केंद्र सरकार ह विश्व दृश्य-श्रव्य अउ मनोरंजन शिखर सम्मेलन-वेव्स के तहत क्रिएटर अर्थव्यवस्था बर एक अरब डॉलर के कोष के घोसना करे हे। काली नई दिल्ली म वेव्स उपर एक ठिन उच्च स्तरीय सत्र ल संबोधित करत केंद्रीय सूचना अउ प्रसारण मंत्री अश्विनी वैष्णव ह किहीन कि एक ले चार मई तक मुंबई म होवइया ए कारीकरम क्रिएटर समुदाय मन ल एक ठिन मंच दिही।
सूचना अउ प्रसारण मंत्रालय के ए सत्र के उद्देस्य वेव्स के पहिली अंतर्राष्ट्रीय समुदाय ल सामिल करना रिहीस। ए मउका म विदेश मंत्री सुब्रह्मण्यम जयशंकर ह किहीन कि वेव्स इंडिया अउ मनोरंजन उद्योग बर गोठबात, सहयोग अउ नवाचार ल बढ़ावा देबर एक ठिन बड़का मंच के रूप म काम करही।
होली-01
रंग, गुलाल अउ उछाह के तिहार होली आज प्रदेस के संगेसंग पूरा देस म जोरदरहा उछाह के संग मनाय जात हे। जम्मों कोति लोगन मन ह रंग के मस्ती म डूबे रिहीन। जघा-जघा नगाड़ा के थाप अउ फाग गीत सुघ्घर ढंग ले सुनाई देत हे। गांव-गांवतरी के संगेसंग सहर मन म घलो जम्मों जघा बिहनिया ले होली के टोली मन घूम-घूम के एक-दूसर ल रंग अउ गुलाल लगाके बधाई दीन। आज बिहनिया लइका, जवान अउ सियान मन चउक-चउराहा म अवइया-जवइया मनखे मन उपर पिचकारी अउ रंग गुलाल लगाके होली के आनंद म झूमिन।
ऐति, कतकोन सामाजिक संस्था मन ह पर्यावरण जागरूकता के चलत मनखे मन ल सूखा होली खेले के बात करीन। संस्था के कार्यकर्ता अउ पदाधिकारी मन गुलाल लगाके एक-दूसर ल होली के बधाई दीन।
छत्तीसगढ़ म बस्तर ले सरगुजा तक होली के आने-आने तरीका के रंग देखे बर मिलिस। बस्तर म हर बार जइसन होली म जनजातीय संस्कृति अउ परंपरा मनके आने-आने झलक देखे बर मिलीस। बस्तर म होली के सुरूवात दंतेवाड़ा के फागुन मेला ले होथे। ए परंपरा के मुताबिक साफ माटी अउ पलास के फूल ले बने रंग ल दंतेश्वरी देवी अउ, मेला म प्रतीकात्मक रूप ले आय जम्मों देवी-देवता ल चढ़ाय जाथे। ए मउका म सांकेतिक होली के दिया बारे जाथे। उहें, फागुन मेला के दूसर दिन बस्तर के पहिली होली के दिया माड़पाल म बारे जाथे। प्रदेस म सुरक्षा बेवस्था के तगड़ा बेवस्था करे गेहे।
होली-02
मानता हे कि बस्तर म पूर्व राजपरिवार के संग पहिली होली इंहे, जलाय जाथे। ए परंपरा आज घलो चलत हे। माड़पाल म होलिका दहन करे के बाद जगदलपुर म मावली मंदिर, भैरमदेव मंदिर अउ जगन्नाथ मंदिर म एके संघरा होलिका दहन करे जाथे। रंग, अबीर अउ गुलाल के संग पारंपरिक लोक नृत्य , नाटक, ढोल मांदर अउ नंगाड़ा के गुंज के बीच लोगन मनके सामूहिक उछाह ए परब ल खास बना देथे। जानबा के मुताबिक बस्तर म होली के तिहार धार्मिक परंपरा मनके भाग हरय अउ इंहा के जादा परब प्रकृति के संगेसंग देवी-देवता मन उपर समर्पित हे।
