मुख्यमंत्री विष्णुदेव साय ह आज रायपुर म होय स्टेट सिविल सप्लाईज कॉर्पोरेशन लिमिटेड के नवा बने अध्यक्ष संजय श्रीवास्तव के संगेसंग राज्य पर्यटन मंडल के अध्यक्ष नीलू शर्मा, राज्य साहित्य अकादमी के अध्यक्ष शशांक शर्मा अउ राज्य औद्योगिक विकास निगम के अध्यक्ष राजीव अग्रवाल के पदभार ग्रहण अउ अभिनंदन समारोह म सामिल होइन।
रायपुर के आने-आने जघा म होय ए कार्यक्रम म नवा बने अध्यक्ष मन ल मुख्यमंत्री ह सुभकामना दीन। ए मउका म ओमन कहिन कि मंडल म अनुभवी लोगन मन ल अध्यक्ष के जिम्मेवारी दे गेहे। कार्यक्रम म विधानसभा अध्यक्ष डॉक्टर रमन सिंह, उपमुख्यमंत्री अरूण साव अउ विजय शर्मा के संगेसंग आने मंत्री अउ भाजपा के प्रदेस अध्यक्ष किरण सिंह देव घलो सामिल होइन।
मुख्यमंत्री-बस्तर
मुख्यमंत्री विष्णुदेव साय ह बस्तर संभाग म जनकल्याणकारी योजना मन ल तेजी ले लागू करे के निरदेस देहे। ओमन किहीन कि आखिरी मनखे तक योजना मनके फायदा अउ जम्मों हितग्राही तक सासन के पहुंच होना चाही। मुख्यमंत्री के अगुवई म आज बस्तर कलेक्टोरेट म संभाग स्तरीय समीक्षा बइठका होइस। मुख्यमंत्री ह संभाग म आयुष्मान अउ आधार कार्ड बनाय के लक्ष्य ल पूरा करे बर बिसेस अभियान चलाय के निरदेस दीन। ओमन कहिन कि सरकार के मंत्र हे कि हर घर म उजाला, हर हाथ म रोजगार अउ हर दिल म विश्वास। बइठका म मुख्यमंत्री ह यहू कहिन कि नक्सलवाद के खात्मा करे बर राज्य सरकार ह केन्द्र सरकार के मदद ले पूरा ताकत लगा देहे।
मुख्यमंत्री ह अधिकारी मन ल नवा सिक्षा सत्र ल देखत जाति प्रमाणपत्र बनाय के काम ल जल्दी ले जल्दी पूरा करे के निरदेस दीन। ओमन गर्मी अउ बारिस के मौसम सीएससी स्तर अउ स्वास्थ्य केन्द्र मन म दवई के पूरा व्यवस्था करे बर किहीन।
नगरीय प्रशासन विभाग-राशि
प्रदेश के सहरी जघा म साफ-सफाई वाले सौचालय के संगेसंग लोगन मन ल साफ-सफाई के बारे म जागरूक करे बर नगरीय प्रशासन विभाग ह संतावन करोड़ सत्तर लाख रूपिया जारी करे हे। एमा ले बयालीस करोड़ रूपिया ले जादा के रासि ले एक सौ चवालीस नगरीय निकाय मन म साफ-सफई के संगेसंग पूरा सुविधा वाले सौचालय बनाय जाही। त उहें, स्वच्छता श्रृंगार योजना के तहत सामुदायिक सौचालय मनके रखरखाव अउ ओला बनाय उपर पन्द्रह करोड़ रूपिया ले जादा के पइसा खरच करे जाही। उपमुख्यमंत्री अउ नगरीय प्रसासन मंत्री अरूण साव के निरदेस म नगरीय निकाय मन म स्वच्छता अभियान ल तेज करे अउ कचरा डिस्पोजल के व्यवस्था ल बढ़िया बनाय के काम ल प्राथमिकता ले करे के पहल करे गेहे।
राज्यपाल-रेडक्रॉस सोसायटी
