प्रधानमंत्री नरेन्द्र मोदी ह आज गुजरात के जामनगर म वन्यजीव संरक्षण, बचाव अउ पुनर्वास के अनूठा पहल ‘वनतारा‘ के उद्घाटन करीन। ए दउरान प्रधानमंत्री ह अनंत अंबानी अउ उंखर टीम के परयास के सराहना करत किहीन कि वनतारा पारिस्थितिकी स्थिरता अउ वन्यजीव कल्याण ल बढ़ावा देवत जानवर मन बर सुरक्षित पर्यावास देथे।
प्रधानमंत्री ह सोशल मीडिया प्लेटफॉर्म एक्स म अलग-अलग पोस्ट म लिखीन कि वनतारा जइसे प्रयास वाकई सराहनीय हरय, ए हमर सदियों पुराना लोकाचार के जीवंत उदाहरण हरय कि हमन ओ जीव-जन्तु के घलो रक्षा करथन जउन मन ए पृथ्वी म हमर संग रहिथे।
प्रधानमंत्री-नमो ऐप
प्रधानमंत्री नरेन्द्र मोदी ह नागरिक मन ले नमो ऐप ओपन फोरम म अउ जादा प्रेरक जीवन यात्रा मन ल साझा करे के आग्रह करीन हे। सोशल मीडिया पोस्ट म प्रधानमंत्री ह बतईन कि नमो ऐप म साझा करे गे प्रेरक यात्रा मन ले कुछेक महिला मन ल आठ मार्च के महिला दिवस के मउका म प्रधानमंत्री के डिजिटल सोशल मीडिया अकाउंट म एखर संचालन करे बर चुने जाही।
सीईओ-सम्मेलन
मुख्य निर्वाचन आयुक्त ज्ञानेश कुमार ह जम्मों मुख्य निर्वाचन अधिकारी, जिला निर्वाचन अधिकारी अउ बूथ स्तर के अधिकारी मन ल जम्मों वैधानिक दायित्व ल पारदर्शिता अउ लगन ले पूरा करे के आह्वान करीन हे। श्री ज्ञानेश कुमार ह नई दिल्ली म आज जम्मों राज्य अउ केन्द्रसासित प्रदेस के मुख्य निर्वाचन अधिकारी मनके दू दिन सम्मेलन ल संबोधित करीन।
विस-बहिर्गमन
छत्तीसगढ़ विधानसभा म बजट सत्र के छठवां दिन महतारी वंदन योजना ल लेके जमके हंगामा होइस। प्रश्नकाल के दउरान कांग्रेस विधायक उमेश पटेल ह हितग्राही मनके संख्या म गिरावट ल लेके सवाल करीन। इही मुद्दा म विपक्षी सदस्य मन पेंशनधारी महिला मन ल योजना के फायदा नइ मिले के आरोप घलो लगईन। विपक्ष के सवाल मनके जवाब देवत विभागीय मंत्री लक्ष्मी राजवाड़े ह मानीन कि हितग्राही मनके संख्या म कमी आय हे। ओमन बतईन कि हितग्राही के मृत्यु होय, फायदा छोड़े अउ दू आवेदन के प्रकरण या अपात्र होय के सेती अइसे होय हे। मंत्री के जवाब ले असंतुष्ट विपक्षी सदस्य मन विधानसभा ले बहिर्गमन कर दीन।
