बीजापुर जिला म आज सुरक्षाबल के संग होय मुठभेड़ म तीन झन वर्दीधारी माओवादी मारे गेहे, जेखर शव ल बरामद कर ले गेहे। मिले जानकारी के अनुसार जिला के इन्द्रावती क्षेत्र के तहत जंगल म माओवादी मनके उपस्थिति के सूचना उपर बीजापुर अउ दंतेवाड़ा जिला ले डिस्ट्रिक्ट रिजर्व गार्ड-डीआरजी, स्पेसल टास्क फोर्स-एसटीएफ अउ कोबरा बटालियन के संयुक्त टीम सर्चिंग अभियान म निकले रिहीन। ए दउरान पहिली ले घात लगाय बइठे माओवादी मन ह सुरक्षाबल उपर फायरिंग कर दीन। जवान मन डहार ले दे गे जवाबी कार्रवाई म तीन झन माओवादी मारे गीस। मृत माओवादी मनके पहिचान करे जात हे। घटनास्थल ले भारी मात्रा म हथियार, विस्फोटक पदार्थ अउ माओवादी सामग्री बरामद करे गेहे।
ओति, दंतेवाड़ा जिला म लोन वर्राटू अभियान ले प्रभावित होके आठ झन माओवादी मन आज पुलिस के समक्ष आत्मसमर्पण कर दीन। एमा ले दू झन माओवादी मन उपर पचास-पचास हजार रूपिया के इनाम घोसित हे। ए माओवादी मन उपर अपन-अपन क्षेत्र म सड़क कांटे अउ बैनर पोस्टर लगाय के घटना म सामिल रेहे के आरोप हे। आत्मसमर्पण करइया सबो माओवादी मन ल पुनर्वास नीति के तहत पचास-पचास हजार रूपिया के सहायता रासि के संगेसंग राज्य सरकार डहार ले मिलइया दूसर सुविधा घलो प्रदान करे जाही।
आत्मसमर्पण-प्रोत्साहन राशि
राज्य सरकार नवा नक्सलवादी आत्मसमर्पण नीति के तहत िंहंसा के रद्दा छोड़ के आत्मसमर्पण करइया माओवादी मन ल सुरक्षा के संगेसंग प्रोत्साहन रासि घलो दिही। एखर अलावा उनला शिक्षा, कौशल प्रसिक्षण अउ रोजगार व्यवसाय ले घलो जोड़े जाही। नवा नीति के तहत एलएमजी हथियार के संग आत्मसमर्पण करइया माओवादी मन ल पांच लाख रूपिया मुआवजा के रूप म दे जाही।
मुख्यमंत्री-मजदूर अधिवेशन
मुख्यमंत्री विष्णुदेव साय ह आज राजधानी रायपुर के गुढ़ियारी म आयोजित अखिल भारतीय विद्युत मजदूर महासंघ के अट्ठारवां अधिवेसन म सामिल होइन। ए मउका म श्री साय ह किहीन कि राज्य सरकार श्रमिक कल्याण अउ ऊर्जा के क्षेत्र म विकास ल लेके प्रतिबध्द हे। ओमन किहीन कि राज्य म बिजली सरप्लस हे, फेर अवइया बेरा म बिजली के बाढ़त मांग ल देखत हुए विद्युत उत्पादन क्षमता ल बढ़ाय के दिसा म तेजी ले काम करत हे। ओमन बतइन कि ऊर्जा के क्षेत्र म तीन लाख पचास हजार करोड़ रूपिया के निवेस प्राप्त होय हे। राज्य म पीएम सूर्यघर मुफ्त बिजली योजना के माध्यम ले हर घर तक बिजली पहुंचाय के काम करे जात हे। ए पहल ले राज्य सरकार हॉफ बिजली ले मुफ्त बिजली देके दिसा म बाढ़त हे। ए योजना बर राज्य सरकार ह सब्सिसिडी देबर बजट म प्रावधान घलो करे हे। ए अधिवेसन म देसभर के इक्कीस राज्य ले आय विद्युत श्रमिक मन सामिल होइन।
मुख्यमंत्री-पर्यटन समीक्षा
मुख्यमंत्री विष्णुदेव साय ह काली मंत्रालय म प्रदेस म पर्यटन ल बढ़ावा देबर करे जात काम मनके समीक्षा करीन। ए दउरान ओमन इको टूरिज्म, एथेनिक टूरिज्म, एडवेंचर टूरिज्म, वेलनेस टूरिज्म, हेरीटेज टूरिज्म, वन्य जीव पर्यटन अउ वॉटर स्पोर्ट्स के संभावना मन उपर विचार विमर्स करीन। मुख्यमंत्री ह किहीन कि बस्तर-सरगुजा समेत प्रदेस के प्रमुख पर्यटन स्थल मन ल ब्राण्ड के रूप म स्थापित करे जाय। संगेसंग प्रदेस के प्रमुख सक्तिपीठ मन म पर्यटन के सुविधा विकसित करे जाय। ओमन प्रमुख पर्यटन स्थल मनके आसपास के जघा ल सामिल कर पर्यटन सर्किट अउ कॉरिडोर तैयार करे के निरदेस देहे।
वक्फ संपत्ति-केंद्रीय टीम
