मंत्रिमंडल ह छत्तीसगढ़ नक्सलवाद उन्मूलन नीति-दू हजार तेईस के जघा म छत्तीसगढ़ नक्सलवादी आत्मसमर्पण-पीड़ित राहत अउ पुनर्वास नीति-दू हजार पच्चीस ल मंजूरी दे हे। ए नीति के तहत आत्मसमर्पण करइया माओवादी मन ल आर्थिक मदद, पुनर्वास, शिक्षा, रोजगार अउ सुरक्षा जइसन सुविधा दे जाही। उहें, मंत्रिमंडल ह राज्य म जल संसाधन मनके सुघ्घर प्रबंधन अउ वैज्ञानिक योजना तियार करे बर राज्य जल सूचना केंद्र के गठन करे के घलो फइसला लेहे। एखर बर केंंद्रीय जल सक्ति मंत्रालय ले एमओयू करे जाही। जल संसाधन विभाग के नौ जलासय मनके सुधार काम बर पांच सौ बाईस करोड़ रूपिया ले जादा के कर्जा के मंजूरी केंद्र सरकार के माध्यम ले मिलही। एमा, मनियारी, घोंघा टैंक, दुघावा, किंकारी, सोंढूर, मूरूमसिल्ली, रविशंकर सागर परियोजना, न्यू रूद्री बैराज अउ पेण्ड्रावन टैंक सामिल हे।
मंत्रिपरिषद ह बैठक म छत्तीसगढ़ राज्य औद्योगिक सुरक्षा बल विधेयक, सहकारी सोसाइटी संशोधन विधेयक अउ निजी विश्वविद्यालय संशोधन विधेयक के प्रारूप के घलो अनुमोदन करीन।
राष्ट्रपति-छत्तीसगढ़ी दौरा
राष्ट्रपति द्रौपदी मुर्मू के चौबीस मार्च के छत्तीसगढ़ दउरा प्रस्तावित हे। राष्ट्रपति विधानसभा के रजत जयंती बछर के मउका म राष्ट्रपति के प्रबोधन कारीकरम राखे जाही। इही कड़ी म मुख्य सचिव अमिताभ जैन ह मंत्रालय म आज उच्च स्तरीय बइठका लीन। वीडियो कॉन्फ्रेंसिंग के माध्यम ले राखे गे ए बइठका म मुख्य सचिव ह जम्मों अधिकारी मन ल जरूरी बेवस्था सुनिश्चित करे के निरदेस दीन हे।
माओवादी-आत्मसमर्पण
बीजापुर जिला म आज सत्रह झिन माओवादी मन ह पुलिस के आगू आत्मसमर्पण करीन हे। ए माओवादी मन उपर कुल चौबीस लाख रूपिया के इनाम घोसित रिहीस। ए माओवादी मन म नक्सली कमांडर दिनेश मोडियाम अउ उंखर पत्नी ज्योति ताती घलो सामिल हे। एखर उपर गंगालूर क्षेत्र म कतकोन हत्या मनके संघरा आने घटना मन म सामिल रेहे के आरोप हे। आत्मसमर्पित माओवादी एड़समेटा के स्थानीय माओवादी संगठन के सक्रिय सदस्य बताय जात हे। ए माओवादी मन ल शासन के पुनर्वास नीति के पच्चीस-पच्चीस हजार रूपिया के प्रोत्साहन रासि दे गीस।
ईडी-चालान
शराब घोटाला मामला म प्रवर्तन निदेशालय-ईडी ह काली रायपुर के बिसेस अदालत म तीन हजार आठ सौ इकचालीस पन्ना के चालान पेस करीन हे। एमा जेल म बंद पूर्व आबकारी मंत्री कवासी लखमा समेत इक्कीस झिन ल आरोपी बनाय गेहे। ए मामला म अवइया सुनवाई बाईस मार्च के होही।
इसरो-उपग्रह प्रक्षेपण
भारतीय अंतरिक्ष अनुसंधान संगठन इसरो ह स्पेस डॉकिंग एक्सपेरिमेंट मिशन के तहत दू उपग्रह ल अलग करे के प्रक्रिया सफलता के संग पूरा कर लेहे। अंतरिक्ष के क्षेत्र म ए देस के एक बिसेस उपलब्धि आय। केंद्रीय विज्ञान अउ प्रौद्योगिक मंत्री जितेंद्र सिंह ह वैज्ञानिक मन ल ए सफलता बर बधाई दीन हे। अपन सोसल मीडिया पोस्ट म ओमन किहीन कि ए सफलता भारतीय अंतरिक्ष स्टेसन, चंद्रयान-चार अउ गगनयान समेत भविष्य के महत्वाकांक्षी योजना मन के सुचारू संचालन के रद्दा प्रशस्त करही।
होलिका दहन
प्रेम, भाईचारा अउ रंग के तिहार होली काली मनाय जाही। एखर पहिली आज रतिहा बुराई म अच्छाई के जीत के प्रतीक के रूप म होलिका दहन करे जाही। राजधानी रायपुर समेत प्रदेस के आने-आने जिला मन म घलो होलिका दहन के तियारी पूरा कर ले गेहे। ए बखत जागरूकता के सेति ले कतकोन जघा मन म लकड़ी के जघा म कंडा के होली जलाय के तियारी करे गेहे। प्रशासन ह मुहुर्त के मुताबिक आज रतिहा साढ़े 12 बजे तक करे के निरदेस दे हे। पुलिस प्रशासन ह होली के दौरान अस्त्र-शस्त्र के उपयोग अउ प्रदर्सन के संगेसंग डीजे अउ मुखौटा मन म रोक लगाय हे।
