बीजापुर अउ कांकेर जिला म आज सुरक्षा बल मनके संग होय मुठभेड़ म तीस माओवादी मारे गेहे।
बस्तर रेंज के पुलिस महानिरीक्षक सुंदरराज पी. ह बतईन कि माओवादी मनके मौजूदगी के सूचना म आज बिहनिया बीजापुर जिला ले डिस्ट्रिक्ट रिजर्व गार्ड-डीआरजी, स्पेशल टॉस्क फोर्स-एसटीएफ अउ कोबरा बटालियन के संयुक्त टीम बीजापुर अउ दंतेवाड़ा जिला के सीमा के गश्त बर निकले रिहीस। ए दउरान गंगालूर थाना क्षेत्र म सुरक्षा बल अउ माओवादी मनके बीच मुठभेड़ होइस। ए मुठभेड़ म छब्बीस माओवादी मारे गीस, जिखर मनके सव बरामद कर ले गेहे। ए मुठभेड़ म डीआरजी के एक जवान घलो सहीद होय हे। सुरक्षा बल मन ह घटना स्थल ले बड़ संख्या म हथियार, गोलाबारूद अउ माओवादी सामान बरामद करे हे।
उहें, कांकेर-नारायणपुर सीमा क्षेत्र म सर्चिंग अभियान म निकले सीमा सुरक्षा बल-बीएसएफ अउ डिस्ट्रिक्ट रिजर्व गार्ड-डीआरजी के संयुक्त टीम अउ माओवादी मनके बीच घलो आज मुठभेड़ होइस। ए मुठभेड़ म एक माईलोगिन के संग चार माओवादी मारे गेहे, जेखर सव बरामद कर ले गेहे। घटनास्थल ले जवान मन ह ऑटोमेटिक हथियार के संग आने माओवादी सामान बरामद करे हे। इलाका म सर्च अभियान बढ़ा दे गेहे।
केन्द्रीय गृहमंत्री अमित शाह ह एला जवान मनके बड़े सफलता बताय हे। ओमन कहिन कि छत्तीसगढ़ ‘‘नक्सलमुक्त भारत अभियान‘‘ के दिसा म आगू बाढ़त हे।
उहें, मुख्यमंत्री विष्णुदेव साय ह घलो जवान मनके साहस अउ जज्बा के सराहना करीन। श्री साय ह डीआरजी के एक जवान के सहादत म सोक जताय हे।
आईईडी-विस्फोट
इही बीच, नारायणपुर जिला के अबूझमाड़ इलाका म माओवादी मन डहार ले करे गे आईईडी ब्लास्ट म सुरक्षा बल के एक अधिकारी अउ जवान मामूली रूप ले घायल होगे हे। प्राथमिक उपचार के बाद दूनों के हालत अब सामान्य बताय जात हे। ए ब्लास्ट अबूझमाड़ इलाका म तब होइस, जब डीआरजी अउ एसटीएफ के संयुक्त टीम कांकेर अउ नारायणपुर के सीमावर्ती इलाका म नक्सल विरोधी अभियान म रिहीस।
विस-ध्यानाकर्षण
राज्य विधानसभा म आज ध्यानाकर्षण के जरिया ले भाजपा विधायक नीलकंठ टेकाम ह ग्राम सभा मन ल सामुदायिक वन संसाधन अधिकार के तहत वन भूमि प्रदाय म नियम के अनदेखी करे के मुद्दा उठईन। ओमन ह कहिन कि कोंडागांव जिला म वन भूमि प्रदाय म नियम के अनदेखी के कारण जगह-जगह लड़ाई के स्थिति होवत हे। ओमन ह कहिन कि बस्तर के माचकोट अउ सरगुजा के दूरदराज के ग्रामीण क्षेत्र मन म फर्जी तरीका ले ग्राम सभा के आयोजन अउ वन क्षेत्र के आवंटन करे गेहे।
जवाब म आदिम जाति विकास मंत्री रामविचार नेताम ह कहिन कि कहीं ले भी फर्जी ग्रामसभा के सिकायत नइ मिले हे। ओमन कहिन कि नियम के तहत ही वन भूमि के आवंटन करे गेहे। श्री नेताम ह कहिन कि ओमन अधिकारी मन ल निरदेस देहे कि ग्रामीण मनके आपसी लड़ाई ल सुलझाय के प्रयास करयं।
ध्यानाकर्षण के जरिया ले ही नेता प्रतिपक्ष डॉक्टर चरणदास महंत ह जैव विविधता ले जुड़े मुद्दा ल उठईन। ओमन कहिन कि जैव विविधता ल लेके प्रदेस म कोनांं काम नइ होय हे। उहें, भाजपा विधायक अजय चंद्राकर ह वेटलैंड के अंदर अनाधिकृत कब्जा ल लेके सवाल करीन। एमा विधानसभा अध्यक्ष डॉक्टर रमन सिंह ह विभागीय मंत्री केदार कश्यप ल जैव विविधता म विशेषज्ञ मन संग कार्यशाला कराय के निरदेस दीन।
जवाब म श्री कश्यप ह कहिन कि जैव विविधता ल लेके सरकार गंभीर हे। ओमन ह बतईन कि बारह हजार ले जादा स्थानीय निकाय मन म जैव विविधता पंजी तैयार करे जा चुके हे। ग्राम पंचायत अउ वेटलैंड जघा म घलो काम होवत हे। ओमन कहिन कि अवइया दिन म सबो विधायक मन बर ए बिसय म एक कार्यशाला के आयोजन करे जाही, जेमा विशेषज्ञ मन ल बुलाय जाही।
