केंद्रीय कोयला अउ खान मंत्री जी. किशन रेड्डी ह किहीन हे कि केंद्र सरकार ह देस म ऊर्जा जरूरत ल पूरा करे बर पूरा पारदर्सिता अउ संकलप के संग काम करत हे। एखर बर पर्यावरण हित के पूरा धियान राखे जात हे। दू दिन के छत्तीसगढ़ दउरा म पहुंचे श्री रेड्डी ह आज कोरबा जिला म स्थित देस के सबले बड़का साऊथ इस्टर्न कोलफिल्ड्स लिमिटेड-एसईसीएल के गेवरा कोयला खदान के निरीक्षण के दउरान ए बात किहीन। ओमन किहीन कि देस म कोयला उत्पादन ल बढ़ावा देके संगेसंग माईन क्लोजर एक्टिविटी बर एक्सन प्लान तियार करे जात हे। अवइया तीन बछर बर पर्यावरण के मानक के मुताबिक ग्रीनरी के विकास करे जाही।
कोयला मंत्री ह एसईसीएल गेवरा खदान क्षेत्र म कोयला लोडिंग अउ परिवहन काम के जानबा लीन। ओमन गेवरा खदान व्यू पॉइंट जघा उपर पॉवर पाइंट प्रजेंटेसन के माध्यम ले एसईसीएल क्षेत्र म कोयला उत्पादन के काम, परिवहन, तकनीकी समावेस, सामुदायिक विकास अउ पर्यावरण संरक्षण गतिविधि के जानबा लीन। ए मउका म केंद्रीय मंत्री ह एसईसीएल के बढ़िया काम करइया करमचारी मन ल सम्मानित घलो करीन। ओमन एसईसीएल के मजूर मनले गोठबात करीन अउ उंखर मांग उपर बिचार करे के बात किहीन।
माओवादी-पुनर्वास नीति
राज्य सरकार डहार ले माओवादी आत्मसमर्पण पीड़ित राहत पुनर्वास नीति दू हजार पच्चीस के परभावी क्रियान्वयन बर जम्मों जिला मन म कलेक्टर के अगुवई म बिसेस समिति बनाय जाही। समिति मन म पुलिस अधीक्षक ल सचिव के जिम्मेवारी दे गेहे। एखर अलावा वनमंडलाधिकारी, जिला पंचायत के सीईओ, कलेक्टर डहार ले नामांकित दू झिन आने अधिकारी के संगेसंग सशस्त्रबल के प्रतिनिधि मन ल घलो समिति म सामिल करे जाही। उहें, पुनर्वास काम के निगरानी बर जिला अउ सब-डिवीजनल स्तर म नोडल अधिकारी के नियुक्ति करे जाही।
राज्य शासन के गृह विभाग ह नक्सलवाद आत्मसमर्पण पीड़ित राहत पुनर्वास नीति दू हजार पच्चीस के बारे म अधिसूचना जारी करे देहे अउ एखरे संग ए नीति लागू होगे हे। ए नीति माओवादी हिंसा म पीड़ित मनखे अउ परिवार जइसे के मृत्यु, घायल या फेर स्थायी अपंगता के सिकार लोगन मनके संगेसंग आत्मसमर्पण करइया माओवादी मनके पुनर्वास अउ राहत के उद्देस्य ले तियार करे गेहे। अधिसूचना के मुताबिक एक ठिन पोर्टल म जम्मों पीड़ित अउ आत्मसमर्पित मनखे के जानबा दरज करके ओमन ल एक ठिन यूनिक आईडी दे जाही।
गृहमंत्री-शांतिवार्ता