देस म वक्फ संशोधन बिल लागू होय के बाद केंद्रीय अल्पसंख्यक मंत्रालय के दस सदस्यीय टीम छत्तीसगढ़ के दउरा म हे। ए टीम म राज्य वक्फ बोर्ड डहार ले दू झन सदस्य हावय। ए टीम राजधानी रायपुर समेत प्रदेस के दूसर जिला मन म वक्फ संपत्ति मनके निरीक्षण करत हे। संगेसंग वक्फ संपत्ति मनके जनहित अउ समाज हित म कइसे इस्तेमाल होवय, एखरो राज्य वक्फ बोर्ड ह सुझाव देवत हे। राजधानी रायपुर म केंद्रीय टीम के सदस्य मन ह राज्य वक्फ बोर्ड के पदाधिकारी मनके संग फातेहशाह बाजार के निरीक्षण करीन, जेन ह वक्फ संपत्ति आय। सदस्य मन मस्जिद कमेटी, मुतवल्ली अउ समाज के लोगन मन ल नवा वक्फ संशोधन के बारे म विस्तार ले जानकारी दीन। संगेसंग उंखर सवाल के जवाब घलो दीन।
उपमुख्यमंत्री अउ विधि विधायी कार्य मंत्री अरूण साव आज रायपुर म छत्तीसगढ़ राज्य उपभोक्ता विवाद प्रतितोष आयोग डहार ले आयोजित उपभोक्ता जागरूकता सम्मेलन म सामिल होइन। ए मउका म श्री साव ह किहीन कि उपभोक्ता मन ल धोखाधड़ी अउ ठगी ले बचाय बर उनला जागरूक करे म राज्य अउ जिला स्तरीय उपभोक्ता विवाद प्रतितोष आयोग ह सराहनीय काम करत हे। ओमन किहीन कि उपभोक्ता मन ल ई-जागृति पोर्टल के माध्यम ले ऑनलाइन सुविधा घलो मिलत हे। उंखर सहुलियत बर अब ऑनलाइन सुनवाई सुरू करे के तैयारी घलो करे जात हे।
कारीकरम म राज्य उपभोक्ता विवाद प्रतितोष आयोग के अध्यक्ष न्यायमूर्ति गौतम चौरड़िया ह बतइन कि राज्य आयोग म ई- सुनवाई के व्यवस्था हे। अवइया तीन महिना म ए व्यवस्था ल प्रदेस के सबो सत्रह जिला स्तरीय आयोग मन म लागू करे जाही।
उपमुख्यमंत्री-समीक्षा बैठक
उपमुख्यमंत्री, नगरीय प्रशासन अउ विकास मंत्री अरूण साव ह काली रायपुर म विभागीय काम मनके समीक्षा करीन। ए मउका म ओमन नगरीय निकाय मन म प्रगतिरत अउ अधूरा काम मनके एक्सन प्लान बनाके समय-सीमा म पूरा करे के निरदेस दीन। ओमन प्रदेस के अलग-अलग सहर म निर्माणाधीन नालंदा परिसर अउ अटल परिसर के निर्माण म तेजी लाय बर किहीन।
बइठका म नगरीय प्रशासन अउ विकास विभाग के सचिव डॉक्टर बसवराजू एस. ह बतइन कि राज्य म प्रधानमंत्री आवास योजना के तहत मंजूर दू लाख उनचास हजार एक सौ छैंसठ आवास मन ले अब तक दू लाख सात हजार ले जादा आवास मनके निर्माण पूरा कर ले गेहे।
हनुमान जन्मोत्सव
हनुमान जन्मोत्सव आज छत्तीसगढ़ समेत देसभर म पारंपरिक श्रध्दा अउ उल्लास के संग मनाय जात हे। हनुमान जन्मोत्सव चैत्र महिना के पुर्णिमा के दिन मनाय जाथे। ए अवसर म देसभर के हनुमान मंदिर मन म बिहनिया ले विसेस पूजा अर्चना के संग अनुष्ठान अउ भंडारा के आयोजन करे जात हे।
हनुमान जन्मोत्सव के अवसर म आज राजधानी रायपुर समेत प्रदेस के सबो हनुमान मंदिर मन म श्रध्दालु मनके लंबा कतार देखे जात हे। उहें, अलग-अलग जघा म सुंदरकांठ अउ अखंड रामायण पाठ के आयोजन करे जात हे।
मुख्यमंत्री विष्णुदेव साय रायपुर के रेलवे स्टेसन करा स्थित हनुमान मंदिर म आयोजित जन्मोत्सव कारीकरम म सामिल होइन। ए मउका म श्री साय ह हनुमान चालीसा के पाठ घलो करीन अउ प्रदेसवासी मनके सुख-सांति अउ समृध्दि के मंगल कामना घलो करीन।
मुख्यमंत्री-युवा संवाद
मुख्यमंत्री विष्णुदेव साय आज नवा रायपुर म ‘‘विचार फॉर विकसित छत्तीसगढ़‘‘ कारीकरम म सामिल होइन। ए मउका म ओमन युवा मन ले गोठ-बात कर छत्तीसगढ़ के उज्जवल भविष्य अउ विकास म उंखर सक्रिय भागीदारी उपर जोर दीन। मुख्यमंत्री ह युवा मन ले गोठबात करत हुए, उंखर समस्या अउ सुझाव ल सुनिन।
दुर्घटना
दंतेवाड़ा जिला के अरनपुर घाट करा आज एक ठन चारपहिया गाड़ी अनियंत्रित होके पलट गे। ए हादसा म दू झन लोगन के मउका म ही मउत होगे। उहें, बारह झन गंभीर रूप ले घायल होगे हे, फेर दस झिन लोगन मन ल मामूली चोट आय हे। गाड़ी म चौबीस झन सवार रिहीस।
जिले की चिट्ठी
आकाशवाणी रईपुर के प्रादेसिक समाचार एकांश डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल प्रदेस के जम्मों आकाशवाणी केंद्र मन ह एके संघरा रिले करही। ए बखत के अंक म ‘‘दुरूग‘‘ जिला के गतिविधि के उपर जानकारी दे जाही।