छत्तीसगढ़ विधानसभा के बजट सत्र के तीसरइया दिन काली राज्यपाल के अभिभाषण म धन्यवाद प्रस्ताव उपर चर्चा सुरू होही। विधानसभा अध्यक्ष डॉक्टर रमन सिंह ह सदन म बतइन कि राज्यपाल के अभिभाषण उपर धन्यवाद प्रस्ताव म 27 अउ 28 फरवरी के चर्चा करे जाही। एखर ले पहिली, काली सदन म प्रश्नकाल अउ धियान आकर्षण सूचना के संगेसंग आने-आने सरकारी अउ विधायी कामबूता घलो निपटाय जाही।
कामकाजी महिला-छात्रावास
प्रदेस के रईपुर-बिलासपुर अउ नवा रईपुर म काम करइया माईलोगिन मन ल सुरक्षित आवास के सुविधा देवय खातिर 6 ठिन छात्रावास बनाय जाही। एखर बर केंद्रीय वित्त मंत्रालय ह बिसेस पूंजीगत सहायता योजना के तहत दू सौ दू करोड़ रूपिया के मंजूरी करीन हे। ए पइसा ले रईपुर नगर निगम डहार ले तेलीबांधा अउ टाटीबंध म ढाई-ढाई सौ सीटर अउ भैंसथान म दू सौ तेईस सीटर माईलोगिन मन बर छात्रावास बनाय जाही।
उहें, बिलासपुर के तीसरा अउ सिरगिट्टी म सी.एस.आई.डी.सी. डहार ले 448 सीटर छात्रावास अउ नवा रईपुर म नवा रईपुर अटल नगर विकास प्राधिकरण डहार ले 1 हजार सीटर छात्रावास बनाय जाही।
दुर्घटना
सरगुजा जिला के सीतापुर थाना क्षेत्र म आज होय सड़क हादसा म एकेच परिवार के चार झिन मनखे मनके मउत होगिस। फेर 7 झिन आने लोगन मन घायल होगिस हवय। मिले जानबा के मुताबिक रेवापुर-सखौली के रहइया 11 झिन लोगन मन चारपहिया गाड़ी म सवार होके सीतापुर के किलकिला शिव मंदिर गे रिहीन। लहुटे के बेरा म आज मंझनिया तकरीबन साढ़े 12 बजे राष्ट्रीय राजमार्ग नंबर- 43 म विशुनपुर गांव के तीर कंटेनर ह चारपहिया ल टक्कर मार दीस। ए हादसा म 4 झिन लोगन मनके मउकच म मउत होगिस।
उहें, 7 झिन घायल लोगन मन ल ईलाज खातिर सीतापुर के सामुदायिक स्वास्थ्य केंद्र म भर्ती कराय गे हवय। घटना के बाद गांव वाला मन कंटेनर म आग लगा दीन।
मुख्यमंत्री विष्णुदेव साय ह ए घटना म दुख जतात सरगुजा जिला प्रशासन ल घायल मनके इलाज बर सुघ्घर चिकित्सा बेवस्था देवाय के निरदेस दीन हवय।
प्रकृति परीक्षण अभियान
भारतीय चिकित्सा पध्दति राष्ट्रीय आयोग के प्रकृति परीक्षण अभियान म छत्तीसगढ़ ह राष्ट्रीय स्तर म सम्मान प्राप्त करे हे। छत्तीसगढ़ ल स्ट्राइक रेट लक्ष्य म देसभर म तीसर अउ कुल प्रकृति परीक्षण मानक मन म नौवां स्थान मिले हवय। केंद्रीय आयुष मंत्री प्रताप राव जाधव ह मुंबई म आयोजित समापन समारोह म छत्तीसगढ़ ल सम्मानित करीन। ए सम्मान अभियान के राज्य समन्वयक डॉक्टर संजय शुक्ला ह लीन। ए उपलब्धि बर मुख्यमंत्री विष्णुदेव साय अउ स्वास्थ्य मंत्री श्याम बिहारी जायसवाल ह आयुष विभाग के अधिकारी अउ करमचारी मन ल बधई दीन हवय।
आकाशवाणी-कुंभवाणी चैनल
प्रसार भारती बोर्ड के अध्यक्ष नवनीत सहगल ह किहीन हे कि आकाशवाणी ह हमेसा लोगन मन ल देस के संस्कृति ले जुड़े म अपन बिसेस भूमिका निभाय हवय। ओमन किहीन कि आकाशवाणी, लोक प्रसारक के रूप म अपन जिम्मेदारी बड़ सुघ्घर तरीका ले अपनाथे। महाकुंभ के आखिरी दिन अपन संदेस म श्री सहगल ह किहीन कि प्रसारण म आकाशवाणी के कुंभवाणी चैनल ह लोगन मन ल बड़ प्रभावित करीस हवय।
प्रसार भारती के मुख्य कार्यकारी अधिकारी गौरव द्विवेदी ह महाकुंभ के प्रयागराज म आकाशवाणी के कुंभवाणी चैनल के प्रयास के तारीफ करीन। ओमन किहीन कि आकाशवाणी ह कुंभवाणी के खबर, साक्षात्कार अउ बिसेस कारीकरम प्रदान कर एक लोक सेवा प्रसारक के रूप म अपन सुघ्घर भूमिका निभाय हवय।
एकलव्य आदर्श आवासीय विद्यालय-परीक्षा