राज्यपाल रमेन डेका ले आज राजभवन म छत्तीसगढ़ राज्य रेडक्रॉस सोसायटी के नवा बने अध्यक्ष टोमन साहू के अगुवई म पदाधिकारी मन ह मुलाकात करीन। ए दउरान राज्यपाल ह रेडक्रॉस के सदस्यता ल बढ़ाय बर जम्मों पदाधिकारी मन ल बिसेस प्रयास करे बर कहिन। ओमन कहिन कि प्रधानमंत्री टीबी मुक्त भारत अभियान के तहत छत्तीसगढ़ ल ए बीमारी ले मुक्त कराय बर रेडक्रॉस के बड़का भूमिका हे।
माओवादी-मुठभेड़
कोंडागांव-नारायणपुर जिला के सीमा म स्थित किलम-बरगुम क्षेत्र के जंगल म होय मुठभेड़ म सुरक्षा बल मन ह दू झिन इनामी माओवादी मन ल मार गिराय हे, जिखर सव बरामद कर ले गेहे। मृतक माओवादी कमांडर हलदर अउ रामे के रूप म जाने जात रिहीस। बस्तर रेंज के पुलिस महानिरीक्षक सुंदरराज पी. ह बतईन कि एक झिन माओवादी उपर आठ लाख रूपिया अउ दूसर माओवादी उपर पांच लाख रूपिया के इनाम घोषित रिहीस। घटना वाले जघा ले एक नग एके-फोर्टी सेवन रायफल अउ आने हथियार के संगेसंग विस्फोटक अउ माओवादी जिनीस बरामद करे गेहे।
उपमुख्यमंत्री-श्रद्धांजलि
उपमुख्यमंत्री विजय शर्मा ह आजे के दिन बछर दू हजार छह और दू हजार आठ के होय माओवादी घटना म सहीद जवान अउ निर्दोष आदिवासी मन ल श्रद्धांजलि दे हवय। उपमुख्यमंत्री ह सोलह अप्रैल के ओ दिन ल प्रदेस के इतिहास म दुखद घटना के रूप म दरज बताय हे। ओमन कहिन कि प्रदेस सरकार ह सहीद के परिवार अउ पीड़ित परिवार मनके संग पूरा संवेदनसीलता के संग खड़े हे। नक्सल हिंसा के खिलाफ सरकार के ए लड़ई आखिरी सांस तक चलही।
जानबा के मुताबिक बछर दू हजार छह म सोलह अप्रैल के दिन बीजापुर जिला के उसूर थाना क्षेत्र स्थित मुरकीपार पुलिस पोस्ट उपर माओवादी मनके हमला म ग्यारह झिन जवान सहीद होगे रिहीन। त उहें, बछर दू हजार आठ म घलो सोलह अप्रैल के दिनेच माओवादी मन ह मुखबिरी के सक म छह झिन गांव के लोगन मनके हत्या कर दे रिहीन।
वेव्स
भारत सरकार डहार ले एक मई ले मुंबई म विश्व दृश्य-श्रव्य अउ मनोरंजन शिखर सम्मेलन-वेव्स के आयोजन करे जाही। चार दिन तक चलइया ए सम्मेलन ल मीडिया अउ मनोरंजन क्षेत्र के बड़का आयोजन माने जात हे।
एमा पाछु सनिवार के हैदराबाद सहर म माइंडस्पेस सोशल म वर्ल्ड ऑडियो विजुअल एंड एंटरटेनमेंट समिट-वेव्स कॉस्प्ले चैंपियनशिप मीटअप के आयोजन करे गीस। जेखर बाद आयोजक मन ह उनतीस झिन प्रतिभाशाली मनखे मनके नाव घोसित करे गीस। जउन मन ह ए चैंपियनशिप के आखिरी चरण म अपन जघा बनाय हे।
त उहें, सूचना अउ प्रसारण मंत्रालय ह भारतीय विज्ञापन एजेंसी संघ के मदद ले मेक द वर्ल्ड वियर खादी बर चैंपियनशिप के आखिरी चरण म जघा बनइया पांच झिन लोगन के नाव घोसित करे हे।
हाईकोर्ट-बाघ/हाथी मौत
