स्वतंत्रता दिवस
राष्ट्र आज चैहत्तरवां स्वतंत्रता दिवस मनावत हे। ए मउका म प्रधानमंत्री नरेन्द्र मोदी ह लाल किला के प्राचीर ले राष्ट्र ल संबोधित करत किहीन कि भारत ल आत्मनिर्भर बनना चाही अउ घरेलू अउ वैश्विक बाजार म उत्पादन बर अपन प्राकृतिक संसाधन के उपयोग करना चाही। श्री मोदी ह किहीन कि कोरोना संक्रमण महामारी के बीच देसवासी मन ह आत्मनिर्भर भारत बनाय के संकल्प लीन हे अउ ओमन विश्वास जताईन कि भारत ए सपना ल साकार करही।
प्रधानमंत्री ह किहीन कि भारत आतंकवाद अउ विस्तारवाद ले मजबूती ले मुकाबला करत हे। ओमन ह फेर ‘‘वोकल फाॅर लोकल‘‘ के आह्वान करीन अउ किहीन कि भारत ल पूरा दुनिया के जरूरत ले निपटे के परयास करना चाही।
प्रधानमंत्री ह किहीन कि आत्मनिर्भर भारत बनाय म सिक्षा के बड़े भूमिका हे, जेला देखत नवा राष्ट्रीय सिक्षा नीति लाय गे हवय।
ए मउका म प्रधानमंत्री ह आज ले राष्ट्रीय डिजिटल स्वास्थ्य मिशन के सुरूवात करे के घोसना करीन। एमा जम्मों मनखे मन ल स्वास्थ्य पहिचान पत्र मिलही। संगेसंग जांच अउ दवई के जानकारी घलो एमा रइहि।
श्री मोदी ह बतईन कि भारत म कोरोना के तीन वैक्सीन परीक्षण के आने-आने प्रक्रिया म हवय। वैज्ञानिक मनके मंजूरी मिले के बाद बड़े मात्रा म एखर उत्पादन सुरू हो जही।
स्वतंत्रता दिवस-छत्तीसगढ़-01
छत्तीसगढ़ म घलो आज स्वतंत्रता दिवस बड़ उछाह के संग मनाय जावत हे। फेर कोरोना संकट के सेती ए बखत राज्य अउ जिला स्तर म कराय गे कारीकरम पाछु बछर ले थोरकुन अलग रिहीस।
स्वतंत्रता दिवस के कारीकरम राजधानी रईपुर के पुलिस परेड मैदान म कराय गीस, जिहां मुख्यमंत्री भूपेश बघेल ह झंडा फहराईन। कारीकरम म ओमन किहीन कि छत्तीसगढ़ सरकार ह कोरोना संकट के दउरान प्रवासी श्रमिक अउ किसान मनके संगेसंग सबो वर्ग के लोगन ल सुविधा देवाय के, रोजगार देवाय के अउ लोगन के जरूरत ल पूरा करे बर कतकोन कदम उठाय हे।
ए मउका म ओमन ह बहुत अकन घोषणा घलो करीन। श्री बघेल ह किहीन कि राज्य सरकार ह बिजली के उपभोग ले रोजगार अउ खुसहाली म बढ़ोतरी के रास्ता अपनाय हे। एखर बर ‘‘मुख्यमंत्री विद्युत अधोसंरचना विकास योजना‘‘ सुरू करे जावत हे।
मुख्यमंत्री ह किहीन कि राज्य सरकार ह ‘‘पढ़ई तुहंर दुआर‘‘ के पहल ल अउ आगू बढ़ावत गांव मन म लइका मन बर ‘‘पढ़ई तुहंर पारा‘‘ योजना सुरू करत हे। इंटरनेट के अभाव वाले अंचल बर ब्लू टूथ आधारित बेवस्था ‘‘बूल्टू के बोल‘‘ के उपयोग करे जाही।
ओमन यहू घलो किहीन कि स्वास्थ्य सेवा ल बढ़ाय बर सहरी क्षेत्र म ‘‘मुख्यमंत्री स्लम स्वास्थ्य योजना‘‘ सुरू करे जाही, जेमा पहिली चरण म सबो चैदह नगर निगम म सत्तर मोबाइल मेडिकल यूनिट के माध्यम ले डाॅक्टर मन ह हरेक जरूरतमंद के दुआरी म पहुंचही। ओमन किहीन कि प्रदेस म ‘‘डाॅक्टर राधा बाई डायग्नोस्टिक सेंटर योजना‘‘ घलो सुरू करे जाही, जउन ह कमती दर म पैथालाॅजी अउ दूसर जांच के सुविधा देवाही।