ऐति, उपमुख्यमंत्री अउ गृहमंत्री विजय शर्मा ह माओवादी मन डहार ले शांतिवार्ता के अपील करे उपर केहे हे कि माओवादी मन गोठबात करही, त ओमन ल मुख्यधारा म आय बर पड़ही। ओमन किहीन कि माओवादी मन ह शांतिवार्ता बर कोनो प्रकार के समिति के जिकर करे हे, त ओमन समिति के बारे म बने ढंग ले खुलासा करय। गृहमंत्री ह किहींन हे कि शांतिवार्ता बर कोनो प्रकार के समिति नइ बनाय गेहे। राज्य सरकार ह माओवादी मन ले गोठबात करे बर तियार हे।
जानबा के मुताबिक माओवादी मन ह काली विज्ञप्ति जारी करके राज्य सरकार ले शांतिवार्ता के अपील करे रिहीन।
एसीबी-इओडब्ल्यू-छापा
राज्य आर्थिक अन्वेषण ब्यूरो ईओडब्ल्यू अउ एंटी करप्सन ब्यूरो एसीबी के टीम ह तेंदू पत्ता गड़बड़ी के मामला म सुकमा जिला के कोंटा म चार ठिन जघा म छापा मारिन। उहें, सुकमा म पूर्व विधायक मनीष कुंजाम के घर म घलो एसीबी के टीम ह पहुंचिन। ए मामला म पूर्व म तत्कालिन डीएफओ के घर के संगेसंग कतकोन जघा म छापा मारे गीस। जानबा के मुताबिक बछर दू हजार इक्कीस के तेंदू पत्ता बोनस बांटे म करोड़ो रूपिया के गड़बड़ी के मामला आगू आय रिहीस। ए मामला म राज्य शासन डहार ले तत्कालिन डीएफओ अशोक पटेल ल निलंबित करे जा चुके हे। त उहें, जांच म प्रबंधक के साथगांठ के बात आगू आय हे। ए आधार उपर कोंटा, एर्राबोर अउ पालाचलमा के प्रबंधक मनके जघा म छापामार कार्रवाई करके जांच करे जात हे।
सुशासन तिहार
राज्य सरकार डहार ले चलाय जात प्रदेसव्यापी सुशासन तिहार के तहत आज तीसर दिन घलो आम लोगन मन ह ग्राम पंचायत अउ नगरीय निकाय मनके आफिस म अर्जी करीन। तीन चरण म चलइया ए सुशासन तिहार इकतीस मई तक चलही। पहिली चरण आठ अप्रैल ले सुरू होय हे, जउन ह काली ग्यारा अप्रैल तक चलही। अर्जी जमा करे बर ग्राम पंचायत अउ नगर पंचायत के आफिस मन म समाधान पेटी के बेवस्था करे गेहे।
अत्याधुनिक कॉमन फैसिलिटी सेंटर
नवा रईपुर अटल नगर म ग्रीनफील्ड इलेक्ट्रानिक वीनिर्माण कलस्टर के तहत एक ठिन अत्याधुनिक कॉमन फैसिलिटी सेंटर-सीएफसी बनाय जात हे। ए सेंटर इलेक्ट्रानिक्स के क्षेत्र म काम करत उद्योग अउ स्टार्टअप्स बर फायदा मिलही। ए कॉमन फैसिलिटी सेंटर तकनीकी नवाचार, औद्योगिक मदद अउ रोजगार देवाय के केंद्र बनही। नवा रईपुर अटल नगर विकास प्राधिकरण के अधिकारी मन ह बतइन कि ए प्रोजेक्ट बर केंद्र सरकार डहार ले ईएमसी योजना के तहत पचहत्तर करोड़ रूपिया के मदद करे गेहे। ए प्रोजेक्ट के कुल लागत एक सौ आठ करोड़ रूपिया ले जादा होय हे, जेमा राज्य सरकार के भागीदारी करीबन साढ़े तैंतीस करोड़ रूपिया होही। नवा रईपुर म सवा तीन एकड़ भुंईया म बने ए सेंटर प्रिंटेड सर्किट बोर्ड प्रोटोटाइपिंग, थ्री-डी पेंटिंग, ईएमसी टेस्टिंग अउ पर्यावरण जइसन आधुनिक तकनीक ले सजाय गेहे। एमा सेमीकंडक्टर, एलईडी लाइटिंग, सोलर चार्ज कंट्रोलर, इलेक्ट्रिक गाड़ी वाले मसीन, ऑटो मेसन सॉल्यूसन अउ एससीएडीए पैनल जइसन उत्पाद के बनाय म लगे उद्योग मन ल तकनीकी मदद मिलही।