छत्तीसगढ़ उच्च न्यायालय म प्रदेस म बाघ अउ हाथी के मउत के मामला म आज सुनवाई होइस। मुख्य न्यायाधीश रमेश कुमार सिन्हा अउ न्यायाधीश अरविंद कुमार वर्मा के बेंच म होय सुनवाई के दौरान वन विभाग कोति ले पीसीसीएफ ह शासन के अधिवक्ता के माध्यम ले शपथ पत्र पेस करीन। उप महाधिवक्ता शशांक ठाकुर ह कोर्ट ल बतईन कि पाछु सत्रह मार्च के होय उच्च स्तरीय बइठका म बाघ मनके सुरक्षा के बारे म कतकोन कदम उठाय उपर गोठबात करे गे रिहीस। जेखर बाद डिवीजन बेंच ह ए मामला ल निगरानी म राखत अवइया सुनवाई चौदह जुलाई के तय करीन।
आकर्षि कश्यप-स्वर्ण पदक
दुरूग जिला म पदस्थ प्रशिक्षु उप पुलिस अधीक्षक आकर्षि कश्यप ह केरल म खेले गे ऑल इंडिया पुलिस बैडमिंटन कलस्टर म तीन ठिन स्वर्ण पदक जीते हे। कोच्चि के राजीव गांधी रीजनल इंडोर स्टेडियम म काली ए प्रतियोगिता के समापन होइस, जेमा छत्तीसगढ़ के संगेसंग देस के आने-आने प्रदेस अउ अर्द्ध सैनिक बल मनके प्रतिभागी मन ह भाग लीन। दुरूग रेंज के पुलिस महानिरीक्षक रामगोपाल गर्ग अउ पुलिस अधीक्षक जितेन्द्र शुक्ला ह किहीन कि दुरूग जिला म पदस्थ प्रशिक्षु डीएसपी आकर्षि कश्यप ह ए प्रतियोगिता के आने-आने वर्ग म तीन ठिन स्वर्ण पदक जीत के छत्तीसगढ़ पुलिस के संगेसंग दुरूग पुलिस के नाम रोशन करे हे।
अउ अब मौसम के हाल…
प्रदेस के कोनों-कोनों जघा म ए बेरा मौसम म बदलाव देखे जात हे। एखरे सेती गर्मी ले थोरकुन राहत मिलत हे। आज बलौदाबाजार जिला के कसडोल म करा गिरे के संगेसंग कोनों-कोनों जिला म बरसा होय के समाचार मिले हे। मौसम विभाग के मुताबिक ए बेरा सिक्किम ले उत्तर ओड़िशा तक एक ठिन द्रोणिका बने हे। त उहें, मध्यप्रदेश अउ ओखर तीर-तखार म एक ठिन ऊपरी हवा के चक्रीय चक्रवाती घेरा बने हे, जेखर असर ले काली प्रदेस के एक-दू जघा म हल्का बरसा होय या फेर गरज-चमक के संग बूंदाबांदी होय के संभावना हे। उहें, एक-दू जघा म गाज गिरे अउ जोरदरहा हवा-गरेर चले के चेतावनी दे गेहे। ए दउरान राज्य के अधिकतम तापमान म थोरकुन बढ़ोतरी हो सकथे।
मानसून-पूर्वानुमान
भारतीय मौसम विज्ञान विभाग मुताबिक एसो घलो देस म मानसून के दउरान सामान्य ले जादा बरसा होय के पूर्वानुमान जारी करे गेहे। अवइया जून ले सितंबर महीना के बीच एक सौ पांच प्रतिशत बरसा हो सकथे। मौसम विभाग के मुताबिक छियानवे ले एक सौ चार प्रतिशत बरसा ल सामान्य बरसा माने जाथे। पूरा देस म मानसून के चार महीना के दउरान सामान्य रूप ले सत्यासी सेंटीमीटर बरसा होथे, जे ह एसो इंक्यानवे दशमलव चार सेंटीमीटर होय के संभावना हे। भारतीय मौसम विभाग डहार ले मानसून बर दू बार पूर्वानुमान जारी करे जाथे। एक ठिन अउ पूर्वानुमान मई महीना के आखिरी हफ्ता म जारी करे जाही।