सदन म काली वित्तीय बछर दू हजार पच्चीस-छब्बीस बर पेश करे गे बजट उपर आज चरचा सुरू होइस। चर्चा के सुरूआत कांग्रेस विधायक उमेश पटेल ह करीन। ए दउरान वित्तमंत्री ओ.पी. चौधरी सदन म मौजूद नइ रिहीस, जेमा नेता प्रतिपक्ष डॉक्टर चरणदास महंत ह नाराजगी जतईन। डॉक्टर महंत ह कहिन कि वित्तमंत्री के बजट उपर चर्चा होवत हे, फेर खुदे वित्तमंत्री सदन म मौजूद नइ हे। इही मुद्दा म विपक्षी सदस्य मन सदन ले बहिर्गमन कर दीन। एखर बाद विधानसभा अध्यक्ष ह विधानसभा के कार्रवाई पांच मिनट बर स्थगित कर दीन। इही बीच, वित्तमंत्री ओपी चौधरी के सदन म पहुंच के बाद बजट म सामान्य चर्चा सुरू होइस। एमा सत्तापक्ष अउ विपक्ष के सदस्य मन सामिल होइन। बजट म सामान्य चर्चा काली घलो जारी रिही।
विस-राशनकार्ड/धान खरीदी
विधानसभा म आज राशनकार्ड अउ धान खरीदी म अनियमितता के मुद्दा गूंजीस। भाजपा विधायक सुशांत शुक्ला ह बेलतरा विधानसभा क्षेत्र म एपीएल ले बीपीएल म बदले गे राशनकार्ड के मुद्दा उठावत आरोप लगईन कि संतावन बीपीएल कार्ड अइसे मनखे मन ल जारी कर दे गेहे, जउन मन सक्षम हे अउ ओमन कभू आवेदन घलो नइ देहे। जवाब म खाद्यमंत्री दयालदास बघेल ह कहिन कि बछर दू हजार बाईस ले दू हजार पच्चीस तक कोनों भी एपीएल कार्ड ल बीपीएल म नइ बदले गेहे। ओमन किहीन कि यदि ए संबंध म कोनों साक्ष्य प्रस्तुत करे जात हे, त सरकार जांच कराही।
उहें, कांग्रेस विधायक इंद्र साव ह धान खरीदी म अमानक बारदाना के इस्मेमाल उपर सवाल पूछीन। ओमन मांग करीन कि ए मामला म दोसी मनके खिलाफ कार्रवाई करे जाय। एमा नेता प्रतिपक्ष चरणदास महंत ह किहीन कि ओमन खुद जाके धान खरीदी केन्द्र मनके जांच करे हे अउ सरकार सदन ल गुमराह करत हे। एमा खाद्य मंत्री दयालदास बघेल ह यहू मामला के जांच कराय के बात किहीन।
सिक्सलेन गड़बड़ी-एसडीएम निलंबित
राज्य सरकार ह रायपुर ले विशाखापट्टनम तक बनने वाले सिक्सलेन ग्रीन कॉरीडोर बर जमीन अधिग्रहण म गड़बड़ी करे के मामला म अभनपुर के तत्कालीन एसडीएम निर्भय साहू ल निलंबित कर देहे। नियमानुसार सिक्सलेन रोड के भूमिअधिग्रहण बर बत्तीस प्लाट मन बर पैंतीस करोड़ रूपिया के मुआवजा देना रिहीस, लेकिन प्रतिबंध के बावजूद एसडीएम ह ओला एक सौ बयालीस टुकड़ा म बांट के दू सौ अड़तालीस करोड़ रूपिया के मुआवजा दे दीस। एखर बाद अठहत्तर करोड़ रूपिया के क्लेम कर दीस। ए मुआवजा प्रकरण म दू पटवारी अउ एक तहसीलदार ल पहिली ही निलंबित करे जा चुके हे।
बतादन कि रायपुर ले विशाखापट्टनम के बीच दूरी कम करे बर पच्चीस हजार करोड़ रूपिया के लागत ले चार सौ चौंसठ किलोमीटर लंबा सिक्सलेन एक्सप्रेस-वे बनाय जात हे। छत्तीसगढ़ म एखर तहत एक सौ चौबीस किलोमीटर सड़क मार्ग बनाय जाही।
ग्रामीण हत्या माओवादी-मुठभेड़
