राष्ट्रपति द्रौपदी मुर्मू चौबीस मार्च के छत्तीसगढ़ दउरा म आही। राष्ट्रपति भवन ले ओखर मिनट-टू-मिनट कारीकरम जारी कर दे गेहे। राष्ट्रपति भारतीय वायु सेना के विमान ले बिहनिया करीबन साढे़ दस बजे रईपुर के स्वामी विवेकानंद विमानतल पहुंचही। एयरपोर्ट म राज्यपाल, मुख्यमंत्री, विधानसभा अध्यक्ष अउ गणमान्य लोगन उंखर अगवानी करही। एखर बाद ओमन सड़क मार्ग ले छत्तीसगढ़ विधानसभा बर रवाना होही। जिहां ओमन विधानसभा के रजत जयंती समारोह म सामिल होही। ए दउरान राष्ट्रपति के प्रबोधन घलो होही।
कारीकरम म सामिल होय के बाद राष्ट्रपति करीबन साढ़े बारह बजे वापस रईपुर के स्वामी विवेकानंद विमानतल पहुंचही अउ बिसेस विमान द्वारा नई दिल्ली बर रवाना हो जही।
विस-ध्यानाकर्षण
छत्तीसगढ़ विधानसभा के बजट सत्र आज आखिरी दिन हरय। सत्र के दउरान कुल सत्रह बइठका होइस।
विधानसभा म आज भाजपा सदस्य धर्मजीत सिंह ह सदन म ध्यानाकर्षण प्रस्ताव ले राज्य के नदी मन म कम होवत भू-जल स्तर के मुद्दा उठाइस। भाजपा विधायक धर्मजीत िंसंह ह किहीन कि शिवनाथ जइसन महत्वपूर्ण नदी म भू-जल स्तर कम होय ले ए बछर मार्च महिना म सूखा जइसन हालात बन गेहे। जेखर ले राज्य म जल संकट के स्थिति बनत हे। ओमन किहीन कि राज्य म भू-जल स्तर दिनों-दिन घटत जात हे। जवाब म उप मुख्यमंत्री अरूण साव ह बतइन कि जल-संरक्षण अउ वर्षा जल रोके के कारीकरम म अड़सठ हजार ले जादा काम करे गेहे। उहें, बत्तीस हजार ले जादा तालाब मनके जीर्णोध्दार करे गेहे। एखर अलावा जल भराव, वॉटर सेड अउ पउधा रोपण के काम घलो करे गेहे।
विधानसभा अध्यक्ष डॉक्टर रमन सिंह ह मुख्यमंत्री विष्णुदेव साय ल गर्मी के मउसम म जल संकट के चुनौती ले निपटे बर एक हफ्ता के भीतर वरिष्ठ अधिकारी मनके संग उच्च स्तरीय बइठका कर कार्ययोजना बनाय के निरदेस दीन। एमा मुख्यमंत्री ह विधानसभा अध्यक्ष ल आस्वासन दीन कि ओमन ए मामला म कलेक्टर मन ल निरदेस दिही।
उहें, कांग्रेस विधायक ब्यास कश्यप ह आज ध्यानाकर्षण प्रस्ताव म जांजगीर के जिला अस्पताल के प्रभारी सिविल सर्जन डहार ले अपन अधिनस्थ कर्मचारी के संग दुर्व्यवहार के मुद्दा उठाइन। ओमन ह प्रभारी सिविल सर्जन के तबादला के मांग करीन। जवाब म स्वास्थ्य मंत्री श्याम बिहारी जायसवाल ह किहीन कि ओमन ल जानकारी मिले हे कि जांजगीर-चांपा जिला अस्पताल के प्रभारी सिविल सर्जन ह डॉक्टर मन ल बेरा म अस्पताल आय के निरदेस दीन, त ओमन ह सिविल सर्जन के विरोध करना सुरू कर दीस। स्वास्थ्य मंत्री ह ए मामला के विस्तृत जांच के बात किहीन। ओमन किहीन कि सिविल सर्जन अउ दोषी पाय गे डॉक्टर मन उपर एक हफ्ता के भीतर कार्रवाई करे जाही।
विस-बहिर्गमन
विधानसभा म आज नेता प्रतिपक्ष डॉक्टर चरण दास महंत अउ आने कांग्रेस विधायक मन ह सून्यकाल म धान खरीदी म अनियमितता के आरोप लगात स्थगन प्रस्ताव लाइन। जिला विधानसभा अध्यक्ष डॉक्टर रमन सिंह ह अग्राह्य कर दीस। जेखर ले नाराज विपक्षी सदस्य मन ह सदन ले बहिर्गमन कर दीस। उहें, आज सदन म छत्तीसगढ़ लोकतंत्र सेनानी सम्मान विधेयक, छत्तीसगढ़ निजी विश्वविद्यालय स्थापना-संचालन संशोधन विधेयक अउ छत्तीसगढ़ पंचायत राज संशोधन विधेयक पारित करे गीस। हालांकि विपक्षी सदस्य मन ह छत्तीसगढ़ लोकतंत्र सेनानी सम्मान विधेयक ल लेके आपत्ति जतइन, जेला सभापति ह खारिज कर दीस। जेखर ले नाराज कांग्रेस विधायक मन ह सदन ले बहिर्गमन कर दीस।
राज्यपाल-गौ सेवा रत्न अलंकरण