छत्तीसगढ़-शासन
आधार सेवा के क्षेत्र म छत्तीसगढ़ राज्य ल एक ठिन अउ बड़का सफलता मिले हे। राज्य म अट्ठारा साल ले कम उमर के लइका मन के बायोमैट्रिक आधार अपडेट के सुघ्घर सेवा बर छत्तीसगढ़ ल राष्ट्रीय स्तर म सम्मानित करे गेहे। नई दिल्ली के भारत मंडपम म होय आधार संवाद कारीकरम म भारतीय विशिष्ट पहिचान प्राधिकरण के डिप्टी डायरेक्टर जनरल-फायनेंस तेनतु सत्यनारायण ह छत्तीसगढ़ ल ए सम्मान दीन। राज्य कोति ले छत्तीसगढ़ सदन के मनीष जोशी ह ए सम्मान लीन। कारीकरम म केंद्रीय मंत्री अश्विनी वैष्णव ह मुख्य अतिथि के रूप म आय रिहीन।
अग्निवीर भर्ती-आवेदन
भारतीय सेना म आने-आने पद म अग्निवीर भर्ती बर अर्जी करइया युवा मन पच्चीस अप्रैल तक अर्जी कर सकथे। सेना भर्ती कार्यालय रईपुर के मुताबिक सेना म जनरल, तकनीकी, कलर्क, ट्रेडमेन, महिला सैन्य पुलिस अउ रेगुलर कैडर भर्ती धर्मगुरू, नर्सिंग सहयोगी अउ सिपाही फार्मा के पद म अग्निवीर के भर्ती करे जाही।
महावीर जयंती
चौबीसवां अउ आखिरी जैन तीर्थंकर भगवान महावीर के जयंती आज प्रदेस के संगेसंग पूरा देस म धार्मिक श्रध्दा अउ उछाह के संग मनाय जात हे। राष्ट्रपति द्रौपदी मुर्मू, प्रधानमंत्री नरेंद्र मोदी, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह महावीर जयंती के मउका म लोगन मन ल सुभकामना दे हवय। महावीर जयंती के मउका म आज राजधानी रईपुर के संगेसंग प्रदेस के कतकोन जिला मन म घलो जैन समुदाय डहार ले आने-आने कारीकरम कराय जात हे।
मुख्यमंत्री तीर्थ दर्शन योजना
‘‘मुख्यमंत्री तीर्थ दर्सन योजना‘‘ के तहत आज सरगुजा संभाग के करीबन आठ सौ भक्त मन ह महाकालेश्वर उज्जैन अउ ओमकारेश्वर जइसन तीरथ वाले जघा के दर्सन बर निकलीन। श्रध्दालु मन ल अंबिकापुर रेलवे स्टेसन ले ‘‘भारत गौरव टूरिस्ट रेलगाड़ी‘‘ डहार ले भेजे गीस। समाज कल्याण मंत्री लक्ष्मी राजवाड़े ह हरा झंडी दिखाके ए रेलगाड़ी ल रवाना करीन।
अउ अब मौसम के हाल…
अवइया चौबीस घंटा के दउरान प्रदेस के एक-दू जघा म हल्का ले मध्यम बरसा होय के संभावना हे, त उहे, एक-दू जघा म गरज-चमक के संग हवा गरेर अउ गाज गिरे के चेतावनी दे गेहे। मौसम विभाग के मुताबिक निम्नदाब के क्षेत्र पश्चिम मध्य बंगाल के खाड़ी अउ ओखर तीर-तखार म स्थित हे। एखरे असर प्रदेस म दिखत हे। ए बेरा अधिकतम तापमान म कोनो बिसेस बदलाव होय के संभावना नइ हे। फेर अवइया दू दिन तक गर्मी ले थोरकुन राहत मिल सकथे।