विधानसभा-विधेयक
श्रम मंत्री लखनलाल देवांगन ह छत्तीसगढ़ श्रम कानून संसोधन अउ विविध प्रावधान विधेयक ल आज सदन के पटल म राखीन।
उहें, सहकारिता मंत्री केदार कश्यप ह घलो आज सदन म छत्तीसगढ़ सहकारी सोसायटी संशोधन विधेयक पेस करीन।
प्रधानमंत्री-बिलासपुर
प्रधानमंत्री नरेन्द्र मोदी तीस मार्च के बिलासपुर जिला के प्रवास म रइही। प्रधानमंत्री के दौरा ल लेके उपमुख्यमंत्री अरूण साव ह काली मोहभठ्ठा म अधिकारी मनके बइठका लेके तैयारी के समीक्षा करीन। श्री साव ह पच्चीस ले उनतीस मार्च तक जिला म विशेष स्वच्छता अभियान चलाय के निरदेस दीन। ओमन ह स्वच्छता अभियान म नव-निर्वाचित पार्षद, पंच, सरपंच अउ जनप्रतिनिधिम मन ल सहभागी बनाय बर कहिन। श्री साव ह सभास्थल अउ एखर तीर बनत पार्किंग स्थल म करे जात तैयारी के जायजा लीन अउ अधिकारी मन ल जरूरी दिसा-निरदेस दीन।
खुड़िया जलाशय-पानी
उपमुख्यमंत्री अरूण साव ह जल संसाधन विभाग के अधिकारी मन ल मुंगेली जिला के खुड़िया जलाशय ले जल्दी पानी छोड़े के निरदेस देहे। एखर ले ग्रामीण मन ल निस्तारी के संग खड़ी फसल ल बचाय म घलो मदद मिलही।
जानबा के मुताबिक लोरमी थाना क्षेत्र के ग्रामीण, जनप्रतिनिधि अउ किसान मनके प्रतिनिधिमंडल ह काली बिलासपुर म उपमुख्यमंत्री ले भेंट कर खुड़िया जलाशय ले निस्तारी बर पानी छोड़े के आग्रह करे रिहीन। श्री साव ह एखर उपर संज्ञान लेवत हुए अधिकारी मन ले कहिन कि खुड़िया जलाशय ले जल्दी पानी छोड़े जाय।
भाजपा-बैठक
रायपुर के कुशाभाऊ ठाकरे परिसर म काली इक्कीस मार्च के भारतीय जनता पार्टी के पदाधिकारी मनके बइठका होही। ए बइठका म प्रदेस भाजपा अध्यक्ष किरण सिंह देव, मुख्यमंत्री विष्णुदेव साय अउ प्रदेस प्रभारी नितिन नबीन सामिल होही। भाजपा प्रदेस महामंत्री जगदीश रोहरा ह बतईन कि बइठका म कार्य समिति सदस्य, संभाग प्रभारी-सह प्रभारी, जिला संगठन प्रभारी-सह-प्रभारी, जिला अध्यक्ष, निवर्तमान जिला अध्यक्ष, सबो मोर्चा के प्रदेस पदाधिकारी, सबो प्रकोष्ठ के संयोजक-सह संयोजक, सबो महापौर, नगर पालिक-नगर पंचायत अध्यक्ष, सभापति, जिला पंचायत अध्यक्ष, उपाध्यक्ष अउ जनपद पंचायत अध्यक्ष घलो सामिल होही।
राज्यपाल-सहायता राशि
राज्यपाल रमेन डेका ह विश्व योग प्रतियोगिता म भाग ले बर छत्तीसगढ़ के प्रतिभागी मन ल पचास हजार रूपिया ले सहायता रासि दीन। ए प्रतिभागी मन अवइया महीना म मलेशिया म होवइया सोलहवां विश्व योग प्रतियोगिता म भारतीय दल के प्रतिनिधित्व करही। आज राजभवन म प्रतिभागी खिलाड़ी साक्षी वर्मा अउ विभांशु बंजारे के संग ओखर योग प्रशिक्षक नमेश कुमार साहू ह राज्यपाल ले मुलाकात करीन। ए दउरान श्री डेका ह दूनों प्रतिभागी मन ल पच्चीस-पच्चीस हजार रूपिया के अनुदान सहायता रासि स्वीकृत करके ओमन ल अच्छा प्रदर्सन करे बर सुभकामना दीन।
जिला पंचायत चुनाव
रायपुर जिला पंचायत चुनई म भारतीय जनता पार्टी के प्रत्याशी नवीन अग्रवाल ह जीत हासिल करे हे। ओमन ह कांग्रेस के वतन चंद्राकर ल दू वोट ले हरईन। ए चुनई म भाजपा प्रत्याशी ल नौ अउ कांग्रेस प्रत्याशी ल सात वोट मिलीस। जेखर बाद नवीन अग्रवाल ल रायपुर जिला पंचायत के अध्यक्ष पद बर निर्वाचित घोषित करे गीस।
अउ अब मौसम के हाल…
मौसम विभाग के अनुसार बंगाल के खाड़ी ले आवत नमी के कारण अवइया चौबीस घंटा के दउरान मध्य छत्तीसगढ़ के जिला म कुछ जघा म हल्का बरसा होय या गरज-चमक के संग छींटा पड़े के संभावना हे। उहें, एक-दू जघा म अंधड़ चले अउ आकाशीय बिजली गिरे के चेतावनी दे गेहे। मौसम विभाग ह प्रदेस के तापमान म कुछ गिरावट होय के संभावना जताय हे।