म प्रतिभागी मन ल दू या तीन मिनट लंबा हवाई वीडियो प्रस्तुत करे बर बुलाय गे रिहीस। प्रत्येक श्रेणी म पांच फाइनलिस्ट ल कठोर मूल्यांकन प्रक्रिया के बाद शॉर्टलिस्ट करे गीस। ए शॉर्टलिस्ट करे गे प्रविष्टिय मन ल वेव्स दू हजार पच्चीस म प्रदर्सित करे जाही अउ विजेता मनके घोसना करे जाही। संगेसंग शिखर सम्मेलन म एक भव्य समारोह के दउरान ओमन ल सम्मानित करे जाही।
चारधाम-यात्रा
उत्तराखंड म चारधाम यात्रा बर केदारनाथ मंदिर ल खोले के तियारी चलत हे। ए आयोजन ले पहिली होवइया अनुष्ठान म आज भगवान केदारनाथ के पंचमुखी मूर्ति ल औपचारिक रूप ले मंदिर बर रवाना करे गीस। यात्रा सुरू करे ले पहिली उखीमठ स्थित ओमकारेश्वर मंदिर म बिसेस पूजा अर्चना करे गीस। उहें, मुख्यमंत्री पुष्कर सिंह धामी ह किहीन कि चारधाम यात्रा बर सबो तियारी पूरा हो गेहे। ओमन बतइन कि ‘‘यमुनोत्री अउ गंगोत्री के कपाट तीस अप्रैल के खुलही। केदारनाथ धाम दू मई के उहें, बद्रीनाथ धाम के द्वार चार मई के खुलही।
पाकिस्तानी नागरिक-कार्रवाई
रायगढ़ म पुलिस ह दू पाकिस्तानी भाई-बहिनी उपर कार्रवाई करे हे। इंखर तीर वैध पासपोर्ट लॉगटर्म वीजा रिहीस, फेर आरोप हे कि ओमन ह फर्जी तरीका ले मतदाता पत्र बनवा ले रिहीस, जेला देखत पुलिस ह इंखर खिलाफ मामला दर्ज करे हे। रायगढ़ के डीएसपी सुशांतो बनर्जी ह बतइन कि दूनों आरोपी अभी न्यायिक रिमांड म हे।
उहें, रईपुर म रहत पाकिस्तानी मनके संबंध म एसएसपी लाल उमेद सिंह ह बतइन कि पाकिस्तान ले जउन लोगन रईपुर आय हे, ओमा ले जादातर हिंदु सिंध प्रांत के हरय। कुछ लोगन ल लंबा अउ कुछ लोगन ल छोटे बेरा बर वीजा मिले हे। सबो झन ल चिन्हित कर ले गेहे। पुलिस के तीर पाकिस्तान ले आय लोगन के सूची हे। वरिष्ठ अधिकारी मन ले निरदेस आय के बाद आगू के कार्रवाई करे जाही।
सूरजमुखी खेती-सराहना
सक्ती अउ कांडागांव समेत प्रदेस के दूसर जिला मन म करे जात सूरजमुखी खेती के केंद्र सरकार ह सराहना करे हे। केंद्रीय कृषि मंत्रालय ह अपन सोसल मीडिया हैंडल एक्स म कहे हे कि छत्तीसगढ़ म सूरजमुखी के खेती एक नवा स्वर्णिम अध्याय के सुरूआत हरय। प्रधानमंत्री नरेंद्र मोदी के आत्म निर्भर भारत के सपना ले प्ररित होके सक्ती जिला के घुइचुनवा गांव के रामायण मान्यवर जइसन किसान सूरजमुखी जइसन वैकल्पिक फसल लेवत हे। पारंपरिक खेती ले आगू बढ़के ए किसान न सिरिफ एक तरफ अपन आय बढ़ावत हे त उहें, पानी उपर निर्भरता कम करत हे। अइसने कोंडागांव जिला म घलो किसान मन ह सूरजमुखी के खेती करे म रूचि देखाय हे अउ एखर बढ़िया परिणाम आगू आय हे।
फसल अवशेष-प्रतिबंध