प्रदेस म चलत एकलव्य आदर्स आवासीय विद्यालय मन म अवइया शिक्षण सत्र के चलत कक्षा छठवीं म प्रवेस देवय खातिर प्राक्चयन परीक्षा दू मार्च के होही। ए परीक्षा प्रदेस के 26 ठिन जिला मन म 151 परीक्षा केंद्र मन म आयोजित करे जाही। एखर बर लगभग 42 हजार पढ़इया लइका मन ह पंजीयन कराय हवय। ए परीक्षा बिहनिया 10 बजे ले मंझनिया 12 बजे तक होही।
अबूझमाड़ मैराथन-पंजीयन
नारायणपुर जिला म अबूझमाड़ पीस हाफ मैराथन के चौथा संस्करण के आयोजन अवइया दू मार्च के करे जाही। मैराथन म सामिल होवइया दौड़ने वाला लोगन मन के पंजीयन बर नारायणपुर स्थित बालक हाई स्कूल मैदान म काली 27 फरवरी ले 1 मार्च तक बिसेस सिविर लगाय जाही। ए सिविर म दउड़इया मन मुफ्त म अपन पंजीयन करा कसथे।
जशपुर-अवैध शराब
जशपुर पुलिस ह अवैध सराब तस्कर मनके खिलाफ कार्रवाई करत दू दिन के भीतर 3 करोड़ रूपिया के अवैध सराब जब्त करीन हवय। ए दउरान दू ठिन ट्रक समेत तकरीबन 14 हजार लीटर सराब बरामद करे गीस। ए मामला म पुलिस ह दू झिन आरोपी मन ल गिरफ्तार करीन हवय।
जिला के बड़का पुलिस अधीक्षक शशिमोहन सिंह ह बतइन कि लोरो घाट के तीर एक ठिन ट्रक के जांच के दउरान सीमेंट के बोरी मनके पाछू, छूपा के राखे गे तकरीबन 7 हजार लीटर अवैध अंग्रेजी सराब पकड़े गीस। ए मामला म ट्रक चालक ल गिरफ्तार करे गे हवय। उहें, दुलदुला थाना पुलिस ह एक ठिन ट्रक ले करीबन 7 हजार लीटर अवैध अंग्रेजी सराब बरामद करीस, जेखर कीमत करीबन ढाई करोड़ रूपिया बताय गे हवय।
महाशिवरात्रि
महाशिवरात्रि के परब आज देसभर म बड़ उछाह अउ श्रध्दा के संग मनाय जावत हे। राजधानी रईपुर समेत प्रदेस के जम्मों शिवालय मन म बिहनिया ले ही महादेव उपर पानी चढ़ाय अउ पूजा-पाठ करे खातिर श्रध्दालु मनके भारी भीड़ होवत हे। ए मउका म श्रध्दालु मन ह नंदिया मन म पुण्य स्नान घलो करीन।
उहें, गरियाबंद जिला म महानदी, पैरी अउ सोंढूर नदी मनके त्रिवेणी संगम म आयोजित राजिम कुंभकल्प मेला म आज बिहनिया हजारों लोगन मन पुण्य स्नान कर कुलेश्वर महादेव के पूजा करीन। ए मउका म नागा साधु मनके संग आने-आने अखाड़ा ले पहुंचिन, साधु-संत मन ह साही स्नान करीन। 12 फरवरी ले सुरू होय ए मेला आज सिरावत हवय।
ओति, जांजगीर-चांपा के धार्मिक नगरी खरौद म लक्ष्मणेश्वर मंदिर म आज बिहनिया ले भक्त मनके भीड़ रिहीस। आठवीं सताब्दी म बने ए मंदिर म दर्सन करे खातिर बड़ संख्या म श्रध्दालु मन पहुंचथे।
सक्ति जिला के तुर्रीधाम म घलो भगवान शिव के दर्सन खातिर भक्त मनके लंबा-लंबा कतार लगे रिहीस। तुर्रीधाम म महाशिवरात्रि के मउका म 15 दिन बर मेला लगथे।
उहें, रायगढ़ जिला के गौरीशंकर, पहाड़ स्थित शिवालय अउ निकले महादेव मंदिर मन म बिहनिया ले भक्त मन के भीड़ देखे गीस। बेलपत्र, धतुरा, दूध, दही, घी, सहद, गंगाजल ले भगवान भोलेनाथ के अभिषेक करे जावत हे।
अइसनेच, बलरामपुर जिला म राजपुर के ओकरा कोठी पत्थल स्थित शिव मंदिर म श्रध्दालु मनके भीड़ रिहीस। इंहा अखंड रामायण पाठ, भजन-कीर्तन अउ मंत्र पढ़े के संगेसंग भगवान शिव के पूजा-पाठ करे जावत हे। उहें, कई ठिन जघा मन म भंडारा घलो चलत हवय।
प्रयागराज-महाकुंभ
विश्व के सबले बड़का आध्यात्मिक अउ सांस्कृतिक समागम महाकुंभ आज महाशिवरात्रि के पावन परब म प्रयागराज म संपन्न होवत हवय। देसभर ले आय श्रध्दालु मन प्रयागराज म आज बिहनिया ले ही संगम अउ आने-आने घाट मन म डूबकी लगावत हवय। 13 जनवरी के सुरू होय महाकुंभ म अब तक 64 करोड़ 60 लाख ले जादा श्रध्दालु मन डूबकी लगा चुके हे। 144 बछर म सिरिफ एक बार होवइया दुर्लभ खगोलीय संयोग ले ए बछर महाकुंभ के महत्व अउ बड़ गे हवय।