ऐति, रईपुर म सुरक्षा के चाक-चौबंद बेवस्था करे गेहे। जघा- जघा पुलिस मनके टीम तैनात हे। सहर म चेकिंग प्वाइंट लगाके गाड़ी मनके जांच करे जात हे। नसा करके गाड़ी चलइया मन उपर कार्रवाई करे जात हे। नगर के जम्मों थाना क्षेत्र मन म सांति बनाय बर पुलिस के संगेसंग नगर सेना के जवान मन ल घलो तैनात करे गे रिहीस।
होली-03
राष्ट्रपति द्रौपदी मुर्मू, उपराष्ट्रपति जगदीप धनखड़, प्रधानमंत्री नरेंद्र मोदी अउ सूचना प्रसारण मंत्री अश्विनी वैष्णव ह होली तिहार के देस के लोगन मन ल सुभकामना दे हवय।
त उहें, छत्तीसगढ़ के राज्यपाल रमेन डेका अउ मुख्यमंत्री विष्णुदेव साय ह प्रदेस के लोगन मन ल होली के बधाई अउ सुभकामना देहे।
आज होली तिहार के मउका म मुख्यमंत्री विष्णुदेव साय ह अपन गृहग्राम जशपुर जिला के बगिया म गांव के लोगन मन के संग होली तिहार के परब धूमधाम ले मनाइन। ए मउका म उंखर गोसाइन कौशल्या साय घलो साथ म रिहीन।
निर्वाचन आयोग-सुझाव
भारत निर्वाचन आयोग ह चुनावी कामकाज ल नियम के मुताबिक करवाय बर आने-आने पार्टी अध्यक्ष अउ बड़का नेता मन के संग गोठबात करे के बात केहे हे। एखर बर आयोग ह जम्मों राष्ट्रीय अउ राज्य स्तरीय राजनीतिक दल मन ले तीस अप्रैल तक सुझाव मांगे हे। राजनीतिक दल मन ल जारी एक ठिन चिट्ठी म आयोग ह यहू प्रस्ताव राखे हे, पार्टी अध्यक्ष अउ बड़का नेता मन के संग मिलके बेरा-बेरा म बात करे जाही। जेखर ले चुनावी कामकाज बने ढंग ले हो सकही।
पीबी-शब्द एक वर्ष पूरा
प्रसार भारती-प्रसारण अउ प्रसार बर साझा दृश्य-श्रव्य-पीबी शब्द सेवा के इही महिना एक बछर पूरा होवइया हे। ए सेवा ल एक साल बर अउ बढ़ा दे गेहे। प्रसार भारती ह किहीन कि शब्द के निसुल्क उपयोग मार्च दू हजार छब्बीस तक जारी रइही। एखर ले मीडिया संगठन बिसेस रूप ले छोटे संगठन मन ल फायदा मिलही। सूचना अउ प्रसारण मंत्रालय ह किहीन कि शब्द के तीर एक हजार पांच सौ ले जादा रिपोर्टर, संवाददाता अउ स्ट्रिगर्स के तगड़ा नेटवर्क हवय। एखर ले बने ढंग ले कवरेज करे बर चौबीसों घंटा काम करइया साठ झिन समर्पित संपादन डेस्क के मदद मिलत हे। मंत्रालय ह किहीन कि पूरा देस के समाचार पोर्टल शब्द के माध्यम ले दूरदर्शन अउ आकाशवाणी के विस्वसनीय भंडार के परयोग कर सकही। शब्द उपर कृषि, प्रौद्योगिकीय, विदेसी मामला अउ राजनीतिक घटनाक्रम जइसन पचास ले जादा समाचार श्रेणी मन ल कवर करइया एक हजार ले जादा समाचार रोजेच जम्मों प्रमुख भारतीय भाषा मन म पेस करे जाथे।