एखर अलावा, घर पहुंच सेवा बर नगरीय क्षेत्र म ‘‘मुख्यमंत्री मितान योजना‘‘ सुरू करे जाही, जेमा काॅल सेंटर म फोन करके आवेदन, दस्तावेज मन ल भेजे जा सकत हे। एमा ‘‘आॅनलाईन‘‘ अउ ‘‘एसएमएस अलर्ट‘ के माध्यम ले कमती खरचा म घर बइठे कतकोन सेवा मिलही।
स्वतंत्रता दिवस-छत्तीसगढ़-02
मुख्यमंत्री ह बतईन कि ‘राजीव गांधी किसान न्याय योजना‘ म दूसरा किस्त पूर्व प्रधानमंत्री राजीव गांधी के जयंती म बीस अगस्त के दे जाही। श्री बघेल ह किहीन कि युवा मन ल खेती किसानी के बारे म सिखाय बर ‘‘महात्मा गांधी उद्यानिकी अउ वानिकी विश्वविद्यालय‘‘ के संगेसंग चार ठिन नवा उद्यानिकी कालेज अउ एक ठन खाद्य तकनीकी अउ प्रसंस्करण कालेज खोले जाही। एखर अलावा दुग्ध उत्पादन अउ मछली पालन के नवा जानकारी दे बर तीन ठिन बिसेस पाॅलिटेक्निक काॅलेज घलो खोले जाही।
मुख्यमंत्री ह बतईन कि माता कौशिल्या, भगवान राम अउ उंखर ले जुड़े आने-आने मउका के सुरता ल चिरस्थायी बनाय बर सरकार ह ‘कोरिया ले सुकमा‘ तक ‘राम वनगमन पर्यटन परिपथ‘ विकास के योजना बनाय हे। एखर बर एक ठिन कोष के गठन घलो करे जाही।
उहें, मरवाही म महंत बिसाहू दास जी के नाव ले उद्यानिकी महाविद्यालय घलो खोले जाही। ए मउका म मुख्यमंत्री ह प्रसासन म माईलोगिन मनके जिम्मेदारी बढ़ाय बर राज्य म होवइया नवा नियुक्ति अउ पदोन्नति बर बनइया समिति मन म महिला प्रतिनिधि मनके मौजूदगी अनिवार्य करे के घलो घोसना करीन।
स्वतंत्रता दिवस-झंडा वंदन
राज्यपाल अनुसुईया उइके ह स्वतंत्रता दिवस के मउका म आज बिहनिया राजभवन म राष्ट्रीय ध्वज फहराईन अउ सलामी लीन अउ परेड के निरीक्षण घलो करीन। उहें, विधानसभा अध्यक्ष डाॅक्टर चरणदास महंत ह कोरबा म ध्वजारोहण करीन। एखर अलावा राज्य सरकार के मंत्री अउ संसदीय सचिव मन ह आने-आने जिला मुख्यालय म तिरंगा फहरा के मुख्यमंत्री के संदेस के वाचन करीन।
रईपुर संघरा आने-आने जिला मुख्यालय म राखे गे स्वतंत्रता दिवस समारोह के दउरान आज कोरोना योद्धा मनके घलो सम्मान करे गीस।
अखिल भारतीय आयुर्विज्ञान संस्थान एम्स रईपुर म चैहत्तरवां स्वतंत्रता दिवस समरोह के मउका म अट्ठाईस कोरोना वारियर्स मनके सम्मान करत प्रदेस म कोविड-नाइंटिन पूरा सिराय तक संघर्ष ल जारी राखे के संकल्प प्रकट करे गीस।
आकाशवाणी केन्द्र रईपुर म उप निदेशक अभियांत्रिकी अउ कार्यालय प्रमुख जी.पी. शर्मा ह आकशवाणी परिसर म ध्वजारोहण करीन। ए मउका म आकाशवाणी केेन्द्र रईपुर के सबो अधिकारी अउ करमचारी मन मौजूद रिहीन।
हमर ग्राम सभा-प्रसारण
पंचायत अउ ग्रामीण विकास मंत्री टी.एस. सिंहदेव ह काली संझा साढ़े सात बजे आकाशवाणी रायपुर ले प्रसारित विशेष कारीकरम ‘हमर ग्राम सभा‘ म पेसा कानून के बारे म विस्तार ले जानकारी दीहीं। ए कारीकरम ल मीडियम वेब नौ सौ इक्यासी किलो हटर््ज म सुने जा सकत हे। ए कारीकरम ल प्रदेस के आकशवाणी के सबो केन्द्र मन ह एके संघरा रिले करही।
मुख्यमंत्री-प्रधानमंत्री पत्र