सुकमा जिला म माओवादी मन मुखबिरी के सक म पाछु रतिहा एक ग्रामीण के हत्या कर दीन। मृतक ग्रामीण के नाम कलमू हिड़मा बताय जात हे, जउन चिंतागुफा थाना अंतर्गत पेंटापाड़ गांव के रहवासी रिहीस। घटना के बाद मउका म पहुंचे पुलिस ह ग्रामीण के सव ल पोस्टमार्टम बर भेज देहे। पुलिस घटना के जांच म जुट गेहे।
ऐति, धमतरी जिला के खल्लारी थाना क्षेत्र म काली पुलिस अउ माओवादी मनके बीच मुठभेड़ होइस। मिले जानकारी के अनुसार जिला के मांदागिरी के जंगल म बड़का संख्या म माओवादी मनके मौजूदगी के सूचना मिले के बाद डिस्ट्रिक्ट रिजर्व गार्ड-डीआरजी के टीम गश्त बर निकले रिहीस। ए दउरान पुलिस अउ माओवादी मनके बीच करीबन आधा घंटा तक मुठभेड़ होइस। पुलिस ह ए मुठभेड़ म दू ले तीन माओवादी मनके घायल होय के आसंका जताय हे। मुठभेड़ के बाद सुरक्षा बल ह माओवादी मन कोति ले बनाय गे अस्थाई कैम्प ल ध्वस्त कर दीन।
आईटी-छापा
आयकर विभाग के टीम ह आज रामागु्रप अउ रामा स्टील के दस ठिकाना म दबिस दीस। आयकर विभाग के अलग-अलग टीम रायपुर म विधानसभा रोड स्थित रामा ग्रुप के दू परिसर के अलावा जगदलपुर अउ मध्यप्रदेश के सतना स्थित कई ठिकाना म जांच बर पहुंचीस। ए टीम म मध्यप्रदेश के आयकर अधिकारी मन संग छत्तीसगढ़ के अधिकारी घलो सामिल हे।
दुर्घटना
सारंगढ़-बिलाईगढ़ जिला म सरसीवां करा आज एक तेज रफ्तार यात्री बस अनियंत्रित होके पलट गीस। ए घटना म कई झिन यात्री घायल होय हे, जेमा लइका मन घलो सामिल हे। घायल मन म छह झिन के हालत गंभीर बताय जात हे। घायल मनके इलाज सरसीवां स्थित स्वास्थ्य केन्द्र म चलत हे। ए बस सरायपाली ले सरसीवां कोति जात रिहीस।
राज्य स्तरीय महिला मड़ई
राजधानी रईपुर के साईंस कॉलेज मैदान म आज ले राज्य स्तरीय महिला मड़ई के आयोजन करे जात हे। अंतर्राष्ट्रीय महिला दिवस म आठ मार्च तक आयोजित होइवया महिला मड़ई के थीम ‘‘सशक्त महिला-समृद्ध महिला‘‘ राखे गेहे। महिला मड़ई म प्रदेस के महिला स्व-सहायता समूह डहार ले उत्पादित जिनीस के प्रदर्शनी लगाय गेहे अउ ओखर विक्रय करे जात हे। एखर अलावा स्थानीय महिला उद्यमी अउ महिला मन ल आगू बाढ़े के अवसर देके उद्देश्य ले पंजीकृत महिला उद्यमी, उत्पादक अउ स्टार्ट-अप ल घलो स्टॉल उपलब्ध कराय जात हे। प्रदर्शनी बिहनिया बारह बजे ले रात दस बजे तक खुला रइही।
ग्राम पंचायत-महिला
केन्द्रीय पंचायत राज मंत्रालय काली नई दिल्ली म एक ठिन राष्ट्रीय सम्मेलन म महिला अनुकूल ग्राम पंचायत मॉडल के सुरूआत करही। ए पहल मंत्रालय के अंतर्राष्ट्रीय महिला दिवस समारोह के एक हिस्सा हरय। ए पहल के उद्देश्य हरेक जिला म कम से कम एक महिला अनुकूल ग्राम पंचायत बनाना हे।