जोरा नाला कंट्रोल स्ट्रक्चर
जोरा नाला कंट्रोल स्ट्रक्चर म पानी ल रोक के इंद्रावती नदी म छोड़े गेहे। ओड़िसा सरकार के हामी भरे के बाद स्ट्रक्चर म रेत के बोरी डालके पानी के बहाव ल रोके गीस, जेखर ले इंद्रावती नदिया म पानी के बढ़ोत्तरी होय हे। ए बारे म जल संसाधन मंत्री केदार कश्यप ह केंद्रीय जल सक्ति मंत्री सी.आर.पाटिल ले इंद्रावती नदिया के जल संकट के समाधान के बारे म गोठबात करीन। एखर उपर केंद्रीय मंत्री ह छत्तीसगढ़ अउ ओड़िसा के मुख्यमंत्री मन ल समस्या के निपटारा बर किहीन। एखरे सेति इंद्रावती नदिया म जादा पानी आय सुरू होय हे। एखर अलावा इंद्रावती नदिया के अपस्ट्रीम अउ डाउनस्ट्रीम म जमे रेत ल हटाय के काम सुरू हो गेहे, जउन ह अप्रैल के पहिली हफ्ता तक पूरा हो जही।
साइबर ठगी-आरोपी गिरफ्तार
कांडागांव जिला म साइबर ठगी के मामला म तीन झिन आरोपी मन ल गिरफ्तार करे गेहे। पुलिस ले मिले जानबा के मुताबिक सोना दुकान के संचालक ह अपन बैंक खाता ल साइबर ठगी करइया मन ल किराया म दे रिहीस। ए खाता म ठगी के करीबन निन्यानवे लाख रूपिया ऐति-ओति होय हे। सिकायत मिले उपर पुलिस ह तीन झिन आरोपी मन ल गिरफ्तार करके न्यायिक रिमांड म जेल भेज दे गेहे।
मास्टर्स लीग क्रिकेट
अंतर्राष्ट्रीय मास्टर्स लीग क्रिकेट ट्वेंटी-ट्वेंटी टूर्नामेंट के तहत रईपुर के शहीद वीरनारायण सिंह अतंर्राष्ट्रीय क्रिकेट स्टेडियम म काली खेले गे सेमिफाइनल मुकाबला म इंडिया मास्टर्स ह आस्ट्रेलिया मास्टर्स ल चौरानवे रन ले हराके फाइनल म पहुंच गेहे। इंडिया मास्टर्स ह पहिली बल्लेबाजी करत बीस ओवर म सात विकेट के नकसान म दू सौ बीस रन बनाइस। जवाब म आस्ट्रेलिया के टीम ह एक सौ छब्बीस रन बना पाइस। भारत कोति ले सचिन तेंदुलकर के बयालिस रन त, युवराज सिंह ह अपन अर्धशतकीय पारी खेल के जीत देवाइन।
उहें, दूसर सेमि फाइनल म आज श्रीलंका मास्टर्स के सामना वेस्टइंडीज मास्टर्स ले होही। ए मैच संझा साढ़े सात बजे सुरू होही।
सीबीएसई-परीक्षा
केंद्रीय माध्यमिक शिक्षा बोर्ड-सीबीएसई ह किहीन हे कि काली शनिच्चर के होवइया कक्षा बारहवीं के परीक्षा देस के आने-आने हिस्सा मन म होली के सेति तय बेरा म ही राखे जाही। बोर्ड ह एक बयान म किहीन कि हिंदी कोर अउ हिंदी वैकल्पिक बिसय बर कक्षा बारहवीं के परीक्षा निर्धारित तिथि म ही आयोजित करे जाही, जउन विद्यार्थी काली पंद्रह मार्च के परीक्षा म सामिल नइ हो पाय हे, ओला राष्ट्रीय या अंतर्राष्ट्रीय स्तर के खेल आयोजन म भाग लेवइया छात्र मन बर राखे गे बिसेस परीक्षा म सामिल होय के मउका दे जाही।