मुख्यमंत्री भूपेश बघेल ह छत्तीसगढ़ी भाखा ल आठवां अनुसूची म सामिल करे बर प्रधानमंत्री नरेन्द्र मोदी ल चिट्ठी लिखे हे। श्री बघेल ह प्रधानमंत्री ले आग्रह करीन हे कि राज्य के बहुसंख्यक जनता के भासा छत्तीसगढ़ी हवय। राज्य म राजकीय प्रयोजन बर उपयोग होवइया भासा के रूप म हिन्दी के अलावा छत्तीसगढ़ी ल स्वीकार करे गेहे। राज्य म हर बछर अट्ठाईस नवंबर के छत्तीसगढ़ी राजभाषा दिवस मनाय जाथे। संगेसंग छत्तीसगढ़ राजभाषा आयोग के गठन घलो करे गेहे।
विस भवन-शिलान्यास
छत्तीसगढ़ विधानसभा के नवा भवन भूमिपूजन अउ सिलान्यास समारोह अवइया अट्ठाईस अगस्त के नवा रईपुर म आयोजित होही। मुख्यमंत्री भूपेश बघेल ह ए समारोह म शामिल होय बर कांगे्रस के राष्ट्रीय अध्यक्ष सोनिया गांधी अउ सांसद राहुल गांधी ल न्योता भेजीन हे। श्री बघेल ह चिट्ठी लिखके श्रीमती गांधी ल समारोह म मुख्य अतिथि अउ राहुल गांधी ल अति विशिष्ट अतिथि के रूप म वीडियो कान्फ्रेंसिंग के माध्यम ले सामिल होय के आग्रह करीन हे।
छत्तीसगढ़-स्वच्छता सम्मान
प्रधानमंत्री नरेन्द्र मोदी ह स्वच्छता के क्षेत्र म सुघ्घर प्रदर्शन बर छत्तीसगढ़ ल अवइया बीस अगस्त के पुरस्कार दीहीं। छत्तीसगढ़ ल न सिरिफ राज्य के रूप म बल्कि एखर चैदह ठिन सहर मन ल घलो पुरस्कार मिलही। एमा अंबिकापुर, धमतरी, जशपुर नगर, पाटन, भिलाई, बीरगांव, भिलाई-चरौदा, चिरमिरी, कवर्धा, चांपा, पिपरिया, अकलतरा, नरहरपुर अउ सारागांव सामिल हे।
मुख्यमंत्री भूपेश बघेल अउ नगरीय प्रशासन मंत्री डाॅक्टर शिवकुमार डहरिया ह ए सफलता बर प्रदेसवासी मन ल बधाई दीन हे।
गौठान-पशु
प्रदेस के गंवई इलाका म खुल्ला म घुमइया पशु मन ल गौठान म राखे जाही। ए संबंध म राज्य सरकार डहार ले दिसा-निरदेस जारी कर दे गे हवय।
जारी निरदेस म बताय गे हवय कि अइसन मवेसी मन ल रतिहा म घलो गौठान म राखे जाही अउ इंखर देखभाल के जिम्मेदारी गौठान समिति के होही। गौठान म मवेसी मन ले मिले गोबर उपर गौठान समिति के अधिकार होही अउ खुला म घुमइया मवेसी मन ल गौठान पहुचाय के जिम्मेदारी पंचायत सचिव के होही। पशुधन विभाग डहार ले गौठान म मवेसी मन बर इलाज के सुविधा देवाय जाही अउ गौठान म मवेसी मन बर चारा के बेवस्था के जिम्मेदारी गौठान समिति ल दे गे हवय।
कोरोना जांच-स्पष्टीकरण
राज्य सरकार ह स्पष्ट करे हे कि सर्दी-जुकाम ले पीड़ित लोगन डहार ले कोरोना संक्रमण के पहिचान बर चैबीस घंटा के भीतर सैंपल जांच जरूरी रूप ले कराय के संबंध म कोनों आदेस जारी नइ करे गेहे। स्वास्थ्य विभाग ह केहे हे कि जांच नइ करइया मन उपर महामारी नियंत्रण अधिनियम म मामला दर्ज करे के बारे म कोनों परकार के आदेस जारी नइ करे गेहे।
मौसम
मौसम विभाग ह अवइया चैबीस घंटा के दउरान प्रदेस के एक-दू जघा म भारी ले अति भारी बरसा होय के चेतावनी देहे।
मौसम विभाग ले मिले जानकारी के अनुसार उत्तर तटीय ओड़िया अउ ओखर ले लगे उत्तर-पश्चिम बंगाल के खाड़ी म एक ठिन निम्न दाब के क्षेत्र बने हे। संगेसंग उपरी हवा म एक ठिन चक्रवाती घेरा घलो बने हे। एखर असर ले प्रदेस के अधिकांश जघा म हल्का ले मध्यम बरसा होवत हे।
ऐति, रायगढ़ जिला के सारंगढ़ क्षेत्र म आज गाज गिरे ले तीन झिन के मउत होगे।