खैरागढ़-छुईखदान-गंडई जिला म आज गौ सेवा रत्न अलंकरण महोत्सव के आयोजन करे गीस। कारीकरम म राज्यपाल रमेन डेका बिसेस रूप ले उपस्थित रिहीन। राज्यपाल ह गौसाला म पहुंच के विधिवत पूजा-पाठ करीन अउ गौ-माता के अराधना म भाग लीन। पूजा-पाठ अउ आरती के बाद राज्यपाल ह गौसाला परिसर के भ्रमण करीन अउ गौवंश के देखरेख अउ सेवा बर करे जात परयास के सराहना करीन। ओमन किहीन कि गौसेवा न सिरिफ हमर संस्कृति के हिस्सा हरय, भलूक ए ह पर्यावरण अउ ग्रामीण जीवन के संतुलन बनाय रखे म घलो महत्वपूर्ण भूमिका निभाथे। राज्यपाल ह लोगन ले गौरक्षा अउ संवर्धन के दिसा म सरलग परयास करे के आह्वान करीन।
माओवादी-शिनाख्त
बीजापुर जिला के गंगालूर क्षेत्र म काली होय मुठभेड़ म मारे गे छब्बीस माओवादी मन ले अट्ठारा माओवादी मनके पहिचान कर ले गेहे। बांकी बांचे माओवादी मनके पहिचान करे जात हे। पहिचान करे गे अट्ठारा माओवादी म ले एक डीवीसीएम, पांच एसीएम, तीन पीपीसीएम अउ नौ पीएलजीए प्लाटून सदस्य सामिल हे। जिला के पुलिस अधीक्षक जितेन्द्र कुमार यादव ह बतइन कि सबो माओवादी मन उपर कुल तिरानवे लाख रूपिया के इनाम घोसित रिहीस। घटनास्थल ले भारी मात्रा म एके-फोर्टिसेवन, एसएलआर, इंसास रायफल, थ्री नॉट थ्री रायफल, रॉकेट लांचर, बीजीएल लांचर, हथियार संग बिस्फोटक पदार्थ अउ आने माओवादी जिनिस बरामद करे गेहे।
इही बीच, मुठभेड़ म सहीद होय बीजापुर डीआरजी के आरक्षक राजूराम ओयाम के पार्थिव सरीर ल जिला मुख्यालय लाय गीस। सहीद जवान ल नवा पुलिस लाइन स्थित सहीद वाटिका म श्रंध्दांजलि दे गीस।
अग्निवीर भर्ती-परिणाम
छत्तीसगढ़ म अग्निवीर भर्ती के परिणाम काली बाईस मार्च के घोसित करे जाही। परीक्षा म सफल अभ्यर्थी ए बछर भारतीय सेना म अग्निवीर बनके देस के सेवा करही। अभ्यर्थी परिणाम देखे बर ज्वॉइन इंडियन आर्मी के साइट डब्ल्यू.डब्ल्यू. डब्ल्यू. डॉट ज्वॉइन इंडियन आर्मी डॉट एनआईसी डॉट इन. के अवलोकन कर सकत हे। परिणाम सेना भर्ती कार्यालय रईपुर के नोटिस बोर्ड म घलो चस्पा करे जाही।
सबो सफल अभ्यर्थी मन ल चौबीस मार्च के बिहनिया साढ़े छै बजे नवा रईपुर स्थित सेना भर्ती कार्यालय शहीद वीरनारायण सिंह अतंर्राष्ट्रीय क्रिकेट स्टेडियम म प्रांरभिक ब्रीफिंग अउ डिस्पैच प्रलेखन बर उपस्थित होना जरूरी हे। सबो सफल अभ्यर्थी के ट्रेनिंग एक मई ले आने-आने ट्रेनिंग सेंटर म सुरू करे जाही। कोनो भी आने जानकारी अउ समस्या के समाधान बर सेना भर्ती कार्यालय रईपुर के टेलीफोन नंबर सून्य सात-सात एक-दू नौ छै पांच दू एक दू म संपर्क करे जा सकत हे।
ईओडब्ल्यू-आरआई परीक्षा
प्रदेस म पटवारी ले राजस्व निरीक्षक आरआई के पद म प्रमोसन बर होय भर्ती घोटाला मामला म आर्थिक अपराध अन्वेषण ब्यूरोर-ईओडब्ल्यू अउ एंटी करप्शन ब्यूरो एसीबी ह एफआईआर दर्ज कर लेहे। खबर के मुताबिक घोटाला आगू आय के बाद के.डी. कुंजाम के अध्यक्षता वाले कमेटी ह जांच रिपोर्ट म ए बात के अनुसंसा करे रिहीस।
अउ अब मौसम के हाल…
प्रदेस के मौसम म बदलाव होय ले बलरामपुर अउ सक्ति जिला म आज करा गिरिस। उहें, रईपुर म मंझनिया बाद तूफान के संग हल्का बरसा दर्ज करे गीस। जांजगीर-चांपा जिला के शिवरीनारायण म आज आकाशीय बिजली गिरे ले एक झिन युवक के मउत हो गेहे। उहें, एक झिन आने युवक घायल होगे हे।
ऐति, बलरामपुर जिला म काली आकाशीय बिजली गिरे ले एक झिन सियनहा के मउका म ही मउत होगे।
मौसम विभाग ह काली बाईस मार्च के प्रदेस म सरगुजा अउ बिलासपुर संभाग म हल्का बरसा होय अउ गरज-चमक के संग छींटा पड़े के अउ आकाशीय बिजली गिरे के चेतावनी दे गेहे।