उहें, तेज गाड़ी अउ सराब पीके गाड़ी चलइया मनखे मन उपर कड़ा कार्रवाई करे जाही।
विशेषज्ञ डॉक्टर मन ह रंग के ए तिहार होली ल सावधानी अउ सुरक्षा के संग मनाय के अपील करीन हे। ओमन किहीन कि कीसम-कीसम के रोटी-पीठा के ए तिहार आय ए दौरान खान-पान म बिसेस सावधानी रखना चाही।
संगेसंग डॉक्टर मन ह बतइन कि आर्गेनिक रंग गुलाल के उपयोग करय जेखर ले शरीर ल कोनो कीसम के एलर्जी अउ नुकसान नइ होवय। होलिका दहन म अगरू, आम, साल, नीम के सूखा डारा अउ कपूर जइसन आयुर्वेदिक जड़ी-बूटी ल हवन के रूप म करना चाही, जेखर ले वातावरण संक्रमित होय ले बांच सकय।
इही बीच, राज्यपाल रमेन डेका अउ मुख्यमंत्री विष्णुदेव साय ह प्रदेसवासी मन ल रंग अउ उत्साह के परब होली तिहार के सुभकामना दीन हे। मुख्यमंत्री श्री साय ह किहीन कि होली सिरिफ रंग के तिहार नही, बल्कि ए तिहार हमर जीवन म प्रेम, सौहार्द अउ भाईचारा के रंग लेके आथे।
राज्यपाल रमेन डेका ले आज राजभवन म मुख्यमंत्री विष्णुदेव साय ह भेंट करीन अउ होली के सुभकामना दीन संगेसंग राज्य हित ले जुड़े बिसय उपर गोठबात घलो करीन।
अम्बेडकर अस्पताल-निर्देश
स्वास्थ्य मंत्री श्याम बिहारी जायसवाल के निरदेस म होली के तियार ल ध्यिन म राखत हुए अंबेडकर अस्पताल के चिकित्सा बेवस्था ल सुचारू बनाय राखे के बेवस्था करे गेहे। अस्पताल अधीक्षक डॉक्टर संतोष सोनकर ह डॉक्टर मन, नर्सिंग स्टाफ, पैरामेडिकल स्टाफ अउ आने संबंधित विभाग मन ल अलर्ट मोड म रेहे बर निरदेस दीन हे।
होली के दउरान कोनो कीसम के दुर्घटना या आपातकालीन डॉक्टर स्थिति के संभावित मामला मन ल देखत हुए आपात चिकित्सा सेवा मन ल चौबीसों घंटा चालू रखे के निरदेस दे गेहे। होली के दिन काली चौदह मार्च के सरकारी छुट्टी होय के सेति ओपीडी बंद रइही, फेर इमरजेंसी सेवा पहिली असन चौबीसो घंटा चालू रइही।
दुर्घटना
बेमेतरा जिला म आज होय एक सड़क दुर्घटना म तीन झिन लइका मनके मउत होगे। सिटी कोतवाली प्रभारी राकेश साहू ह बतइन हे कि सैगोना गांव के तीर एक कार राष्ट्रीय राजमार्ग क्रमांक-तीस म अंतेतंते होके पलट गे। एमा ग्यारा झिन मनखे सवार रिहीन, जेमा तीन झिन मनखे के मउकाच म मउत होगे। आठ झिन घायल मन ल बेमेतरा जिला अस्पताल लाय गीस, जिहां ले प्राथमिक उपचार के बाद ओमन ल रायपुर के अंबेडकर अस्पताल म रिफर कर दे गेहे। ए परिवार रायपुर सिवनी ले पिपरिया तिहार मनाय बर जावत रिहीस हे। इही दउरान तेज रफ्तार कार के टायर फट गे, जेखर चलत ओ ह अंतेतंते होके नहर म जाके गिरगे।
उहें, गरियाबंद जिला के बारूका गांव के तीर एक ठिन कार अंतेतंते होके पेड़ ले टकरा गे। ए हादसा म एक मनखे के मउकाच म ही मउत होगे। उहें, चार झिन आने लोगन घायल होगे हे। घायल मन ल गरियाबंद जिला अस्पताल म प्राथमिक उपचार के बाद रायपुर रिफर करे गेहे।
अउ अब थोरकुन समाचार सार म –
– नारायणपुर जिला म सुरक्षा बल मन ह अमदई खदान निको कंपनी के डंप एरिया म पांच किलो के कुकर बम बरामद करे हे।
– छत्तीसगढ़ व्यवसायिक परीक्षा मंडल डहार ले तेईस मार्च के मत्स्य निरीक्षक भर्ती परीक्षा के आयोजन करे जाही। अभ्यर्थी आज ले व्यापम के आधिकारिक वेबसाइट ले अपन प्रवेस पत्र डाउनलोड कर सकत हे।
– मुंगेली जिला के समाजसेवी उमाशंकर कश्यप ल बाल अधिकार अउ संरक्षण के क्षेत्र म सुघ्घर काम बर गोल्डन बुक ऑफ वर्ल्ड रिकॉर्ड्स डहार ले सम्मानित करे गेहे।
अउ
– कोंडागांव जिला के साइबर सेल के टीम ह अभियान चलाके एक महिना म गंवाय एक सौ चौहत्तर मोबाइल ल बरामद करे हे। पुलिस अधीक्षक कार्यालय म राखे गे कारीकरम म मालिक मन ल उंखर मोबाइल लहुटाय गीस।