बेमेतरा जिला म फसल अवशेष जलइया किसान मनले उंखर खेत के रक्बा के अनुसार दंड वसूल करे जाही। कृषि उपसंचालक मोरध्वज डड़सेना ह बतइन कि दू एकड़ तक के किसान मन उपर ढाई हजार रूपिया, दू से पांच एकड़ वाले किसान उपर पांच हजार अउ एखर ले जादा रक्बा वाले किसान उपर पंद्रह हजार रूपिया के जुर्माना लगाय जाही। उहें, बेमेतरा कलेक्टर ह सबो सरपंच मनले अपील करे हे कि ओमन अपन-अपन गांव मन म किसान मन ल फसल अवशेष जलाय ले रोकय अउ पर्यावरण संरक्षण म सहयोग करय।
शिक्षक-अटैचमेंट समाप्त
सारंगढ़-बिलाईगढ़ के जिला शिक्षा अधिकारी ह कतकोन शिक्षक मनके अटैचमेंट ल तत्काल प्रभाव ले समाप्त कर देहे। ओमन ह तीस अप्रैल तक सबो शिक्षक मन ल अपन मूल पदस्थापना म लहुटे के निरदेस देहे। ओमन ह चेतावनी दे हे कि आदेस के पालन नइ करइया शिक्षक मन उपर सख्त विभागीय कार्रवाई करे जाही।
अउ अब मौसम के हाल…
प्रदेस म मौसम के मिजाज बदले हे अउ कतकोन जिला म आज आंधी तूफान संग करा अउ पानी गिरे हे। गौरेला-पेण्ड्रा-मरवाही जिला के पेण्ड्रा संग कतकोन क्षेत्र मन म आज पानी के संग करा गिरे हे। एखर ले तापमान म गिरावट आय हे। तेज हवा अउ पानी के सेति शहरी क्षेत्र संग तीर-तखार के इलाका मन म बिजली आपूर्ति बाधित होइस।
उहें, कोरबा जिला के आने-आने जघा मन म आज तेज आंधी तूफान के संग पानी गिरिस। कतकोन इलाका म करा घलो गिरे हे। पानी ले कोरबा सहर के सड़क मन म जलभराव के स्थिति दिखीस। ऐति राजधानी रईपुर म घलो बीते रतिहा ले मौसम बदले हे। काली रतिहा ले रईपुर म रूक-रूक के पानी गिरीस।
इही बीच, मौसम विभाग ह काली प्रदेस के एक-दू जघा मन म हल्का बरसा होय अउ गरज-चमक के संग छींटा पड़े के संभावना जताय हे। उहें, विभाग ह एक-दू जघा मन म गरज-चमक के संग अंधड़ चले, करा गिरे अउ गाज गिरे के चेतावनी घलो देहे।
अब थोरकुन समाचार सार म –
– दुरूग जिला के स्मृति नगर चौकी क्षेत्र म आज तेज रफ्तार कार अनियंत्रित होके खंभा ले जा टकराइस। ए हादसा म कार म सवार युवक-युवती के मउत हो गेहे।
– सरगुजा जिला के गांधीनगर पुलिस ह प्रतिबंधित नसीला इंजेक्सन के तस्करी करे के आरोप म एक झिन युवक ल गिरफ्तार करे हे। एखर तीर ले करीबन चालीस हजार रूपिया के समान बरामद करे गेहे।
– बलरामपुर जिला के डिंडो चौकी क्षेत्र म जंगल म शिकार के दउरान बंदूक के गोली लगे ले एक झिन युवक के मउत के मामला म पुलिस ह छै आरोपी मन ल गिरफ्तार करे हे। इंखर तीर ले चार भरमार बंदूक बरामद करे गेहे। सबो आरोपी मन ल न्यायिक रिमांड म जेल भेज दे गेहे।
अउ
– दुरूग जिला के चंदखुरी म स्थित एक ठिन राईस मिल के बारदाना गोदाम म काली रतिहा आगी लग गे। दुरूग अग्निशमन अउ आपातकालीन सेवा के तीन टीम मन ह कतकोन मसक्कत के बाद आगी म काबू पा लीन। आगी लगे के कारण शॉर्ट सर्किट बताय जात हे।